Nyɛɛ Kase Gbali Ɔmɛ A Nɔ Hyɛmi Nɔ́ ɔ—Amos
1. Mɛni heje nɛ Amos nɔ hyɛmi nɔ́ ɔ ma nyɛ maa wo wɔ he wami ɔ?
1 Anɛ o nu he hyɛ kaa o he sui kɛ ha fiɛɛmi nítsumi ɔ akɛnɛ o yɛ sukuu tsɔ aloo o be nɔ́ ko heje ɔ lo? Ke jã a, lɛɛ Amos nɔ hyɛmi nɔ́ ɔ ma nyɛ maa wo mo he wami. Amos ji to hyɛlɔ, nɛ be komɛ hu ɔ, e ya yeɔ apaa ngɛ nihi a ngmɔ mi, se kɛ̃ ɔ, Yehowa wo lɛ he wami nɛ e ya fiɛɛ sɛ gbi ko nɛ he hia wawɛɛ. (Amos 1:1; 7:14, 15) Jã kɛ̃ nɛ ngɛ wa be nɛ ɔ mi ɔ, Yehowa ngɔɔ nihi nɛ a baa a he si kɛ tsuɔ ní. (1 Kor. 1:27-29) Mɛni ji ní kpa komɛ nɛ wa ma nyɛ maa kase ngɛ gbalɔ Amos he nɛ maa ye bua wɔ ngɛ wa sɔmɔmi nítsumi ɔ mi?
2. Mɛni heje nɛ wa ma nyɛ ma fĩ si ke waa kɛ yi mi wami kpe ngɛ wa sɔmɔmi nítsumi ɔ mi ɔ?
2 Mo Fi Si Ngɛ Yi Mi Wami Be Mi: Benɛ osɔfo Amazia nɛ jaa na bi amaga ngɛ Israel wɛtso nyɔngma nɛ ngɛ yiti je ɔ nu Amos gbami ɔ, e ngɛ kaa nɔ́ nɛ Amazia kɛ abofu de Amos ke: ‘Ho wemi ya! O ngɛ wa nya gbae! Wa ngɛ wa jami momo!’ (Amos 7:12, 13) Amazia ya plɛ munyuhi nɛ Amos ɔ tu ɔ hɛ mi kɛ tsɔɔ Matsɛ Yeroboam bɔnɛ pee nɛ a tsi gbalɔ Amos nítsumi ɔ nya. (Amos 7:7-11) Se enɛ ɔ wui Amos he gbeye. Mwɔnɛ ɔ, osɔfo komɛ hlaa kaa ma nya dali nɛ fĩ a se ngɛ mɔde nɛ a ngɛ bɔe kaa a maa wa Yehowa webi a yi mi ɔ mi. Se Yehowa ma nɔ mi kɛ ha wɔ kaa a ta hwumi níhi nɛ a sɔ̃ ɔmɛ ekoeko be nyɛe maa pee wɔ nɔ́ ko.—Yes. 54:17.
3. Mɛni sɛ gbi enyɔ nɛ wa ngɛ fiɛɛe mwɔnɛ ɔ?
3 Moo Fiɛɛ Mawu Kojomi Kɛ Jɔɔmihi Nɛ Maa Ba Hwɔɔ Se ɔ: E ngɛ mi kaa Amos gba kɛ si Israel wɛtso nyɔngma a mohu lɛɛ, se e ngɔ si womi kɛ jɔɔmi babauu nɛ Yehowa kɛ maa ba a kɛ gbe womi nɛ e ngma a nya. (Amos 9:13-15) Wɔ hu wa tuɔ Mawu “kojomi ligbi” nɛ ma a he munyu, se e ji “sane kpakpa nɛ kɔɔ matsɛ yemi ɔ he ɔ” fã ko nɛ e sa kaa waa fiɛɛ. (2 Pet. 3:7; Mat. 24:14) Yayami peeli a hɛ mi nɛ Yehowa ma kpata ngɛ Harmagedon ɔ ma bli blɔ konɛ zugba a nɛ pee paradeiso.—La 37:34.
4. Mɛni heje nɛ wa ngɛ nɔ mi mami kaa wa ma nyɛ maa pee Yehowa suɔmi nya ní ɔ?
4 Matsɛ Yemi ɔ he sane kpakpa a nɛ wa ngɛ fiɛɛe ngɛ je nɛ si temi kɛ woli hiɛ ngɛ mi ɔ mi ɔ haa nɛ wa he nɔ nɛ wa jɔɔ kɛ ha Yehowa, kɛ wa juɛmi nya si nɛ wa ma kaa wa maa pee e suɔmi nya ní ɔ ba peeɔ ka. (Yoh. 15:19) Se kɛ̃ ɔ, wa ngɛ nɔ mi mami kaa Yehowa maa ya nɔ ma ha wɔ nɔ́ tsuaa nɔ́ nɛ e he hia wɔ konɛ wa nyɛ nɛ waa pee e suɔmi nya ní kaa bɔnɛ e pee ha Amos ɔ.—2 Kor. 3:5.