Nyɛɛ Kase Gbali Ɔmɛ A Nɔ Hyɛmi Nɔ́ ɔ—Habakuk
1. Mɛni he je nɛ wa ma nyɛ ma de ke wa si fɔfɔɛ ɔ ngɛ kaa gbalɔ Habakuk nɔ́ ɔ?
1 Akɛnɛ yi wu tso níhi ngɛ nɔ yae ngɛ je ɔ mi he je ɔ, wa ma nyɛ maa nu he kaa bɔ nɛ Habakuk nu he ɔ. E bi Yehowa ke: “Mɛni he je o ha i ngɛ yayami kɛ haomi hyɛe kikɛ nɛ ɔ? Kɛ pee kɛɛ nɛ o ngɛ nɔ́ nɛ dɛ nɛ ɔ hyɛe, nɛ o pui mi ɔ?” (Hab. 1:3; 2 Tim. 3:1, 13) Ke wa susu sɛ gbi nɛ Habakuk fiɛɛ kɛ e nɔ hyɛmi nɔ́ ɔ he ɔ, e maa ye bua wɔ be mi nɛ wa ngɛ Yehowa kojomi ligbi ɔ blɔ hyɛe nɛ ɔ.—2 Pet. 3:7.
2. Mɛni blɔ nɔ wa maa gu kɛ tsɔɔ kaa wa ngɛ hemi kɛ yemi?
2 Mo Ná Hemi Kɛ Yemi: Habakuk ha we nɛ ní yayahi nɛ ngɛ nɔ yae ɔ nɛ wo e kɔni mi nyu, mohu ɔ, e ya nɔ nɛ e kɛ kã sɔmɔ Yehowa. (Hab. 2:1) Yehowa ma nɔ mi kɛ ha Habakuk kaa E munyu ɔ maa ba mi ngɛ e be nya, nɛ “dali lɛɛ, akɛnɛ a yeɔ Mawu anɔkuale ɔ, a yi ma na wami.” (Hab. 2:2-4) Kɛ Kristofohi nɛ a ngɛ nyagbe be nɛ ɔ mi ɔ ma ná munyu nɛ ɔ he se ha kɛɛ? E he hia nɛ wa he ye kaa nyagbe ɔ maa ba, mohu pe nɛ wa ma hla kaa wa maa le be tutuutu nɛ e maa ba. Hemi kɛ yemi nɛ wa ngɛ ɔ haa nɛ wa yaa nɔ nɛ wa hwɔɔ, nɛ waa kɛ fiɛɛmi ní tsumi ɔ peeɔ nɔ́ titli ngɛ wa si himi mi.—Heb. 10:38, 39.
3. Mɛni he je nɛ e sa nɛ waa ya nɔ nɛ waa kɛ bua jɔmi nɛ sɔmɔ Yehowa?
3 O Kɛ Bua Jɔmi Nɛ Sɔmɔ Yehowa: Ke Gog nɛ je Magog ɔ ba tua Yehowa we bi ɔ, waa kɛ ka maa kpe. (Eze. 38:2, 10-12) Ta haa nɛ nɔ tsuaa nɔ hao ɔ, nɛ e saa nihi nɛ a yeɔ kunimi ɔ po a he. Ta haa nɛ hwɔ baa, weto níhi a hɛ mi nyɛɔ kpataa, nɛ nihi yeɔ ohia. Ke si himi kaa kikɛ ba a, kɛ wa maa pee wa ní ha kɛɛ? Habakuk le kaa e kɛ haomi ma nyɛ maa kpe, lɔ ɔ he ɔ, e ma e juɛmi nya si kaa e kɛ bua jɔmi ma sɔmɔ Yehowa ngɛ haomihi nɛ e kɛ maa kpe ɔ tsuo se. (Hab. 3:16-19) ‘Bua jɔmi nɛ Yehowa haa wɔ’ ɔ maa ye bua wɔ konɛ wa nyɛ nɛ waa da kahi nɛ maa ba wa nɔ hwɔɔ se ɔ a nya.—Neh. 8:10; Heb. 12:2.
4. Mɛni nɛ ma nyɛ ma ha nɛ wa ná bua jɔmi amlɔ nɛ ɔ, kɛ hwɔɔ se?
4 Yehowa maa ya nɔ ma tsɔse nihi nɛ e maa baa a yi kojomi ligbi ɔ konɛ a le e blɔ ɔmɛ. (Hab. 2:14) Nihi nɛ a ma tle mɛ si ɔ hu ma ba kase Yehowa he ní. Nyɛ ha nɛ waa ngɔ he blɔhi nɛ wa ma ná a kɛ tu ní kpakpahi nɛ Yehowa peeɔ ɔ he munyu kɛ tsɔɔ nihi!—La 34:1; 71:17.