Yehowa ‘Tsɔɔ Mi Blɔ Nɛ Da’

YE FƆLI YE BUA MI NƐ I NA BLƆ NƐ DA A

Ye fɔli kase anɔkuale ɔ ngɛ jeha 1920 jeha amɛ a mi loko a sɛ gba si himi mi. A fɔ mi ngɛ jeha 1939 ɔ mi. Benɛ i ji jokuɛyo ɔ, wa hi England. I nyɛɛɔ ye fɔli ɔmɛ a se kɛ yaa Kristofohi a kpehi. Pee se ɔ, i kɛ ye he wo Teokrase Sɔmɔmi Sukuu ɔ mi. Loloolo ɔ, i kaiɔ kekleekle be nɛ i ná ní peemi ngɛ sukuu ɔ mi ɔ. E biɔ nɛ ma da daka ko nɔ ngɛ munyu tumi kpoku ɔ nɔ konɛ ma ya hiɔwe bɔ nɛ pee nɛ ma na nyɛmimɛ ɔmɛ a hɛ mi. Jamɛ a be ɔ, i ye jeha ekpa pɛ, nɛ i ye gbeye benɛ i na nikɔtɔmahi nɛ a pueɔ si ngɛ Matsɛ Yemi Asa a nɔ ɔ.

Ye papaa ngmaa munyu komɛ ngɛ kaadi nɔ konɛ ma kɛ tsu ní ngɛ fiɛɛmi mi. Benɛ i ye jeha kpaanyɔ ɔ, ligbi ko ɔ, imi nɔ kake too i ya si nɔ ko sinya ngɛ fiɛɛmi mi. Ye bua jɔ wawɛɛ benɛ wetsɛ ɔ kane munyu nɛ ngɛ kaadi ɔ nɔ ɔ nɛ e ngɔ womi nɛ ji, “Let God Be True”! ɔ. Kɛkɛ nɛ i tu fo nɛ i ya de ye papaa nɔ́ nɛ ya nɔ ɔ. Fiɛɛmi ní tsumi ɔ kɛ asafo mi kpehi ha nɛ i ná bua jɔmi nɛ i ná suɔmi ɔ kaa i kɛ ye be tsuo ma sɔmɔ Yehowa.

Kɛ je benɛ ye papaa to blɔ nya konɛ ye nine nɛ su Hwɔɔmi Mɔ ɔmɛ a nɔ ɔ, ye bua ba jɔ Baiblo ɔ mi anɔkuale ɔ he wawɛɛ. Be fɛɛ be nɛ ye nine maa su eko nɔ ɔ, i kɛ bua jɔmi kaneɔ. Hɛ kɛ nɔ fɔmi nɛ i ngɛ ngɛ Yehowa mi ɔ mi ba wa, nɛ lɔ ɔ ha nɛ i jɔɔ ye wami nɔ kɛ ha lɛ.

Ngɛ jeha 1950 ɔ mi ɔ, i kɛ ye weku ɔ ya kpe ko nɛ yi ji Theocracy Increase ɔ ngɛ New York. So, August 3 munyuyi ɔ ji “Missionary Day.” Jamɛ a ligbi ɔ, Nyɛminyumu Carey Barber, nɛ pee se ɔ, e sɔmɔ kaa Blɔ Tsɔɔmi Ajla Toli ɔmɛ a kpɛti nɔ kake ɔ lɛ tu baptisimi munyu ɔ. I piɛɛ nihi nɛ a maa baptisi mɛ ɔ a he, lɔ ɔ he ɔ, benɛ e bi sane bimi enyɔ ɔ ta a, i te si nɛ i de ke, “Ee!” Jamɛ a be ɔ, i ye jeha 11 se i yɔse kaa i mwɔ yi mi kpɔ ko nɛ he hia wawɛɛ. Se i ye gbeye kaa ma ya sɛ nyu ɔ mi ejakaa i li slemi. Ye tsɛko ɔ piɛɛ ye he kɛ ya he nɛ a maa baptisi mi ngɛ ɔ, nɛ e ha nɛ i ná nɔ mi mami kaa nɔ́ fɛɛ nɔ́ maa ya nɔ saminya. Ngɛ anɔkuale mi ɔ, baptisimi ɔ se kɛ we kulaa, nɛ ye nane po pi nyu ɔ sisi. Nyɛminyumu ko baptisi mi, nɛ nyɛminyumu kpa wo ye nɔ kɛ je nyu ɔ mi. Kɛ je jamɛ a ligbi klɛdɛɛ nɛ ɔ nɔ kɛ yaa a, Yehowa ya nɔ nɛ e tsɔɔ mi blɔ nɛ da.

I NGƆ YE HƐ KƐ FƆ YEHOWA NƆ

Benɛ i gbe sukuu nya a, jinɛ i suɔ kaa ma tsu blɔ gbami ní tsumi ɔ, se ye tsɔɔli ɔmɛ wo mi he wami kaa ma ya yunivɛsiti. A munyu ɔ ná ye nɔ he wami nɛ i ya yunivɛsiti ɔ, se e kɛ we nɛ i yɔse kaa i be nyɛe nɛ i kɛ ye juɛmi nɛ ma nɔ́ nɛ i ngɛ kasee ɔ nɔ, nɛ́ jamɛ a be ɔ mi nɔuu ɔ, ma ya ye hɛ mi ngɛ anɔkuale ɔ mi. Lɔ ɔ he ɔ, i mwɔ ye yi mi kpɔ kaa ma kpa. I ngɔ sane ɔ kɛ fɔ Yehowa hɛ mi ngɛ sɔlemi mi, nɛ i ngma sɛ womi kɛ ya ha ye tsɔɔli ɔmɛ nɛ i de mɛ kaa ma kpa sukuu ɔ ke ye kekleekle jeha a ba nyagbe. I ngɔ ye hɛ kɛ fɔ Yehowa nɔ wawɛɛ, nɛ i je blɔ gbami ní tsumi ɔ sisi oya nɔuu.

Ngɛ July 1957 ɔ mi ɔ, i je be tsuo sɔmɔmi ní tsumi ɔ sisi ngɛ Wellingborough ma a mi. I de nyɛmimɛ nɛ a ngɛ London Betel ɔ kaa a tsɔɔ mi nyɛminyumu ko nɛ e ji blɔ gbalɔ nɛ e nane pi si nɛ ma nyɛ ma ya piɛɛ e he. Nyɛminyumu Bert Vaisey tsɔɔ mi níhi fuu. E kɛ kã tsuɔ fiɛɛmi ní tsumi ɔ, nɛ e ye bua mi nɛ i to blɔ nya kpakpa kɛ ha fiɛɛmi ní tsumi ɔ. Wɔ nihi nɛ wa ngɛ asafo ɔ mi ji imi, Nyɛminyumu Vaisey kɛ nyɛmimɛ yi nikɔtɔmahi ekpa. Ye he nɛ i dlaa kɛ haa asafo mi kpehi kɛ ye he nɛ i kɛ woɔ mi ɔ haa nɛ i náa he blɔhi fuu kɛ jeɔ ye hemi kɛ yemi kpo nɛ i ngɔɔ ye hɛ kɛ fɔɔ Yehowa nɔ.

A wo mi tsu be bɔɔ akɛnɛ i kua kaa i kɛ ye he be ta buli a ní tsumi mi woe ɔ he je. Lɔ ɔ se ɔ, i kɛ Barbara nɛ ji blɔ gbalɔ klɛdɛɛ ɔ kpe. Wa sɛ gba si himi mi ngɛ jeha 1959 ɔ mi, nɛ wa pee klaalo kaa wa maa ya he fɛɛ he nɛ asafo ɔ ma de ke waa ya a. Sisije ɔ, wa ya sɔmɔ ngɛ Lancashire ngɛ England yiti je ngɛ pusinɔ he blɔ. Ngɛ January jeha 1961 ɔ mi ɔ, a fɔ mi nine kaa ma ya Matsɛ Yemi Sɔmɔmi Sukuu ngɛ London Betel nyɔhiɔ kake. Benɛ sukuu ɔ ba nyagbe ɔ, e pee mi nyakpɛ kaa a ke ma ya tsu kpɔ mi nɔ hyɛmi ní tsumi ɔ. Kpɔ mi nɔ hyɛlɔ ko nɛ e ngɛ níhi a si kpami ɔ tsɔse mi ngɛ Birmingham ma a mi, nɛ a ha nɛ Barbara hu ba piɛɛ ye he. Kɛkɛ nɛ wa kpale kɛ ya Lancashire kɛ Cheshire nɛ wa ya je wa ní tsumi ɔ sisi.

E DA BLƆ KAA WA NGƆ WA HƐ KƐ FƆ YEHOWA NƆ

Ngɛ August jeha 1962 ɔ mi benɛ wa sɔmɔ we asafo ko nɛ wa ngɛ wa he jɔɔe ɔ, wa nine su sɛ womi ko nɔ kɛ je asafo ɔ ní tsumi kɔni ɔ. Nɔ́ nɛ ngɛ sɛ womi ɔ mi ji Gilead Sukuu blɔ bimi womi! Benɛ wa sɔle ngɛ he ta a, i kɛ Barbara ngma blɔ bimi womi ɔ nɔ ní, nɛ wa kɛ mane asafo ɔ ní tsumi kɔni ɔ. Ngɛ nyɔhiɔ enuɔ se ɔ, wa ya Gilead sukuu nɛ to nɔ 38 ɔ ngɛ Brooklyn ngɛ New York. A kɛ nyɔhiɔ nyɔngma lɛ tsɔse wɔ ngɛ teokrase sukuu nɛ ɔ mi.

Benɛ wa ya Gilead sukuu ɔ, wa kase Mawu Munyu ɔ, e we asafo ɔ, kɛ nyɛmimɛ a kuu ɔ he ní fuu. Jamɛ a be ɔ, wa yi jeha 25 lolo. Wa kase níhi fuu kɛ je nihi nɛ waa kɛ mɛ ya sukuu ɔ a ngɔ. E ji he blɔ ngua nɛ i ná kaa i piɛɛ Nyɛminyumu Fred Rusk nɛ e ji wa tsɔɔli ɔmɛ a kpɛti nɔ kake ɔ he kɛ tsu ní daa ligbi. Nɔ́ kake nɛ he hia nɛ i kase kɛ je e ngɔ ji kaa e sa nɛ waa wo nihi ga ngɛ blɔ nɛ da nɔ, nɛ tsɔɔ kaa e sa nɛ ga womi ɔ nɛ da Ngmami ɔ nɔ. Nyɛmimɛ nyumuhi nɛ a ngɛ níhi a si kpami nɛ a tsɔɔ wɔ ní ngɛ sukuu ɔ a kpɛti ni komɛ ji, Nathan Knorr, Frederick Franz, kɛ Karl Klein. Wa kase níhi fuu kɛ je nyɛminyumu ko nɛ e baa e he si nɛ a tsɛɛ lɛ ke A.  H.  Macmillan ɔ ngɔ. E tsɔɔ wɔ blɔ nɔ nɛ Yehowa gu kɛ ye bua e we bi nɛ a nyɛ da kahi nɛ a kɛ kpe kɛ je jeha 1914 kɛ ba si jeha 1919 sisije ɔ nya ha!

WA NÍ TSUMI TSAKE

Benɛ e piɛ bɔɔ nɛ sukuu ɔ maa ba nyagbe ɔ, Nyɛminyumu Knorr de i kɛ Barbara kaa a ma ha nɛ wa ya sɔmɔ ngɛ Burundi ngɛ Afrika. Oya nɔuu nɛ wa ya Betel womi to he ɔ, nɛ wa ya hyɛ Yearbook ɔ mi kaa wa maa na fiɛɛli abɔ nɛ a ngɛ Burundi jamɛ a be ɔ lo. Nyakpɛ sane ji kaa wa nɛ́ fiɛɛli abɔ nɛ a ngɛ Burundi ma a mi ɔ ngɛ womi ɔ mi he ko he ko! Wa na kaa wa yaa he ko nɛ a tsu we fiɛɛmi ní tsumi ɔ ngɛ hyɛ. E ji he ko nɛ wa li ma a he sane ko tsɔ. Wa pee yeyeeye wawɛɛ! Se benɛ wa sɔle ha Yehowa a, wa tsui nɔ wa mi.

He nɛ wa ya sɔmɔ ngɛ ɔ je ekpa kulaa ngɛ he nɛ wa je ɔ he. Kɔɔhiɔ mi si fɔfɔɛ, a kusumi, kɛ gbi nɛ a tuɔ ɔ je ekpa kulaa. Jehanɛ hu ɔ, e he ba hia nɛ waa kase French. Waa kɛ hwɔ he he nyagba hu kpe. Benɛ wa ya su ɔ, e we ligbi enyɔ se ɔ, Harry Arnott nɛ waa kɛ lɛ ya Gilead sukuu ɔ ba slaa wɔ benɛ e bee kɛ yaa he nɛ e ngɛ sɔmɔe ngɛ nɛ ji Zambia a. E ye bua wɔ nɛ wa na tsu, nɛ lejɛ ɔ nɛ wa hi kekle kaa ma se sane kpakpa fiɛɛli. E kɛ we nɛ ma nikɔtɔmahi nɛ a li Yehowa Odasefohi a he nɔ́ ko nɔ́ ko ɔ bɔni si temi kɛ wo wɔ. Benɛ wa bua bɔni jɔmi ngɛ wa ní tsumi ɔ mi ɔ, e kɛ we nɛ ma nikɔtɔma amɛ de wɔ kaa wa be nyɛe maa hi ma a mi ke wa be womi nɛ tsɔɔ kaa wa ma nyɛ nɛ wa tsu ní ngɛ ma a mi. Aywilɛho sane ji kaa e he ba hia nɛ waa je ma a mi kɛ ya Uganda.

Wa ye gbeye kaa wa maa ya Uganda be mi nɛ wa be visa, se wa ngɔ wa hɛ kɛ fɔ Yehowa nɔ. Nyɛminyumu ko nɛ e je Canada nɛ e ngɛ sɔmɔe ngɛ he nɛ fiɛɛli fuu a he hia ngɛ ngɛ Uganda a nyɛ nɛ e tsɔɔ wa si fɔfɔɛ ɔ mi kɛ tsɔɔ ma nikɔtɔma amɛ, nɛ a ngmɛ wɔ blɔ kaa wa ma nyɛ maa hi ma a mi nyɔhiɔ bɔɔ komɛ konɛ wa kɛ to blɔ bimi womi ɔ he blɔ nya. Enɛ ɔ ha nɛ wa na kaa Yehowa ngɛ wɔ ye buae.

Bɔ nɛ níhi ya nɔ ha ngɛ Uganda a je ekpa ngɛ bɔ nɛ níhi ya nɔ ha ngɛ Burundi ɔ. E ngɛ mi kaa fiɛɛli 28 pɛ lɛ ngɛ Uganda ma a mi mohu lɛɛ, se ke e hí kulaa fiɛɛmi ní tsumi ɔ ngɛ nɔ yae ngɛ lejɛ ɔ momo. Wa na nihi fuu ngɛ ma a mi nɛ a tuɔ Blɛfo gbi. Se e kɛ we nɛ wa yɔse kaa loko wa ma nyɛ maa ye bua nihi nɛ a bua jɔ sane kpakpa a he ɔ, ja wa kase gbihi nɛ a tuɔ ngɛ ma a mi ɔ a kpɛti kake. Wa bɔni fiɛɛmi ngɛ Kampala he nɛ a tuɔ Luganda ngɛ wawɛɛ, enɛ ɔ he ɔ, wa mwɔ wa yi mi kpɔ kaa wa maa kase jamɛ a gbi ɔ. E he wɔ jehahi fuu loko wa nyɛ nɛ wa nu gbi ɔ saminya, se lɔ ɔ ye bua wɔ nɛ wa nyɛ nɛ wa tsu fiɛɛmi ní tsumi ɔ saminya! E ha nɛ wa ba le nɔ́ nɛ e sa kaa waa tsɔɔ wa Baiblo kaseli ɔmɛ. Benɛ wa Baiblo kaseli ɔmɛ na bɔ nɛ wa bua jɔ a he ha a, a de wɔ a nyagbahi kɛ bɔ nɛ a nuɔ he ha ngɛ nɔ́ nɛ a ngɛ kasee ɔ he.

WA HIA BLƆ SLƆƆTOHI

Wa bua jɔɔ ke wa ye bua nihi nɛ a ba kase anɔkuale ɔ. Se wa bua jɔ wawɛɛ benɛ a de wɔ kaa wa tsu kpɔ mi nɔ hyɛmi ní tsumi ɔ ngɛ ma a mi ɔ. Asafo ɔ ní tsumi kɔni nɛ ngɛ Kenya a ha nɛ wa hia blɔ kɛ kpa Uganda ma a mi kɛ hla hehi nɛ a hia blɔ gbali klɛdɛɛ ngɛ. Behi fuu ɔ, waa kɛ nihi nɛ a kɛ Odasefohi po kpi hyɛ ɔ kpeɔ nɛ a peeɔ wɔ nibwɔ. A heɔ wɔ atuu, nɛ a hooɔ ní po kɛ haa wɔ.

Wa hia blɔ kpa ko hulɔ. I kɛ tlee hia blɔ ligbi enyɔ kɛ je Kampala kɛ ya Kenya ma nɛ ji Mombasa a mi. I kɛ mele hu hia blɔ kɛ ya Seychelles nɛ ji zugba kpɔ nɛ wo bɔle lɛ ngɛ Indian Ocean ɔ nɔ. Kɛ je jeha 1965 ɔ kɛ ba si jeha 1972 ɔ, Barbara piɛɔ ye he kɛ yaa Seychelles. Sisije ɔ, fiɛɛli enyɔ pɛ nɛ a ngɛ jamɛ a zugba kpɔ ɔ mi, nɛ pee se ɔ, a ba pee kuu, nɛ lɔ ɔ se ɔ, a ba pee asafo nɛ ngɛ e hɛ mi yae. I hia blɔ kɛ ya slaa nyɛmimɛ nɛ a ngɛ Eritrea, Ethiopia, kɛ Sudan.

Ta buli a kuu ko te si kɛ wo nɔ yelɔ ɔ nɛ a kpɔ nɔ yemi ɔ ngɛ e dɛ, enɛ ɔ ha nɛ níhi tsake ngɛ Uganda ma a mi. Níhi a mi ba wa ngɛ jehahi nɛ nyɛɛ se ɔ mi, nɛ lɔ ɔ ha nɛ i ba na nile nɛ ngɛ munyu nɛ ji “nyɛɛ ngɔ Kaisare níhi kɛ ha Kaisare” ɔ mi. (Maak. 12:17) Jamɛ a be ɔ, e ba biɔ nɛ nihi tsuo nɛ a je ma kpahi a nɔ ɔ nɛ a ya polisi tesia nɛ e kɛ a he kɛ we ɔ nɛ a ya ngma a biɛ. Oya nɔuu nɛ wa pee jã. Ligbi bɔɔ komɛ a se nɛ i kɛ lɔle bee ngɛ Kampala ma a mi ɔ, polisi komɛ wa i kɛ ma se sane kpakpa fiɛɛlɔ ko. Wa tsui po wawɛɛ! A po wa nya kaa wa ji slaali nɛ wa ma ma a he sane hlami, nɛ a ngɔ wɔ kɛ ya polisi tesia ngua nɛ ngɛ ma a mi ɔ. Benɛ wa su lejɛ ɔ, wa tsɔɔ mɛ nya kaa wa ji ma se sane kpakpa fiɛɛli, nɛ wa suɔ tue mi jɔmi. Wa de mɛ kaa wa ngma wa biɛ ngɛ polisi tesia a momo, se a bui wɔ tue. A ngɔ wɔ kɛ ya polisi tesia a he nɛ wa ngma wa biɛ ngɛ ɔ. Wa bua jɔ wawɛɛ kaa polisi ɔ nɛ ngɛ tesia a he nɛ wa ngma wa biɛ ngɛ ɔ yo wɔ nɛ e fã kaa a ngmɛɛ wa he!

Ngɛ jamɛ a be ɔ mi ɔ, waa kɛ si fɔfɔɛhi nɛ mi wa pɔɔ kpemi ngɛ he nɛ ta buli tsi blɔ ngɛ ɔ, titli ke ta buli nɛ a nuu da wawɛɛ ɔ lɛ a wa mo. Be fɛɛ be nɛ e maa ba jã a, wa sɔleɔ nɛ wa peeɔ kpoo, enɛ ɔ he ɔ, a ngmɛɔ wɔ blɔ nɛ wa beɔ slɔkee. Aywilɛho sane ji kaa, ngɛ jeha 1973 ɔ mi ɔ, a fã ma se sane kpakpa fiɛɛli tsuo kaa a je Uganda.

Wa ní tsumi tsake ekohu. A ha nɛ wa ya sɔmɔ ngɛ Côte d’Ivoire ngɛ West Africa. Enɛ ɔ hu ji tsakemi ngua kɛ ha wɔ. E ba biɔ nɛ waa kase kusumi ehe, waa tu French ekohu, nɛ waa kase bɔ nɛ waa kɛ ma se sane kpakpa fiɛɛli nɛ a je ma kpahi a nɔ ɔ maa hi si ha! Ngɛ hiɛ ɔ hu ɔ, wa na bɔ nɛ Yehowa ngɛ níhi kudɔe ha, benɛ tsui kpakpatsɛmɛ nɛ a baa a he si kplɛɛ sane kpakpa a nɔ amlɔ nɔuu ɔ. Wa na bɔ nɛ wa hɛ nɛ waa kɛ fɔ Yehowa nɔ ɔ ha nɛ e tsɔɔ wɔ blɔ nɛ da ha.

Se e kɛ we nɛ dɔkitahi hyɛ Barbara, nɛ a na kaa e ná kansa. Wa ya Europe si abɔ konɛ Barbara nɛ ya ná tsami ngɛ lejɛ ɔ, nɛ ngɛ jeha 1983 ɔ mi ɔ, wa ba na kaa wa be nyɛe ma sɔmɔ ngɛ Afrika hu. Enɛ ɔ dɔ wɔ wawɛɛ!

WA SI FƆFƆƐ TSAKE

Benɛ wa ngɛ sɔmɔe ngɛ London Betel ɔ, Barbara kansa a mi ba wa, nɛ e gbo. Benɛ e ba jã a, Betel weku ɔ ye bua mi wawɛɛ. Weku ko ye bua mi kɛ da si fɔfɔɛ ɔ nya, nɛ i ya nɔ nɛ i ngɔ ye hɛ kɛ fɔ Yehowa nɔ. Pee se ɔ, i kɛ nyɛmiyo ko nɛ e jeɔ we mi kɛ ba yeɔ bua ngɛ Betel, nɛ e sɔmɔ kaa blɔ gbalɔ klɛdɛɛ be ko nɛ be ɔ kpe. Nyɛmiyo nɛ ɔ suɔ Yehowa wawɛɛ nitsɛ. A tsɛɛ nyɛmiyo nɛ ɔ ke Ann. I kɛ Ann sɛ gba si himi mi ngɛ jeha 1989 ɔ mi nɛ wa sɔmɔ ngɛ London Betel.

I ná he blɔ kɛ sɔmɔ kaa asafo ɔ ní tsumi yi ɔ nane mi dalɔ (nɛ be ko nɛ be ɔ, a tsɛɛ lɛ ke zone overseer a) kɛ je jeha 1995 kɛ ba si jeha 2018 ɔ mi, nɛ i ya mahi maa pee 60 a nɔ. Ngɛ ma fɛɛ ma nɛ i ya a mi ɔ, i na bɔ nɛ Yehowa ngɛ e sɔmɔli jɔɔe ngɛ si fɔfɔɛ slɔɔtohi a mi ha.

Ngɛ jeha 2017 ɔ mi ɔ, i kpale kɛ ya Afrika. Ye bua jɔ wawɛɛ kaa i kɛ Ann ya Burundi, nɛ bɔ nɛ fiɛɛmi ní tsumi ɔ ya hɛ mi ngɛ lejɛ ɔ ha a pee wɔ nyakpɛ! I na lɔle blɔ ko nɛ i tsu wehi a mi fiɛɛmi ní tsumi ɔ ngɛ nɔ ngɛ jeha 1964 ɔ mi, nɛ amlɔ nɛ ɔ, a ma asafo ní tsumi kɔni ngɛ lejɛ ɔ. Fiɛɛli nɛ a hiɛ pe 15,500 lɛ a ngɛ ma a mi amlɔ nɛ ɔ.

Ye bua jɔ wawɛɛ benɛ i na hehi nɛ ma hia blɔ kɛ ya ngɛ jeha 2018 ɔ mi ɔ. I na kaa Côte d’Ivoire piɛɛ mahi nɛ ma hia blɔ kɛ ya a nɔ ɔ he. Benɛ wa ya su Abidjan nɛ ji Côte d’Ivoire ma nɛ kle pe kulaa a mi ɔ, i nu he kaa i ba we mi. I hyɛ womi nɛ Betel sɔmɔli a tɛlifoo nɔma ngɛ mi ɔ mi, nɛ i na kaa nyɛminyumu nɛ ngɛ tsu nɛ tsa wa nɔ́ ɔ nɔ ɔ ji Nyɛminyumu Sossou. I kai kaa e sɔmɔ kaa city overseera benɛ i ngɛ Abidjan ɔ. Mamoo tsa pi lɛ, e bi.

Yehowa ye e si womi ɔ nɔ. Nyagbahi nɛ i kɛ kpe ɔ ha nɛ i na kaa ke wa ngɔ wa hɛ kɛ fɔ Yehowa nɔ ɔ, e maa tsɔɔ wɔ blɔ nɛ da. Amlɔ nɛ ɔ, wa suɔ nɛ waa ya nɔ nɛ waa nyɛɛ blɔ nɛ e kɛ nɔ yaa je ehe ɔ mi ɔ nɔ.​—Abɛ 4:18.