KRISTOFOHI A SI HIMI
Mɛnɔmɛ Nɛ O Kɛ Bɔɔ Ngɛ Intanɛti ɔ Nɔ?
A tsɔɔ huɛ sisi kaa “nɔ ko nɛ e mɛtɛɔ nɔ ko he nɛ e jeɔ suɔmi kɛ bumi kpo kɛ tsɔɔ lɛ.” Kaa nɔ hyɛmi nɔ́ ɔ, benɛ David gbe Goliat se ɔ, Yonatan kɛ David ba nu huɛ gbagbanii nɛ nɔ́ ko nɔ́ ko pue we a kpɛti. (1Sam 18:1) Mɛ tsuo a je su kpakpahi nɛ mwɔ a sibi hɛ kpo, nɛ lɔ ɔ lɛ ha nɛ a kɛ a sibi bɔ huɛ ɔ nɛ. Enɛ ɔ he ɔ, loko huɛ bɔmi nɛ mi wa maa hi nihi a kpɛti ɔ, ja a le a sibi saminya. Loko o maa le nɔ ko saminya a, e biɔ be kɛ mɔde bɔmi. Se ngɛ Intanɛti nɔ huɛ bɔmi hehi ɔ, o ma nyɛ ma ná huɛmɛ fuu ngɛ be kpiti mi pɛ. Ejakaa nihi nɛ a ngɛ Intanɛti nɔ huɛ bɔmi hehi nɛ ɔmɛ ma nyɛ ma de ní kpakpahi, nɛ a ma nyɛ ma tsake a ní peepee hulɔ konɛ nihi nɛ a na mɛ kaa nimli kpakpahi. Enɛ ɔ he ɔ, e yi kulaa kaa a maa laa nimli nɛ a ji tutuutu ɔ nɔ. Lɔ ɔ he ɔ, e sa nɛ o hyɛ saminya ngɛ nihi nɛ o kɛ bɔɔ ngɛ Intanɛti ɔ nɔ ɔ he. Ke nɔ ko nɛ o li lɛ bi kaa e maa suɔ nɛ e kɛ mo nɛ pee huɛ ngɛ Intanɛti ɔ nɔ ɔ, koo ye gbeye kaa o ma kua e ní bimi ɔ kɛ susumi ɔ kaa lɔ ɔ maa hao lɛ. Nihi fuu kɛ Intanɛti nɔ huɛ bɔmi hehi tsu we ní kulaa ngɛ oslaa nɛ́ e kɛ ma nyɛ maa ba a he je. Se kɛ̃ ɔ, ke o hla kaa o kɛ Intanɛti nɔ huɛ bɔmi hehi ma tsu ní ɔ, mɛni lɛ e sa nɛ e hi o juɛmi mi?
NYƐƐ HYƐ VIDEO NƐ JI, O KƐ INTANƐTI NƆ HUƐ BƆMI HEHI NƐ TSU NÍ NGƐ NILE MI, LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:
Loko o maa ngɔ munyuhi loo fonihi kɛ fɔ Intanɛti ɔ nɔ ɔ, mɛni he e sa nɛ o susu?
Mɛni he je nɛ e sa nɛ o hyɛ saminya ke o maa hla huɛmɛ ngɛ Intanɛti ɔ nɔ ɔ?
Mɛni he je nɛ e sa nɛ o ha nɛ huzu nɛ hi be abɔ nɛ o yeɔ ngɛ Intanɛti nɔ huɛ bɔmi he ko he ɔ?—Efe 5:15, 16