KRISTOFOHI A SI HIMI
Moo Hyɛ Nɛ Hi Nɛ O Ko Gbɛ Lakpa Munyuhi Kɛ Fĩa
Mwɔnɛ ɔ, a ma nyɛ maa ngɔ womi, radio, TV, kɛ intanɛti ɔ kɛ tsu ní kɛ ha nɛ nihi ayɔhi abɔ a nine nɛ su sɛ gbi nɔ ngɛ be kpiti mi. Nihi nɛ a jaa “Mawu anɔkualetsɛ” ɔ sume nɛ a gbɛ lakpa munyuhi kɛ fĩa nɛ pi nɛ a je blɔ kaa a maa pee jã. (La 31:5; 2Mo 23:1) Lakpa munyuhi nɛ a gbɛɔ kɛ fĩaa a ma nyɛ maa ye nihi awi wawɛɛ. Ke o ngɛ hlae nɛ o le ke ji munyu ko ji anɔkuale ɔ, mo bi o he ke:
‘Anɛ ma nyɛ ma fĩa kɛ fɔ he nɛ munyu ɔ je ɔ nɔ lo?’ Eko ɔ, nɔ nɛ ngɛ mo amaniɛ ɔ bɔe ɔ li anɔkuale ɔ tsuo nɛ ngɛ sane ɔ mi. Behi fuu ɔ, ke nihi nu munyu ko nɛ a ngɛ ni kpahi dee ɔ, munyu ɔ tsakeɔ, enɛ ɔ he ɔ, moo hyɛ nɛ hi ke o li he tutuutu nɛ munyu ɔ je. Ke nyɛmimɛ nu munyu ko kɛ je nihi nɛ a ngɛ sɔmɔmi he blɔhi ngɛ asafo ɔ mi ɔ a ngɔ ɔ, a heɔ yeɔ. Enɛ ɔ he ɔ, e sa nɛ a hyɛ saminya konɛ a ko gbɛ munyu nɛ odase ko be he nɛ tsɔɔ kaa e ji anɔkuale ɔ kɛ fĩa
‘Anɛ munyu ɔ maa gbe nɔ he guɛ lo?’ Ke munyu ɔ ma puɛ nɔ ko aloo kuu ko biɛ ɔ, e maa hi wawɛɛ kaa o be nɔ ko dee.—Abɛ 18:8; Flp 4:8
‘Anɛ e ji munyu nɛ sa kaa a he ye lo?’ Moo hyɛ nɛ hi ke o nu munyu ko aloo níhi a si kpami ko nɛ maa pee nɔ nyakpɛ ɔ he
NYƐƐ HYƐ VIDEO NƐ JI, MƐNI MA PEE KONƐ MA KO YE NIHI A HE SIEKU? LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:
Ngɛ Abɛ 12:18 nya a, mɛni awi nɛ munyu ma nyɛ maa ye nihi?
Kɛ Filipi Bi 2:4 ɔ maa ye bua wɔ ha kɛɛ konɛ waa le nɔ́ nɛ sa kaa wa de ngɛ nihi a he?
Ke waa kɛ nihi ngɛ ní sɛɛe nɛ a bɔni he fɛu yemi munyu tumi loo a bɔni munyu nɛ sɛ tumi ngɛ nɔ ko he ɔ, mɛni e sa kaa waa pee?
Loko wa maa tu nihi a he munyu ɔ, mɛni sanehi e sa kaa wa bi wa he?