Anɛ O Ngɛ Nɔ Mi Mami Kaa Anɔkuale ɔ Ji Nɛ ɔ Lo? Mɛni He Je?

1. Mɛni Katoliki bi kɛ Protestant bi a jami nya dali peeɔ ke a ngɛ ta hwue?

ANƐ Mawu suɔ kaa Kristofohi nɛ a ya ta nɛ a gbe nihi nɛ a je ma kpahi a nɔ ɔ lo? Maa pee jeha 100 ji nɛ ɔ, nihi fuu nɛ a tsɛɛ a he ke Kristofohi ɔ gbe a sibi ngɛ ta mi. Katoliki bi gbe Katoliki bi, nɛ Protestant bi hu gbe Protestant bi. Katoliki bi kɛ Protestant bi a jami nya dali po jɔɔ ta buli kɛ ta hwumi tuhi a nɔ. Ngɛ Je Mi Ta Enyɔne ɔ mi ɔ, nihi nɛ a tsɛɛ a he ke Kristofohi ɔ pue muɔ si wawɛɛ nitsɛ.

2, 3. Kɛ Yehowa Odasefohi pee a ní ha kɛɛ ngɛ je mi ta enyɔne ɔ kɛ ta kpahi nɛ a hwu ngɛ lɔ ɔ se ɔ mi? Mɛni he je?

² Mɛni Yehowa Odasefohi pee be mi nɛ a ngɛ Je Mi Ta Enyɔne ɔ hwue ɔ? A fĩ we ma ko ma ko se. A kɛ a he wui ta a mi. Mɛni he je? Ejakaa a suɔ kaa a maa bu ní nɛ Yesu tsɔɔ mɛ ɔ tue, konɛ a kase lɛ, nɛ́ mɛ hu a suɔ ni kpahi. Yesu de ke: “Ke nyɛ suɔ nyɛ sibi ɔ, kɛkɛ nɔ tsuaa nɔ maa le kaa ye kaseli ji nyɛ.” (Yohane 13:35) Odasefohi kai sisi tomi mlaahi nɛ Paulo ngma ya ha Korinto bi ɔmɛ ɔ hulɔ. A suɔ kaa a kɛ sisi tomi mlaa nɛ ɔmɛ ma tsu ní.​—Kane 2 Korinto Bi 10:3, 4.

³ Baiblo ɔ ji nɔ́ nɛ anɔkuale Kristofohi kɛ kudɔɔ a si himi. Enɛ ɔ he ɔ, a he nile ngmɛ́ mɛ blɔ kaa a ya ta, aloo a kase ta hwumi. Akɛnɛ Yehowa Odasefohi bɔɔ mɔde kaa a maa hi si kaa anɔkuale Kristofohi he je ɔ, a wa a kpɛti nihi akpehi abɔ yi mi. A wa jokuɛwi kɛ nikɔtɔmahi, yihi kɛ nyumuhi tsuo a yi mi ngɛ tsu womi hehi. A gbe a ti ni komɛ po ngɛ je mi ta enyɔne ɔ mi ngɛ Nazi nɔ yemi ɔ sisi ngɛ Germany. Ngɛ yi mi wami nɛ ɔ nɛ Yehowa Odasefohi kɛ kpe ngɛ Yuropa tsuo se ɔ, a ya nɔ nɛ a fiɛɛ Yehowa Matsɛ Yemi ɔ he sane kpakpa a nɛ a kpa we. A ya nɔ nɛ a fiɛɛ ngɛ he tsuaa he nɛ a ngɛ. A fiɛɛ ngɛ hehi nɛ a wo mɛ tsu ngɛ ɔ, kɛ hehi nɛ a fie mɛ kɛ ho ɔ tsuo.a (Hyɛ sisi ningma.) Jehahi komɛ a se ngɛ jeha 1994 ɔ mi ɔ, a hwu wɛtsohi a kpɛti ta ko ngɛ Rwanda nɛ a gbe nihi babauu. Yehowa Odasefohi kɛ a he wui ta nɛ ɔ mi. Jã kɛ̃ nɛ a kɛ a he wui ta nɛ a hwu ngɛ blema Yugoslavia a hu mi.

4. Behi fuu ɔ, ke nihi na kaa Yehowa Odasefohi fĩ we ma ko ma ko se ngɛ ta hwumi mi ɔ, mɛni a deɔ?

⁴ Akɛnɛ ke mahi ngɛ ta hwue nɛ Yehowa Odasefohi fĩ we ma ko ma ko se he je ɔ, nihi fuu nɛ a ngɛ je ɔ mi ɔ deɔ ke, Odasefo bi ɔmɛ suɔ Mawu kɛ a nyɛmi nɔmlɔ niinɛ, enɛ ɔ he ɔ, mɛ ji anɔkuale Kristofohi ɔ nɛ. Mɛni ní kpa komɛ hu a he je nɛ nihi he ye kaa Yehowa Odasefohi ji anɔkuale Kristofohi ɔ?

NÍ TSƆƆMI NÍ TSUMI NƐ PE KULAA NGƐ YI NƆ SANE MI

5. Mɛnɔmɛ hu nɛ Yesu de e kaseli ɔmɛ kaa a fiɛɛ kɛ ha, nɛ mɛni he je nɛ enɛ ɔ ji tsakemi agbo kɛ ha mɛ ɔ?

⁵ Yesu tsɔɔ heii kaa Mawu Matsɛ Yemi ɔ he sane kpakpa fiɛɛmi ɔ ji ní tsumi nɛ he hia pe kulaa ngɛ zugba a nɔ. Benɛ e je e sɔmɔmi ní tsumi ɔ sisi pɛ nɛ e hla kaseli 12 konɛ a je fiɛɛmi ní tsumi nɛ ɔ sisi. Pee se ɔ, a ma tsu ní tsumi nɛ ɔ kɛ kpa je ɔ mi tsuo. Ngɛ kaseli 12 ɔ se ɔ, Yesu tsɔse kaseli 70 kpa komɛ hulɔ. (Luka 6:13; 10:1) Yesu tsɔse e kaseli ɔmɛ konɛ a le ní tsɔɔmi. Kekleekle ɔ, e de mɛ ke a fiɛɛ sane kpakpa a kɛ ha Yuda bi ɔmɛ. Pee se ɔ, e de mɛ kaa a fiɛɛ sane kpakpa a kɛ ha ma jeli ɔmɛ hulɔ. Enɛ ɔ ji tsakemi agbo kɛ ha Yesu kaseli ɔmɛ, ejakaa a ji Yuda bi nɛ a kɛ ma jeli ɔmɛ be nɔ́ ko peemi!​—Bɔfo Ɔmɛ A Ní Tsumi 1:8.

6. Mɛni ha nɛ Petro na kaa Mawu hyɛ we nɔ hɛ mi?

⁶ Kornelio ji kekleekle ma je no nɛ a pui lɛ nɛ e ba plɛ Kristofo no. Yehowa tsɔ bɔfo Petro konɛ e ya fiɛɛ kɛ ha Kornelio kɛ e we mi bimɛ ɔmɛ. Enɛ ɔ ha nɛ Petro na kaa Mawu hyɛ we nɔ hɛ mi. Yehowa suɔ kaa adesahi tsuo nɛ kase anɔkuale ɔ nɛ a kplɛɛ nɔ. Enɛ ɔ he ɔ, Petro fã ke a baptisi Kornelio kɛ e we ɔ. (Bɔfo Ɔmɛ A Ní Tsumi 10:9-48) Kɛ je jamɛ a be ɔ mi kɛ ma a, Petro kɛ Yesu kaseli kpa amɛ fiɛɛɔ kɛ haa nihi nɛ a je je ma kpahi a mi ɔ.

7, 8. Mɛni Yehowa Odasefohi ngɛ pee konɛ sane kpakpa a nɛ sɛ nihi a tsui mi? (Moo hyɛ foni nɛ ngɛ ni kasemi ɔ sisije ɔ.)

⁷ Ngɛ wa be nɛ ɔ mi hu ɔ, nihi nɛ a nyɛɛ hɛ mi ngɛ Yehowa asafo ɔ mi ɔ, kɛ kã fĩɔ sane kpakpa fiɛɛmi kɛ nihi a ní tsɔɔmi ɔ se ngɛ je ɔ mi tsuo. Amlɔ nɛ ɔ, wa ngɛ Yehowa Odasefohi maa pee ayɔ kpaanyɔ ngɛ je kɛ wɛ. A kɛ kã fiɛɛɔ ngɛ gbihi nɛ hiɛ pe 600 a mi, nɛ yibɔ nɛ ɔ ngɛ hɛ mi yae daa jenanɛɛ. A fiɛɛɔ ngɛ nihi a wehi a mi, kɛ gbɛjegbɛhi a he. Be komɛ ngɛ nɛ a ngɔɔ okplɔɔhi kɛ atsɛ̃sehi kɛ maa si, nɛ a toɔ womihi nɛ a pee ngɛ gbihi fuu a mi ɔ ngɛ nɔ, konɛ a kɛ ye nihi odase. Nihi le Yehowa Odasefohi a mi tso, ejakaa mɛ pɛ ji nihi nɛ a guɔ blɔ nɛ ɔmɛ a nɔ kɛ fiɛɛɔ.

⁸ Yehowa asafo ɔ tsɔse nyɛmimɛ nyumuhi kɛ yihi nɛ a hiɛ pe 2,900, konɛ a tsɔɔ Baiblo ɔ kɛ Baiblo kasemi womihi a sisi kɛ ya gbihi a mi. A tsɔɔ Baiblo ɔ kɛ Baiblo kasemi womihi a sisi kɛ yaa gbi lafahi abɔ nɛ nihi bɔɔ pɛ nɛ a tuɔ ɔ po a mi. Kaa nɔ hyɛmi nɔ́ ɔ, amlɔ nɛ ɔ, Yehowa Odasefohi nɛ a ngɛ Spain ɔ tsɔɔ Baiblo kasemi womihi a sisi kɛ yaa Catalan gbi ɔ mi. Lingmi nɛ ɔ, nihi fuu bɔni Catalan gbi ɔ tumi ngɛ Valencia, Alicante, Balearic Islands, kɛ Andorra ma amɛ a mi. Mwɔnɛ ɔ, nimli ayɔhi abɔ tuɔ Catalan gbi ɔ. Yehowa Odasefohi tsɔɔ Baiblo kasemi womihi a sisi kɛ yaa Catalan gbi ɔ mi, nɛ a peeɔ asafo mi kpehi ngɛ gbi nɛ ɔ mi hulɔ. Enɛ ɔ haa nɛ munyu ɔ sɛɛ ni ɔmɛ a tsui mi.

9, 10. Mɛni tsɔɔ kaa Yehowa asafo ɔ suɔ nɛ nihi tsuo nɛ a kase anɔkuale ɔ?

⁹ Yehowa Odasefohi peeɔ Baiblo kasemi womihi ngɛ gbihi fuu a mi ngɛ je kɛ wɛ, nɛ a ngɛ nihi ní tsɔɔe ngɛ ni ɔmɛ a je gbihi a mi. Kaa nɔ hyɛmi nɔ́ ɔ, ngɛ Mexico ɔ, nihi fuu tuɔ Spania gbi. Se nihi fuu tuɔ gbi kpahi ngɛ a wehi a mi. Maya gbi ɔ hu piɛɛ gbi nɛ ɔmɛ a he. Asafo ɔ ní tsumi kɔni ɔ nɛ ngɛ lejɛ ɔ ha nɛ nihi nɛ a tsɔɔ wa womi ɔmɛ a sisi kɛ yaa Maya gbi ɔ mi ɔ, hia kɛ ya je Maya bi ɔmɛ a kpɛti. Enɛ ɔ ha nɛ daa ligbi ɔ, a kɛ nihi tuɔ Maya gbi ɔ. Lɔ ɔ he ɔ, ke a tsɔɔ womi ɔmɛ a sisi kɛ ya Maya gbi ɔ mi ɔ, Maya bi ɔmɛ nuɔ sisi saminya. Gbi ɔ ekpa ko hu ji Nepali. A tuɔ gbi nɛ ɔ ngɛ ma ko nɛ a tsɛɛ ke Nepal ɔ mi. Nihi nɛ a ngɛ ma a mi ɔ hiɛ pe ayɔ 29. A tuɔ gbi slɔɔtoslɔɔtohi maa pee 120 ngɛ ma a mi. Se nihi nɛ a hiɛ pe ayɔ 10 tuɔ Nepali gbi ɔ kaa a je gbi. Nihi babauu hu tuɔ gbi nɛ ɔ kɛ piɛɛ mɛ nitsɛmɛ a je gbihi a he. Wa nyɛmimɛ ɔmɛ tsɔɔ Baiblo kasemi womihi a sisi kɛ yaa Nepali gbi ɔ mi.

¹⁰ Baiblo kasemi womihi a sisi nɛ Yehowa asafo ɔ tsɔɔ kɛ yaa gbihi fuu a mi mwɔnɛ ɔ tsɔɔ kaa a kɛ Matsɛ Yemi sane kpakpa fiɛɛmi ní tsumi ɔ nɛ a ngɛ tsue ngɛ je kɛ wɛ ɔ fiɛ we kulaa. Yehowa Odasefohi gbaa dɛ womihi, womiyohi, kɛ womi tɛtlɛɛhi ayɔhi abɔ kɛ haa nihi nɛ́ a jua we. Odasefohi jeɔ mɛ nitsɛmɛ a tsui mi nɛ a haa nɔ́ ko kɛ fĩɔ fiɛɛmi ní tsumi ɔ se. A buɔ Yesu munyu nɛ nyɛɛ se nɛ ɔ tue: “Nyɛ ná lɛ yaka gu nɛ nyɛ wui he hiɔ; nyɛ hu nyɛ ngɔ ha nɛ nyɛ ko he hiɔwo.”​—Mateo 10:8.

11, 12. Akɛnɛ wa fiɛɛɔ nɛ wa tsɔɔ nihi ní ngɛ je kɛ wɛ he je ɔ, mɛni nihi fuu deɔ?

¹¹ Yehowa Odasefohi ngɛ nɔ mi mami kaa a na anɔkuale ɔ, enɛ ɔ he ɔ, a ngɔɔ níhi fuu kɛ sãa afɔle konɛ a nyɛ nɛ a fiɛɛ kɛ ha nihi nɛ́ a je ma kpahi a nɔ. Odasefohi fuu pee a si himi kpokploo, a kase gbi kpahi, nɛ a kase bɔ nɛ a kɛ nihi nɛ a je ma kpahi a nɔ hiɔ si ha konɛ a nyɛ nɛ a fiɛɛ kɛ ha mɛ. Akɛnɛ wa fiɛɛɔ nɛ waa tsɔɔ nihi ní ngɛ je kɛ wɛ he je ɔ, nihi fuu deɔ ke Yehowa Odasefohi ji Yesu Kristo we anɔkuale se nyɛɛli ɔmɛ nɛ.

¹² Odasefohi peeɔ ní nɛ ɔmɛ tsuo, ejakaa a ngɛ nɔ mi mami kaa a na anɔkuale ɔ. Se mɛni ji ní kpa komɛ hu nɛ ha nɛ wa nyɛmimɛ ɔmɛ ngɛ nɔ mi mami kaa a na anɔkuale ɔ?​—Kane Roma Bi 14:17, 18.

NƆ́ HE JE NƐ A NGƐ NƆ MI MAMI KAA ANƆKUALE Ɔ JI NƐ Ɔ

13. Mɛni Yehowa Odasefohi peeɔ konɛ a we asafo ɔ he nɛ tsɔ?

¹³ Wa nyɛmimɛ ɔmɛ tsɔɔ yi mi tomihi fuu a he je nɛ a ngɛ nɔ mi mami kaa a na anɔkuale ɔ. Nyɛminyumu ko nɛ ngɛ Yehowa sɔmɔe jehahi babauu ji nɛ ɔ de ke: “Nɔ tsuaa nɔ bɔɔ mɔde kaa e maa ba e je mi saminya ngɛ Yehowa asafo ɔ mi, nɛ ke e he hia nɛ a wo nɔ ko ga aloo a tsɔse nɔ ko ɔ, asafo ɔ peeɔ jã nɛ́ hɛ mi hyɛmi be mi.” Mɛni yeɔ bua Yehowa we bi loko a nyɛɔ baa a je mi saminya a? A ti nɔ tsuaa nɔ bɔɔ mɔde wawɛɛ kaa e kɛ Mawu mlaahi nɛ ngɛ Baiblo ɔ mi ɔ ma tsu ní, nɛ e maa kase Yesu kɛ Yesu kaseli ɔmɛ. Odasefohi bɔɔ ko pɛ nɛ a kua ke a kɛ Mawu mlaahi be ní tsue. A fie jamɛatsɛmɛ ɔmɛ ngɛ asafo ɔ mi. Yehowa Odasefohi babauu baa a je mi saminya, nɛ a he tsɔ ngɛ Yehowa hɛ mi. Nihi fuu nɛ be ko nɛ be ɔ, a pee níhi nɛ Mawu bua jɔɛ he ɔ tsake a je mi bami, nɛ amlɔ nɛ ɔ, a kɛ Mawu mlaahi ngɛ ní tsue.​—Kane 1 Korinto Bi 6:9-11.

14. Mɛni tsakemihi nihi fuu nɛ a fie mɛ ngɛ asafo ɔ mi ɔ pee? Mɛni je jã nɛ a pee ɔ mi kɛ ba?

¹⁴ Baiblo ɔ tsɔɔ kaa ke Kristofo no ko sume kaa e maa pee tue bumi kɛ ha Mawu ɔ, e sa nɛ a fie lɛ ngɛ asafo ɔ mi. Bua jɔmi sane ji kaa nimli akpehi abɔ nɛ a fie mɛ ngɛ asafo ɔ mi be ko nɛ be ɔ, pee se ɔ, a pia a he nɛ a kpale kɛ ba asafo ɔ mi. (Kane 2 Korinto Bi 2:6-8.) Akɛnɛ be tsuaa be ɔ, Odasefo bi ɔmɛ kɛ Baiblo ɔ mi mlaahi tsuɔ ní he je ɔ, mu ko mu ko be asafo ɔ he. Enɛ ɔ he ɔ, a ngɛ nɔ mi mami kaa Mawu kplɛɛ a we asafo ɔ nɔ. E ngɛ mi kaa sɔlemihi fuu ngmɛɛɔ a sɔlemi bimɛ ɔmɛ blɔ nɛ a peeɔ níhi nɛ a tsui suɔ mohu lɛɛ, se Odasefo bi ɔmɛ lɛɛ, a kɛ Yehowa mlaahi tsuɔ ní. Enɛ ɔ ha nɛ nihi fuu ma nɔ mi kaa Yehowa Odasefohi na anɔkuale ɔ.

15. Mɛni ha nɛ nyɛminyumu ko ná nɔ mi mami kaa e na anɔkuale ɔ?

¹⁵ Mɛni he je nɛ Odasefo bi komɛ hu he ye kaa a na anɔkuale ɔ? Nyɛminyumu ko nɛ e ye jeha 54 nɛ e bɔni Yehowa sɔmɔmi loko e ye jeha 20 ɔ, tsɔɔ kaa ní etɛ nɛ nyɛɛ se nɛ ɔmɛ a nɔ e da nɛ e kɛ ná nɔ mi mami kaa e na anɔkuale ɔ nɛ: (1) Mawu ngɛ, (2) Mawu lɛ ha nɛ a ngma Baiblo ɔ nɛ, (3) Yehowa Odasefohi ji nihi nɛ a ngɛ Mawu suɔmi nya ní pee ngɛ zugba a nɔ mwɔnɛ ɔ. E de ke: “Be tsuaa be ɔ, i suɔ kaa ma hyɛ kaa ní etɛ nɛ ɔmɛ ngɛ mi niinɛ lo. I bɔni jã peemi jehahi babauu ji nɛ ɔ nɛ. Be tsuaa be nɛ ma pee jã a, i naa kaa wɔ lɛ wa na anɔkuale ɔ nɛ. Enɛ ɔ haa nɛ ye hemi kɛ yemi ɔ mi waa.”

16. Mɛni he je nɛ nyɛmiyo ko ná nɔ mi mami kaa e na anɔkuale ɔ?

¹⁶ Yogbayo ko nɛ e ngɛ sɔmɔe ngɛ Yehowa Odasefohi a ní tsumi yi ɔ ngɛ New York ɔ de ke: “Yehowa asafo ɔ pɛ nɛ e tsɔɔ nihi Yehowa biɛ ɔ. Ye bua jɔ munyu nɛ woɔ nɔ he wami nɛ ngɛ 2 Kronika 16:9 ɔ he. A tsɔɔ ngɛ lejɛ ɔ kaa ‘Yehowa hɛngmɛ ngɛ je ɔ tsuo he; nihi nɛ yeɔ lɛ anɔkuale ɔ, e woɔ mɛ he wami.’ Sisi numi ngɛ he kaa asafo ɔ tsɔɔ nihi Yehowa biɛ ɔ, ejakaa biɛ nɛ ɔ je kpo ngɛ Baiblo ɔ mi maa pee si 7,000 sɔuu!” E de hu ke: “Anɔkuale ɔ ha nɛ i na kaa e sa nɛ ma ngɔ ye tsui tsuo kɛ sɔmɔ Yehowa, konɛ Yehowa hu nɛ je e tsui mi faa nɛ e wo mi he wami. Huɛ bɔmi nɛ ngɛ i kɛ Yehowa wa kpɛti ɔ he hia mi wawɛɛ pe nɔ́ tsuaa nɔ́. Ye bua hu jɔ kaa Yesu ba tsɔɔ wɔ bɔ nɛ Mawu ngɛ ha tutuutu.”

17. Mɛni nɔ́ mi mami nyɛminyumu ko nɛ be ko nɛ be ɔ, e he we yi kaa Mawu ngɛ ɔ ba ná, nɛ mɛni he je?

¹⁷ Nyɛminyumu ko nɛ be ko nɛ be ɔ, e he we yi kaa Mawu ngɛ ɔ de ke: “Adebɔ níhi ha nɛ i ná nɔ mi mami kaa Mawu suɔ nɛ adesahi nɛ a ná bua jɔmi ngɛ si himi mi, enɛ ɔ he ɔ, e be hae nɛ nɔ́ nami nɛ ya nɔ daa. Jehanɛ se hu ɔ, e ngɛ mi kaa nihi babauu a hemi kɛ yemi ngɛ Mawu mi ɔ ngɛ si bae mohu lɛɛ, se Yehowa we bi lɛɛ, hemi kɛ yemi, kã, kɛ suɔmi nɛ a kɛ jaa Mawu ɔ mi ngɛ wae. Yehowa mumi ɔ pɛ nɛ ma nyɛ ma tsu nɔ́ nɛ ɔ.”​—Kane 1 Petro 4:1-4.

18. Mɛni he je nɛ nyɛmimɛ enyɔ komɛ he ye kaa a na anɔkuale ɔ? Kɛ mo hu o susu kɛɛ?

¹⁸ Nyɛminyumu ko hu nɛ e kɛ jehahi babauu sɔmɔ Yehowa a, tsɔɔ nɔ́ he je nɛ e he ye kaa e na anɔkuale ɔ. E de ke: “Níhi nɛ i ngɛ kasee kɛ je blema kɛ ba si piɔ ɔ, ha nɛ i na kaa Odasefohi bɔɔ mɔde kaa a maa pee a ní kaa bɔ nɛ Yesu bɔfo ɔmɛ pee ɔ. I hia blɔ kɛ ya hehi fuu ngɛ je ɔ mi, nɛ i na kaa kake peemi ngɛ Yehowa Odasefohi a kpɛti ngɛ je kɛ wɛ. Baiblo ɔ mi anɔkuale ɔ nɛ i kase ɔ ha nɛ i ngɛ bua jɔmi, nɛ ye tsui hu nɔ ye mi.” Nyɛminyumu ko hu nɛ e ye pe jeha 60 tsɔɔ kaa Yehowa Odasefohi ngɛ hemi kɛ yemi nitsɛnitsɛ ngɛ Yesu mi. E de ke: “Wa kaseɔ ní kɛ kɔɔ bɔ nɛ Yesu ba e je mi ha, kɛ bɔ nɛ e tsu e sɔmɔmi ní tsumi ɔ ha a he. Enɛ ɔ ha nɛ wa kase e nɔ hyɛmi nɔ́ ɔ. Wa pee tsakemihi ngɛ wa si himi mi konɛ wa nyɛ nɛ waa gu Kristo Yesu nɔ kɛ hɛ wɔ kɛ su Mawu he. Wa yɔse kaa Kristo kpɔmi afɔle sami ɔ nɔ nɛ Mawu maa da kɛ he wa yi wami. Wa le hu kaa a tle lɛ si kɛ je gbeje, nɛ nihi fuu ye enɛ ɔ he odase.”​—Kane 1 Korinto Bi 15:3-8.

MOO FIƐƐ ANƆKUALE Ɔ KƐ TSƆƆ NIHI

19, 20. (a) Mɛni ní tsumi Paulo tu he munyu ngɛ womi nɛ e ngma ya ha Roma asafo ɔ mi? (b) Mɛni e sa kaa Yehowa sɔmɔli tsuo nɛ a pee?

¹⁹ Anɔkuale Kristofohi suɔ nihi saminya. Enɛ ɔ he je nɛ a fiɛɛɔ Mawu he anɔkuale nɛ́ a kase ɔ kɛ tsɔɔ nihi ɔ nɛ. Paulo de Roma asafo ɔ mi bimɛ ɔmɛ kaa e ji anɔkuale Kristofohi a ní tsumi kaa a fiɛɛ. E ngma ya ha mɛ ke: “Ke o kɛ o nya jaje ke ‘Yesu Kristo ji Nyɔmtsɛ,’ nɛ o he ye ngɛ o tsui mi kaa Mawu tle lɛ si kɛ je gbeje ɔ, a ma he o yi wami. Ejakaa tsui a kɛ heɔ yeɔ loko Mawu woɔ nɔ nguɔ; nɛ ke waa kɛ wa nya jaje ɔ, a ma he wa yi wami.”​—Roma Bi 10:9, 10.

²⁰ Yehowa Odasefohi ngɛ nɔ mi mami kaa anɔkuale ɔ ji nɛ ɔ nɛ. A le hu kaa e ji he blɔ nɛ a ná kaa a maa fiɛɛ Mawu Matsɛ Yemi ɔ he sane kpakpa a kɛ tsɔɔ nihi. Enɛ ɔ he ɔ, bɔɔ mɔde kaa o kɛ nihi maa kase Baiblo ɔ. O kɛ o ní peepee hu nɛ tsɔɔ kaa o ngɛ nɔ mi mami kaa anɔkuale ɔ ji nɛ ɔ nɛ.