KRISTOFOHI A SI HIMI
Mo Hla Mawu Juɛmi Ngɛ Níhi A He
Wa suɔ nɛ wa ní peepeehi tsuo nɛ sa Yehowa hɛ mi. (Abɛ 27:11) Loko wa ma nyɛ maa pee jã a, e sa nɛ waa mwɔ yi mi kpɔhi nɛ kɛ Yehowa susumi kɔ, ke mlaa pɔtɛɛ ko be he po. Mɛni maa ye bua wɔ konɛ wa nyɛ nɛ waa pee jã?
Moo ya nɔ nɛ o kase Baiblo ɔ daa ligbi. Be fɛɛ be nɛ wa maa kane Baiblo ɔ, e ngɛ kaa nɔ́ nɛ waa kɛ Yehowa ngɛ ní sɛɛe. Ke wa na bɔ nɛ Yehowa kɛ e we bi ye ha, nɛ wa susu ní yayahi kɛ ní kpakpahi nɛ nihi pee ngɛ Yehowa hɛ mi ɔ he ɔ, lɔ ɔ maa ye bua wɔ nɛ́ waa le Yehowa susumi ngɛ níhi a he. Ke e he ba hia kaa waa mwɔ yi mi kpɔ ko ɔ, mumi klɔuklɔu ɔ maa kai wɔ níhi nɛ a he hia kɛ sisi tomi mlaahi nɛ wa kase ngɛ Mawu Munyu ɔ mi ɔ.—Yo 14:26.
Mo hla níhi a mi. Ke e he ba hia nɛ o mwɔ yi mi kpɔ ko ɔ, mo bi o he ke, ‘Mɛni Baiblo ngmami loo Baiblo mi sane ko lɛ maa ye bua mi konɛ ma le bɔ nɛ Yehowa nuɔ he ha ngɛ sane ɔ he?’ Moo sɔle kɛ bi Yehowa yemi kɛ buami, nɛ o ngɔ níhi a mi hlami níhi nɛ a ngɛ o je gbi mi ɔ kɛ tsu ní kɛ hlá Baiblo sisi tomi mlaahi nɛ a kɔɔ o si fɔfɔɛ ɔ he nɛ o kɛ tsu ní.—La 25:4.
NYƐƐ HYƐ VIDEO NƐ JI, E SA NƐ “WAA KƐ HƐ MI MIAMI NƐ TU FO Ɔ”—MOO YE NIYE NÍ NƐ MA HA MO HE WAMI, LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:
Mɛni si fɔfɔɛhi nɛ a mi wa nɛ nyɛmiyo wayoo ɔ nɛ ngɛ video ɔ mi ɔ kɛ kpe?
Kɛ níhi a mi hlami nɛ o maa pee ngɛ wa womi ɔmɛ a mi ɔ maa ye bua mo kɛ da si fɔfɔɛhi nɛ a ngɛ kaa jã amɛ a nya ha kɛɛ?
Ke wa he be kɛ hla níhi a mi, nɛ wa kase ní ngɛ wa dɛ he konɛ wa nyɛ nɛ waa mwɔ yi mi kpɔhi nɛ da a, kɛ wa ma ná he se kɛɛ?—Heb 5:13, 14