Mo Je Hɛsa Kpo Kɛ Tsɔɔ ‘Nyumuhi Nɛ A Kɛ Ha Kaa Nike Ní ɔ’

1. Mɛni ji nike ní komɛ nɛ wa nine su nɔ kɛ je Yesu ngɔ?

ADESA ko be nɛ e mi mi jɔ pe Yesu. Benɛ e ngɛ zugba a nɔ ɔ, e ngɔ he wami nɛ e ngɛ ɔ kɛ ye bua ni kpahi faa. (Luka 9:​12-17) E ngɔ nike ní nɛ pe kulaa a kɛ ha kɛ gu e wami nɛ e kɛ fɔ si ngɛ wa he ɔ nɔ. (Yoh. 15:13) Benɛ a tle Yesu si po ɔ, e ya nɔ nɛ e ye bua nihi. Kaa bɔ nɛ e wo si ɔ, e bi Yehowa kaa e ngɔ e mumi klɔuklɔu ɔ kɛ ha wɔ konɛ e tsɔɔ wɔ ní nɛ e wo wa bua. (Yoh. 14:​16, 17, sisi ningma; 16:13) Jehanɛ hu ɔ, Yesu woɔ wɔ he wami konɛ wa nyɛ nɛ wa tsu kaselɔ peemi ní tsumi ɔ ngɛ zugba a nɔ tsuo kɛ gu asafo mi kpehi nɛ wa yaa a nɔ.—Mat. 28:​18-20.

2. Ngɛ Efeso Bi 4:​7, 8 ɔ nya a, mɛnɔmɛ ji ‘nyumuhi nɛ a kɛ ha kaa nike ní’ ɔ?

² Mo susu nike ní kpa komɛ nɛ Yesu kɛ ha wɔ ɔ he nɛ o hyɛ. Bɔfo Paulo ngma kaa benɛ Yesu ho hiɔwe ya a, “e ngɔ nike níhi kɛ ha ngɛ adesahi a mi.” (Kane Efeso Bi 4:​7, 8.) Paulo tsɔɔ kaa Yesu ngɔ nike ní nɛ ɔmɛ kɛ ha konɛ e kɛ ye bua asafo ɔ ngɛ blɔ slɔɔtohi a nɔ. (Efe. 1:​22, 23; 4:​11-13) Mwɔnɛ ɔ, nike ní nɛ ɔmɛ a kpɛti ni komɛ ji asafo mi sɔmɔli, asafo mi nikɔtɔmahi kɛ kpɔ mi nɔ hyɛli.a Ngɛ anɔkuale mi ɔ, nyumu nɛ ɔmɛ yi mluku, lɔ ɔ he ɔ, a tɔ̃ɔ be komɛ. (Yak. 3:2) Se kɛ̃ ɔ, wa Nyɔmtsɛ Yesu Kristo guɔ nyumuhi nɛ a he jua wa nɛ ɔmɛ a nɔ kɛ yeɔ buaa wɔ.

3. Moo ngɔ nɔ́ he tomi nɔ́ ko kɛ tsɔɔ nɔ́ nɛ wa ma nyɛ maa pee kɛ fĩ ‘nyumuhi nɛ a kɛ ha wɔ kaa nike ní ɔ’ se.

³ Yesu ngɔ ní tsumi nɛ he hia kɛ wo nyumu nɛ ɔmɛ a dɛ kaa a wo asafo ɔ he wami. (Efe. 4:12) Se wa kpɛti nɔ fɛɛ nɔ ma nyɛ maa ye bua mɛ konɛ a tsu a blɔ nya ní tsumi nɛ he hia nɛ ɔ. Kaa nɔ hyɛmi nɔ́ ɔ, wa ma nyɛ maa ngɔ a ní tsumi ɔ kɛ to Matsɛ Yemi Asa ko nɛ a ngɛ mae ɔ he. Ni komɛ maa tsu ɔ nitsɛ. Ni komɛ haa niye ní kɛ yeɔ buaa, ni komɛ hu yeɔ buaa kɛ a lɔle, nɛ ni kpahi yeɔ buaa ngɛ ní kpahi a mi hulɔ. Jã nɔuu kɛ̃ nɛ wɔ hu wa ma nyɛ maa ngɔ wa munyu tutui kɛ wa ní peepee kɛ ye bua asafo mi sɔmɔli, asafo mi nikɔtɔmahi kɛ kpɔ mi nɔ hyɛli ɔmɛ. Enɛ ɔ he ɔ, nyɛ ha nɛ waa hyɛ bɔ nɛ wa náa a ní tsumi kpakpa amɛ a he se ha, kɛ nɔ́ nɛ wa ma nyɛ maa pee kɛ tsɔɔ kaa wa jeɔ hɛsa kpo kɛ tsɔɔ mɛ kɛ Yesu, nɔ nɛ e ‘ngɔ nike ní nɛ ɔmɛ’ kɛ ha wɔ ɔ.

ASAFO MI SƆMƆLI ‘TSUƆ NÍ TSUMIHI NƐ A HE HIA’

4. Mɛni ji ‘ní tsumi komɛ nɛ a he hia’ nɛ asafo mi sɔmɔli tsu kɛ ye bua ngɛ kaseli ɔmɛ a be ɔ mi?

⁴ Ngɛ kaseli ɔmɛ a be ɔ mi ɔ, a hla nyɛmimɛ nyumuhi komɛ kaa asafo mi sɔmɔli. (1 Tim. 3:8) Eko ɔ, mɛ ji nihi nɛ a tsu ‘ní tsumihi nɛ a he hia’ nɛ Paulo tu he munyu ngɛ 1 Korinto Bi 12:28 ɔ nɛ. E ngɛ heii kaa asafo mi sɔmɔli tsuɔ ní tsumihi nɛ a he hia wawɛɛ ɔ he ní, bɔ nɛ pee nɛ asafo mi nikɔtɔma amɛ nɛ a nyɛ nɛ a ngɔ a juɛmi kɛ ma ní tsɔɔmi kɛ nyɛmimɛ nɛ a maa slaa mɛ nɛ a wo mɛ he wami ɔ nɔ. Kaa nɔ hyɛmi nɔ́ ɔ, e ma nyɛ maa ba kaa asafo mi sɔmɔli ɔmɛ hyɛ blema Ngmami ɔmɛ a nɔ kɛ ngma eko, aloo a he ní komɛ nɛ a he hia konɛ a kɛ ngma Ngmami ɔmɛ.

5. Mɛni ji ní komɛ nɛ a he hia nɛ asafo mi sɔmɔli tsuɔ mwɔnɛ ɔ?

⁵ Mo susu ní tsumi komɛ nɛ a he hia nɛ asafo mi sɔmɔli tsuɔ mwɔnɛ ɔ he nɛ o hyɛ. (1 Pet. 4:10) Ní tsumihi nɛ a tsuɔ ɔ ekomɛ ji nɛ ɔ nɛ: A yeɔ buaa kɛ hyɛɛ asafo ɔ sika nɔ, a toɔ asafo ɔ zugba kpɔ ɔmɛ a he blɔ nya, a sɛɛ womihi kɛ haa asafo ɔ, a tsuɔ audio/video klama amɛ a he ní, a sɔmɔɔ kaa nibwɔhi a kpeeli, nɛ a yeɔ buaa kɛ dlaa Matsɛ Yemi Asa a nɔ hulɔ. Ní tsumi nɛ ɔmɛ tsuo he hia ngɛ asafo ɔ mi, ejakaa e haa nɛ nɔ́ fɛɛ nɔ́ yaa nɔ pɛpɛɛpɛ ngɛ asafo ɔ mi. (1 Kor. 14:40) Jehanɛ hu ɔ, asafo mi sɔmɔli ɔmɛ ekomɛ tsuɔ ní tsumi komɛ ngɛ Si Himi Kɛ Sɔmɔmi Ní Tsumi Kpe ɔ mi, nɛ a tuɔ magbɛ nɔ munyuhi hulɔ. A ma nyɛ maa hla asafo mi sɔmɔlɔ ko kaa e ye bua kuu nɔ hyɛlɔ ko. Be komɛ ɔ, asafo mi sɔmɔli nɛ a he su ɔ, piɛɛɔ asafo mi nikɔtɔmahi a he kɛ ya slaa nyɛmimɛ ɔmɛ.

6. Mɛni he je nɛ wa bua jɔ ní tsumi kpakpahi nɛ asafo mi sɔmɔli ɔmɛ ngɛ tsue ngɛ asafo ɔ mi ɔ he ɔ?

⁶ Kɛ ní tsumi nɛ asafo mi sɔmɔli ɔmɛ tsuɔ ɔ yeɔ buaa asafo ɔ ha kɛɛ? Nyɛmiyo ko nɛ a tsɛɛ lɛ ke Beberlyb nɛ e ngɛ Bolivia a de ke: “Asafo mi sɔmɔli nɛ a ngɛ wa we asafo ɔ mi ɔ haa nɛ ye bua jɔɔ asafo mi kpe ɔmɛ a he wawɛɛ. Ní tsumi nɛ a tsuɔ he je ɔ, i nyɛɔ nɛ i laa, i haa sanehi a heto, nɛ i buɔ magbɛ nɔ munyuhi nɛ a tuɔ ɔ tue saminya. I nyɛɔ nɛ i kaseɔ ní kɛ jeɔ fonihi kɛ videohi nɛ a jeɔ ngɛ klama amɛ a nɔ ɔ mi. Jehanɛ hu ɔ, a yeɔ buaa nɛ nihi nɛ a ba a asafo mi kpe ɔ hiɔ slɔkee, nɛ nihi nɛ a nyɛ we nɛ a ba a hu hyɛɔ kɛ guɔ videoconference nɔ. Ke a kpa asafo mi kpe ɔ, a nyɛɛɔ hɛ mi kɛ dlaa Matsɛ Yemi Asa a nɔ, a yeɔ buaa kɛ jeɔ sika ngɛ yemi kɛ buami daka a mi, nɛ a bɔɔ mɔde kaa wa nine maa su womihi nɛ wa hia a nɔ. Ye bua jɔ ní tsumi nɛ a ngɛ tsue ɔ he wawɛɛ!” Leslie nɛ e ngɛ Colombia nɛ e huno ɔ sɔmɔɔ kaa asafo mi nɔkɔtɔma a de ke: “Ye huno ɔ hia asafo mi sɔmɔli ɔmɛ a yemi kɛ buami konɛ e nyɛ nɛ e tsu ní tsumi slɔɔtohi nɛ a kɛ wo e dɛ ɔ. Ke pi asafo mi sɔmɔli ɔmɛ a he ɔ, ye huno ɔ be deka náe kulaa. Enɛ ɔ he ɔ, i naa mɛ si ngɛ a he nɛ a kɛ ha, kɛ kã nɛ a kɛ ngɛ a ní tsumi ɔ tsue ɔ he.” Anɛ jã nɛ mo hu o naa asafo mi sɔmɔli nɛ a ngɛ o we asafo ɔ mi ɔ lo?—1 Tim. 3:13.

7. Mɛni wa ma nyɛ maa pee kɛ tsɔɔ kaa wa hɛ sa ní tsumi nɛ asafo mi sɔmɔli ɔmɛ tsuɔ ɔ? (Hyɛ foni ɔ hulɔ.)

⁷ E ngɛ mi kaa wa bua jɔ ní tsumi nɛ asafo mi sɔmɔli ɔmɛ ngɛ tsue ɔ he mohu lɛɛ, se Baiblo woɔ wɔ he wami kaa waa ‘pee wa he nihi nɛ a le sina.’ (Kol. 3:15) Kristofer nɛ e ji asafo mi nɔkɔtɔma ngɛ Finland ɔ pee nɔ́ ko kɛ tsɔɔ kaa e hɛ sa ní tsumi nɛ asafo mi sɔmɔli ɔmɛ ngɛ tsue ɔ. E de ke: “Benɛ asafo mi sɔmɔlɔ ko tsu ní tsumi ko nɛ ye bua jɔ he ɔ, i mane lɛ sɛ womi, nɛ i tsɛ ngmami ko se ngɛ mi, nɛ i tsɔɔ lɛ nɔ́ tutuutu nɛ e pee, kɛ nɔ́ he je nɛ ye bua jɔ nɔ́ nɛ e pee ɔ he ɔ.” Pascal kɛ e yo Jael nɛ a ngɛ New Caledonia a sɔleɔ kɛ haa asafo mi sɔmɔli ɔmɛ. Pascal de ke: “Ligbi etɛ nɛ ɔ, wa sɔleɔ wawɛɛ kɛ haa asafo mi sɔmɔli nɛ a ngɛ wa asafo ɔ mi ɔ, nɛ wa naa Yehowa si kaa e kɛ mɛ ha wɔ, nɛ wa deɔ lɛ nɛ e ye bua mɛ.” Yehowa buɔ sɔlemihi kaa jã a tue, nɛ asafo ɔ tsuo náa he se.—2 Kor. 1:11.

ASAFO MI NIKƆTƆMAHI NƐ “A NGƐ NÍ TSUE WAWƐƐ NGƐ NYƐ KPƐTI”

8. Mɛni he je nɛ Paulo de ke nikɔtɔmahi nɛ a hi si ngɛ kaseli ɔmɛ a be ɔ mi ɔ ‘tsu ní wawɛɛ’ ɔ? (1 Tɛsalonika Bi 5:​12, 13)

⁸ Asafo mi nikɔtɔmahi nɛ a hi si ngɛ kaseli ɔmɛ a be ɔ mi ɔ tsu ní wawɛɛ kɛ ha asafo ɔ. (Kane 1 Tɛsalonika Bi 5:​12, 13; 1 Tim. 5:17) A nyɛɛ asafo ɔ hɛ mi kɛ gu asafo mi kpehi a nɔ nɛ a hyɛ, kɛ yi mi kpɔhi nɛ a mwɔ kaa nikɔtɔmahi a kuu ɔ nɔ. Jehanɛ hu ɔ, a je suɔmi mi kɛ wo nyɛmimɛ ɔmɛ ga konɛ a ya nɔ nɛ a ná hemi kɛ yemi nɛ mi wa. (1 Tɛs. 2:​11, 12; 2 Tim. 4:2) Ngɛ anɔkuale mi ɔ, nyumu nɛ ɔmɛ tsu ní wawɛɛ kɛ hyɛ a weku ɔmɛ a nɔ, nɛ a ha nɛ huɛ bɔmi kpakpa ngɛ mɛ nitsɛmɛ kɛ Yehowa a kpɛti hulɔ.—1 Tim. 3:​2, 4; Tito 1:​6-9.

9. Mɛni ní tsumi komɛ nɛ asafo mi nikɔtɔmahi tsuɔ mwɔnɛ ɔ?

⁹ Mwɔnɛ ɔ hu ɔ, asafo mi nikɔtɔmahi be deka kulaa. A tsuɔ fiɛɛmi ní tsumi ɔ. (2 Tim. 4:5) Kaa nɔ hyɛmi nɔ́ ɔ, a nyɛɛɔ hɛ mi nɛ a kɛ kã tsuɔ fiɛɛmi ní tsumi ɔ, a toɔ fiɛɛmi ní tsumi ɔ he blɔ nya ngɛ zugba kpɔ ɔ mi, nɛ a tsɔseɔ wɔ konɛ waa fiɛɛ nɛ waa tsɔɔ ní saminya. Jehanɛ hu ɔ, a sɔmɔɔ kaa kojoli nɛ a naa nɔ mɔbɔ, nɛ a hyɛ we nɔ hɛ mi. Ke Kristofono ko pee yayami nɛ hɛdɔ ngɛ he ɔ, asafo mi nikɔtɔma amɛ bɔɔ mɔde kaa a maa ye bua lɛ konɛ e dla huɛ bɔmi nɛ ngɛ e kɛ Yehowa a kpɛti ɔ. Ngɛ jamɛ a be ɔ mi nɔuu hu ɔ, a haa nɛ asafo ɔ he tsɔɔ. (1 Kor. 5:​12, 13; Gal. 6:1) Ní tsumi titli nɛ a kɛ kadiɔ asafo mi nikɔtɔma amɛ ji kaa a slaa nyɛmimɛ ɔmɛ nɛ a woɔ mɛ he wami. (1 Pet. 5:​1-3) A dlaa a he saminya kɛ haa munyu tumihi, nɛ a bɔɔ mɔde kaa a maa le nyɛmimɛ nɛ a ngɛ asafo ɔ mi ɔ konɛ a ya slaa mɛ. Jehanɛ hu ɔ, asafo mi nikɔtɔmahi komɛ yeɔ buaa ngɛ Matsɛ Yemi Asahi a mami kɛ a dlami mi. A toɔ kpehi a he blɔ nya, nɛ ni komɛ hu sɔmɔɔ kaa Hiɔ Tsami He Kɛ Ní Sɛɛmi Ajla Toli loo a sɔmɔɔ ngɛ Hiɔtsɛmɛ A Slaami Kuuhi a mi, nɛ a tsuɔ ní tsumi kpahi hulɔ. Ngɛ anɔkuale mi ɔ, asafo mi nikɔtɔma amɛ tsuɔ ní wawɛɛ kɛ yeɔ buaa wɔ!

10. Mɛni ji yi mi tomi komɛ a he je nɛ e sa nɛ wa hɛ nɛ sa asafo mi nikɔtɔmahi nɛ a tsuɔ ní wawɛɛ ɔ?

¹⁰ Yehowa gba kɛ fɔ si kaa asafo mi nikɔtɔma amɛ maa hyɛ wa nɔ, nɛ wa be ‘gbeye yee hu, nɛ sawale be wɔ nue hulɔ.’ (Yer. 23:4) Nyɛmiyo Johanna nɛ e ngɛ Finland ɔ ná enɛ ɔ mi níhi a si kpami benɛ e mami nu hiɔ ko nɛ nya wa a. E de ke: “E ngɛ mi kaa e he wa ha mi kaa i kɛ ni kpahi maa sɛɛ bɔ nɛ i ngɛ he nue ha a he ní mohu lɛɛ, se asafo mi nɔkɔtɔma ko nɛ i li lɛ saminya a to e tsui si ha mi, nɛ e kɛ mi sɔle, nɛ e ha nɛ i ná nɔ mi mami kaa Yehowa suɔ mi. I kaii we nɔ́ tutuutu nɛ e de, se i kai kaa e ha nɛ i nu he kaa i ngɛ slɔkee. I he ye kaa Yehowa tsɔ lɛ kɛ ba ye ngɔ ngɛ be nɛ sa mi.” Mɛni nɛ asafo mi nikɔtɔmahi nɛ a ngɛ o we asafo ɔ mi ɔ pee kɛ ye bua mo?

11. Mɛni wa ma nyɛ maa pee kɛ tsɔɔ kaa wa hɛ sa ní tsumi nɛ asafo mi nikɔtɔma amɛ ngɛ tsue ɔ? (Hyɛ foni ɔ hulɔ.)

¹¹ Yehowa suɔ nɛ wɔ tsuo waa je wa tsui mi nɛ wa je hɛsa kpo kɛ tsɔɔ nikɔtɔma amɛ “ngɛ a ní tsumi ɔ he je.” (1 Tɛs. 5:​12, 13) Henrietta nɛ lɛ hu e je Finland ɔ de ke: “Asafo mi nikɔtɔma amɛ jeɔ a tsui mi kɛ yeɔ buaa ni kpahi, se lɔ ɔ tsɔɔ we kaa a ngɛ be fuu kɛ he wami fuu pe ni kpahi, nɛ e tsɔɔ we hu kaa a kɛ nyagbahi kpi ngɛ a si himi mi. Be komɛ ɔ, i deɔ mɛ ke, ‘Nyɛ ngɛ mɔde bɔe wawɛɛ, nɛ i suɔ nɛ nyɛɛ le.’” Nyɛmiyo ko nɛ e ngɛ Türkiyec nɛ a tsɛɛ lɛ ke Sera a de ke: “Asafo mi nikɔtɔma amɛ hia he wami womi konɛ a nyɛ nɛ a ya nɔ nɛ a tsu a ní tsumi ɔ. Enɛ ɔ he ɔ, wa ma nyɛ maa mane mɛ sɛ gbi, wa tsɛ mɛ ní yemi loo waa kɛ mɛ nɛ ya fiɛɛmi.” Anɛ asafo mi nɔkɔtɔma ko ngɛ nɛ o suɔ nɛ o je o tsui mi nɛ o na lɛ si ngɛ ní tsumi kpakpa nɛ e ngɛ tsue ɔ he lo? Ke jã a, lɛɛ moo bɔ mɔde nɛ o je e yi.—1 Kor. 16:18.

KPƆ MI NƆ HYƐLI FIAA ASAFOHI KƐ MAA SI

12. Mɛnɔmɛ hu a nɔ nɛ Yesu gu kɛ fia asafo ɔmɛ kɛ ma si ngɛ kaseli ɔmɛ a be ɔ mi? (1 Tɛsalonika Bi 2:​7, 8)

¹² Yesu ngɔ he blɔ kɛ ha nyumu komɛ konɛ a ye bua asafo ɔ ngɛ blɔ kpahi a nɔ. E gu asafo mi nikɔtɔmahi nɛ a ngɛ Yerusalem ɔ a nɔ kɛ ha nɛ Paulo, Banaba kɛ ni kpahi sɔmɔ kaa kpɔ mi nɔ hyɛli. (Níts. 11:22) Mɛni he je? Kaa bɔ nɛ asafo mi sɔmɔli kɛ asafo mi nikɔtɔmahi yeɔ buaa asafo ɔ, jã nɔuu kɛ̃ nɛ kpɔ mi nɔ hyɛli hu fiaa asafo ɔmɛ kɛ maa si. (Níts. 15:​40, 41) Nyumu nɛ ɔmɛ ngɔɔ níhi fuu kɛ sãa afɔle konɛ a nyɛ nɛ a tsu ní tsumi nɛ ɔ. Be komɛ po ɔ, a ngɔɔ a wami kɛ sãa afɔle konɛ a nyɛ nɛ a tsɔɔ ni kpahi ní, nɛ a wo mɛ he wami.—Kane 1 Tɛsalonika Bi 2:​7, 8.

13. Mɛni ji ní tsumi komɛ nɛ kpɔ mi nɔ hyɛli tsuɔ?

¹³ Be fɛɛ be ɔ, kpɔ mi nɔ hyɛli ngɛ blɔ hiae. Ni komɛ hiaa blɔ gagaa loko a ya sɔmɔɔ asafohi. Daa otsi ɔ, kpɔ mi nɔ hyɛli tuɔ magbɛ nɔ munyuhi fuu, a slaa nyɛmimɛ ɔmɛ nɛ a woɔ mɛ he wami, a kɛ blɔ gbali ɔmɛ kɛ asafo mi nikɔtɔma amɛ peeɔ kpe, nɛ a hyɛɛ fiɛɛmi yami kpehi a nɔ. A dlaa a he kɛ haa munyu tumihi, nɛ a toɔ kpɔ mi kpehi kɛ kpokpa nɔ kpehi hu a he blɔ nya. A toɔ sukuuhi kɛ kpe klɛdɛɛhi a he blɔ nya kɛ haa blɔ gbali nɛ a ngɛ a kpɔ ɔ mi ɔ, nɛ a tsɔɔ mɛ ní. Jehanɛ se hu ɔ, a tsuɔ ní tsumi kpahi nɛ a he hia nɛ asafo ɔ ní tsumi kɔni ɔ kɛ woɔ a dɛ ɔ, nɛ be komɛ po ɔ, a kɛ oya yemi lɛ tsuɔ ní tsumi nɛ ɔmɛ.

14. Mɛni ji yi mi tomi komɛ a he je nɛ wa bua jɔ ní tsumi kpakpa nɛ kpɔ mi nɔ hyɛli ɔmɛ ngɛ tsue ɔ he?

¹⁴ Kɛ asafo ɔmɛ náa ní tsumihi nɛ se be nɛ kpɔ mi nɔ hyɛli tsuɔ ɔ he se ha kɛɛ? Nyɛminyumu ko nɛ e ngɛ Türkiye ɔ de ke: “Be fɛɛ be nɛ kpɔ mi nɔ hyɛlɔ ko ma ba slaa wɔ ɔ, lɔ ɔ woɔ mi he wami kaa ma pee babauu kɛ ye bua nyɛmimɛ ɔmɛ. I kɛ kpɔ mi nɔ hyɛli babauu kpe, se a kpɛti nɔ ko nɔ ko pee we nɔ́ ko kɛ tsɔɔ kaa e be deka kulaa loo i kɛ lɛ be nyɛe maa sɛɛ ní.” Johanna nɛ wa tu e he munyu kɛ sɛ hlami ɔ kɛ kpɔ mi nɔ hyɛlɔ ko tsu ní ngɛ fiɛɛmi mi, se a nɛ nɔ ko nɔ ko ngɛ we mi. Johanna de ke: “Ye hɛ be jamɛ a ligbi ɔ nɔ jee gblegbleegble. Ye nyɛmimɛ yihi enyɔ hia kɛ je we mi kɛ ho he kpa ya, nɛ ye hɛ ngɛ jae ngɛ a he wawɛɛ. Kpɔ mi nɔ hyɛlɔ ɔ je mi mi jɔmi mi kɛ wo mi he wami, nɛ e ye bua mi nɛ i na kaa eko ɔ, waa kɛ wa huɛmɛ kɛ wa wekuli nɛ wa suɔ mɛ ɔ be he kake hie amlɔ nɛ ɔ, nɛ wa hɛ ma ja ngɛ a he. Se ngɛ je ehe ɔ mi lɛɛ wa ma ná be babauu nɛ waa kɛ mɛ maa hi he kake daa.” Ngɛ anɔkuale mi ɔ, wa bua jɔ wa kpɔ mi nɔ hyɛli ɔmɛ a he kaa a ngɔ a he kɛ ha kɛ ngɛ wɔ ye buae.—Níts. 20:37–21:1.

15. (a) Kaa bɔ nɛ 3 Yohane 5-8 ɔ tsɔɔ ɔ, mɛni wa ma nyɛ maa pee kɛ tsɔɔ kaa wa hɛ sa ní tsumi nɛ kpɔ mi nɔ hyɛli ngɛ tsue ɔ? (Hyɛ foni ɔ hulɔ.) (b) Mɛni he je nɛ e sa nɛ wa je hɛsa kpo ngɛ mɔde nɛ nyumuhi nɛ a hla mɛ ɔ a yihi ngɛ bɔe ɔ he, nɛ mɛni blɔ nɔ wa ma nyɛ maa gu kɛ pee jã? (Hyɛ daka nɛ ji, “Mo Kai A Yi Ɔmɛ.”)

¹⁵ Bɔfo Yohane wo Gayo he wami kaa e pee nyɛmimɛ nɛ a ba woɔ asafo ɔ he wami ɔ nibwɔ, nɛ e de lɛ hu kaa e “wo mɛ blɔ kɛ ho bɔ nɛ e maa sa Mawu hɛ mi.” (Kane 3 Yohane 5-8.) Blɔ kake nɛ wa ma nyɛ maa gu nɔ kɛ pee jã ji kaa ke kpɔ mi nɔ hyɛlɔ ko ba slaa wɔ ɔ, wa ma tsɛ lɛ ní yemi. Blɔ kpa nɛ wa ma nyɛ maa gu nɔ kɛ pee jã ji kaa wa ma fĩ blɔ nya nɛ a to kɛ ha fiɛɛmi ní tsumi ɔ ngɛ jamɛ a otsi ɔ mi ɔ se. Leslie nɛ wa tu e he munyu kɛ sɛ hlami ɔ je hɛsa kpo ngɛ blɔ kpa ko nɔ. E de ke: “I sɔleɔ kaa Yehowa nɛ ha kpɔ mi nɔ hyɛli ɔmɛ a hiami níhi. Jehanɛ hu ɔ, i kɛ ye huno ɔ ngma sɛ womi kɛ ya ha mɛ, nɛ wa de mɛ bɔ nɛ a slaami ɔ ye bua wɔ ha.” Mo kai kaa kpɔ mi nɔ hyɛli ɔmɛ hu yi mluku kaa wɔ nɔuu. Be komɛ ɔ, a nuɔ hiɔ, a peeɔ yeyeeye, nɛ a kɔni mi hu jɔ̃ɔ. Eko ɔ, mi mi jɔmi mi nɛ o maa je kɛ tu munyu, loo nike ní bɔɔ ko nɛ o kɛ ma ha kpɔ mi nɔ hyɛli ɔmɛ ɔ ma nyɛ ma ha a sɔlemihi a heto nɛ e ye bua mɛ!—Abɛ 12:25.

WA HIA ‘NYUMUHI NƐ A KƐ HA KAA NIKE NÍ Ɔ’

16. Kaa bɔ nɛ Abɛ 3:27 ɔ tsɔɔ ɔ, mɛni sanehi nɛ nyɛmimɛ nyumuhi ma nyɛ ma bi a he?

¹⁶ Ngɛ je ɔ mi tsuo ɔ, wa hia nyumuhi babauu nɛ a sɔmɔ ngɛ asafo ɔ mi. Ke o ji nyumu nɛ a baptisi mo ɔ, anɛ “e ngɛ o he wami mi kaa o maa ye bua” lo? (Kane Abɛ 3:27.) Anɛ o ngɛ mɔde bɔe konɛ o he nɛ su kaa asafo mi sɔmɔlɔ lo? Ke o ngɛ sɔmɔe hu kaa asafo mi sɔmɔlɔ ɔ, anɛ o pee klaalo kaa o ma sɔmɔ kaa asafo mi nɔkɔtɔma lo?d Anɛ o ma nyɛ maa pee tsakemihi ngɛ o si himi mi konɛ o ngma Sukuu Kɛ Ha Matsɛ Yemi Sane Kpakpa Fiɛɛli ɔ blɔ bimi womi ɔ nɔ ní lo? Sukuu nɛ ɔ ma dla mo konɛ Yesu kɛ mo nɛ tsu ní wawɛɛ. Ke o susu kaa o be nyɛe maa pee ní nɛ ɔmɛ ɔ, moo sɔle ha Yehowa. Moo sɔle nɛ e ye bua mo kɛ e mumi klɔuklɔu ɔ konɛ o nyɛ nɛ o tsu ní tsumi fɛɛ ní tsumi nɛ a kɛ maa wo o dɛ ɔ he ní saminya.—Luka 11:13; Níts. 20:28.

17. Mɛni nɛ ‘nyumuhi nɛ a kɛ ha kaa nike ní’ ɔ tsɔɔ wɔ ngɛ wa Matsɛ Yesu Kristo he?

¹⁷ Nyumuhi nɛ a tsuɔ ní wawɛɛ nɛ Yesu kɛ ha kaa ‘nike ní’ ngɛ asafo ɔ mi ɔ tsɔɔ kaa Yesu lɛ ngɛ asafo ɔ hɛ mi nyɛɛe ngɛ nyagbe ligbi nɛ ɔmɛ a mi. (Mat. 28:20) Anɛ o bua jɔɛ kaa wa ngɛ Matsɛ ko nɛ e suɔ wɔ, e mi mi jɔ, nɛ e susuɔ wa he, nɛ e ha wɔ nyɛmimɛ nyumuhi nɛ a he su konɛ a ye bua wɔ lo? Enɛ ɔ he ɔ, mo hla blɔhi a nɔ nɛ o maa gu kɛ tsɔɔ kaa o hɛ sa ní tsumi nɛ nyumu nɛ ɔmɛ ngɛ tsue ɔ. Mo kai nɛ o na Yehowa si be fɛɛ be, ejakaa lɛ ji nɔ nɛ e haa wɔ “nike ní kpakpa fɛɛ nike ní kpakpa, kɛ nike ní nɛ hi kɛ pi si fɛɛ nike ní nɛ hi kɛ pi si ɔ.”—Yak. 1:17.