Ke O Ngɛ Fiɛɛe ɔ, Ha Nɛ He Wami Nɛ Ngɛ Mawu Munyu ɔ Mi ɔ Nɛ Je Kpo
Ke nɔ ko ngmɛ wɔ blɔ kaa waa kɛ lɛ nɛ sɛɛ sane kpakpa a he ní ɔ, waa kɛ he blɔ ɔ tsuɔ ní saminya. Wa kaneɔ ngmamihi kɛ jeɔ Baiblo ɔ mi tɛɛ nɛ he wami nɛ ngɛ Mawu Munyu ɔ mi ɔ jeɔ kpo. A ma enɛ ɔ nɔ mi benɛ wa ya jeha 2014 ligbi kake kpe klɛdɛɛ ɔ. Kpɔ mi nɔ hyɛlɔ ɔ tu munyu nɛ e yi ji “Ha Nɛ Nihi Nɛ A Le Kaa Mawu Munyu ɔ Ngɛ He Wami” ɔ ngɛ jamɛ a kpe ɔ sisi. Anɛ o kai otihi nɛ je kpo ngɛ jamɛ a munyu ɔ mi ɔ lo?
Mɛni he je nɛ Mawu Munyu ɔ ngɛ he wami kulaa pe wɔ nitsɛmɛ wa munyu ɔ?—2 Tim. 3:16, 17.
Mɛni he je nɛ Baiblo ɔ taa nihi a tsui he, nɛ e nyɛɛ nɛ e tsakeɔ nihi a juɛmi kɛ a ní peepeehi ɔ?—Hyɛ June 15, 2012, Blɛfo gbi Hwɔɔmi Mɔ ɔ, bf. 27, kk. 7.
Ke wa maa kane ngmami ko kɛ ha nɔ ko ngɛ fiɛɛmi mi ɔ, mɛni blɔ nɔ wa maa gu kɛ gbla nɔ ɔ juɛmi kɛ ya Mawu Munyu ɔ nɔ konɛ e ná bu kɛ ha munyu ɔ?—Hyɛ Ministry School womi ɔ, bf. 148, kk. 3-4 kɛ March 2013 Wa Matsɛ Yemi Sɔmɔmi ɔ, bf. 6, kk. 8.
Mɛni he je nɛ ke wa kane ngmami ɔ, e sa kaa waa tsɔɔ mi nɛ waa kɛ nɔ ɔ nɛ susu ngmami ɔ he ɔ? Mɛni blɔ nɔ nɛ wa maa gu kɛ pee jã?—Níts. 17:2, 3; Hyɛ Ministry School womi ɔ, bf. 154, kk. 4 kɛ ya si bf. 156, kk. 5.