Blema Gbami Ko Nɛ E Kɔɔ O He

1. Benɛ Adam kɛ Hawa tɔ̃ pɛ ɔ, mɛni nɛ Yehowa pee? (1 Mose 3:15)

BENƐ Adam kɛ Hawa tɔ̃ ɔ, e kɛ we nɛ Yehowa gba gbami ko nɛ ha nɛ a sisi bimɛ ná hɛ kɛ nɔ fɔmi. A ngma nɔ́ nɛ Yehowa de ɔ ngɛ 1 Mose 3:15.​—Kane.

2. Mɛni he je nɛ gbami nɛ ɔ he ngɛ se nami ɔ?

² Gbami ɔ je kpo ngɛ Baiblo mi womi nɛ sɛ hlami ɔ mi. Se ngɛ blɔ ko nɔ ɔ, Baiblo mi womi kpa amɛ tsuo kɛ jamɛ a ngmami ɔ ngɛ tsakpa. Ke a bua lɛ́ nya a, a kɛ kpa fiɔ lɛ ɔmɛ kɛ blaa. Munyu nɛ ngɛ 1 Mose 3:15 ɔ ngɛ kaa kpa nɛ fiɔ Baiblo womi ɔmɛ a mi munyu ɔmɛ kɛ blaa nɛ e peeɔ lɛ sɛ gbi kake. Sɛ gbi nɛ ɔ ji, Mawu maa tsɔ Kpɔlɔ ko nɛ e ba kpata Abosiami kɛ nihi nɛ a fĩ e se ɔ tsuo a hɛ mi.b Enɛ ɔ maa pee jɔɔmi kɛ ha nihi nɛ a suɔ Yehowa a!

3. Mɛni he wa ma susu ngɛ ní kasemi nɛ ɔ mi?

³ Ngɛ ní kasemi nɛ ɔ mi ɔ, wa ma ha sane bimihi nɛ nyɛɛ se ɔ a heto. Sane bimi ɔmɛ kɔɔ gbami nɛ ngɛ 1 Mose 3:15 ɔ he. Mɛnɔmɛ nɛ a wo a ta ngɛ gbami ɔ mi? Mɛni blɔ nɔ nɛ gbami nɛ ɔ ba mi? Nɛ mɛni blɔ nɔ nɛ wa ngɛ he se náe?

MƐNƆMƐ NƐ A WO A TA NGƐ GBAMI Ɔ MI?

4. Mɛnɔ ji “sinɔ” ɔ, nɛ kɛ wa pee kɛ le kɛɛ?

⁴ A wo “sinɔ” ɔ, sinɔ ɔ “nina,” “yo” ɔ, kɛ yo ɔ “nina” a ta ngɛ 1 Mose 3:14, 15. Baiblo ɔ ye bua wɔ nɛ wa le nɔ́ nɛ eko fɛɛ eko daa si kɛ ha.c Nyɛ ha nɛ waa je sisi kɛ je “sinɔ ɔ” nɔ. Sinɔ nitsɛ be nyɛɛ maa nu nɔ́ nɛ Yehowa de ngɛ Eden abɔɔ ɔ mi ɔ sisi. Enɛ ɔ tsɔɔ kaa adebɔ nɔ́ ko nɛ le ní nɛ Yehowa kɛ lɛ tu munyu ɔ nɛ. Mɛnɔ nɛ Yehowa kɛ tu munyu ɔ? Kpo Jemi 12:9 ɔ tsɔɔ nɔ nɛ sinɔ ɔ daa si kɛ ha. Ngmami nɛ ɔ tsɔɔ heii kaa “blema sinɔ ɔ” ji Satan Abosiami. Se mɛnɔmɛ ji sinɔ ɔ nina a?

5. Mɛnɔmɛ ji sinɔ ɔ nina a?

⁵ Be komɛ ɔ, Baiblo ɔ ngɔɔ munyu nɛ ji nina kɛ tsuɔ ní kɛ daa si kɛ haa nihi nɛ a kaseɔ nɔ ko ní peepee saminya, nɛ a ma nyɛ ma tsɛ mɛ ke nɔ ɔ bimɛ po. Lɔ ɔ, sinɔ ɔ nina a ji bɔfo yayahi kɛ adesahi nɛ a peeɔ a ní kaa Satan, nɛ a teɔ si kɛ woɔ Yehowa Mawu kɛ e we bi. Enɛ he ɔ, bɔfohi nɛ a je hiɔwe nɛ a ba zugba a nɔ ngɛ Noa be ɔ mi kɛ adesahi nɛ a peeɔ a ní kaa a tsɛ Abosiami ɔ, ji sinɔ ɔ nina a nɛ.​—1 Mose 6:1, 2; Yoh. 8:44; 1 Yoh. 5:19; Jud 6.

6. Mɛni he je nɛ “yo ɔ” be nyɛe maa da si kɛ ha Hawa a?

⁶ Jehanɛ ɔ, nyɛ ha nɛ waa hyɛ nɔ nɛ “yo ɔ” daa si kɛ ha. Yo ɔ be nyɛɛ ma da si kɛ ha Hawa. Mɛni he je? Nyɛ ha nɛ waa hyɛ yi mi tomi kake ko he je. Gbami ɔ tsɔɔ kaa yo ɔ nina a maa “fia” sinɔ ɔ yi nɔ́. Kaa bɔ nɛ wa susu he ɔ, sinɔ ɔ ji Satan nɛ ji bɔfo yaya a, nɛ Hawa nina ko be nyɛɛ maa fia e yi nɔ́, ejakaa wa yi mluku. Ke jã a, lɛɛ kɛ a ma plɛ kɛ kpata Satan hɛ mi kɛɛ?

7. Kaa bɔ nɛ Kpo Jemi 12:1, 2, 5, 10 tsɔɔ ɔ, mɛnɔ ji yo ɔ nɛ a wo e ta ngɛ 1 Mose 3:15 ɔ?

⁷ A tsɔɔ nɔ nɛ yo ɔ nɛ a wo e ta ngɛ 1 Mose 3:15 ɔ daa si kɛ ha ngɛ Baiblo ɔ nyagbe womi ɔ mi. (Kane Kpo Jemi 12:1, 2, 5, 10.) Yo nɛ ɔ pi yo ko nɛ e ngɛ zugba nɛ ɔ nɔ. Nyɔhiɔ ɔ ngɛ e nane si, nɛ dodoe 12 jlasi fĩ e yi. Yo ɔ fɔ bi ko, bi ɔ ji Mawu Matsɛ Yemi ɔ. Matsɛ Yemi ɔ ngɛ hiɔwe, lɔ ɔ yo ɔ hu maa hi hiɔwe. Yo ɔ daa si kɛ ha Yehowa blɔ nya tomi ɔ fã nɛ ngɛ hiɔwe ɔ, nɛ́ hiɔwe bɔfo anɔkualetsɛmɛ ɔmɛ hu piɛɛ he.​—Gal. 4:26.

8. Mɛnɔ tutuutu ji yo ɔ nina a, nɛ mɛni be nɛ e ba pee yo ɔ nina a? (1 Mose 22:15-18)

⁸ Mawu Munyu ɔ ye bua wɔ nɛ wa le nɔ tutuutu nɛ yo ɔ nina a ji. Ngmami ɔ tsɔɔ kaa nina nɛ ɔ maa pee Abraham nina. (Kane 1 Mose 22:15-18.) Kaa bɔ nɛ gbami ɔ tsɔɔ ɔ, Yesu ji Abraham nina. (Luka 3:23, 34) Se e sa nɛ nina a nɛ e pee nɔ ko nɛ e ngɛ he wami pe nɔmlɔ adesa, ejakaa e ma kpata Satan Abosiami hɛ mi pɛsɛpɛsɛ. Benɛ Yesu ye maa pee jeha 30 ɔ, Mawu ngɔ mumi klɔuklɔu kɛ pɔ lɛ nu kaa e Bi. Benɛ a kɛ mumi klɔuklɔu ɔ pɔ Yesu nu ɔ, e ba pee yo ɔ nina tutuutu. (Gal. 3:16) Benɛ Yesu gbo nɛ a tle lɛ si se ɔ, Mawu “ngɔ hɛ mi nyami kɛ bumi kɛ bu lɛ jlasi,” nɛ e “ngɔ he blɔhi tsuo nɛ ngɛ hiɔwe kɛ zugba a nɔ,” kɛ he blɔ nɛ e kɛ ma “puɛ Abosiami ní tsumi ɔmɛ” ɔ kɛ ha lɛ.​—Heb. 2:7; Mat. 28:18; 1 Yoh. 3:8.

9-10. (a) Mɛnɔmɛ hu nɛ a piɛɛ yo ɔ nina a he, nɛ mɛni be nɛ a ba piɛɛ he? (b) Mɛni he wa ma susu ngɛ kukuhi nɛ nyɛɛ se ɔ mi?

⁹ Se ngɛ Yesu se ɔ, ni komɛ hu ma ba pee yo ɔ nina. Bɔfo Paulo tu a he munyu benɛ e de Yuda bi kɛ Ma je li nɛ a ji Kristofohi nɛ a pɔ mɛ nu ɔ ke: “Ke Kristo níhi ji nyɛ ɔ, lɛɛ Abraham nina ji nyɛ niinɛ, gbosi ní yeli ngɛ si womi ko nya.” (Gal. 3:28, 29) Ke Yehowa ngɔ mumi klɔuklɔu ɔ kɛ pɔ Kristofo no ko nu ɔ, jamɛ a nɔ ɔ ba piɛɛɔ yo ɔ nina a he. Lɔ ɔ, yo ɔ nina a ji Yesu Kristo kɛ nihi 144,000 nɛ a pɔ mɛ nu ɔ nɛ a kɛ lɛ maa ye matsɛ ɔ. (Kpoj. 14:1) Nimli nɛ ɔmɛ tsuo bɔɔ mɔde nɛ a peeɔ a ní kaa a Tsɛ, Yehowa Mawu, nɛ a susuɔ níhi a he kaa lɛ.

¹⁰ Amlɔ nɛ ɔ nɛ wa ba na nihi nɛ a tu a he munyu ngɛ 1 Mose 3:15 ɔ mi ɔ, nyɛ ha nɛ waa hyɛ níhi nɛ Yehowa pee kɛ ha nɛ gbami nɛ ɔ ba mi, kɛ bɔ nɛ wa ngɛ he se náe ha mwɔnɛ ɔ.

MƐNI YEHOWA PEE KƐ HA NƐ GBAMI NƐ Ɔ BA MI?

11. Ngɛ mɛni blɔ nɔ nɛ sinɔ ɔ kɔ̃ yo ɔ nina a “nane se ja”?

¹¹ Kaa bɔ nɛ gbami nɛ ngɛ 1 Mose 3:15 ɔ tsɔɔ ɔ, sinɔ ɔ maa kɔ̃ yo ɔ nina a “nane se ja.” Gbami nɛ ɔ ba mi benɛ Satan ha nɛ Yuda bi ɔmɛ kɛ Roma bi ɔmɛ gbe Mawu Bi ɔ. (Luka 23:13, 20-24) Kaa bɔ nɛ ke nɔ ko plaa ngɛ e nane se ja nɛ e be nyɛe maa nyɛɛ be bɔɔ ko ɔ, jã kɛ̃ nɛ benɛ Yesu gbo nɛ a pu lɛ ɔ, e nyɛ we nɛ e pee nɔ́ ko ligbi etɛ.​—Mat. 16:21.

12. Mɛni blɔ nɔ a maa gu kɛ fia sinɔ ɔ yi nɔ́, nɛ mɛni be?

¹² Gbami nɛ ngɛ 1 Mose 3:15 ɔ tsɔɔ kaa Yesu be yɔkɔ ɔ mi tlɔe. Mɛni he je? Ejakaa gbami ɔ tsɔɔ kaa nina a maa fia sinɔ ɔ yi nɔ́. Enɛ ɔ tsɔɔ kaa e sa nɛ a tle Yesu si kɛ je gbeje. Nɛ a tle lɛ si niinɛ! Benɛ Yesu gbo ɔ, ligbi etɛ se ɔ, a tle lɛ si kɛ ho hiɔwe ya, nɛ e be gboe hu gblegbleegble. Ngɛ Mawu be nɛ e to ɔ mi ɔ, Yesu ma kpata Satan hɛ mi pɛsɛpɛsɛ. (Heb. 2:14) Kristo kɛ nihi nɛ a maa piɛɛ e he kɛ ye matsɛ ɔ ma kpata Mawu he nyɛli ɔmɛ, nɛ a ji sinɔ ɔ nina a hɛ mi kulaa.​—Kpoj. 17:14; 20:4, 10.d

KƐ WA NGƐ GBAMI NƐ Ɔ HE SE NÁE HA KƐƐ?

13. Kɛ wa ngɛ gbami nɛ ɔ mi bami ɔ he se náe ha kɛɛ?

¹³ Ke o ji Yehowa sɔmɔlɔ ɔ, lɛɛ o ngɛ gbami nɛ ɔ mi bami ɔ he se náe. Yesu ba zugba a nɔ kaa adesa. E kase e Tsɛ ɔ saminya, nɛ e je e su ɔmɛ kpo pɛpɛɛpɛ. (Yoh. 14:9) Lɔ ɔ he ɔ, Yesu he ní nɛ wa ba kase ɔ ha nɛ wa le Yehowa Mawu, nɛ wa suɔ lɛ. Wa ná níhi nɛ e tsɔɔ, kɛ e blɔ tsɔɔmi ɔmɛ a he se kɛ gu Kristofohi asafo ɔ hɛ mi nɛ e ngɛ nyɛɛe mwɔnɛ ɔ nɔ. E tsɔɔ wɔ bɔ nɛ wa maa hi si ha nɛ ma ha nɛ Yehowa bua maa jɔ wa he. Wɔ tsuo wa ma nyɛ ma ná Yesu gbenɔ ɔ, nɛ ji e nane se ja nɛ a kɔ̃ ɔ he se. Ngɛ mɛni blɔ nɔ? Benɛ a tle Yesu si ɔ, Yehowa kplɛɛ e Bi ɔ afɔle sami nɛ e kɛ ‘tsu wa he kɛ je yayamihi tsuo a he’ ɔ nɔ.—1 Yoh. 1:7.

14. Kɛ wa plɛ kɛ le kaa gbami nɛ Yehowa tu he munyu ngɛ Eden abɔɔ ɔ mi ɔ bɛ mi ngɛ jamɛ a be ɔ mi ha kɛɛ? Moo tsɔɔ nya.

¹⁴ Nɔ́ nɛ Yehowa de ngɛ Eden abɔɔ ɔ mi ɔ tsɔɔ kaa gbami ɔ be mi bae ngɛ jamɛ a be ɔ mi. E ma he be loko yo ɔ ma fɔ nina a nɛ a wo e he si ɔ, nɛ e ma he be loko Abosiami ma bua e se nyɛli ɔmɛ a nya, nɛ be babauu maa be loko ninyɛ maa ba kuu enyɔ nɛ ɔmɛ a kpɛti. Gbami nɛ ɔ sisi nɛ wa maa nu ɔ maa ye bua wɔ nɛ wa maa le kaa je ɔ nɛ Satan ngɛ nɔ yee ɔ maa nyɛ Yehowa sɔmɔli. Pee se ɔ, Yesu kɛ kɔkɔ bɔmi nɛ ɔ nɔuu ha e kaseli ɔmɛ. (Maak. 13:13; Yoh. 17:14) Maa pee jeha 100 ji nɛ ɔ, wa na kaa gbami ɔ fã nɛ ɔ ngɛ mi bae wawɛɛ. Ngɛ mɛni blɔ nɔ?

15. Mɛni he je nɛ je ɔ nyɛ wɔ wawɛɛ ɔ, se mɛni he je nɛ e sɛ nɛ waa ye Satan gbeye ɔ?

¹⁵ Benɛ a wo Yesu matsɛ kaa Mesia Matsɛ Yemi ɔ nya Matsɛ ngɛ jeha 1914 ɔ mi ɔ, e kɛ we nɛ a fiee Satan kɛ je hiɔwe. Amlɔ nɛ ɔ, Satan tlɔ zugba a nɔ, nɛ nɔ́ nɛ piɛ ha lɛ pɛ ji kaa a ma ba kpata e hɛ mi. (Kpoj. 12:9, 12) Se e hí si gu. Satan mi mi fu, nɛ e ngɛ Mawu we bi tuae. (Kpoj. 12:13, 17) Lɔ ɔ he je nɛ amlɔ nɛ ɔ, Satan je ɔ nyɛ Mawu we bi wawɛɛ ɔ nɛ. Se e sɛ nɛ waa ye Satan kɛ e se nyɛɛli ɔmɛ gbeye. Mohu ɔ, e sa nɛ wa ná nɔ mi mami kaa bɔfo Paulo. E ngma ke: “Ke Mawu ngɛ kɛ ha wɔ ɔ, lɛɛ mɛnɔ maa te si kɛ wo wɔ?” (Rom. 8:31) Wa ma nyɛ ma ná nɔ mi mami nɛ mi wa ngɛ Yehowa mi, ejakaa wa na kaa gbami nɛ ngɛ 1 Mose 3:15 ɔ mi fã hiɛhiɛɛ ba mi momo.

16-18. Kɛ 1 Mose 3:15 ɔ sisi nɛ Curtis, Ursula, kɛ Jessica nu ɔ ye bua mɛ ha kɛɛ?

¹⁶ Si nɛ Yehowa wo ngɛ 1 Mose 3:15 ɔ ma nyɛ maa ye bua wɔ nɛ ke waa kɛ ka ko ngɛ kpee ɔ, wa ma nyɛ maa da nya. Curtis nɛ e ngɛ sɔmɔe kaa ma se sane kpakpa a fiɛɛlɔ ngɛ Guam ɔ de ke: “Be komɛ ɔ, i kɛ kahi kɛ nyagbahi kpeɔ nɛ e haa nɛ e he waa kɛ haa mi kaa ma ye Yehowa anɔkuale. Se ke i pue ye yi mi tɛ ngɛ gbami nɛ ngɛ 1 Mose 3:15 ɔ he ɔ, e yeɔ bua mi nɛ i ngɔɔ ye hɛ kɛ fɔɔ ye hiɔwe Tsɛ ɔ nɔ.” Curtis ngɛ be nɛ Yehowa ma ha nɛ wa ka amɛ tsuo a se maa po ɔ blɔ hyɛe wawɛɛ.

¹⁷ Nyɛmiyo ko nɛ e ngɛ Bavaria nɛ a tsɛɛ lɛ ke Ursula ɔ tsɔɔ kaa 1 Mose 3:15 nɛ e ba nu sisi ɔ ha nɛ e ná nɔ mi mami kaa Mawu lɛ ha nɛ a ngma Baiblo ɔ. Benɛ e na bɔ nɛ gbami kpa amɛ tsuo kɛ gbami nɛ ɔ ngɛ tsakpa ha a, e bua jɔ wawɛɛ. E de ke: “Benɛ i ba kase kaa Yehowa to blɔ nya oya nɔuu bɔ nɛ pee nɛ adesahi nɛ a ná hɛ nɔ kami ɔ, ye bua jɔ wawɛɛ.”

¹⁸ Jessica nɛ e je Micronesia a de ke: “Loloolo ɔ, i kaiɔ bɔ nɛ i nu he ha benɛ i na anɔkuale ɔ! Gbami nɛ ngɛ 1 Mose 3:15 ɔ ngɛ mi bae. E ye bua mi nɛ i na kaa pi Yehowa yi mi tomi ji kaa waa hi nɔ́ nae. Gbami nɛ ɔ ha nɛ i na kaa Yehowa nɛ ma sɔmɔ ɔ ma ha nɛ ma ná si himi kpakpa mwɔnɛ ɔ, nɛ ma ná si himi nɛ hi pe kulaa hwɔ se.”

19. Mɛni he je nɛ wa ma nyɛ ma ná nɔ mi mami kaa gbami ɔ fã nɛ bɛ mi lolo ɔ maa ba mi?

¹⁹ Kaa bɔ nɛ wa na a, loloolo ɔ, 1 Mose 3:15 ngɛ mi bae. Wa ba le yo ɔ nina a kɛ sinɔ ɔ nina a mi tso heii. Yo ɔ nina tutuutu nɛ ji Yesu nɛ a kɔ̃ e nane se ja a ná he wami ekohu, nɛ amlɔ nɛ ɔ, e ji Matsɛ nɛ e hɛ mi ngɛ nyami nɛ e be gboe gblegbleegble. Yehowa ngɛ nihi nɛ a maa piɛɛ e Bi ɔ he kɛ ye matsɛ ngɛ hiɔwe ɔ hlae, nɛ e piɛ bɔɔ nɛ e maa gbe nya. Akɛnɛ gbami ɔ fã nɛ sɛ hlami ɔ ba mi momo ɔ, wa ngɛ nɔ mi mami kaa bɔ fɛɛ bɔ nɛ e ji ɔ, e nyagbe fã nɛ ji sinɔ ɔ yi nɔ́ nɛ a maa fia a hu maa ba mi. Ke a kpata Satan hɛ mi ɔ, Mawu sɔmɔli a bua maa jɔ wawɛɛ! Kɛ yaa si jamɛ a be ɔ, o kɔni mi ko jɔ̃. Anɔkualetsɛ ji wa Mawu ɔ nɛ. Yo ɔ nina a maa ngɔ jɔɔmihi babauu kɛ ba ha “je ma amɛ tsuo.”​—1 Mose 22:18.