Asafo ɔ Tsuo Ma Nyɛ Maa Ye Bua Baiblo Kaselɔ Nɛ E Ya E Hɛ Mi Kɛ Su Baptisimi He

1-2. Mɛnɔmɛ ma nyɛ maa ye bua Baiblo kaselɔ ko nɛ e ya e hɛ mi kɛ su baptisimi he?

NYƐMIYO ko nɛ a tsɛɛ lɛ ke Amy nɛ e ngɛ Fiji ɔ de ke: “Ye bua jɔ nɔ́ nɛ i ngɛ kasee ngɛ Baiblo ɔ mi ɔ he. I le kaa lɔ ɔ ji anɔkuale ɔ nɛ. Se benɛ i kɛ nyɛmimɛ bɔni bɔmi ngɛ Matsɛ Yemi Asa a nɔ ɔ loko i bɔni tsakemi peemi, nɛ i ha nɛ a baptisi mi.” Amy níhi a si kpami ɔ maa anɔkuale sane nɛ ɔ nɔ mi: Baiblo kaselɔ ma nyɛ maa ya e hɛ mi kɛ su baptisimi he ke nihi nɛ a ngɛ asafo ɔ mi ɔ ye bua lɛ.

² Fiɛɛli tsuo nɛ a ngɛ asafo ɔ mi ɔ ma nyɛ maa ye bua nɛ asafo ɔ nɛ ya hɛ mi. (Efe. 4:16) Daa blɔ gbalɔ ko nɛ a tsɛɛ lɛ ke Leilani nɛ e ngɛ Vanuatu ɔ de ke: “A pɔɔ demi ke: Pi nɔ kake nɛ lɛɛ bi. I susu kaa munyu nɛ ɔ ji anɔkuale ngɛ kaselɔ peemi ní tsumi ɔ blɔ fa mi. Behi fuu ɔ, nihi nɛ a ngɛ asafo ɔ mi ɔ tsuo lɛ a yeɔ bua loko nɔ ko baa anɔkuale ɔ mi.” Weku li, huɛmɛ, kɛ tsɔɔli yeɔ bua loko jokuɛ ko waa. A peeɔ jã kɛ gu he wami nɛ a woɔ lɛ kɛ níhi nɛ a he hia ngɛ si himi mi nɛ a tsɔɔ lɛ ɔ nɔ. Jã nɔuu kɛ̃ nɛ fiɛɛli hu ma nyɛ maa wo Baiblo kaseli ga, a wo mɛ he wami, nɛ a pee nɔ hyɛmi nɔ́ kpakpa kɛ ha mɛ konɛ a ya a hɛ mi kɛ su baptisimi he.​—Abɛ 15:22.

3. Mɛni o kase ngɛ nɔ́ nɛ Ana, Daniel, kɛ Leilani de ɔ mi?

³ Mɛni he je nɛ e sa nɛ tsɔɔlɔ nɛ ngmɛ blɔ nɛ fiɛɛli kpahi nɛ a ye bua e Baiblo kaselɔ ɔ? Mo kadi nɔ́ nɛ Ana nɛ e ji blɔ gbalɔ klɛdɛɛ nɛ e ngɛ Moldova a de. E de ke: “E he waa kaa nɔ kake maa ye bua Baiblo kaselɔ nɛ e ya e hɛ mi nɛ a baptisi lɛ.” Danielb nɛ e ji blɔ gbalɔ klɛdɛɛ nɛ lɛ hu e ngɛ sɔmɔe ngɛ Moldova a de ke: “Behi fuu ɔ, fiɛɛli komɛ deɔ níhi nɛ taa Baiblo kaselɔ tsui he wawɛɛ. A deɔ ní komɛ nɛ ye juɛmi sui he po.” Leilani nɛ wa tu e he munyu kɛ sɛ hlami ɔ de ke: “Ke nyɛmimɛ je suɔmi kpo kɛ tsɔɔ Baiblo kaselɔ ko nɛ a susu e he ɔ, lɔ ɔ ma nyɛ ma ha nɛ e yɔse kaa wa ji Yehowa we bi.”​—Yoh. 13:35.

4. Mɛni he wa ma susu ngɛ ní kasemi nɛ ɔ mi?

⁴ Eko ɔ, o ma bi ke, ‘Mɛni ma nyɛ ma pee kɛ ye bua Baiblo kaselɔ nɛ e ya e hɛ mi be mi nɛ pi imi nɛ i kɛ lɛ ngɛ Baiblo ɔ kasee?’ Nyɛ ha nɛ wa susu nɔ́ nɛ wa ma nyɛ maa pee ke Baiblo tsɔɔlɔ ko kɛ Baiblo kaselɔ ko yaa kase Baiblo ɔ nɛ e fɔ wɔ nine kaa waa piɛɛ e he, kɛ nɔ́ nɛ wa ma nyɛ maa pee ke Baiblo kaselɔ bɔni asafo mi kpe bami ɔ he nɛ waa hyɛ. Wa maa na nɔ́ nɛ asafo mi nikɔtɔmahi ma nyɛ maa pee kɛ ye bua Baiblo kaseli nɛ a ya a hɛ mi kɛ su baptisimi he.

KE O PIƐƐ BAIBLO TSƆƆLƆ HE NƐ NYƐƐ KƐ NƆ KO NGƐ BAIBLO Ɔ KASEE

5. Ke Baiblo tsɔɔlɔ ko fɔ mo nine kaa o piɛɛ e he kɛ pee Baiblo mi ní kasemi ɔ, mɛni e sa nɛ o pee?

⁵ Ke Baiblo tsɔɔlɔ kɛ nɔ ko ngɛ Baiblo ɔ kasee ɔ, tsɔɔlɔ ɔ blɔ nya ní tsumi titli ji kaa e maa ye bua e Baiblo kaselɔ ɔ nɛ e nu Mawu Munyu ɔ sisi saminya. Ke Baiblo tsɔɔlɔ ko fɔ mo nine kaa o piɛɛ e he kɛ pee Baiblo mi ní kasemi ɔ, lɛɛ e sa nɛ o ye bua lɛ. (Fiɛlɔ 4:9, 10) Se mɛni tutuutu o ma nyɛ maa pee kɛ ye bua Baiblo kaselɔ ɔ?

6. Loko o maa piɛɛ nɔ ko he kɛ ya pee Baiblo mi ní kasemi ɔ, mɛni blɔ nɔ nɛ sisi tomi mlaa nɛ ngɛ Abɛ 20:18 ɔ maa ye bua mo?

⁶ Dla o he kɛ ha Baiblo mi ní kasemi ɔ. Kekleekle ɔ, mo bi tsɔɔlɔ ɔ nɛ e de mo e Baiblo kaselɔ ɔ he nɔ́ ko bɔɔ. (Kane Abɛ 20:18.) O ma nyɛ ma bi lɛ ke: “O ma nyɛ ma de mi Baiblo kaselɔ ɔ he sane bɔɔ lo? Mɛni munyuyi nɛ nyɛ ngɛ he susue? Mɛni ji oti nɛ o ngɛ hlae nɛ e je kpo ngɛ ní kasemi ɔ mi? Anɛ nɔ́ ko ngɛ nɛ e sa nɛ ma pee aloo ma ko pee ke ní kasemi ɔ ngɛ nɔ yae lo? Mɛni ma nyɛ maa wo Baiblo kaselɔ ɔ he wami nɛ e ya e hɛ mi?” Ngɛ anɔkuale mi ɔ, tsɔɔlɔ ɔ be Baiblo kaselɔ ɔ he sane nɛ e sɛ nɛ ni kpahi nɛ a le ɔ dee, se kɛ̃ ɔ, e ma de níhi nɛ nɔ nɛ e piɛɛ e he ɔ ma nyɛ maa da nɔ kɛ ye bua Baiblo kaselɔ ɔ. Ma se sane kpakpa fiɛɛlɔ ko nɛ a tsɛɛ lɛ ke Joy ɔ ngɛ enɛ ɔ mi níhi a si kpami. E de ke: “Ní sɛɛmi nɛ ɔ yeɔ bua fiɛɛlɔ ɔ nɛ i kɛ lɛ yaa fiɛɛmi ɔ, nɛ lɔ ɔ haa nɛ e deɔ níhi nɛ maa ye bua Baiblo kaselɔ ɔ ke ní kasemi ɔ ngɛ nɔ yae.”

7. Mɛni he je nɛ e sa nɛ o dla o he ke o yaa piɛɛ nɔ ko he kɛ pee Baiblo mi ní kasemi ɔ?

⁷ Ke nɔ ko fɔ mo nine kaa o piɛɛ e he nɛ nyɛɛ kɛ Baiblo kaselɔ ko ya kase Baiblo ɔ, e maa hi kaa o ma dla o he kɛ ha ní kasemi ɔ. (Ezra 7:10) Daniel nɛ wa tu e he munyu kɛ sɛ hlami ɔ de ke: “Ye bua jɔɔ wawɛɛ ke fiɛɛlɔ nɛ e piɛɛ ye he kɛ yaa pee Baiblo mi ní kasemi ɔ dla e he. Ke e pee jã a, lɔ ɔ ma ha nɛ e kɛ e he nɛ wo ní kasemi ɔ mi konɛ Baiblo kaselɔ ɔ nɛ ná he se.” Jehanɛ hu ɔ, lɔ ɔ ma ha nɛ Baiblo kaselɔ ɔ nɛ na kaa nyɛ tsuo nyɛ dla nyɛ he saminya, nɛ lɔ ɔ maa pee nɔ hyɛmi nɔ́ kpakpa kɛ ha lɛ. Ke o nyɛ we nɛ o dla o he saminya kɛ ha ní kasemi ɔ po ɔ, moo ngɔ be bɔɔ kɛ hla otihi nɛ ngɛ ní kasemi ɔ mi ɔ.

8. Kɛ o ma plɛ kɛ ná nɔ mi mami kaa sɔlemi nɛ o sɔle ngɛ Baiblo mi ní kasemi ko sisi ɔ nu tso ha kɛɛ?

⁸ Sɔlemi ji nɔ́ ko nɛ e he hia wawɛɛ ke wa kɛ nɔ ko yaa kase Baiblo ɔ, enɛ ɔ he ɔ, moo sɛ hlami nɛ o susu nɔ́ nɛ o ma de ke a ha mo he blɔ kaa o sɔle ɔ he. Ke o pee jã a, lɔ ɔ ma ha nɛ o le nɔ́ tutuutu he nɛ o maa sɔle ngɛ. (La 141:2) Loloolo ɔ, Hanae nɛ e je Japan ɔ kai sɔlemi nɛ nyɛmiyo ko nɛ e piɛɛ e Baiblo tsɔɔlɔ ɔ he kɛ ba e ngɔ ɔ sɔle ɔ. E de ke: “I na kaa huɛ bɔmi nɛ mi wa ngɛ nyɛmiyo ɔ kɛ Yehowa a kpɛti, nɛ i suɔ nɛ maa pee kaa lɛ. Jehanɛ hu ɔ, benɛ e tsɛ ye biɛ ngɛ sɔlemi ɔ mi ɔ, i nu he kaa a suɔ mi.”

9. Kaa bɔ nɛ Yakobo 1:19 ɔ tsɔɔ ɔ, mɛni o ma nyɛ maa pee kɛ ye bua ke o piɛɛ nɔ ko he nɛ nyɛɛ kɛ nɔ ko ngɛ Baiblo ɔ kasee?

⁹ Moo ye bua tsɔɔlɔ ɔ ke ní kasemi ɔ ngɛ nɔ yae. Blɔ gbalɔ klɛdɛɛ ko nɛ e ngɛ Nigeria nɛ a tsɛɛ lɛ ke Omamuyovbi de ke, “Fiɛɛlɔ kpakpa nyɛɛɔ ní kasemi ɔ se. Fiɛɛlɔ ɔ nɛ e piɛɛ tsɔɔlɔ ɔ he ɔ yeɔ bua ngɛ ní kasemi ɔ mi, se e tui munyu fuu, ejakaa e le kaa tsɔɔlɔ lɛ nyɛɛɔ ní kasemi ɔ hɛ mi.” Mɛni blɔ nɔ o maa gu kɛ le be nɛ e sa kaa o tu munyu kɛ blɔ nɔ nɛ o maa gu kɛ pee jã? (Abɛ 25:11) Moo bu tue saminya be mi nɛ Baiblo kaselɔ ɔ kɛ tsɔɔlɔ ɔ ngɛ munyu tue ɔ. (Kane Yakobo 1:19.) Ja jã loko o maa le he nɛ e sa nɛ o ye bua ngɛ. Ngɛ anɔkuale mi ɔ, e sa nɛ o hyɛ si fɔfɔɛ ɔ loko o tu munyu. Kaa nɔ hyɛmi nɔ́ ɔ, e sɛ nɛ o tu munyu fuu, e sɛ nɛ o po tsɔɔlɔ ɔ nya ke e ngɛ munyu tue, nɛ e sɛ nɛ o tu nɔ́ kpa ko nɛ kɔ we ní kasemi ɔ he ɔ he munyu. Mohu ɔ, moo tu munyu kpiti, moo ngɔ nɔ́ he tomi nɔ́ kɛ tsu ní aloo mo bi sane ko nɛ ma ha nɛ Baiblo kaselɔ ɔ nɛ nu níhi a sisi saminya. Be komɛ ɔ, o ma nyɛ maa nu he kaa o be nɔ́ ko tsɔ nɛ o ma de. Se ke o je Baiblo kaselɔ ɔ yi nɛ o tsɔɔ kaa o susuɔ e he ɔ, e ma nyɛ maa ye bua lɛ nɛ e ya e hɛ mi.

10. Kɛ o níhi a si kpami ma nyɛ maa ye bua Baiblo kaselɔ ko ha kɛɛ?

¹⁰ Mo de mɛ níhi a si kpami ko. Ke e he maa hia a, mo de Baiblo kaselɔ ɔ blɔ nɔ nɛ o gu kɛ ba na anɔkuale ɔ, blɔ nɔ nɛ o gu kɛ da nyagba ko nya, aloo bɔ nɛ Yehowa ye bua mo ha ngɛ si himi mi. (La 78:4, 7) Eko ɔ, lɔ ɔ lɛ Baiblo kaselɔ ɔ hia. E ma nyɛ maa wo e hemi kɛ yemi ɔ mi he wami loo e wo lɛ he wami nɛ e ya e hɛ mi kɛ su baptisimi he. Jehanɛ hu ɔ, e ma nyɛ maa ye bua lɛ konɛ e nyɛ nɛ e da ka ko nɛ e kɛ ngɛ kpee ɔ nya. (1 Pet. 5:9) Blɔ gbalɔ ko nɛ a tsɛɛ lɛ ke Gabriel nɛ e ngɛ Brazil ɔ kaiɔ bɔ nɛ nyɛmimɛ a níhi a si kpamihi ye bua lɛ ha benɛ a kɛ lɛ ngɛ Baiblo ɔ kasee ɔ. E de ke: “Benɛ i nu nyɛmimɛ a níhi a si kpami ɔmɛ ɔ, i ba na kaa Yehowa naa nyagbahi nɛ waa kɛ kpeɔ ɔ. Nɛ ke nyɛmimɛ nɛ ɔmɛ nyɛ nɛ a da nyagba nɛ ɔmɛ a nya a, lɛɛ imi hu ma nyɛ.”

KE BAIBLO KASELƆ KO BƆNI ASAFO MI KPEHI YAMI

11-12. Mɛni he je nɛ e sa nɛ waa kɛ bua jɔmi nɛ nya Baiblo kaselɔ ko nɛ e ba asafo mi kpe ɔ he ɔ?

¹¹ Loko Baiblo kaselɔ ko maa ya e hɛ mi kɛ su baptisimi he ɔ, jã e yaa asafo mi kpehi be fɛɛ be nɛ e náa kpe ɔmɛ a he se. (Heb. 10:24, 25) Eko ɔ, tsɔɔlɔ ɔ lɛ maa fɔ lɛ nine kɛ ba asafo mi kpe kekle. Se ke Baiblo kaselɔ ɔ ba asafo mi kpe ɔ, wɔ tsuo wa ma nyɛ maa wo lɛ he wami konɛ e tsa nɔ nɛ e ba Matsɛ Yemi Asa a nɔ. Mɛni blɔ nɔ wa ma nyɛ maa gu kɛ pee jã?

¹² O kɛ bua jɔmi nɛ nya Baiblo kaselɔ ɔ he. (Rom. 15:7) Ke Baiblo kaselɔ ɔ nu he kaa a he lɛ hɛ muɔ ɔ, lɔ ɔ ma nyɛ maa ye bua lɛ konɛ e tsa nɔ nɛ e ba Matsɛ Yemi Asa a nɔ. Mo nga Baiblo kaselɔ ɔ, o kɛ lɛ nɛ ya nga nyɛmimɛ ɔmɛ nɛ o de nyɛmimɛ ɔmɛ nɔ nɛ e ji, se ko ha nɛ zo nɛ gbe lɛ. Ko de ke e tsɔɔlɔ ɔ ngɛ, lɔ ɔ he ɔ, nyagba be. O kɛ lɛ nɛ sɛɛ ní, ejakaa eko ɔ, yi mi tomi komɛ a he je ɔ, tsɔɔlɔ ɔ be bae mla, loo eko ɔ, e ngɛ ní komɛ a he ní tsue ngɛ Matsɛ Yemi Asa a nɔ. Ke Baiblo kaselɔ ngɛ munyu tue ɔ, moo bu tue saminya nɛ o ngɔ o ní peepee kɛ tsɔɔ kaa o susuɔ e he. Kɛ jã nɛ o maa pee ɔ maa ye bua lɛ ha kɛɛ? Nyɛminyumu ko nɛ a tsɛɛ lɛ ke Dmitrii nɛ a baptisi lɛ jehahi bɔɔ komɛ nɛ be, nɛ amlɔ nɛ ɔ, e ngɛ sɔmɔe kaa asafo mi sɔmɔlɔ ɔ kai nɔ́ nɛ ya nɔ kekle be nɛ e ya asafo mi kpe ɔ. E de ke: “Nyɛminyumu ko na mi nɛ i daa si ngɛ Matsɛ Yemi Asa a he, nɛ e ha nɛ i nyɛɛ e se kɛ sɛ Matsɛ Yemi Asa a nɔ. Nyɛmimɛ fuu ba ye ngɔ nɛ a ba nga mi, nɛ enɛ ɔ pee mi nyakpɛ wawɛɛ. Ye bua jɔ wawɛɛ nɛ i ná nɛ wa yaa asafo mi kpe daa ligbi. I nɛ nɔ́ ko kaa kikɛ gblee.”

13. Kɛ nɔ hyɛmi nɔ́ kpakpa nɛ o maa pee ɔ ma nyɛ ma ná Baiblo kaselɔ nɔ he wami ha kɛɛ?

¹³ Moo pee nɔ hyɛmi nɔ́ kpakpa. Nɔ hyɛmi nɔ́ kpakpa nɛ o maa pee ɔ maa ye bua Baiblo kaselɔ nɛ e ná nɔ mi mami kaa e na anɔkuale ɔ. (Mat. 5:16) Vitalii nɛ amlɔ nɛ ɔ, e ngɛ sɔmɔe kaa daa blɔ gbalɔ ngɛ Moldova a de ke: “I na bɔ nɛ nyɛmimɛ nɛ a ngɛ asafo ɔ mi ɔ hiɔ si ha, bɔ nɛ a susuɔ níhi a he ha, kɛ bɔ nɛ a peeɔ a ní ha. Enɛ ɔ ha nɛ i ná nɔ mi mami kaa Yehowa Odasefohi peeɔ Mawu suɔmi nya ní niinɛ.”

14. Kɛ nɔ hyɛmi nɔ́ kpakpa nɛ o maa pee ɔ maa ye bua Baiblo kaselɔ ko nɛ e ya e hɛ mi ha kɛɛ?

¹⁴ Loko Baiblo kaselɔ ko he maa su kɛ ha baptisimi ɔ, jã e kɛ níhi nɛ e ngɛ kasee ɔ tsuɔ ní. Pi be fɛɛ be nɛ enɛ ɔ peemi ngɛ gbɔjɔɔ. Se ke Baiblo kaselɔ ɔ yɔse bɔ nɛ Baiblo sisi tomi mlaahi nɛ o kɛ tsuɔ ní ɔ yeɔ bua mo ha a, lɔ ɔ ma nyɛ maa wo lɛ he wami nɛ e kase o nɔ hyɛmi nɔ́ ɔ. (1 Kor. 11:1) Hanae nɛ wa tu e he munyu kɛ sɛ hlami ɔ ná enɛ ɔ mi níhi a si kpami. E de ke: “I naa kaa nyɛmimɛ kɛ níhi nɛ a tsɔɔ mi ɔ tsuɔ ní. I ba na blɔ nɔ nɛ ma gu kɛ wo nihi he wami, ma ngɔ a yayamihi kɛ ke mɛ, nɛ ma je suɔmi kpo kɛ tsɔɔ mɛ. Nyɛmimɛ ɔmɛ tuɔ ni kpahi a he munyu kpakpa be fɛɛ be, nɛ i suɔ nɛ ma kase mɛ.”

15. Ngɛ Abɛ 27:17 ɔ nya a, mɛni he je nɛ e sa nɛ waa kɛ Baiblo kaselɔ ko nɛ pee huɛ ke e bɔni asafo mi kpehi yami ɔ?

¹⁵ O kɛ Baiblo kaselɔ ɔ nɛ pee huɛ. Be mi nɛ Baiblo kaselɔ ɔ ngɛ asafo mi kpe bae ɔ, yaa nɔ nɛ o pee níhi nɛ tsɔɔ kaa o susuɔ e he. (Filip. 2:4) O kɛ lɛ ma nyɛ maa sɛɛ ní. O ma nyɛ ma je e yi ngɛ tsakemi ko nɛ e pee ngɛ e si himi mi ɔ he, nɛ o bi lɛ bɔ nɛ e ní kasemi ɔ kɛ e ní tsumi ngɛ nɔ yae ha. Jehanɛ hu ɔ, o ma nyɛ ma bi e weku li ɔmɛ a si, se e sa nɛ o hyɛ nɛ o ko koli níhi a mi tsɔ. Ní sɛɛmi nɛ ɔmɛ ma nyɛ ma ha nɛ nyɛɛ hɛ kɛ su nyɛ sibi a he wawɛɛ. Ke o kɛ Baiblo kaselɔ ɔ pee huɛ ɔ, lɔ ɔ maa ye bua lɛ konɛ e ya e hɛ mi kɛ su baptisimi he. (Kane Abɛ 27:17.) Hanae ngɛ sɔmɔe kaa daa blɔ gbalɔ amlɔ nɛ ɔ. Se e kai bɔ nɛ níhi ya nɔ ha benɛ e bɔni asafo mi kpehi yami ɔ. E de ke: “Benɛ i kɛ nyɛmimɛ pee huɛ ngɛ asafo ɔ mi ɔ, ye bua bɔni asafo mi kpe ɔmɛ a he jɔmi wawɛɛ. Ke pɔ tɔ mi po ɔ, i yaa. Ye bua jɔ huɛmɛ ehe nɛ i ná a he, nɛ enɛ ɔ ye bua mi nɛ i kɛ ye huɛmɛ nɛ a be asafo ɔ mi ɔ kpa bɔmi. I suɔ nɛ ma hɛ kɛ su Yehowa kɛ nyɛmimɛ ɔmɛ a he wawɛɛ, enɛ ɔ he ɔ, i ha nɛ a baptisi mi.”

16. Mɛni ji nɔ́ kpa ko nɛ o ma nyɛ maa pee kɛ ye bua Baiblo kaselɔ ko nɛ e hɛ nɛ muɔ si ngɛ asafo ɔ mi?

¹⁶ Be mi nɛ Baiblo kaselɔ ɔ ngɛ hɛ mi yae nɛ e ngɛ tsakemihi pee ngɛ e si himi mi ɔ, moo ye bua lɛ nɛ e nu he kaa e piɛɛ asafo ɔ he. O ma nyɛ maa pee enɛ ɔ kɛ gu nubwɔ nɛ o maa pee lɛ ɔ nɔ. (Heb. 13:2) Denis nɛ e ngɛ Moldova a kaiɔ nɔ́ nɛ ya nɔ benɛ a kɛ lɛ ngɛ Baiblo ɔ kasee ɔ. E de ke: “Nyɛmimɛ ɔmɛ fɔ i kɛ ye yo ɔ nine kɛ ya he nya buamihi a sisi. A de wɔ bɔ nɛ Yehowa ye bua mɛ ngɛ a si himi mi ha, nɛ lɔ ɔ wo wɔ he wami. He nya buami nɛ ɔmɛ ye bua wɔ nɛ wa ná nɔ mi mami kaa e sa nɛ wa sɔmɔ Yehowa, nɛ ní kpakpahi ngɛ nɛ wa nine maa su nɔ hwɔɔ se.” Ke Baiblo kaselɔ ɔ ná he blɔ kaa e ma bɔni fiɛɛmi yami pɛ ɔ, o ma nyɛ maa fɔ lɛ nine nɛ o kɛ lɛ nɛ ya fiɛɛmi. Fiɛɛlɔ ko nɛ a tsɛɛ lɛ ke Diego nɛ e ngɛ Brazil ɔ de ke: “Nyɛmimɛ fuu ha nɛ i piɛɛ a he kɛ ya fiɛɛmi, nɛ enɛ ɔ ha nɛ i ná he blɔ kɛ le mɛ saminya. I kase níhi babauu kɛ je a ngɔ, nɛ i nu he kaa i hɛ kɛ su Yehowa kɛ Yesu a he wawɛɛ.”

MƐNI ASAFO MI NIKƆTƆMAHI MA NYƐ MAA PEE KƐ YE BUA?

17. Mɛni blɔ nɔ nɛ asafo mi nikɔtɔmahi ma nyɛ maa ye bua Baiblo kaseli?

¹⁷ Nyɛ ná be kɛ ha Baiblo kaseli ɔmɛ. Asafo mi nikɔtɔmahi, ke nyɛ susuɔ Baiblo kaseli a he ɔ, lɔ ɔ ma nyɛ maa ye bua mɛ konɛ a ya a hɛ mi kɛ su baptisimi he. Anɛ nyɛɛ kɛ mɛ ma nyɛ maa sɛɛ ní be fɛɛ be ngɛ asafo mi kpe sisi lo? Ke a naa kaa o kɛ a biɛ tsɛɛ mɛ, titli ke a ma ha sanehi a heto ɔ, lɔ ɔ ma ha nɛ a na kaa o susuɔ a he. Anɛ o ma nyɛ maa to blɔ nya konɛ o piɛɛ fiɛɛli komɛ a he kɛ ya slaa a Baiblo kaseli be komɛ lo? Ke o pee jã a, lɔ ɔ ma nyɛ ma ná Baiblo kaselɔ ɔ nɔ he wami wawɛɛ. Daa blɔ gbalɔ ko nɛ a tsɛɛ lɛ ke Jackie nɛ e ngɛ Nigeria a de ke: “Ke Baiblo kaseli ba na kaa nyɛminyumu nɛ e piɛɛ e he kɛ ba slaa lɛ ɔ ji asafo mi nɔkɔtɔma a, e peeɔ mɛ nyakpɛ wawɛɛ. Baiblo kaselɔ ko de ke: ‘Ye osɔfo ɔ be jã pee gblee. E slaa sikatsɛmɛ pɛ, nɛ ke e maa pee jã po ɔ, ja a ha lɛ sika!’” Amlɔ nɛ ɔ, Baiblo kaselɔ ɔ ngɛ asafo mi kpehi yae.

18. Mɛni blɔ nɔ nɛ asafo mi nikɔtɔmahi kɛ munyu nɛ ngɛ Ní Tsumi 20:28 ɔ ma nyɛ ma tsu ni?

¹⁸ Nyɛ tsɔse Baiblo tsɔɔli nɛ nyɛɛ wo mɛ he wami. Asafo mi nikɔtɔmahi, e ji nyɛ blɔ nya ní tsumi kaa nyɛ maa ye bua fiɛɛli tsuo konɛ a pee fiɛɛli kɛ tsɔɔli kpakpahi. (Kane Ní Tsumi 20:28.) Ke nɔ ko ngɛ zo gboe kaa e kɛ nɔ ko maa kase Baiblo ɔ be mi nɛ o ngɛ lejɛ ɔ, moo hyɛ ní kasemi ɔ nɔ. Jackie nɛ wa tu e he munyu kɛ sɛ hlami ɔ de ke: “Asafo mi nikɔtɔmahi pɔɔ ye Baiblo kaseli ɔmɛ a si bimi. Ke e he wa ha mi kaa i kɛ nɔ ko maa kase Baiblo ɔ, a woɔ mi ga kpakpa nɛ yeɔ bua mi.” Asafo mi nikɔtɔmahi ma nyɛ maa pee níhi fuu kɛ wo Baiblo tsɔɔli he wami. (1 Tɛs. 5:11) Jackie kpale de ke: “Ye bua jɔɔ ke asafo mi nikɔtɔmahi woɔ mi he wami nɛ a deɔ mi kaa a hɛ sa ye mɔde bɔmi ɔ. Munyu nɛ ɔmɛ haa nɛ ye tsui he jɔɔ kaa bɔ nɛ ke pu ngɛ tsoe nɛ nɔ ko nu nyu nɛ mi jɔ ɔ, e tsui he jɔɔ ɔ. Ye yi nɛ a jeɔ ɔ haa nɛ ye nɔ gbagba tee, nɛ bua jɔmi nɛ i náa ngɛ Baiblo mi ní kasemi peemi mi ɔ mi waa.”​—Abɛ 25:25.

19. Mɛni ma nyɛ ma ha nɛ wɔ tsuo wa bua nɛ jɔ?

¹⁹ Ke waa kɛ nɔ ko kase we Baiblo ɔ po ɔ, loloolo ɔ, wa ma nyɛ maa ye bua nɔ ko konɛ e ya e hɛ mi kɛ su baptisimi he. Wa ma nyɛ ma dla wa he saminya konɛ wa de níhi nɛ maa ye bua Baiblo kaselɔ ke wa piɛɛ fiɛɛlɔ ko he kɛ ya fiɛɛmi. Se e sa nɛ waa hyɛ nɛ hi nɛ wa ko tu munyu fuu. Ke Baiblo kaseli ba Matsɛ Yemi Asa a nɔ ɔ, waa kɛ mɛ ma nyɛ maa pee huɛ nɛ waa pee nɔ hyɛmi nɔ́ kpakpa kɛ ha mɛ. Asafo mi nikɔtɔmahi hu ma nyɛ maa wo Baiblo kaseli he wami kɛ gu be nɛ a ma ná kɛ ha mɛ ɔ nɔ. A ma nyɛ maa wo tsɔɔli ɔmɛ hu he wami kɛ gu a yi nɛ a ma je kɛ tsɔsemi nɛ a kɛ ma ha mɛ ɔ nɔ. Ke wa pee nɔ́ nyafii ko po kɛ ye bua nɔ ko nɛ e ba suɔ Yehowa nɛ ji wa hiɔwe Tsɛ ɔ, nɛ e ngɛ lɛ sɔmɔe ɔ, anɛ lɔ ɔ ha we nɛ wa bua jɔɔ lo?