Anɛ O Kai Lo?

Anɛ o kane munyuhi nɛ a ngɛ jeha nɛ ɔ Hwɔɔmi Mɔ ɔ mi ɔ saminya lo? Ke jã a, lɛɛ hyɛ kaa o ma nyɛ ma ha sane bimi nɛ ɔmɛ a heto lo:

Mɛni nɔ hyɛmi nɔ́ nɛ Yehowa pee ngɛ bɔ nɛ e sa kaa waa kɛ yihi nɛ hi si ha a he?

Yehowa kɛ yihi hiɔ si kaa bɔ nɛ e kɛ nyumuhi hiɔ si ɔ. E buɔ mɛ tue. Jehanɛ hu ɔ, e susuɔ bɔ nɛ yihi nuɔ he ha, kɛ nyagbahi nɛ a kɛ kpeɔ ɔ he, nɛ e ngɔ ní tsumihi kɛ wo a dɛ.—w24.01, bf. 15-16.

Kɛ e sa nɛ waa kɛ Efeso Bi 5:7 ɔ nɛ e de ke: “Nyɛɛ kɛ mɛ nɛ ko pee jamɛ a ní ɔmɛ” ɔ nɛ tsu ní ha kɛɛ?

Bɔfo Paulo bɔ wɔ kɔkɔ kaa waa kɛ nihi nɛ a ma ha nɛ e he nɛ wa ha wɔ kaa waa kɛ Mawu mlaa amɛ nɛ tsu ní ɔ nɛ ko bɔ. Enɛ ɔ kɔɔ nihi nɛ waa kɛ bɔɔ ngɛ Intanɛti ɔ nɔ ɔ hu a he.—w24.03, bf. 22-23.

Mɛni lakpa munyuhi nɛ e sa kaa waa yu wa he ngɛ he?

Munyuhi nɛ wa nuɔ kɛ jeɔ wa nyɛmimɛ ɔmɛ a ngɔ, email loo sɛ gbi komɛ nɛ tuɔ Yehowa we bi a he munyu kpakpa, kɛ hemi kɛ yemi kuali nɛ a bua peeɔ a ní kaa nɔ́ nɛ a suɔ nɛ a kase Baiblo ɔ a munyuhi.—w24.04, bf. 12.

Mɛni wa li ngɛ bɔ nɛ Yehowa maa kojo Matsɛ Salomo kɛ nihi nɛ a hɛ mi kpata ngɛ Sodom kɛ Gomora kɛ Nyu Kpekpemi ɔ mi ɔ a he, nɛ mɛni nɛ wa le?

Wa li ke ji Yehowa kpata nimli nɛ ɔmɛ a hɛ mi kɛ ya neneene, nɛ e be mɛ si tlee hwɔɔ se lo. Se kɛ̃ ɔ, wa le kaa Yehowa le nɔ́ fɛɛ nɔ́, nɛ e naa nɔ mɔbɔ.—w24.05, bf. 3-4.

Akɛnɛ Mawu ji “Tɛsa” he je ɔ, mɛni nɔ mi mami wa ma nyɛ ma ná? (5 Mose 32:4)

Wa ma nyɛ maa sa we ngɛ Yehowa ngɔ, nɛ waa ngɔ wa hɛ kɛ fɔ e nɔ, ejakaa e yeɔ e si womihi a nɔ be fɛɛ be. Jehanɛ hu ɔ, e tsakee we, nɛ e yeɔ anɔkuale hulɔ.—w24.06, bf. 26-28.

Mɛni maa ye bua mo konɛ o hɛ nɛ mwɔ si ke o ya je asafo kpa mi?

Ngɔɔ o hɛ kɛ fɔ Yehowa nɔ, ejakaa e maa ye bua mo kaa bɔ nɛ e ye bua nihi blema a. Koo ngɔ asafo ehe ɔ kɛ to asafo nɛ o je mi ɔ he. Ngɔɔ o he kɛ wo ní tsumi slɔɔtohi a mi, nɛ o hla huɛmɛ ehehi.—w24.07, bf. 26-28.

Mɛni wa kaseɔ ngɛ nɔ́ he tomi níhi etɛ nɛ a tu he munyu ngɛ Mateo yi 25 ɔ mi?

Nɔ́ he tomi nɔ́ nɛ kɔɔ jijɔ ɔmɛ kɛ apletsi ɔmɛ a he ɔ ha nɛ wa na kaa e he hia nɛ waa ye anɔkuale kɛ ya si nyagbe. Nɔ́ he tomi nɔ́ nɛ kɔɔ yihewi kuasiahi kɛ yihewi nɛ a ji juɛmitsɛmɛ nɛ a li nyumu ɔ he ɔ tsɔɔ wɔ kaa e sa nɛ wa hɛ nɛ kã si nɛ wa dla wa he kɛ to. Nɛ nɔ́ he tomi nɔ́ nɛ kɔɔ talɛnt ɔ he ɔ hu tsɔɔ wɔ kaa e sa nɛ waa kɛ hɛdɔ nɛ tsu ní saminya.—w24.09, bf. 20-24.

Kɛ ablanaa a nɛ ngɛ Salomo sɔlemi we ɔ hiɔwe yami ngɛ ha kɛɛ?

Blema womi kpo komɛ de ngɛ 2 Kronika 3:4 ɔ ke ablanaa a hiɔwe yami ji “kɔni fã 120,” nɛ ji mita 53 (nanewɛɛ 175). Womi kpo kpa komɛ hu de ke ‘kɔni fã 20’ aloo maa pee mita 9 (nanewɛɛ 30). Ke o hyɛ bɔ nɛ sɔlemi we ɔ gbogbo ɔ timi ɔ ngɛ ha a, o naa kaa kɔni fa 20 ji nɔ́ nɛ da a nɛ.—w24.10, bf. 31.

Ke a ke asafo mi sɔmɔlɔ nɛ pee ‘huno nɛ e ngɛ yo kake’ ɔ, mɛni e tsɔɔ? (1 Tim. 3:12)

E tsɔɔ kaa e sa nɛ e ngɔ yo kake, nɛ e sɛ nɛ e bɔ ajuama hulɔ. Jehanɛ hu ɔ, e sɛ nɛ e pee nɔ́ ko nɛ tsɔɔ kaa e ngɛ yo kpa ko he suɔmi náe.—w24.11, bf. 19.

Mɛni he je nɛ wa ma nyɛ ma de ke nɔ́ nɛ Yesu de ngɛ Yohane 6:53 ɔ tsɔɔ we nɔ́ nɛ maa ya nɔ ngɛ Nyɔmtsɛ ɔ Gbɔkuɛ Niye Ní ɔ sisi ɔ?

Yohane 6:53 ɔ tsɔɔ kaa e sa nɛ waa ye Yesu he lo ɔ nɛ waa nu e muɔ ɔ. Yesu tu munyu nɛ ɔ kɛ tsɔɔ Yudabi nɛ́ e sa kaa a ná hemi kɛ yemi ngɛ e mi ngɛ jeha 32 ɔ mi ngɛ Galilea. Se kɛ̃ ɔ, maa pee jeha kake se ɔ, e to Nyɔmtsɛ ɔ Gbɔkuɛ Niye Ní ɔ sisi ngɛ Yerusalem. Ngɛ lejɛ ɔ, nihi nɛ Yesu kɛ tu munyu ɔ ji nihi nɛ e kɛ mɛ maa ye matsɛ ngɛ hiɔwe.—w24.12, bf. 10-11.