O Ma Nyɛ Ma Ná Nɔ Mi Mami Kaa Yehowa Ngɔ O Yayami ɔ Kɛ Ke Mo

1-2. Ke Yehowa kɛ wa yayamihi ke wɔ ɔ, kɛ wa nuɔ he ha kɛɛ? (Hyɛ foni ɔ hulɔ.)

MATSƐ David he nile bu lɛ fɔ ngɛ yayamihi nɛ e pee ɔ he. (La 40:12; 51:3; yi nɔ ningma) E pee yayami komɛ nɛ hɛdɔ ngɛ a he wawɛɛ. Se kɛ̃ ɔ, e tsake e tsui niinɛ, nɛ Yehowa ngɔ kɛ ke lɛ. (2 Sam. 12:13) Benɛ David ba ná le kaa Yehowa ngɔ e yayami ɔmɛ kɛ ke lɛ ɔ, e bua jɔ wawɛɛ.—La 32:1.

² Kaa bɔ nɛ e ba ngɛ David blɔ fa mi ɔ, wɔ hu ke Yehowa ngɔ wa yayamihi kɛ ke wɔ ɔ, e haa nɛ wa bua jɔɔ. Ke wa pee yayami nɛ hɛdɔ ngɛ he, se wa tsake wa tsui niinɛ, nɛ wa kpa Yehowa pɛɛ ngɛ he, nɛ waa kɛ asafo mi nikɔtɔma amɛ sɛɛ he ní, nɛ wa bɔ mɔde kaa wa be jamɛ a yayami ɔmɛ pee hu ɔ, Yehowa kɛ maa ke wɔ. Enɛ ɔ woɔ wa bua wawɛɛ. (Abɛ 28:13; Níts. 26:20; 1 Yoh. 1:9) Jehanɛ hu ɔ, lemi nɛ wa le kaa ke Yehowa kɛ wa yayami ɔmɛ ke wɔ ɔ, e kɛ ke wɔ kulaa, nɛ e be wa tue gblae ngɛ he ɔ haa nɛ wa bua jɔɔ!—Eze. 33:16.

3-4. Kɛ nyɛmiyo ko nu he ha kɛɛ benɛ a baptisi lɛ se ɔ, nɛ mɛni he wa ma susu ngɛ ní kasemi nɛ ɔ mi?

³ Be komɛ ɔ, e he ma nyɛ maa wa ha ni komɛ kaa a maa kplɛɛ nɔ kaa Yehowa ngɔ a he yayami kɛ ke mɛ. Mo susu Jennifer nɛ e fɔli tsɔse lɛ ngɛ anɔkuale ɔ mi ɔ níhi a si kpami ɔ he nɛ o hyɛ. Benɛ Jennifer ngɛ wae ɔ, e bɔni ní yayamihi peemi, nɛ e kɛ laa e fɔli ɔmɛ. Se jeha komɛ a se ɔ, e kpale kɛ ba Yehowa ngɔ ekohu, nɛ bɔɔbɔɔbɔɔ ɔ, a baptisi lɛ. E de ke: “Be ko nɛ be ɔ, i bɔɔ ajuama, i deɔ dã, ye mi mi fuɔ wawɛɛ, nɛ i ngɔ he lo nya níhi kɛ pee nɔ́ titli ngɛ ye si himi mi. Ngɛ ye juɛmi mi ɔ, i le kaa ke i pee ní nɛ ɔmɛ ta, nɛ i ba kpa Mawu pɛɛ, nɛ i tsake ye tsui ɔ, Yehowa maa gu Kristo afɔle sami ɔ nɔ kɛ ngɔ ye yayami ɔmɛ kɛ ke mi. E ngɛ mi kaa i tsake ye tsui nɛ Yehowa ngɔ ye yayami ɔmɛ kɛ ke mi mohu lɛɛ, se i nui he kaa e kɛ ke mi niinɛ.”

⁴ Anɛ o nuɔ he be komɛ kaa Yehowa kɛ yayamihi nɛ o pee be ko nɛ be ɔ ki mo lo? Yehowa suɔ nɛ o ná nɔ mi mami kaa ke e ngɔ o he yayami ɔmɛ kɛ ke mo ɔ, e kɛ ke kulaa kaa bɔ nɛ e ji ngɛ David blɔ fa mi ɔ. Ngɛ ní kasemi nɛ ɔ mi ɔ, wa maa hyɛ nɔ́ he je nɛ e sa nɛ waa kplɛɛ nɔ kaa Yehowa ngɔɔ wa yayamihi kɛ keɔ wɔ, kɛ nɔ́ nɛ ma nyɛ maa ye bua wɔ konɛ waa pee jã.

MƐNI HE JE NƐ E SA NƐ WAA KPLƐƐ NƆ KAA YEHOWA NGƆƆ WA YAYAMIHI KƐ KEƆ WƆ Ɔ?

5. Mɛni Satan suɔ nɛ wa he ye? Mo ha enɛ ɔ he nɔ hyɛmi nɔ́.

⁵ Ke wa kplɛɛ nɔ kaa Yehowa ngɔɔ wa yayamihi kɛ keɔ wɔ niinɛ ɔ, lɔ ɔ haa nɛ wa yuɔ wa he ngɛ Satan klama ko he. O hɛ nɛ ko je nɔ kaa Satan suɔ nɛ e pee nɔ́ fɛɛ nɔ́ nɛ e ma nyɛ konɛ e ha nɛ wa kpa Yehowa sɔmɔmi. Bɔ nɛ pee nɛ e nyɛ nɛ e su oti nɛ ɔ he ɔ, e bɔɔ mɔde kaa e ma ha nɛ wa he ye kaa Yehowa be wa tɔmihi ngɔe kɛ ke wɔ. Mo susu nyumu ɔ nɛ e ngɛ Korinto asafo ɔ mi, nɛ e ya bɔ ajuama nɛ a je lɛ kɛ je asafo ɔ mi ɔ he nɛ o hyɛ. (1 Kor. 5:​1, 5, 13) Benɛ e tsake e tsui se po ɔ, Satan sume nɛ nihi nɛ a ngɛ asafo ɔ mi ɔ nɛ a ngɔ nyumu ɔ yayami ɔ kɛ ke lɛ konɛ a kpale ngɔ lɛ ngɛ asafo ɔ mi. Ngɛ jamɛ a be ɔ mi nɔuu hu ɔ, Satan suɔ nɛ nyumu ɔ nɛ e tsake e tsui ɔ nɛ nu he kaa Yehowa be e yayami ɔ ngɔe kɛ ke lɛ. Enɛ ɔ ma ha nɛ ‘aywilɛho yemi sɔuu maa gbe lɛ,’ nɛ e ma kpa Yehowa sɔmɔmi. Loloolo ɔ, Satan tsakee we, se ‘wa le e ga tsɔmi ɔmɛ.’—2 Kor. 2:​5-11.

6. Ke wa he nile buɔ wɔ fɔ ngɛ yayami ko nɛ wa pee be ko nɛ be ɔ he, nɛ wa nuɔ he kaa Yehowa kɛ ki wɔ ɔ, mɛni maa ye bua wɔ?

⁶ Ke wa kplɛɛ nɔ kaa Yehowa ngɔɔ wa yayamihi kɛ keɔ wɔ niinɛ ɔ, lɔ ɔ ma ha nɛ wa he nile be wɔ fɔ bue hu. Ke wa pee yayami ɔ, wa he nile buɔ wɔ fɔ. (La 51:17) Tɔmi ko be he kaa wa he nile maa bu wɔ fɔ ke wa pee yayami. Ke wa he nile buɔ wɔ fɔ ɔ, lɔ ɔ ma nyɛ maa ye bua wɔ nɛ waa pee tsakemihi, nɛ waa pee nɔ́ nɛ da. (2 Kor. 7:​10, 11) Se ke wa he nile yaa nɔ nɛ e buɔ wɔ fɔ be mi nɛ Yehowa ngɔ wa yayami ɔ kɛ ke wɔ se ɔ, lɔ ɔ ma nyɛ ma ha nɛ wa kɔni mi nɛ jɔ̃, nɛ wa kpa Yehowa sɔmɔmi. Ke wa kplɛɛ nɔ kaa Yehowa ngɔ wa tɔmi ɔ kɛ ke wɔ niinɛ ɔ, wa he nile be wɔ fɔ bue hu. Ke e ba jã a, wa maa ya nɔ ma sɔmɔ Yehowa kɛ he nile kpakpa kaa bɔ nɛ e ngɛ hlae ɔ, nɛ wa bua maa jɔ wawɛɛ. (Kol. 1:​10, 11; 2 Tim. 1:3) Mɛni ma nyɛ maa ye bua wɔ konɛ wa ná nɔ mi mami kaa Yehowa ngɔ wa yayami ɔ kɛ ke wɔ?

MƐNI MA NYƐ MAA YE BUA WƆ KONƐ WA NÁ NƆ MI MAMI KAA YEHOWA NGƆ WA YAYAMI Ɔ KƐ KE WƆ?

7-8. Kɛ Yehowa kale e he kɛ ha Mose ha kɛɛ, nɛ mɛni nɔ mi mami wa ma nyɛ ma ná? (2 Mose 34:​6, 7)

⁷ Mo pue o yi mi tɛ ngɛ bɔ nɛ Yehowa nitsɛ kale e he ha a he. Kaa nɔ hyɛmi nɔ́ ɔ, benɛ Mose suɔ nɛ e le babauu ngɛ Yehowa he ɔ, Yehowa de lɛ nɔ́ ko ngɛ Sinai Yoku ɔ he.a (Kane 2 Mose 34:​6, 7.) E ngɛ mi kaa Yehowa ngɛ su kpakpahi fuu mohu lɛɛ, se e tu e su pɔtɛɛ komɛ pɛ a he munyu kɛ tsɔɔ Mose. E de Mose kaa e ji “Mawu mɔbɔ nalɔ nɛ e mi mi sãã lɛ.” Anɛ Mawu nɛ e naa nɔ mɔbɔ nɛ e mi mi sãã lɛ kaa kikɛ nɛ ɔ be e sɔmɔlɔ ko nɛ e pia e he niinɛ ɔ yayami ngɔe kɛ ke lɛ lo? E kɛ maa ke lɛ hluu tsɔ, ejakaa ke Yehowa ngɔɛ e sɔmɔlɔ ko nɛ e pia e he ɔ yayami kɛ ki lɛ ɔ, lɔ ɔ tsɔɔ kaa Yehowa yi mi wa, nɛ e nɛ nɔ mɔbɔ. Wa le kaa Yehowa be jã pee gblegbleegble!

⁸ Akɛnɛ Yehowa yeɔ anɔkuale he je ɔ, wa ma nyɛ ma he nɔ́ nɛ e de kaa e ji Mawu nɛ e naa nɔ mɔbɔ ɔ maa ye. (La 31:5) Enɛ ɔ he ɔ, ke e de nɔ́ ko ɔ, e sa nɛ wa he ye. Ke o he nile buɔ mo fɔ ngɛ yayami ko nɛ o pee kɛ be ɔ he ɔ, mo bi o he ke: ‘Anɛ i he ye kaa Yehowa naa nɔ mɔbɔ, nɛ e mi mi sãã lɛ, nɛ e maa ngɔ nɔ ko nɛ e pee yayami nɛ e tsake e tsui ɔ tɔmi kɛ ke lɛ niinɛ lo? Ke o he ye kaa Yehowa maa pee jã a, lɛɛ mo hu o ma nyɛ ma ná nɔ mi mami kaa Yehowa maa ngɔ o yayami ɔ kɛ ke mo.’

9. Mɛni nɛ La 32:5 ɔ tsɔɔ wɔ ngɛ bɔ nɛ Yehowa ngɔɔ wa yayamihi kɛ keɔ wɔ ha a he?

⁹ Mo pue o yi mi tɛ ngɛ nɔ́ nɛ Yehowa tsɔɔ wɔ ngɛ Baiblo ɔ mi kɛ kɔ bɔ nɛ e kɛ yayami keɔ ha a he. Kaa nɔ hyɛmi nɔ́ ɔ, mo susu bɔ nɛ Baiblo ngmalɔ David kale bɔ nɛ Yehowa kɛ yayami keɔ ha a he nɛ o hyɛ. (Kane La 32:5.) David de ke: “O ngɔ ye tɔmi ɔ kɛ ye yayami ɔmɛ kɛ ke mi.” Hebri munyu nɛ a tsɔɔ sisi kaa “ke” ngɛ ngmami nɛ ɔ mi ɔ hu ma nyɛ maa tsɔɔ “nɔ́ ko nɛ a ma wo nɔ” aloo “nɔ́ ko nɛ a ma je kɛ je.” Benɛ Yehowa ngɔ David tɔmi ɔ kɛ ke lɛ ɔ, ngɛ blɔ ko nɔ ɔ, e ngɛ kaa nɔ́ nɛ Yehowa je tlomi ko nɛ e mi jio ngɛ David kuɛ nɔ. Enɛ ɔ ha nɛ David he jɔ lɛ, nɛ e he nile bui lɛ fɔ hu. (La 32:​2-4) Wɔ hu wa ma nyɛ maa nu he jã. Ke wa pee yayami nɛ hɛdɔ ngɛ he, nɛ wa tsake wa tsui niinɛ, nɛ Yehowa ngɔ kɛ ke wɔ ɔ, e he hia we nɛ wa he nile nɛ e ya nɔ nɛ e bu wɔ fɔ hu. Mohu ɔ, e sa nɛ wa bua nɛ jɔ kaa Yehowa je wa yayami ɔ nɛ ngɛ kaa tlomi ko nɛ e mi jiɔ ɔ ngɛ wa kuɛ nɔ.

10-11. Mɛni lɛ munyu nɛ ji Yehowa ‘pee klaalo kaa e kɛ yayami maa ke’ ɔ tsɔɔ wɔ ngɛ e he? (La 86:5)

¹⁰ Kane La 86:5. Ngɛ ngmami nɛ ɔ mi ɔ, David tsɔɔ kaa Yehowa ‘pee klaalo kaa e kɛ yayami maa ke.’ Enɛ ɔ tsɔɔ kaa ke wa pee yayami ɔ, Yehowa mi mi fu we mla, nɛ e pee klaalo hu kaa e maa ngɔ nihi nɛ a tsake a tsui ɔ a yayami kɛ ke mɛ be fɛɛ be. Mɛni he je nɛ Yehowa peeɔ e ní jã a? Ngmami ɔ nyagbe fã a tsɔɔ nɔ́ he je. E de ke: “O suɔmi nɛ se pui ɔ hiɛ babauu kɛ ha nihi nɛ a tsɛɔ mo ɔ.” Kaa bɔ nɛ wa na ngɛ ní kasemi nɛ sɛ hlami ɔ mi ɔ, Yehowa wo si kaa e ma je suɔmi nɛ se pui kpo kɛ tsɔɔ nihi nɛ a suɔ lɛ ɔ, nɛ e be mɛ kuae gblegbleegble. Suɔmi nɛ se pui nɛ Yehowa ngɛ ɔ haa nɛ e kɛ nihi tsuo nɛ a tsake a tsui ɔ a yayami ‘keɔ mɛ kulaa.’ (Yes. 55:7) Ke o be nɔ mi mami kaa Yehowa ngɔ yayami ko nɛ o pee be ko nɛ be ɔ kɛ ke mo ɔ, o ma nyɛ ma bi o he ke: ‘Anɛ i he ye kaa Yehowa pee klaalo kaa e maa ngɔ nihi tsuo nɛ a tsake a tsui, nɛ a kpa lɛ pɛɛ kaa e na mɛ mɔbɔ ɔ a tɔmi kɛ ke mɛ lo? Ke i he ye jã a, lɛɛ imi hu ma nyɛ ma ná nɔ mi mami kaa Yehowa maa ngɔ ye tɔmi ɔ kɛ ke mi, ke i kpa lɛ pɛɛ kaa e na mi mɔbɔ.’

¹¹ Jehanɛ hu ɔ, Baiblo ɔ de wɔ kaa Yehowa nuɔ wɔ sisi ejakaa e le kaa wa yi mluku, nɛ enɛ ɔ woɔ wa bua wawɛɛ. (La 139:​1, 2) Wa naa enɛ ɔ heii ngɛ la kpahi nɛ David po ɔ mi. Nɔ́ nɛ David de ɔ ma nyɛ maa ye bua wɔ konɛ waa kplɛɛ nɔ kaa Yehowa suɔ nɛ e ngɔ wa tɔmihi kɛ ke wɔ.

NƆ́ NƐ YEHOWA KAIƆ NGƐ WA HE

12-13. Ngɛ La 103:14 ɔ nya a, mɛni Yehowa kaiɔ ngɛ wa he, nɛ kɛ lɔ ɔ haa nɛ e kɛ wɔ hiɔ si ha kɛɛ?

¹² Kane La 103:14. David tsɔɔ kaa Yehowa “kaiɔ kaa zu ji wɔ.” Nɔ́ nɛ David de nɛ ɔ ha nɛ wa na nɔ́ he je nɛ Yehowa pee klaalo kaa e maa ngɔ e sɔmɔli nɛ a tsake a tsui ɔ a tɔmihi kɛ ke mɛ. Yehowa le kaa wa yi mluku. Bɔ nɛ pee nɛ waa nu munyu nɛ ɔ sisi saminya a, nyɛ ha nɛ wa susu nɔ́ nɛ David de ɔ he kɛ ya tsitsaa.

¹³ David tsɔɔ kaa Yehowa “le bɔ nɛ e bɔ wɔ ha a saminya.” Yehowa “ngɔ zugba zu kɛ puɛ” Adam. Enɛ ɔ he ɔ, Yehowa le bɔ nɛ e bɔ adesahi ha, kɛ nɔ́ nɛ a hia. Kaa nɔ hyɛmi nɔ́ ɔ, e he hia nɛ waa ye ní, waa hwɔ mahe, nɛ waa wo mumi hulɔ. E ngɛ heii kaa e he hia nɛ adesahi nɛ a ye mluku ɔ po nɛ a pee ní nɛ ɔmɛ. (1 Mose 2:7) Se akɛnɛ Adam kɛ Hawa pee yayami he je ɔ, adesahi ba pee zu ngɛ blɔ kpa ko nɔ kulaa. Wa ba pee zu ejakaa a fɔ wɔ kɛ wo yayami mi, nɛ e ma bi nɛ waa hwu kɛ si yayami. Yehowa le kaa wa ji yayami peeli, se pi lɔ ɔ pɛ. David de ngɛ e he kaa e “kaiɔ” kaa wa ji yayami peeli hulɔ. Enɛ ɔ tsɔɔ hu kaa akɛnɛ Yehowa le wɔ saminya he je ɔ, be fɛɛ be ɔ, e mi mi sãã lɛ ngɛ wa he. Wa ma nyɛ maa mwɔ nɔ́ nɛ David de ɔ nya ngɛ blɔ nɛ ɔ nɔ: Yehowa le kaa wa ma nyɛ ma tɔ̃ be komɛ. Se ke wa tɔ̃ ɔ, e hyɛɛ blɔ kaa waa pee tsakemi, konɛ e na wɔ mɔbɔ nɛ e ngɔ wa tɔmi ɔ kɛ ke wɔ.—La 78:​38, 39.

14. (a) Mɛni ji nɔ́ kpa ko nɛ David de ngɛ bɔ nɛ Yehowa kɛ wa yayami keɔ wɔ ha a he? (La 103:12) (b) Mɛni wa ma nyɛ maa kase ngɛ bɔ nɛ Yehowa ngɔ David yayami kɛ ke lɛ ha a mi? (Hyɛ daka nɛ ji “Ke Yehowa Kɛ Yayami Ke ɔ, E Kaii We Hu” ɔ.)

¹⁴ Mɛni ji nɔ́ kpa ko nɛ maa ye bua wɔ konɛ waa na kaa Yehowa ngɔ wa tɔmi kɛ ke wɔ? (Kane La 103:12.) David tsɔɔ kaa ke Yehowa ngɔ wa yayami kɛ ke wɔ ɔ, e jeɔ kɛ yaa se lokoo “kaa bɔ nɛ puje he kɛ pusinɔ he a kpɛti kɛ” ɔ. Puje he kɛ pusinɔ he a kpɛti kɛ wawɛɛ, nɛ a be nyɛe maa kpe gblee. Mɛni enɛ ɔ deɔ wɔ ngɛ bɔ nɛ Yehowa kɛ wa yayami keɔ wɔ ha a he? Womi ko de ngɛ ngmami nɛ ɔ he ke: “Ke Yehowa je wa yayami kɛ yaa se tsitsaa kaa kikɛ nɛ ɔ, e ngɛ kaa nɔ́ nɛ a ngɔ nɔ́ ko nɛ ngɛ fu jee kɛ je wa kasa nya kɛ ho se tsitsaa ya, nɛ wa be he nue hu. Enɛ ɔ tsɔɔ kaa wa ma nyɛ ma ná nɔ mi mami kaa Yehowa be wa yayami ɔmɛ nɛ e kɛ ke wɔ ɔ he susue, nɛ e be kaie hulɔ.” Mo susu he nɛ o hyɛ. Nɔ́ ko he fu loo e he via ma nyɛ ma ha nɛ wa kai nɔ́ ko nɛ ya nɔ blema. Se ke Yehowa ngɔ wa yayamihi kɛ ke wɔ ɔ, nɔ́ ko nɔ́ ko be nyɛe ma ha nɛ e kai ekohu, loo e gbla wa tue ngɛ he.—Eze. 18:​21, 22; Níts. 3:19.

15. Ke wa he nile buɔ wɔ fɔ loloolo ngɛ yayami ko nɛ wa pee kɛ be ɔ he ɔ, mɛni wa ma nyɛ maa pee?

¹⁵ Kɛ David munyu nɛ ngɛ La 103 ɔ maa ye bua wɔ ha kɛɛ konɛ waa kplɛɛ nɔ kaa Yehowa ngɔ wa tɔmi kɛ ke wɔ? Ke wa he nile buɔ wɔ fɔ loloolo ngɛ yayami ko nɛ wa pee kɛ be ɔ he ɔ, mo kai bɔ nɛ Yehowa nuɔ he ha. E kaiɔ kaa wa yi mluku. Enɛ ɔ he ɔ, e ngɔɔ nihi tsuo nɛ a tsake a tsui ngɛ yayamihi nɛ a pee kɛ be ɔ he ɔ a tɔmi kɛ keɔ mɛ. Lɔ ɔ akɛnɛ mo hu o tsake o tsui he je ɔ, Yehowa kɛ o yayami ɔ ke mo. Mo kai hu kaa Yehowa ma e juɛmi nya si kaa e be yayamihi nɛ e kɛ ke wɔ ɔ kaie hu, nɛ e be wa tue gblae ngɛ he hulɔ. Yehowa ngɔɛ e juɛmi kɛ mɛ yayami nɛ wa pee kɛ be ɔ nɔ kɔkɔɔkɔ, nɛ e sɛ nɛ wɔ hu waa ngɔ wa juɛmi kɛ ma nɔ. (La 130:3) Ke wa kplɛɛ nɔ kaa Yehowa ngɔ wa tɔmihi kɛ ke wɔ niinɛ ɔ, lɔ ɔ ma ha nɛ wa he nile be wɔ fɔ bue, nɛ wa maa ya nɔ ma sɔmɔ lɛ kɛ bua jɔmi.

16. Moo ngɔ nɔ́ he tomi nɔ́ ko kɛ tsɔɔ nɔ́ he je nɛ oslaa ngɛ he kaa wa maa ya nɔ ma susu yayamihi nɛ wa pee be ko nɛ be nɛ Yehowa kɛ ke wɔ ɔ he. (Hyɛ foni ɔ hulɔ.)

¹⁶ Mo susu nɔ́ he tomi nɔ́ nɛ ɔ he nɛ o hyɛ. Ke dlɛɛva ko hɛɛ lɔle ɔ, be komɛ ɔ, e hyɛɔ ahuhuɛ nɛ ngɛ e lɔle ɔ mi ɔ mi konɛ e nyɛ nɛ e hyɛ nɔ́ nɛ ngɛ nɔ yae ngɛ e se. Se e sɛ nɛ e pɔ jã peemi kpamkpam. Ejakaa ke e ya nɔ nɛ e ngɔ e juɛmi kɛ ma níhi nɛ ngɛ nɔ yae ngɛ e se ɔ pɛ nɔ, nɛ e hyɛ we e hɛ mi tɛɛ ɔ, e ma nyɛ ma ya ná oslaa. Bɔ nɛ pee nɛ e ya su he nɛ e yaa a slɔkee ɔ, e sa nɛ e ya nɔ nɛ e hyɛ e hɛ mi. Jã kɛ̃ nɛ e ji ngɛ wɔ hu wa blɔ fa mi. Be komɛ ɔ, e maa hi wawɛɛ kaa wa ma susu tɔmi komɛ nɛ wa pee kɛ be ɔ he, ejakaa jã peemi ma nyɛ maa ye bua wɔ konɛ wa ko ya tɔ̃ jamɛ a tɔmi ɔmɛ ekohu. Se ke wa ngɔ wa juɛmi kɛ ma tɔmihi nɛ wa tɔ̃ be ko nɛ be ɔ nɔ be fɛɛ be ɔ, lɔ ɔ ma ha nɛ wa bua jɔmi ɔ nya maa ba si, nɛ eko ɔ, wa be nyɛe ma sɔmɔ Yehowa kɛ pi si. Akɛnɛ wa ngɛ blɔ nɛ kɛ nɔ yaa je ehe nɛ Mawu wo si ɔ mi ɔ nɔ nyɛɛe, nɛ ní yayahi nɛ wa pee kɛ be ɔ “be juɛmi mi bae” hu he je ɔ, e sa nɛ waa hyɛ wa hɛ mi tɛɛ.—Yes. 65:17; Abɛ 4:25.

YAA NƆ NƐ O NÁ NƆ MI MAMI KAA YEHOWA NGƆ O TƆMI Ɔ KƐ KE MO

17. Mɛni he je nɛ e sa nɛ waa ya nɔ nɛ wa ná nɔ mi mami kaa Yehowa suɔ wɔ, nɛ be fɛɛ be ɔ, e pee klaalo kaa e maa ngɔ wa yayamihi kɛ ke wɔ ɔ?

¹⁷ E sa nɛ waa ya nɔ nɛ wa ná nɔ mi mami kaa Yehowa suɔ wɔ, nɛ be fɛɛ be ɔ, e pee klaalo kaa e maa ngɔ wa yayamihi kɛ ke wɔ. (1 Yoh. 3:​19, sisi ningma.) Mɛni he je? Ejakaa Satan maa ya nɔ maa pee nɔ́ fɛɛ nɔ́ nɛ e ma nyɛ konɛ e kɛ ha nɛ wa susu kaa Yehowa sume wɔ, nɛ e kɛ wa yayamihi be wɔ kee gblee. Oti nɛ Satan kɛ ma e hɛ mi ɔ tsakee we kɔkɔɔkɔ. E suɔ nɛ wa kpa Yehowa sɔmɔmi. Enɛ ɔ he ɔ, wa ma nyɛ maa hyɛ blɔ kaa Satan maa ya nɔ maa hwu kɛ si wɔ wawɛɛ, ejakaa e le kaa be bɔɔ pɛ lɛ e piɛ ha lɛ. (Kpoj. 12:12) E sɛ nɛ wa ha nɛ e ye kunimi kɔkɔɔkɔ!

18. Mɛni maa ye bua mo nɛ o ná nɔ mi mami kaa Yehowa suɔ mo, nɛ e pee klaalo kaa e maa ngɔ o yayamihi kɛ ke mo be fɛɛ be?

¹⁸ Bɔ nɛ pee nɛ o he ye kaa Yehowa suɔ mo ɔ, moo ngɔ ga womihi nɛ wa susu he ngɛ ní kasemi nɛ sɛ enɛ ɔ hlami ɔ mi ɔ kɛ tsu ní. Jehanɛ hu ɔ, bɔ nɛ pee nɛ o ná nɔ mi mami kaa Yehowa ngɔ tɔmihi nɛ o pee be ko nɛ be ɔ kɛ ke mo ɔ, mo susu bɔ nɛ Yehowa nitsɛ kale e he ha ngɛ ní kasemi nɛ ɔ mi ɔ he. Mo pue o yi mi tɛ ngɛ bɔ nɛ Baiblo ɔ kale bɔ nɛ Yehowa ngɔɔ tɔmihi kɛ keɔ ha a he. O hɛ nɛ ko je nɔ kaa e le o gbɔjɔmihi, nɛ e maa ya nɔ maa na mo mɔbɔ. Jehanɛ hu ɔ, mo kai kaa ke e kɛ yayami ke ɔ, e kɛ ke kulaa. Ke o pee jã a, o bua maa jɔ̃, ejakaa o ngɛ nɔ mi mami kaa Yehowa na mo mɔbɔ kaa bɔ nɛ e na David mɔbɔ ɔ, nɛ o ma de ke: “Yehowa, mo tsumi kaa ‘o ngɔ ye tɔmi ɔ kɛ ye yayami ɔmɛ kɛ ke mi’!”—La 32:5.