Moo Ye Bua O Baiblo Kaseli Ɔmɛ Konɛ A Pɛtɛ Anɔkuale ɔ He

1-2. (a) Mɛni he je nɛ Baiblo kaseli komɛ gblaa a nane si kaa a maa pɛtɛ anɔkuale ɔ he ɔ? (b) Mɛni he wa ma susu ngɛ ní kasemi nɛ ɔ mi?

LOKO o ma ba pee Yehowa Odasefono ɔ, anɛ o ye gbeye ngɛ ní komɛ a he, nɛ lɔ ɔ ha nɛ o to tsle kaa o ma ha nɛ a baptisi mo lo? Eko ɔ, o ye gbeye kaa ke o ba pee Yehowa Odasefono ɔ, nihi nɛ o kɛ mɛ tsuɔ ní, o huɛmɛ aloo o wekuli a mi mi ma fu mo. Aloo eko ɔ, o susu kaa o be nyɛe maa ye Mawu mlaa amɛ a nɔ kɔkɔɔkɔ. Ke o nu he jã hyɛ ɔ, lɛɛ atsinyɛ jemi ko be he kaa o le nɔ́ he je nɛ nihi nɛ o kɛ mɛ kaseɔ Baiblo ɔ gblaa a nane si kaa a maa pɛtɛ anɔkuale ɔ he ɔ.

² Yesu yɔse kaa ke wa yeɔ gbeye ɔ, lɔ ɔ ma nyɛ ma ha nɛ wa kpa Yehowa sɔmɔmi. (Mat. 13:​20-22) Se Yesu kɔni mi jɔ̃ we ngɛ nihi nɛ a gbla a nane si kaa a maa nyɛɛ e se ɔ a he. Mohu ɔ, e tsɔɔ e kaseli ɔmɛ bɔ nɛ a ma plɛ kɛ ye bua nihi kaa jã a ha konɛ a yɔse níhi nɛ ha we nɛ a ya a hɛ mi, nɛ a ná suɔmi nɛ mi wa kɛ ha Yehowa, nɛ a ngɔ Yehowa sɔmɔmi kɛ pee nɔ́ titli ngɛ a si himi mi, nɛ a nyɛ nɛ a da nyagbahi nɛ a kɛ kpeɔ ɔ nya. Ke waa kɛ nihi ngɛ Ná Bua Jɔmi Kɛ Ya Neneene! womi ɔ kasee ɔ, mɛni blɔ nɔ wa maa gu kɛ ngɔ nɔ́ nɛ Yesu tsɔɔ e kaseli ɔmɛ ɔ kɛ tsu ní konɛ waa ye bua mɛ nɛ a nyɛ nɛ a pɛtɛ anɔkuale ɔ he?

MOO YE BUA O BAIBLO KASELI ƆMƐ KONƐ A YƆSE NÍHI NƐ HA WE NƐ A YA A HƐ MI Ɔ

3. Mɛni he je nɛ e he wa ha Nikodemo kaa e maa nyɛɛ Yesu se ɔ?

³ Nikodemo ji Yudabi ɔmɛ a hɛ mi nyɛɛlɔ nɛ e he biɛ. Benɛ e ngɛ hlae nɛ e nyɛɛ Yesu se ɔ, ní komɛ ha nɛ e he wa ha lɛ kaa e maa pee jã. Benɛ Yesu je e sɔmɔmi ní tsumi ɔ sisi nyɔhiɔ ekpa se pɛ ɔ, Nikodemo yɔse kaa Yesu ji Mawu nane mi dalɔ. (Yoh. 3:​1, 2) Se akɛnɛ Nikodemo ngɛ “Yudabi ɔmɛ gbeye yee” he je ɔ, e ma e juɛmi nya si kaa e kɛ Yesu maa kpe ngɛ laami mi. (Yoh. 7:13; 12:42) Eko ɔ, e ye gbeye kaa ke e ba pee Yesu se nyɛɛlɔ ɔ, ní komɛ nɛ e ngɛ kɛ he blɔ nɛ e ngɛ ɔ ma bɔ lɛ.a

4. Mɛni blɔ nɔ nɛ Yesu gu kɛ ye bua Nikodemo konɛ e le nɔ́ nɛ Mawu suɔ kaa e pee?

⁴ E ngɛ mi kaa Nikodemo le Mose Mlaa a saminya mohu lɛɛ, se e he hia nɛ a ye bua lɛ konɛ e le nɔ́ nɛ Yehowa suɔ kaa e pee. Kɛ Yesu plɛ kɛ ye bua lɛ ha kɛɛ? Yesu ná deka kɛ ha lɛ, nɛ e kɛ lɛ sɛɛ ní nyɔ mi po. Yesu tsɔɔ Nikodemo níhi nɛ e he hia kaa e pee konɛ e ba pee e se nyɛɛlɔ. Ní nɛ ɔmɛ ji, nɛ e ma pia e he ngɛ e yayami ɔmɛ a he, nɛ e ma ha nɛ a baptisi lɛ, kɛ hemi kɛ yemi nɛ e ma ná ngɛ lɛ Yesu ɔ mi.—Yoh. 3:​5, 14-21.

5. Mɛni blɔ nɔ wa maa gu kɛ ye bua Baiblo kaselɔ ko konɛ e nyɛ nɛ e yɔse níhi nɛ ha we nɛ e ya e hɛ mi ɔ?

⁵ Ke Baiblo kaselɔ ko nu Ngmami ɔ sisi po ɔ, eko ɔ, e he maa hia nɛ a ye bua lɛ nɛ e yɔse níhi nɛ ha we nɛ e ya e hɛ mi ɔ. Eko ɔ, ní tsumi nɛ Baiblo kaselɔ ɔ tsuɔ ɔ ngɔɔ e be babauu aloo e wekuli sume nɛ e ba pee Yehowa Odasefono. Enɛ ɔ he ɔ, mo ná be kɛ ha lɛ kaa bɔ nɛ Yesu pee ɔ. O ma nyɛ maa fɔ lɛ nine kɛ ba o we ɔ mi konɛ o kɛ lɛ nɛ ye ní loo nyɛ ya slaa si. Ke nyɛ peeɔ níhi kaa jã kɛ blaa a, lɔ ɔ maa ye bua lɛ konɛ e de mo nyagba komɛ nɛ e kɛ ngɛ kpee. Moo wo o Baiblo kaselɔ ɔ he wami nɛ e pee tsakemihi nɛ a he hia kaa e pee ɔ konɛ e nyɛ nɛ e sa Yehowa hɛ mi, se pi mo.

6. Mɛni o ma nyɛ maa pee kɛ ye bua Baiblo kaselɔ ko konɛ e ngɔ nɔ́ nɛ e ngɛ kasee ɔ kɛ tsu ní? (1 Korinto Bi 16:13)

⁶ Ke Baiblo kaselɔ ko ná nɔ mi mami kaa Yehowa ma nyɛ maa ye bua lɛ nɛ e ye e mlaa amɛ a nɔ ɔ, lɔ ɔ maa wo lɛ he wami konɛ e ngɔ nɔ́ nɛ e ngɛ kasee ɔ kɛ tsu ní. (Kane 1 Korinto Bi 16:13.) Ke o kɛ nɔ ko ngɛ Baiblo ɔ kasee ɔ, lɛɛ o ngɛ kaa tsɔɔlɔ nɛ e tsɔɔ sukuubi ní. Benɛ o ngɛ sukuu yae ɔ, o tsɔɔli ɔmɛ a ti mɛnɔ lɛ o suɔ e sane wawɛɛ? E ngɛ heii kaa o bua jɔ tsɔɔlɔ nɛ e to e tsui kɛ ha mo, nɛ e ha nɛ o ná nɔ mi mami kaa o ma nyɛ maa ya o hɛ mi ɔ he wawɛɛ. Ke nɔ ko ji Baiblo tsɔɔlɔ kpakpa a, pi nɔ́ nɛ Mawu suɔ kaa Baiblo kaselɔ ɔ nɛ e pee ɔ pɛ nɛ e tsɔɔ lɛ, mohu ɔ, e haa nɛ Baiblo kaselɔ ɔ náa nɔ mi mami kaa Yehowa maa ye bua lɛ nɛ e pee tsakemihi nɛ a he hia kaa e pee ɔ. Mɛni o ma nyɛ maa pee konɛ mo hu o pee tsɔɔlɔ kpakpa?

MOO YE BUA O BAIBLO KASELI ƆMƐ KONƐ A NÁ SUƆMI NƐ MI WA KƐ HA YEHOWA

7. Mɛni blɔ nɔ Yesu gu kɛ ye bua e tue buli ɔmɛ konɛ suɔmi nɛ a ngɛ kɛ ha Yehowa a mi nɛ wa?

⁷ Yesu le kaa ke e kaseli ɔmɛ suɔ Mawu ɔ, lɔ ɔ maa ye bua mɛ konɛ a ngɔ nɔ́ nɛ a kase ɔ kɛ tsu ní. Enɛ ɔ he ɔ, e tsɔɔ mɛ níhi nɛ maa ye bua mɛ konɛ a ná suɔmi nɛ mi kuɔ kɛ ha a hiɔwe Tsɛ ɔ. Kaa nɔ hyɛmi nɔ́ ɔ, e ngɔ Yehowa kɛ to tsɛ ko nɛ e haa e bimɛ ní kpakpahi ɔ he. (Mat. 7:​9-11) Eko ɔ, nihi nɛ a ngɛ Yesu tue bue ɔ, a kpɛti ni komɛ a tsɛmɛ be suɔmi kaa jã kɛ ha mɛ. Benɛ Yesu ngɔ nɔ́ he tomi nɔ́ nɛ kɔɔ tsɛ ko nɛ e mi mi sãa lɛ ɔ he ɔ kɛ tsu ní, nɛ e tsɔɔ kaa tsɛ ɔ he e bi nɛ e sɛ nga a atuu kɛ ba we ekohu ɔ, e ngɛ heii kaa e tue buli ɔmɛ a bua maa jɔ wawɛɛ. Yesu ye bua e kaseli ɔmɛ nɛ a na kaa Yehowa suɔ mɛ wawɛɛ, nɛ e suɔ nɛ e ye bua mɛ.—Luka 15:​20-24.

8. Mɛni blɔ nɔ o maa gu kɛ ye bua Baiblo kaselɔ ko konɛ e suɔ Yehowa wawɛɛ?

⁸ Ke o kɛ o Baiblo kaselɔ ɔ ngɛ ní kasee ɔ, moo tu Yehowa su kpakpa amɛ a he munyu konɛ suɔmi nɛ e ngɛ kɛ ha Yehowa a mi nɛ wa. Be fɛɛ be nɛ o kɛ lɛ maa kase ní ɔ, moo ye bua lɛ konɛ e na bɔ nɛ nɔ́ nɛ e ngɛ kasee ɔ tsɔɔ kaa Yehowa suɔ lɛ ha. Ke nyɛ ngɛ kpɔmi nɔ́ ɔ he ní kasee ɔ, moo ye bua lɛ nɛ e na kaa Yehowa suɔ adesahi tsuo, nɛ lɛ hu e piɛɛ he. (Rom. 5:8; 1 Yoh. 4:10) Ke Baiblo kaselɔ ko na bɔ nɛ Yehowa suɔ lɛ wawɛɛ ha a, e maa ye bua lɛ konɛ suɔmi nɛ e ngɛ ha Yehowa a mi nɛ wa.—Gal. 2:20.

9. Mɛni ye bua Michael nɛ e bɔni Yehowa sɔmɔmi?

⁹ Mo susu Michael nɛ e je Indonesia a níhi a si kpami ɔ he nɛ o hyɛ. A tsɔse lɛ ngɛ anɔkuale ɔ mi, se e ha we nɛ a baptisi lɛ. Benɛ e ye jeha 18 ɔ, e hia blɔ kɛ ho ma kpa nɔ ya konɛ e ya tsu ní kaa dlɛɛva. Pee se ɔ, e kpale kɛ ya Indonesia nɛ e ya ngɔ yo. Se e je e yo ɔ kɛ e biyo ɔ he ngɛ Indonesia nɛ e ya tsu ní ngɛ ma kpa ko nɔ́. Benɛ Michael je e yo ɔ kɛ e biyo ɔ a he ɔ, a bɔni Baiblo ɔ kasemi nɛ a ya a hɛ mi wawɛɛ. Pee se ɔ, Michael mami ba gbo, nɛ e ma e juɛmi nya si kaa e maa kpale kɛ ho we mi ya konɛ e ya hyɛ e papaa. Benɛ Michael ya su ɔ, e ha nɛ a kɛ lɛ bɔni Baiblo ɔ kasemi. Benɛ a kɛ lɛ ngɛ ní kasemi 27 nɛ ngɛ Ná Bua Jɔmi Kɛ Ya Neneene! womi ɔ mi ɔ kasee, nɛ a su fã nɛ ji “Moo Kase Babauu” ɔ nɔ ɔ, e kase nɔ́ ko nɛ ta e tsui he wawɛɛ. Michael susu bɔ nɛ Yehowa maa nu he ha benɛ e na kaa Yesu ngɛ nɔ́ nae wawɛɛ ɔ he, kɛkɛ nɛ e bɔni ya fomi. Enɛ ɔ ha e ba na kaa Yehowa kɛ Yesu suɔ lɛ wawɛɛ, nɛ e pee tsakemihi, nɛ e ha nɛ a baptisi lɛ.

MOO YE BUA O BAIBLO KASELI ƆMƐ KONƐ A NGƆ YEHOWA SƆMƆMI KƐ PEE NƆ́ TITLI NGƐ A SI HIMI MI

10. Mɛni Yesu pee kɛ ye bua e se nyɛɛli ɔmɛ konɛ a pee tsakemi nɛ a nyɛ nɛ a sɔmɔ Yehowa saminya? (Luka 5:​5-11) (Hyɛ foni ɔ hulɔ.)

¹⁰ E yi ha nihi nɛ Yesu fiɛɛ kɛ tsɔɔ mɛ ɔ a ti ni komɛ kaa a ma yɔse kaa lɛ ji Mesia a nɛ. Se kɛ̃ ɔ, e he hia nɛ a ye bua mɛ konɛ a na kaa loko a ma sɔmɔ Yehowa a, e sa nɛ a kɛ kã nɛ fiɛɛ sane kpakpa a. Loko Yesu ma tsɛ Petro kɛ Andrea kaa a kɛ a be tsuo nɛ ba nyɛɛ e se ɔ, jamɛ a be ɔ, a ji Yesu kaseli momo. (Mat. 4:​18, 19) Petro kɛ Andrea kɛ Yakobo kɛ Yohane tsuo ji wo hɛli, nɛ ní tsumi nɛ ɔ ngɛ nɔ yae ha mɛ saminya. (Maak. 1:​16-20) Se benɛ Petro kɛ Andrea “je a ya amɛ a he” konɛ a kɛ a be tsuo nɛ ya nyɛɛ Yesu se ɔ, atsinyɛ jemi ko be he kaa a to blɔ nya konɛ a nyɛ nɛ a hyɛ a weku ɔmɛ a nɔ. Mɛni he je nɛ a je ní tsumi nɛ a ngɛ tsue ɔ he ɔ? Yesu pee nyakpɛ nɔ́ ko kɛ tsɔɔ kaa bɔ fɛɛ bɔ nɛ ji ɔ, Yehowa maa hyɛ a nɔ. Enɛ ɔ ha nɛ a ná nɔ mi mami kaa Yehowa ma ha mɛ a hiami níhi be fɛɛ be ke a ngɔ Matsɛ Yemi ɔ kɛ pee nɔ́ titli ngɛ a si himi mi.—Kane Luka 5:​5-11.

11. Mɛni blɔ nɔ o maa gu kɛ ngɔ o níhi a si kpamihi kɛ wo o Baiblo kaselɔ ɔ hemi kɛ yemi ɔ mi he wami?

¹¹ E ngɛ mi kaa wa be nyɛe maa pee nyakpɛ níhi kaa bɔ nɛ Yesu pee ɔ mohu lɛɛ, se wa ma nyɛ ma de nihi nɛ waa kɛ mɛ kaseɔ Baiblo ɔ níhi a si kpamihi nɛ tsɔɔ bɔ nɛ Yehowa yeɔ buaa nihi nɛ a ngɔɔ e sɔmɔmi kɛ peeɔ nɔ́ titli ngɛ a si himi mi ɔ ha. Kaa nɔ hyɛmi nɔ́ ɔ, anɛ o kai bɔ nɛ Yehowa ye bua mo ha benɛ o bɔni asafo mi kpehi yami ɔ lo? Eko ɔ, o de o nitsumitsɛ ɔ kaa o be nyɛe maa pee overtime hu konɛ o nyɛ nɛ o ya asafo mi kpe. Ke o ngɛ o Baiblo kaselɔ ɔ o níhi a si kpami ɔ dee ɔ, ha nɛ e na bɔ nɛ Yehowa ye bua mo akɛnɛ o ngɔ e sɔmɔmi kɛ pee nɔ́ titli ngɛ o si himi mi kɛ bɔ nɛ lɔ ɔ ha nɛ o hemi kɛ yemi ɔ mi wa ha.

12. (a) Mɛni he je nɛ e sa nɛ wa ha nɛ fiɛɛli kpahi nɛ a piɛɛ wa he kɛ ya wa Baiblo kaseli ɔmɛ a ngɔ ɔ? (b) Kɛ o ma plɛ kɛ ngɔ videohi kɛ ye bua o Baiblo kaselɔ ɔ saminya ha kɛɛ? Mo ha enɛ ɔ he nɔ hyɛmi nɔ́.

¹² Jehanɛ hu ɔ, ke nyɛmimɛ kpahi de o Baiblo kaselɔ ɔ bɔ nɛ a pee tsakemihi konɛ a ngɔ Yehowa sɔmɔmi kɛ pee nɔ́ titli ngɛ a si himi mi ha a, e maa ye bua lɛ wawɛɛ. Enɛ ɔ he ɔ, be fɛɛ be nɛ o kɛ o Baiblo kaselɔ ɔ ma ya kase ní ɔ, o ma nyɛ maa ngɔ nyɛmi ko kɛ piɛɛ o he kɛ ya. Mo bi mɛ nɛ a tsɔɔ bɔ nɛ a plɛ kɛ ba na anɔkuale ɔ ha, kɛ nɔ́ nɛ ye bua mɛ nɛ a ngɔ Yehowa sɔmɔmi kɛ pee nɔ́ titli ngɛ a si himi mi. Jehanɛ se hu ɔ, moo to o tsui si nɛ o kɛ o Baiblo kaselɔ ɔ nɛ hyɛ videohi nɛ ngɛ “Moo Kase Babauu” loo “Ní Kpahi Nɛ Maa Ye Bua Mo” blɔ he ɔ nɛ ngɛ Ná Bua Jɔmi Kɛ Ya Neneene! womi ɔ mi ɔ. Kaa nɔ hyɛmi nɔ́ ɔ, ke nyɛ ngɛ ní kasemi 37 ɔ he susue, nɛ nyɛ hyɛ video nɛ ji Yehowa Ma Ha Wɔ Wa Hiami Níhi ɔ, moo ye bua lɛ nɛ e na kaa ke e ngɔ Yehowa sɔmɔmi kɛ pee nɔ́ titli ngɛ e si himi mi ɔ, Yehowa ma ha lɛ e hiami níhi.

MOO YE BUA O BAIBLO KASELI ƆMƐ KONƐ A NYƐ NƐ A DA KAHI A NYA

13. Kɛ Yesu plɛ kɛ dla e kaseli ɔmɛ kɛ ha si temi kɛ womi ha kɛɛ?

¹³ Yesu de e kaseli ɔmɛ si abɔ kaa ni kpahi kɛ a wekuli po maa te si kɛ wo mɛ. (Mat. 5:11; 10:​22, 36) Benɛ e piɛ bɔɔ nɛ Yesu ma gbo ɔ, e de e kaseli ɔmɛ kaa nihi ma nyɛ maa gbe mɛ akɛnɛ a ngɛ Yehowa jae ɔ he je. (Mat. 24:9; Yoh. 15:20; 16:2) E wo mɛ he wami konɛ a kɛ hɛ si kami nɛ tsu ní ngɛ fiɛɛmi ní tsumi ɔ mi. Kaa nɔ hyɛmi nɔ́ ɔ, e de e kaseli ɔmɛ kaa a kɛ nihi nɛ a teɔ si kɛ woɔ mɛ ɔ nɛ ko sã nya, nɛ a hyɛ a munyu tutui kɛ a ní peepee saminya, bɔ nɛ pee nɛ a ya nɔ nɛ a fiɛɛ.

14. Mɛni wa ma nyɛ maa pee kɛ ye bua Baiblo kaselɔ ko konɛ e dla e he kɛ ha si temi kɛ womi? (2 Timoteo 3:12)

¹⁴ Kaa bɔ nɛ Yesu pee ɔ, wa ma nyɛ maa ye bua wa Baiblo kaseli ɔmɛ konɛ a na ní komɛ nɛ nihi nɛ a kɛ mɛ tsuɔ ní, a huɛmɛ kɛ a wekuli ma nyɛ ma de loo a pee kɛ jɔ̃ a kɔni mi. (Kane 2 Timoteo 3:12.) Eko ɔ, nihi nɛ a kɛ mɛ tsuɔ ní ɔ maa ye a he fɛu akɛnɛ a ngɛ mɔde bɔe kaa a maa ngɔ níhi nɛ a ngɛ kasee ngɛ Baiblo ɔ mi ɔ kɛ tsu ní ɔ he je. A wekuli kɛ ni kpahi hu ma nyɛ maa te si kɛ wo mɛ ngɛ a hemi kɛ yemi ɔ he je. Ke wa ye bua wa Baiblo kaseli ɔmɛ konɛ a dla a he kɛ ha si temi kɛ womi amlɔ nɛ ɔ, lɔ ɔ maa ye bua mɛ konɛ a nyɛ nɛ a da si temi kɛ womi nya.

15. Ke Baiblo kaselɔ ko wekuli ngɛ si tee kɛ ngɛ lɛ woe ɔ, mɛni ma nyɛ maa ye bua lɛ konɛ e da nya?

¹⁵ Ke o Baiblo kaselɔ ɔ wekuli ngɛ si tee kɛ ngɛ lɛ woe ɔ, moo ye bua lɛ konɛ e susu nɔ́ he je nɛ e wekuli ɔmɛ ngɛ jã pee ɔ he. Eko ɔ, e wekuli ɔmɛ ma susu kaa níhi nɛ Yehowa Odasefo ɔmɛ tsɔɔ ɔ ji lakpa, aloo a ma nyɛ ma susu kaa Odasefo ɔmɛ ji nimli yayamihi. Ngɛ anɔkuale mi ɔ, Yesu wekuli komɛ po bua jɔɛ ní tsumi nɛ e tsu ɔ he. (Maak. 3:21; Yoh. 7:5) Moo ye bua o Baiblo kaselɔ ɔ konɛ e to e tsui si kɛ ha e wekuli kɛ ni kpahi nɛ a teɔ si kɛ woɔ lɛ ɔ, nɛ e kɛ mɛ nɛ tu munyu ngɛ mi mi jɔmi mi.

16. Kɛ wa ma plɛ kɛ ye bua Baiblo kaselɔ ko ha kɛɛ konɛ e gu ga blɔ nɔ kɛ ye nihi odase?

¹⁶ Ke Baiblo kaselɔ ɔ wekuli ɔmɛ suɔ nɛ a le níhi fuu ngɛ Baiblo ɔ mi ɔ, e maa hi kaa e be mɛ níhi fuu a nya tsɔɔe si kake, ke pi jã a, ní sɛɛmi ɔ maa gbe a nya, nɛ a bua be he jɔe kaa a kɛ lɛ maa sɛɛ ní be kpa mi. Enɛ ɔ he ɔ, moo wo Baiblo kaselɔ ɔ he wami konɛ e ha nɛ ní sɛɛmi ɔ nɛ pee kpiti konɛ lɔ ɔ nɛ bli blɔ kɛ ha ní sɛɛmi kpa hwɔɔ se. (Kol. 4:6) E ma nyɛ ma de e wekuli ɔmɛ konɛ a ya jw.org ɔ nɔ konɛ mɛ nitsɛmɛ a ya kase babauu kɛ kɔ Yehowa Odasefohi a he.

17. Mɛni blɔ nɔ o maa gu kɛ ye bua Baiblo kaselɔ ko konɛ e nyɛ nɛ e ha sanehi nɛ eko ɔ, nihi ma bi ngɛ Yehowa Odasefohi a he ɔ heto? (Hyɛ foni ɔ hulɔ.)

¹⁷ Akɛnɛ o Baiblo kaselɔ ɔ wekuli loo nihi nɛ e kɛ mɛ tsuɔ ní ɔ ma nyɛ ma bi lɛ sanehi he je ɔ, o ma nyɛ maa ngɔ munyuhi nɛ ngɛ “Sanehi Nɛ Nihi Pɔɔ Bimi” blɔ he ɔ nɛ ngɛ jw.org ɔ nɔ ɔ kɛ ye bua lɛ konɛ e dla heto kpiti nɛ e kɛ ma nyɛ maa ye bua mɛ. (2 Tim. 2:​24, 25) Jehanɛ hu ɔ, ke nyɛ gbe ní kasemi ɔ eko fɛɛ eko nya ngɛ Ná Bua Jɔmi Kɛ Ya Neneene! womi ɔ mi ɔ, o kɛ lɛ nɛ susu fã nɛ ji, “Ni Komɛ Deɔ Ke” ɔ he. Moo wo Baiblo kaselɔ ɔ he wami konɛ e kase bɔ nɛ e maa ngɔ lɛ nitsɛ e munyu kɛ ha sanehi a heto ha. Ke e maa hi ɔ, moo ye bua Baiblo kaselɔ ɔ konɛ e na hehi nɛ e he hia kaa e ya e hɛ mi ngɛ ke e kɛ nihi ngɛ e hemi kɛ yemi ɔ he munyu tue. Ke o ye bua Baiblo kaselɔ ɔ nɛ e pee jã a, lɔ ɔ maa wo lɛ he wami konɛ e kɛ kã nɛ fã e hemi kɛ yemi ɔ he.

18. Mɛni o ma nyɛ maa pee kɛ wo Baiblo kaselɔ ko he wami konɛ e nyɛ nɛ e je fiɛɛmi yami sisi? (Mateo 10:27)

¹⁸ Yesu wo e kaseli ɔmɛ he wami kaa a fiɛɛ sane kpakpa a kɛ tsɔɔ nihi. (Kane Mateo 10:27.) Ke Baiblo kaselɔ ko je fiɛɛmi yami sisi ɔ, e maa na kaa Yehowa ngɛ lɛ ye buae, nɛ lɔ ɔ ma ha nɛ e ngɔ e hɛ kɛ fɔ Yehowa nɔ wawɛɛ. Kɛ o ma plɛ kɛ ye bua Baiblo kaselɔ ko ha kɛɛ konɛ e nyɛ nɛ e je fiɛɛmi yami sisi? Ke a fia adafi kaa asafo ɔ tsuo maa ya fiɛɛmi konɛ eko ɔ, a kɛ gba nine fɔmi womihi, loo a kɛ je Baiblo mi ní kasemi sisi ɔ, moo ye bua o Baiblo kaselɔ ɔ konɛ e le níhi nɛ e sa kaa e pee konɛ e he nɛ su kaa fiɛɛlɔ. Moo ye bua lɛ nɛ e na kaa e yi kulaa kaa nɔ ko maa je fiɛɛmi yami sisi ngɛ behi kaa jã a mi. Jehanɛ se hu ɔ, e ma nyɛ ma kɛ pee oti kaa e ma bɔni assignment peemi ngɛ otsi kpɛti kpe ɔ sisi. Enɛ ɔ maa ye bua lɛ konɛ e kɛ nɔ́ mi mami nɛ tsɔɔ ni kpahi níhi nɛ e heɔ yeɔ.

MO NÁ NƆ MI MAMI KAA O BAIBLO KASELƆ Ɔ MA NYƐ MAA PEE YEHOWA SUƆMI NYA NÍ

19. Mɛni Yesu pee kɛ tsɔɔ kaa e ngɛ nɔ mi mami kaa e kaseli ɔmɛ maa pee Yehowa suɔmi nya ní, nɛ kɛ wa ma plɛ kɛ kase lɛ ha kɛɛ?

¹⁹ Loko Yesu maa je kɛ ho hiɔwe ya a, e de e kaseli ɔmɛ kaa e maa na mɛ ekohu. E kaseli ɔmɛ li kaa Yesu ngɛ tsɔɔe kaa a maa ya hiɔwe. E ngɛ mi kaa Yesu kaseli ɔmɛ nui nɔ́ nɛ Yesu de ɔ sisi mohu lɛɛ, se Yesu ngɛ nɔ mi mami kaa a suɔ nɛ a pee Yehowa suɔmi nya ní. (Yoh. 14:​1-5, 8) Yesu le kaa be ma pue mi loko e kaseli ɔmɛ maa nu ní komɛ a sisi, nɛ́ hiɔwe hɛnɔkami ɔ hu piɛɛ he. (Yoh. 16:12) Wɔ hu wa ma nyɛ ma ná nɔ mi mami kaa wa Baiblo kaseli ɔmɛ ma nyɛ maa pee níhi nɛ maa sa Yehowa hɛ mi.

20. Mɛni nɛ nyɛmiyo ko nɛ e ngɛ Malawi ɔ pee kɛ tsɔɔ kaa e ngɛ nɔ mi mami kaa e Baiblo kaselɔ ɔ maa pee nɔ́ nɛ da?

²⁰ Mo ná nɔ mi mami kaa o Baiblo kaselɔ ɔ suɔ kaa e maa pee nɔ́ nɛ da. Kaa nɔ hyɛmi nɔ́ ɔ, mo susu nyɛmiyo ko nɛ e ngɛ Malawi nɛ a tsɛɛ lɛ ke Chifundo ɔ níhi a si kpami ɔ he nɛ o hyɛ. E kɛ yiheyo ko nɛ e yaa Katoliki sɔlemi ɔ nɛ a tsɛɛ lɛ ke Alinafe ɔ je Ná Bua Jɔmi Kɛ Ya Neneene! womi ɔ kasemi sisi. Benɛ a gbe ní kasemi 14 ɔ nya a, Chifundo bi Alinafe kaa mɛni ji e susumi ngɛ amagahi nɛ a kɛ tsuɔ ní ngɛ jami mi ɔ he? Alinafe mi mi fu wawɛɛ nɛ e de ke, “Lɔ ɔ lɛɛ imi nitsɛ ye sane!” Enɛ ɔ ha nɛ Chifundo susu kaa eko ɔ, e be kɛe nɛ Alinafe ma kpa Baiblo ɔ kasemi. Se Chifundo to e tsui si nɛ e kɛ Alinafe tsa Baiblo ɔ kasemi ɔ nɔ kɛ yi mi tomi ɔ kaa hwɔɔ se ko ɔ, Alinafe ma ba nu nɔ́ nɛ Baiblo ɔ de ngɛ amagahi nɛ a kɛ tsuɔ ní ngɛ jami mi ɔ sisi saminya. Nyɔhiɔ bɔɔ komɛ a se ɔ, Chifundo bi Alinafe sane nɛ ngɛ ní kasemi 34 ɔ nɛ ji: “Kɛ ba si amlɔ nɛ ɔ, kɛ o ná Baiblo ɔ nɛ o ngɛ kasee, kɛ Yehowa nɛ ji anɔkuale Mawu ɔ he ní nɛ o ngɛ kasee ɔ he se ha kɛɛ?” Chifundo tsɔɔ bɔ nɛ Alinafe ha sane bimi ɔ heto ha. Chifundo de ke: “Alinafe tu níhi fuu a he munyu, nɛ e tsɔɔ kaa Odasefo ɔmɛ ngɔɛ a he kɛ wui níhi nɛ Baiblo ɔ tsɔɔ kaa a dɛ ɔ mi.” Be bɔɔ se ɔ, Alinafe kɛ amagahi tsu we ní hu, nɛ e ya e hɛ mi nɛ a baptisi lɛ.

21. Mɛni blɔ nɔ wa maa gu kɛ ye bua wa Baiblo kaseli konɛ a mwɔ yi mi kpɔ kaa a ma sɔmɔ Yehowa?

²¹ E ngɛ mi kaa Yehowa ‘lɛ haa nɛ anɔkuale ɔ waa’ ngɛ nihi a tsui mi mohu lɛɛ, se wɔ tsuo wa ma nyɛ maa ye bua Baiblo kaselɔ ko konɛ e nyɛ nɛ e ya e hɛ mi. (1 Kor. 3:7) E sa nɛ waa tsɔɔ lɛ nɛ e le nɔ́ nɛ Mawu suɔ kaa e pee, se pi lɔ ɔ pɛ, e sa nɛ waa ye bua lɛ konɛ suɔmi nɛ e ngɛ ha Yehowa a mi nɛ wa wawɛɛ hulɔ. Jehanɛ se hu ɔ, e sa nɛ waa wo lɛ he wami konɛ e ngɔ Yehowa sɔmɔmi kɛ pee nɔ́ titli ngɛ e si himi mi, nɛ waa tsɔɔ lɛ kaa e sa kaa e ngɔ e hɛ kɛ fɔ Yehowa nɔ ke e kɛ nyagbahi ngɛ kpee. Ke wa ha nɛ wa Baiblo kaseli ɔmɛ na kaa wa ngɛ nɔ mi mami kaa a ma nyɛ maa sa Yehowa hɛ mi ɔ, lɔ ɔ maa wo mɛ he wami konɛ a mwɔ yi mi kpɔ kaa a ma sɔmɔ Yehowa.