Anɛ O Suɔ Kaa O Maa Ya Sukuu Kɛ Ha Matsɛ Yemi Sane Kpakpa Fiɛɛli ɔ Eko Lo?

Anɛ o ye kɛ je jeha 23 kɛ ya si 65 nɛ o ngɛ be tsuo sɔmɔmi ní tsumi ɔ mi lo? Anɛ o ngɛ nɔmlɔ tso mi he wami kpakpa, nɛ o ma nyɛ ma sɔmɔ ngɛ he nɛ fiɛɛli fuu a he hia ngɛ lo? Ke o heto ɔ ji ee ɔ, anɛ o susu Sukuu Kɛ Ha Matsɛ Yemi Sane Kpakpa Fiɛɛli ɔ eko nɛ o maa ya a he lo? Kɛ je benɛ a je sukuu nɛ ɔ sisi ɔ, nyɛmimɛ akpehi abɔ nɛ a sɛ gba si himi mi kɛ nyɛmimɛ nyumuhi kɛ yihi nɛ a sɛ we gba si himi mi ɔ ya eko. Se wa hia nyɛmimɛ nyumuhi fuu nɛ a sɛ we gba si himi mi ɔ nɛ́ a ya eko. Moo sɔle kɛ ha Yehowa konɛ e ye bua mo nɛ o ya o hɛ mi ngɛ e suɔmi nya ní peemi mi nɛ o kase e Bi ɔ. (La 40:8; Mat 20:28; Heb 10:7) Lɔ ɔ se ɔ, ke hiɔ ko ngɛ o kuɛ nɔ ɔ moo hyɛ bɔ nɛ o ma plɛ kɛ wo, aloo o gbɔ be nɛ o kɛ tsuɔ ní loo weku blɔ nya ní tsumihi ɔ a nɔ bɔ nɛ pee nɛ o he nɛ su.

Mɛni sɔmɔmi he blɔhi lɛ nihi nɛ a nine su teokrase tsɔsemi nɛ ɔ nɔ ɔ ná? A ha nɛ nyɛmimɛ nɛ a gbe sukuu nɛ ɔ nya a ekomɛ ya ngɛ sɔmɔe ngɛ hehi nɛ a tuɔ gbi kpa ngɛ, aloo a kɛ a he woɔ ma nɔ odase yemi klɛdɛɛ ngɛ ma nguahi a mi ɔ mi. Pee se ɔ, a ti ni komɛ sɔmɔɔ kaa kpɔ mi nɔ hyɛli a nane mi dali, aloo kpɔ mi nɔ hyɛli, aloo ma se sane kpakpa fiɛɛli. Be mi nɛ o ngɛ níhi nɛ o ma nyɛ maa pee ngɛ Yehowa sɔmɔmi mi ɔ he susue ɔ, moo bɔ mɔde nɛ o ná su nɛ gbalɔ Yesaya ná a eko. E de ke: “I ngɛ hiɛ ɔ! Moo tsɔ mi!”​—Yes 6:8.

NYƐƐ HYƐ VIDEO NƐ JI, ‘MA SE SANE KPAKPA FIƐƐLI​—NÍ TSULI NGƐ NÍ KPAMI NÍ TSUMI Ɔ MI, LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:

• 

  Mɛni blɔ nɔ a guɔ kɛ hlaa ma se sane kpakpa fiɛɛli?

• 

  Mɛni ní tsumi kpakpa nɛ ma se sane kpakpa fiɛɛli ngɛ tsue?

• 

  Mɛni jɔɔmihi nɛ ma se sane kpakpa fiɛɛli náa?