Wa He Nɛ Maa Be Ngɛ Fiɛɛmi Ní Tsumi ɔ Mi​—Tsɔse O Baiblo Mi Ní Kaseli Nɛ A Nyɛ Nɛ A Kase Ní Ngɛ A Dɛ He

Nɔ́ He Je Nɛ E He Hia: Loko wa Baiblo mi ní kaseli maa ya a hɛ mi ngɛ Mawu jami mi ɔ, pi Mawu Munyu ɔ mi sisije tsɔɔmi ɔmɛ pɛ nɛ e sa nɛ a kase. (Heb. 5:12–6:1) E biɔ mɔde bɔmi loko nɔ ko ma nyɛ maa kase ní. E biɔ nɛ waa ngɔ ní hehi nɛ wa kase ɔ kɛ to níhi nɛ wa le momo ɔ he, konɛ wa nyɛ nɛ waa le bɔ nɛ waa kɛ ma tsu ní ha nɛ wa ma ná he se. (Abɛ 2:1-6) Ke Baiblo mi ní kaselɔ ko kase bɔ nɛ lɛ nitsɛ e ma plɛ kɛ pee níhi a mi hlami ha a, e maa ye bua lɛ nɛ e kɛ wa Baiblo kasemi womihi ɔmɛ ma ha Baiblo mi sane bimihi a heto. Ke a bɔ mɔde kaa a kɛ níhi nɛ a kase ɔ ma tsu ní ɔ, e maa ye bua mɛ nɛ a ma nyɛ maa da kahi nɛ Kristofohi kɛ kpeɔ ɔ a nya.​—Luka 6:47, 48.