Moo Ye Bua O Weku ɔ Konɛ A Hɛ Nɛ Ko Je Yehowa Nɔ

Akɛnɛ Yuda bi ɔmɛ a hɛ je Yehowa, a Mawu ɔ nɔ he je ɔ, Yehowa tsɔ Yeremia konɛ e ya de mɛ ke e ma kpata a hɛ mi. (Yer 13:25) Mɛni ha nɛ Israel ma a hɛ je Yehowa nɔ jã a? Wekuhi nɛ a ngɛ ma a mi ɔ a hɛ dɔɛ ngɛ Mawu jami he. E ngɛ heii kaa wekuyi ɔmɛ kɛ blɔ tsɔɔmi nɛ Yehowa kɛ ha mɛ ngɛ 5 Mose 6:5-7 ɔ tsu we ní.

Mwɔnɛ ɔ, wekuhi nɛ a nane pi si ngɛ Mawu jami mi ɔ yeɔ bua nɛ wa we asafo ɔmɛ a he waa. Ke wekuyihi kɛ a weku mi bimɛ peeɔ Weku Mawu Jami daa otsi nɛ a náa he se ɔ, lɔ ɔ maa ye bua weku ɔ nɛ a hɛ be Yehowa nɔ jee. (La 22:27) Ke nyɛ hyɛ video nɛ ji ‘Nyɛ Hɛ Nɛ Hi Mlaa Nɛ Ɔmɛ A Nɔ’​—Níhi Nɛ Weku Komɛ De ɔ ta a, nyɛ ha sane bimi nɛ ɔmɛ a heto:

• Kɛ weku komɛ plɛ kɛ tsu nyagbahi nɛ ha we nɛ a peeɔ weku Mawu jami saminya a he ní ha kɛɛ?

• Ke nyɛ peeɔ Weku Mawu Jami daa otsi ɔ, mɛni jɔɔmihi nyɛ ma ná?

• Ngɛ weku Mawu jami blɔ fa mi ɔ, mɛni ji nyagba komɛ nɛ i kɛ kpeɔ, nɛ kɛ ma tsu he ní ha kɛɛ?