Nyɛɛ Da Si Kpɛii Be Mi Nɛ Nyagbe ɔ Ngɛ Sue Nɛ ɔ

NƆ́ HE JE NƐ E HE HIA: E be kɛe nɛ níhi nɛ a ngɛ gbeye maa ya nɔ, nɛ enɛ ɔ ma bi nɛ waa tsɔɔ ke ji wa ngɛ kã nɛ wa ngɛ hɛ kɛ nɔ fɔmi ngɛ Yehowa mi pe be ko nɛ be ɔ. Amanehlu ngua a maa je sisi kɛ lakpa jami hɛ mi kpatami. (Mat 24:21; Kpj 17:16, 17) Ngɛ jamɛ a haomi be ɔ mi ɔ, waa kɛ kã maa fiɛɛ kojomi sɛ gbi ko. (Kpj 16:21) Gog nɛ je Magog ɔ ma ba tua wɔ. (Eze 38:10-12, 14-16) Ke jamɛ a be ɔ su ɔ, Yehowa “Mawu Ope ɔ ligbi ngua a nɔ ta a” maa je sisi, nɛ e kɛ maa po e we bi a he piɛ. (Kpj 16:14, 16) Bɔ nɛ pee nɛ wa ná kã konɛ wa nyɛ nɛ waa da ní nɛ ɔmɛ nɛ maa ba hwɔɔ se ɔ nya a, e he hia nɛ waa ye anɔkuale ngɛ hemi kɛ yemi he kahi nɛ waa kɛ kpeɔ amlɔ nɛ ɔ mi.

BLƆ NƆ NƐ O MAA GU KƐ PEE JÃ:

• O kɛ kã nɛ fĩ je mi bami he mlaahi nɛ a nɔ kuɔ nɛ Yehowa wo ɔmɛ a se.​—Yes 5:20

• Yaa nɔ nɛ o kɛ nyɛmimɛ Kristofohi nɛ bla kɛ sɔmɔ Mawu.​—Heb 10:24, 25

• O kɛ oya yemi nɛ bu blɔ tsɔɔmi nɛ Yehowa asafo ɔ kɛ haa wɔ ɔ tue.​—Heb 13:17

• Mo pue o yi mi tɛ ngɛ bɔ nɛ Yehowa he e we bi a yi wami ha blema a he.​—2Pe 2:9

• Moo sɔle ha Yehowa, nɛ o ngɔ o hɛ kɛ fɔ e nɔ.​—La 112:7, 8

NYƐƐ HYƐ VIDEO NƐ JI, NÍHI NƐ MAA BA HWƆƆ SE NƐ E MA BI NƐ WAA PEE KÃ​—FÃ KO, LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:

• 

  Benɛ a gba nyɛmimɛ nɛ a ngɛ asafo ko mi ɔ kɛ wo asafo kpa komɛ a mi ɔ, mɛni tue bumi he ka nɛ a kɛ kpe?

• 

  Mɛni tsakpa lɛ ngɛ kã kɛ tue bumi nɛ wa maa pee ɔ a kpɛti?

• 

  Mɛni he je nɛ wa maa hia kã ke benɛ e su Hamagedɔn ɔ?

• 

  Mɛni Baiblo mi sane lɛ ma nyɛ maa ye bua wɔ konɛ wa ná hemi kɛ yemi kaa Yehowa ma kpɔ̃ wɔ?​—2Kron 20:1-24