Kahi Tsuo Nɛ Waa Kɛ Ngɛ Kpee ɔ Maa Ba Nyagbe Ligbi Ko

Ke kahi nɛ waa kɛ ngɛ kpee ɔ se ngɛ kɛe ɔ, e ma nyɛ ma ha nɛ wa kɔni mi nɛ jɔ̃ mla. David le kaa nyagbahi tsuo nɛ Matsɛ Saul ha nɛ e kɛ ngɛ kpee ɔ se maa po kokooko, nɛ e ma ba ye matsɛ kaa bɔ nɛ Yehowa wo si ɔ. (1Sam 16:13) Hemi kɛ yemi nɛ David ngɛ ɔ ye bua lɛ nɛ e to e tsui si kɛ mlɛ Yehowa konɛ Yehowa nitsɛ nɛ tsu sane ɔ he ní.

Ke waa kɛ ka ko ngɛ kpee ɔ, wa ma nyɛ maa ngɔ hɛ si kami, nile kɛ nyɛmi nɛ a kɛ susuɔ nɔ́ he ɔ kɛ tsu si fɔfɔɛ ɔ he ní. (1Sam 21:12-14; Abɛ 1:4) Se nyagba amɛ ekomɛ ngɛ nɛ ke wa bɔ mɔde nɛ waa kɛ Baiblo sisi tomi mlaahi tsu ní po ɔ, loloolo ɔ, a be jee. Ke e ba lɛ jã a, e sa nɛ waa to wa tsui si nɛ waa mlɛ Yehowa. E be kɛe nɛ Yehowa maa po wa nɔ́ namihi tsuo a se nɛ e ma “tsu vo nyu fɛɛ vo nyu” ngɛ wa hɛ mi. (Kpj 21:4) Ke Yehowa pee nɔ́ ko kɛ tsu wa nyagba a he ní jio, aloo nɔ́ kpa ko lɛ ye bua wɔ jio, nɔ́ kake ko nɛ e sa nɛ wa hɛ nɛ hi nɔ ji: Kahi tsuo nɛ waa kɛ ngɛ kpee ɔ maa ba nyagbe ligbi ko. Anɔkuale munyu nɛ ɔ ma nyɛ maa wo wa bua.

NYƐƐ HYƐ VIDEO NƐ JI, NIHI NƐ KAKE PEEMI NGƐ A KPƐTI NGƐ JE NƐ KAKE PEEMI BE MI Ɔ MI, LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:

• Mɛni nyagbahi nɛ Kristofohi komɛ nɛ a ngɛ United States woyi je ɔ kɛ kpe?

• Mɛni a pee kɛ tsɔɔ kaa a to a tsui si nɛ a je suɔmi kpo?

• Mɛni a pee kɛ tsɔɔ kaa a ya nɔ nɛ a ngɔ a juɛmi kɛ maa “níhi nɛ a he hia wawɛɛ” ɔmɛ a nɔ?​—Flp 1:10