KRISTOFOHI A SI HIMI
O Bua Nɛ Jɔ Sane Kpakpa a Fiɛɛmi He
Anɛ e he wa ha mo hyɛ kaa o maa fiɛɛ kɛ tsɔɔ nihi lo? Wa ti nihi fuu ma ha heto ke ee. Mɛni he je? Eko ɔ, nihi nɛ a ngɛ wa zugba kpɔ ɔ mi ɔ bui sɛ gbi ɔ tue, aloo wa yeɔ gbeye kaa wa maa fiɛɛ kɛ tsɔɔ nihi nɛ wa li mɛ. Ngɛ anɔkuale mi ɔ, níhi kaa jã ma nyɛ ma jɔ̃ wa kɔni mi. Se kɛ̃ ɔ, Mawu nɛ wa ngɛ jae ɔ ji bua jɔmi Mawu, nɛ e suɔ nɛ wa sɔmɔ lɛ kɛ bua jɔmi. (La 100:2) Mɛni yi mi tomi etɛ a he je nɛ a sa kaa wa bua nɛ jɔ fiɛɛmi ní tsumi ɔ he?
Kekleekle ɔ, sɛ gbi nɛ wa ngɛ fiɛɛe ɔ haa nɛ nihi náa hɛ nɔ kami. Mwɔnɛ ɔ, e ngɛ mi kaa nihi fuu a hɛ nɔ kami ngɛ tae lɛɛ, se wa ma nyɛ ma de mɛ “manye munyu,” loo sane kpakpa nɛ wa hɛɛ ɔ, konɛ a ná hɛ nɔ kami. (Yes 52:7) Mawu Matsɛ Yemi ɔ he sane kpakpa a nɛ wa maa fiɛɛ kɛ tsɔɔ nihi ɔ hu ma nyɛ ma ha wɔ bua jɔmi. Loko wa maa je kpo kɛ ya fiɛɛmi ɔ, e maa hi kaa wa ma susu jɔɔmihi nɛ Mawu Matsɛ Yemi ɔ kɛ maa ba zugba a nɔ ɔ he.
Nɔ́ nɛ ji enyɔ, sane kpakpa a nɛ wa ngɛ fiɛɛe ɔ tsakeɔ nihi, nɛ a ba peeɔ Mawu huɛmɛ. E haa nɛ a yuɔ a he ngɛ ní yayahi a he, nɛ a hyɛɔ blɔ kaa a ma ná neneene wami. (Yes 48:17, 18; Rom 1:16) Waa ngɔ lɛ kaa oslaa ko ba ni komɛ a nɔ, nɛ e he hia kaa wa hla a se blɔ konɛ wa he a yi wami. Ke ni ɔmɛ a ti ni komɛ sume nɛ wa he a yi wami po ɔ, e sa kaa waa ya nɔ nɛ wa hla nihi nɛ a suɔ kaa a he a yi wami ɔ.—Mat 10:11-14.
Nɔ́ nɛ pe kulaa a, wa fiɛɛmi ní tsumi ɔ woɔ Yehowa hɛ mi nyami. E buɔ wa fiɛɛmi ní tsumi ɔ kaa nɔ́ ko nɛ he jua wa wawɛɛ. (Yes 43:10; Heb 6:10) Jehanɛ hu ɔ, e haa wɔ e mumi klɔuklɔu ɔ faa konɛ wa kɛ tsu ní tsumi nɛ ɔ saminya. Bua jɔmi piɛɛ mumi klɔuklɔu ɔ yiblii ɔ he. Enɛ ɔ he ɔ, mo kpa Yehowa pɛɛ konɛ e ha nɛ o ná bua jɔmi. (Gal 5:22) Ke waa kɛ nyagbahi ngɛ kpee ɔ, Yehowa ma nyɛ maa ye bua wɔ konɛ waa fiɛɛ kɛ kã. (Níts 4:31) Ngɛ nyagbahi nɛ waa kɛ kpeeɔ ngɛ wa zugba kpɔ ɔ mi ɔ tsuo se ɔ, wa ma nyɛ maa fiɛɛ kɛ bua jɔmi.—Eze 3:3.
Ke o ya fiɛɛmi ɔ, kɛ o suɔ kaa o maa pee o hɛ mi ha kɛɛ? Mɛni o ma nyɛ maa pee konɛ o bua nɛ jɔ ngɛ fiɛɛmi mi?
NYƐƐ HYƐ VIDEO NƐ JI, KASE NÍ NƐ O PUE O YI MI TƐ KONƐ O NÁ BUA JƆMI EKOHU. LƆ Ɔ SE Ɔ, NYƐ HA SANE BIMI NƐ ƆMƐ A HETO:
Ke waa kɛ ngmlɛfia babauu fiɛɛɔ daa nyɔhiɔ po ɔ, mɛni he je nɛ e sa kaa wɔ nitsɛmɛ hu waa kase ní ɔ?
Kɛ wa ma plɛ kɛ kase Mary ha kɛɛ?
Mɛni be o kɛ pueɔ o yi mi tɛ ngɛ Mawu Munyu ɔ he?
Mɛni lɛ haa nɛ o bua jɔɔ ke o ngɛ sane kpakpa a fiɛɛe?