Fiɛɛmi Munyuhi

Jije Wa Maa Na Sane Bimihi Nɛ A He Hia Amɛ A Heto Ngɛ?

Mo nga wetsɛ ɔ. Mo plɛ dɛ womi ɔ bɔ nɛ e maa na munyuyi ɔ nɛ o kɛ ha lɛ nɛ o de lɛ ke: “Wa ngɛ sɛ gbi nɛ he hia nɛ ɔ gbae ngɛ je kɛ wɛ. O nɔ́ ji nɛ ɔ nɛ.”

Ke o ma si dɛ womi ɔ eko ngɛ nihi nɛ a be we mi ɔ a sinya nya a, mo si ngɛ he nɛ wetsɛ ɔ pɛ ma ba na, nɛ o ko koklo lɛ basaa.

Ke wetsɛ ɔ je bua jɔmi kpo loo e suɔ nɛ nyɛɛ sɛɛ ní ɔ, o ma nyɛ ma bi lɛ e juɛmi ngɛ sane bimihi nɛ ngɛ dɛ womi ɔ hɛ mi ɔ he. Mo bli dɛ womi ɔ mi nɛ o tsɔɔ lɛ nɔ́ nɛ La 119:144, 160 de ɔ. Mo ha nɛ e le kaa dɛ womi ɔ tu Intanɛti ní tsumi he ko nɛ maa ye bua lɛ konɛ e na hetohi nɛ Baiblo ɔ ha a he munyu. O ma nyɛ maa fia video nɛ ji Mɛni He Je Nɛ E Sa Kaa Waa Kase Baiblo ɔ? kɛ pee nɔ hyɛmi nɔ́ kɛ ha lɛ. Loko o maa je ɔ, tsɔɔ lɛ sane bimi etɛ nɛ ngɛ dɛ womi ɔ se ɔ nɛ o bi lɛ nɛ e tsɔɔ nɔ́ nɛ e suɔ kaa e ma ná heto. Mo de lɛ kaa o suɔ nɛ o maa ba konɛ o ba tsɔɔ lɛ bɔ nɛ e maa pee ha kɛ na sane bimi ɔ heto ngɛ jw.org. Ke o kpale ya slaa lɛ ɔ, o kɛ lɛ nɛ ya BIBLE TEACHINGS > BIBLE QUESTIONS ANSWERED ngɛ wa Intanɛti ɔ nɔ konɛ nyɛ susu heto ɔ he.

Ke nyɛ ngɛ nyɛ kpokpa nɔ kpe nine fɔmi womi ɔ hu gbae ngɛ jamɛ a be ɔ nɔuu mi ɔ, moo ngɔ nine fɔmi womi ɔ kɛ piɛɛ dɛ womi ɔ he kɛ ha wetsɛ ɔ nɛ o de lɛ ke, “Wa kpale ngɛ mo nine fɔe kɛ ba kpe ko nɛ wa maa pee nɛ a be sika he ɔ sisi.”

Hwɔɔmi Mɔ August 1

Ngɛ Hɔ kɛ Hɔgba a, ke e maa hi nɛ o kɛ Hwɔɔmi Mɔ ɔ ma ha a, de ke: “Wa suɔ nɛ wa ha mo womi tɛtlɛɛ ehe nɛ ɔ. Hwɔɔmi Mɔ nɛ ɔ ha sane bimi nɛ ji, Anɛ Mawu susuɔ o he lo? ɔ heto.”

Awake! August

Ngɛ Hɔ kɛ Hɔgba a, ke e maa hi nɛ o kɛ Awake! ɔ ma ha a, de ke: “Wa suɔ nɛ wa ha mo womi tɛtlɛɛ ehe nɛ ɔ. Awake! womi tɛtlɛɛ nɛ ɔ ha sane bimi nɛ ji, Mɛni blɔ nɔ nihi maa gu kɛ ha nɛ tue mi jɔmi nɛ ba? a heto.”