Jeha 2015 Teokrase Sɔmɔmi Sukuu ɔ Maa Ye Bua Wɔ Nɛ Wa Ní Tsɔɔmi Maa Nu Tso

¹ La polɔ David ngma ke: ‘Oo Yehowa, ye wesa he, kɛ ye kpɔlɔ! Ha nɛ ye nya mi munyu, kɛ ye tsui mi susumi nɛ sa o hɛ mi.’ (La 19:14) Wɔ hu wa suɔ kaa wa nya mi munyu nɛ sa Yehowa hɛ mi ejakaa wa bua jɔ he blɔ nɛ wa náa nɛ waa kɛ tuɔ anɔkuale ɔ he munyu ngɛ asafo ɔ kɛ fiɛɛmi mi ɔ he wawɛɛ. Teokrase Sɔmɔmi Sukuu ɔ ji blɔ kake nɔ nɛ Yehowa guu kɛ tsɔseɔ wɔ konɛ wa nyɛ nɛ wa tsu sɔmɔmi ní tsumi ɔ. Tsɔsemi nɛ ɔ yaa nɔ daa otsi ngɛ asafohi nɛ a hiɛ pe 111,000 a mi ngɛ je kɛ wɛ. Sukuu nɛ ɔ ye bua fiɛɛli babauu ngɛ je kɛ wɛ nɛ a he su kɛ ha sane kpakpa a fiɛɛmi, nɛ a kɛ kã, kɛ ga, kɛ nɔ́ se kɔmi fiɛɛɔ, nɛ nihi nuɔ anɔkuale ɔ sisi.​—Níts. 19:8; Kol. 4:6.

² A ma je níhi nɛ wa maa kase ngɛ 2015 sukuu blɔ nya tomi ɔ mi ɔ kɛ je womi nɛ ɔmɛ a mi: Níhi Nɛ Wa Ma Nyɛ Maa Kase Ngɛ Mawu Munyu ɔ Mi, Ye Womi nɛ Sɛɛɔ Baiblo Mi Sanehi kɛ Sane Kpakpa Nɛ Je Mawu Ngɔ! Jehanɛ hu ɔ, a tsake be nɛ a kɛ ma tsu Baiblo kanemi ɔ mi otihi, kɛ Ní Tsumi 1 he ní ɔ. A kɛ tsakemi nɛ ɔmɛ kɛ blɔ tsɔɔmi kpahi nɛ a kɛ ma tsu ní ngɛ sukuu ɔ mi ɔ ha ngɛ kuku nɛ nyɛɛ se ɔmɛ a mi.

³ Baiblo Kanemi Mi Otihi: Nyɛminyumu nɛ ma tsu fã nɛ ɔ he ní ɔ maa ngɔ hɛngmɛfia enyɔ ngɛ be nɛ a kɛ ha lɛ ɔ mi kɛ tu Ngmami kake nɛ ngɛ otsi Baiblo kanemi ɔ mi, nɛ kɔɔ asafo ɔ he ɔ he munyu. Ke e dla e he saminya a, e ma nyɛ maa tsɔɔ ngmami ɔ mi ngɛ be nya, nɛ asafo ɔ ma ná he se. E ma si hɛngmɛfia ekpa kɛ ha tue buli ɔmɛ konɛ a ngɔ tsuifia 30 loo nɔ́ nɛ sui jã kɛ de nɔ́ nɛ a bua jɔ he ngɛ otsi Baiblo kanemi ɔ mi kaa bɔ nɛ a peeɔ daa a. Ja wa kase ní, nɛ wa kase be nɔ yemi loko wa ma nyɛ ma ha heto nɛ nu tso ngɛ tsuifia 30 mi, se jã nɛ wa maa pee ɔ ma tsɔse wɔ. E ngmɛɛ ni kpahi blɔ nɛ mɛ hu a deɔ nɔ́ nɛ a kase ngɛ otsi Baiblo kanemi ɔ mi.

⁴ Ní Tsumi 1: A gbɔ be nɛ a kɛ maa kane Baiblo ɔ nɔ kɛ ba hɛngmɛfia etɛ loo nɔ́ nɛ sui jã, nɛ a gbɔ kukuhi nɛ a maa kane ɔ hu nɔ. E sa nɛ nihi nɛ a ma ha mɛ ní tsumi nɛ ɔ nɛ a kase mi si abɔ, nɛ a kane lɛ boboobo ke a ngɛ a he dlae ɔ, bɔ nɛ pee nɛ a kɛ nya mi tsɔmi nɛ kane munyungu ɔmɛ pɛpɛɛpɛ konɛ nihi nɛ a nu sisi. E sa nɛ Yehowa we bi tsuo nɛ a bɔ mɔde nɛ a le ní kanemi saminya, ejakaa ní kanemi he hia wawɛɛ ngɛ wa jami mi. Wa bua jɔ kaa jokuɛwi fuu nɛ a ngɛ wa kpɛti ɔ nyɛɛ nɛ a kaneɔ ní. Enɛ ɔ he ɔ, fɔli nɛ a je suɔmi mi nɛ a tsɔɔ a bimɛ ní kanemi ɔ sa yi jemi wawɛɛ.

⁵ Ní Tsumi 2: A kɛ fã nɛ ɔ ma ha nyɛmiyo, nɛ e kɛ hɛngmɛfia enuɔ ma tsu he ní. E sa nɛ e tu munyuyi nɛ a ha lɛ ɔ pɛ he munyu. Ke a je ní tsumi ɔ kɛ je Níhi Nɛ Wa Ma Nyɛ Maa Kase Ngɛ Mawu Munyu ɔ Mi womi wayo ɔ loo Sane Kpakpa Nɛ Je Mawu Ngɔ womiyo ɔ mi ɔ, e sa nɛ e ha nɛ e ní tsumi ɔ nɛ kɔ wa fiɛɛmi ní tsumi ɔ fã ko nɛ a ma nyɛ ma kɛ tsu ní ngɛ nyɛ asafo ɔ zugba kpɔ ɔ mi ɔ he. Ke a je ní tsumi ɔ ngɛ Ye Womi nɛ Sɛɛɔ Baiblo Mi Sanehi womi ɔ mi ɔ, e sa nɛ sukuu no ɔ nɛ tsɔɔ munyuyi ɔ mi, nɛ e hla ngmamihi nɛ e kɛ ma tsu ní, nɛ e tsɔɔ nɔ́ nɛ wa ma nyɛ maa kase ngɛ sane ɔ mi. E ma nyɛ maa ngɔ ngmami kpahi nɛ e kɛ e munyuyi ɔ kɔ ɔ kɛ tsu ní. Sukuu nɔ hyɛlɔ ɔ ma ha sukuu no ɔ wetsɛ.

⁶ Ní Tsumi 3: A kɛ fã nɛ ɔ ma ha nyɛminyumu loo nyɛmiyo ko, nɛ e kɛ hɛngmɛfia enuɔ ma tsu he ní. Se ke a kɛ ha nyɛmiyo ɔ, lɛɛ e sa nɛ e tsu he ní kaa bɔ nɛ a tsɔɔ kaa a tsu Ní Tsumi 2 ɔ he ní ɔ. Ke a kɛ ha nyɛminyumu , nɛ a kɛ da Ye Womi nɛ Sɛɛɔ Baiblo Mi Sanehi ɔ nɔ ɔ, e sa nɛ e ha nɛ tue buli ɔmɛ nɛ a hi e juɛmi mi, konɛ e tu munyu ɔ kɛ tsɔɔ mɛ tɛ̃ɛ. E kɛ munyuyi nɛ a ha lɛ ɔ nɛ tsu ní, nɛ e hla ngmamihi nɛ e kɛ maa tsɔɔ mi, nɛ e tsɔɔ nɔ́ nɛ wa ma nyɛ maa kase ngɛ sane ɔ mi.

⁷ Nɔ́ Ehe Nɛ Nyɛmimɛ Nyumuhi Ma Tsu He Ní Ngɛ Ní Tsumi 3 ɔ Mi: Ke a kɛ ní tsumi nɛ a kɛ da Níhi Nɛ Wa Ma Nyɛ Maa Kase Ngɛ Mawu Munyu ɔ Mi womi wayo loo Sane Kpakpa Nɛ Je Mawu Ngɔ ɔ nɔ ɔ ha nyɛminyumu ɔ, e ma nyɛ maa pee lɛ kaa weku ko nɛ a ngɛ ní kasee, loo kaa e ya na nɔ ko ngɛ fiɛɛmi mi. Behi fuu ɔ, sukuu nɔ hyɛlɔ ɔ ma ha sukuu no ɔ wetsɛ, kɛ si fɔfɔɛ mi nɛ e maa pee ngɛ. E sa nɛ nɔ nɛ maa pee e wetsɛ ɔ nɛ pee e weku ɔ mi no loo nyɛminyumu ko ngɛ asafo ɔ mi. E ma nyɛ maa ngɔ ngmami kpahi nɛ maa Baiblo sisi tomi mlaahi nɛ kɛ munyuyi ɔ kɔ ɔ nɔ mi ɔ kɛ tsu ní. Ngɛ be kɛ behi a mi ɔ, a kɛ ní tsumi nɛ ɔ ma ha asafo mi nikɔtɔmahi. Asafo mi nɔkɔtɔma a nitsɛ ma nyɛ maa hla wetsɛ nɛ e kɛ ma tsu ní ɔ, kɛ si fɔfɔɛ mi nɛ e maa pee ngɛ. Atsinyɛ jemi ko be he kaa ke asafo mi bi ɔmɛ na bɔ nɛ asafo mi nikɔtɔmahi tsɔɔ a weku ɔ kɛ ni kpahi ní ha a, e maa wo mɛ he wami.

⁸ Ga Womi: Ke a gbe Ní Tsumi 1, 2, kɛ 3 nya a, sukuu nɔ hyɛlɔ ɔ maa ngɔ hɛngmɛfia enyɔ kɛ je a yi ngɛ hehi nɛ a bɔ mɔde ngɛ, nɛ e maa da Benefit From Theocratic Ministry School Education womi ɔ nɔ kɛ wo mɛ ga ke e he hia. Ke sukuu nɔ hyɛlɔ ɔ ma tsɛ sukuu no ko kɛ ba kpoku ɔ nɔ ɔ, e be ga womi nɛ sukuu no ɔ ma tsu he ní ɔ tsɔɔe. Se ke e gbe e ní tsumi ɔ nya a, sukuu nɔ hyɛlɔ ɔ ma je e yi ngɛ hehi nɛ e bɔ mɔde ngɛ ɔ, nɛ e maa tsɔɔ ga womi nɛ ngɛ sukuu womi ɔ mi nɛ sukuu no ɔ kɛ tsu ní ɔ. E maa tsɔɔ nɔ́ he je nɛ e susu kaa sukuu no ɔ bɔ mɔde, loo nɔ́ he je nɛ e he hia kaa e kɛ jamɛ a ga womi ɔ nɛ tsu ní pee se.

⁹ Nyɛ maa na munyu tumi bɔ nɛ sukuu bi ɔmɛ kɛ ma tsu ní ɔ ngɛ Ministry School womi ɔ ba fa 79 kɛ ya si ba fa 81 ɔ mi. Ke sukuu no ko gbe e ní tsumi nya a, sukuu nɔ hyɛlɔ ɔ ma kadi ga womi nɛ ngɛ womi ɔ mi nɛ sukuu no ɔ tsu he ní ɔ ngɛ sukuu no ɔ womi ɔ mi, nɛ pee se ɔ, e ma bi lɛ ke ji e tsu munyu tumi bɔ ɔ he ní tsumi nɛ a kɛ ha ngɛ womi ɔ mi ɔ. Ke a kpa asafo mi kpe loo ngɛ be kpa mi ɔ, sukuu nɔ hyɛlɔ ɔ ma nyɛ maa ngɔ ga womi nɛ sa kɛ ha sukuu no ɔ ngɛ laami mi. E sa nɛ sukuu bi ɔmɛ nɛ a na ga nɛ a maa wo mɛ ɔ kaa e ji nɔ́ nɛ ma dla mɛ konɛ a ya a hɛ mi ngɛ Mawu jami mi.​​—1 Tim. 4:15.

¹⁰ Ke sukuu no ko ye be ɔ, e sa nɛ sukuu nɔ hyɛlɔ ɔ loo e se yelɔ ɔ nɛ pee okadi ko kɛ kai nɔ ɔ kaa e be ɔ su. A ma nyɛ maa ngɔ alarm loo nɔ́ kpa ko nɛ ma ha nɛ nɔ ɔ maa le kaa e ngɛ be yee ɔ kɛ tsu ní. Ke sukuu no ɔ na okadi ɔ pɛ ɔ, e sa nɛ e mwɔ e munyu ɔ nya nɔuu nɛ e je kpoku ɔ nɔ.​​—Hyɛ Ministry School womi ɔ bf. 282 kk. 4.

¹¹ Wa ngɛ nihi tsuo nɛ a su hlami níhi ɔmɛ a he ɔ he wami woe kaa a ngma a biɛ ngɛ Teokrase Sɔmɔmi Sukuu ɔ mi. (Hyɛ Ministry School womi ɔ bf. 282 kk. 6.) Tsɔsemi nɛ Yehowa we bi a nine suu nɔ ngɛ sukuu nɛ ɔ mi ɔ haa nɛ a jeɔ suɔmi mi nɛ a kɛ kã kɛ bu fiɛɛ Matsɛ Yemi ɔ he sane kpakpa a. Atsinyɛ jemi ko be he kaa Yehowa bua jɔ yi jemi nɛ nihi tsuo nɛ a tsɔse mɛ ngɛ sukuu nɛ ɔ mi ɔ kɛ ngɛ lɛ hae ɔ he wawɛɛ!​​—La 148:12, 13; Yes. 50:4.