O Kɛ Nɔ Ko Nɛ “Le Nyɔmtsɛ ɔ” Pɛ Nɛ Sɛ Gba Si Himi Mi Anɛ Loloolo ɔ, Nile Ngɛ Mi Lo?

Mawu sɔmɔli komɛ nɛ a sɛ we gba si himi lolo ɔ tu munyu ko kaa jã hyɛ. A le kaa Yehowa suɔ nɛ e sɔmɔli kɛ nihi nɛ a “le Nyɔmtsɛ ɔ” pɛ nɛ sɛ gba si himi mi. Enɛ ɔ tsɔɔ kaa e sa nɛ a kɛ anɔkuale Kristofohi pɛ nɛ sɛ gba si himi mi. (1 Korinto Bi 7:39) Mɛni he je nɛ Kristo se nyɛɛli komɛ tuɔ munyu kaa jã a?

NƆ́ HE JE NƐ NI KOMƐ A YI MI PEEƆ MƐ ENYƆƆNYƆ

Eko ɔ, Kristofohi nɛ a tuɔ munyu nɛ ɔmɛ ɔ susuɔ kaa nyɛmimɛ yihi a he hiɛ pe nyɛmimɛ nyumuhi. E ngɛ mi jã ngɛ mahi fuu a nɔ. Kaa nɔ hyɛmi nɔ́ ɔ, ngɛ Korea a, ke a hla Kristofohi nɛ a sɛ we gba si himi mi 100, a kpɛti nihi 57 ji nyɛmimɛ yihi, nɛ 43 ji nyɛmimɛ nyumuhi. Nɛ ngɛ Colombia hu ɔ, ke a hla Kristofohi nɛ a sɛ we gba si himi mi 100, a kpɛti nihi 66 ji nyɛmimɛ yihi, nɛ 34 ji nyɛmimɛ nyumuhi.

Ngɛ he kpa komɛ ɔ, eko ɔ, níhi nɛ fɔli nɛ tsa pi Odasefohi ji mɛ ɔ heɔ loko a kɛ a biyihi haa gba a, tsa pi nɔ́ bi. Nɛ eko ɔ, nyɛmimɛ nyumu komɛ nɛ a suɔ kaa a maa sɛ gba si himi ɔ be ní nɛ ɔmɛ eko. Enɛ ɔ ha nyɛmimɛ yi komɛ haoɔ wawɛɛ, nɛ e peeɔ mɛ kaa a be Kristofo no ko nae nɛ a kɛ lɛ maa sɛ gba si himi mi.a​​—Hyɛ sisi ningma.

E HE HIA NƐ O KƐ O HƐ NƐ FƆ YEHOWA NƆ

Ke o ngɛ si himi ko kaa jã mi ɔ, mo ná nɔ mi mami kaa Yehowa nu mo sisi, nɛ e le bɔ nɛ e peeɔ mo ha tutuutu.​​—2 Kronika 6:29, 30.

Se kɛ̃ ɔ, Yehowa fã wɔ ngɛ Baiblo ɔ mi kaa waa kɛ nɔ nɛ le Nyɔmtsɛ ɔ pɛ nɛ sɛ gba si himi mi. Mɛni he je? Ejakaa e le nɔ́ nɛ hi ha wɔ, nɛ e suɔ nɛ e bu wa he. E sume nɛ waa pee juɛmi ko nɛ maa ye wɔ awi aloo e ma ha nɛ wa be bua jɔmi náe. Ngɛ Nehemia be ɔ mi ɔ, Yuda bi fuu kɛ yihi nɛ tsa pi Mawu sɔmɔli ji mɛ ɔ sɛ gba si himi mi. Nehemia wo nɔ́ yaya nɛ Salomo pee ɔ nɔ ta. E tsɔɔ kaa “Mawu suɔ e sane, nɛ e wo lɛ Israel tsuo nɔ matsɛ, se kɛ̃ ɔ, ma se yi ɔmɛ ha nɛ lɛ po e pee yayami.” (Nehemia 13:23-26) Yehowa le kaa se nami ngɛ mlaahi nɛ e woɔ wɔ ɔ he, enɛ ɔ he ɔ, e wo Kristofohi mlaa kaa a kɛ nɔ nɛ le Nyɔmtsɛ ɔ pɛ nɛ sɛ gba si himi mi. (La 19:7-10; Yesaya 48:17, 18) Wa bua jɔ kaa e jeɔ suɔmi mi nɛ e woɔ wɔ ga kpakpa. Ke wa buɔ Yehowa tue kaa wa Nɔ Yelɔ ɔ, lɔ ɔ tsɔɔ kaa wa kplɛɛ nɔ kaa e ngɛ he blɔ nɛ e tsɔɔ wɔ nɔ́ nɛ e sa kaa waa pee.​​—Abɛ 1:5.

E ngɛ heii kaa o be suɔe kaa o kɛ nɔ ko nɛ sume Yehowa maa “bɔ,” aloo o kɛ lɛ maa sɛ gba si himi mi. Nɔ ko kaa jã a, ma nyɛ ma ha nɛ o kpa Mawu sɔmɔmi. (2 Korinto Bi 6:14) Ga nɛ Mawu woɔ wɔ ɔ, poɔ wa he piɛ be tsuaa be. Kristofohi fuu nɛ a ngɛ mwɔnɛ ɔ, buɔ Yehowa tue, nɛ a na kaa nile ngɛ jã nɛ a peeɔ ɔ mi. Se ni komɛ lɛɛ a bui Yehowa tue.

LOLOOLO Ɔ, NILE NGƐ MI

Nyɛmiyo ko nɛ a tsɛɛ lɛ ke Maggy nɛ e ngɛ Australia a kɛ nyumu ko nɛ e pi anɔkuale Kristofo no bɔni kpo jemi.b (Hyɛ sisi ningma.) E de ke: “I poɔ asafo mi kpehi a mi konɛ i kɛ lɛ wa nyɛ nɛ waa je kpo. I ba gbo ngɛ mumi mi kulaa.” Zangmayo ko nɛ e ngɛ India nɛ a tsɛɛ lɛ ke Ratana a kɛ nɔ ko nɛ e kɛ lɛ yaa sukuu nɛ e bɔni Baiblo ɔ kasemi ɔ bɔni kpo jemi. Se nyumuyo ɔ ngɛ Baiblo ɔ kasee konɛ e nine nɛ su yoyo ɔ nɔ. Nyagbenyagbe ɔ, yoyo ɔ kpa Yehowa sɔmɔmi nɛ e ya sɛ jami kpa ko mi konɛ a nyɛ nɛ a sɛ gba si himi mi.

Ndenguè nɛ e ye jeha 19 nɛ e je Cameroon ɔ kɛ nyumu ko nɛ pi Yehowa sɔmɔlɔ ji lɛ ɔ sɛ gba si himi mi. Loko nyumu ɔ maa kpee lɛ ɔ, nyumu ɔ wo lɛ si kaa e maa ngmɛ lɛ blɔ konɛ e ya nɔ nɛ e pee Odasefo no. Se benɛ a sɛ gba si himi ɔ mi otsi enyɔ se ɔ, nyumu ɔ de lɛ kaa e be lɛ blɔ ngmɛɛe nɛ e ya asafo mi kpehi hu. Nyɛmiyo ɔ de ke: “Ye hɛ jaa a, nɛ i foɔ ya daa ligbi. I na kaa i nyɛ we nɛ ma pee nɔ́ ko nɔ́ ko ngɛ ye dɛhe hu. I piaa ye he wawɛɛ nitsɛ.”

Ngɛ anɔkuale mi ɔ, Kristo se nyɛɛli komɛ kɛ nihi nɛ tsa pi Yehowa sɔmɔli ji mɛ nɛ a mi mi jɔ, nɛ a nuɔ nɔ́ sisi sɛ gba si himi mi. Se ke o kɛ nɔ ko nɛ pi Yehowa sɔmɔlɔ ji lɛ, nɛ e mi mi jɔ sɛ gba si himi mi po ɔ, kɛ lɔ ɔ maa sa huɛ bɔmi nɛ ngɛ o Yehowa nyɛ kpɛti ɔ he ha kɛɛ? Ke o yɔse kaa o kɛ ga womi nɛ Yehowa kɛ ha mo konɛ o ná bua jɔmi ɔ tsu we ní ɔ, kɛ e peeɔ mo kɛɛ? Nɛ nɔ́ nɛ he hia pe kulaa a, kɛ nɔ́ nɛ o pee ɔ ma ha nɛ Yehowa nɛ nu he ha kɛɛ?​​—Abɛ 1:33.

Nyɛmimɛ nyumuhi kɛ yihi fuu ngɛ je kɛ wɛ ɔ buɔ ga womi nɛ Yehowa kɛ ha kaa a kɛ nɔ ko nɛ “le Nyɔmtsɛ ɔ” pɛ nɛ sɛ gba si himi mi ɔ tue, nɛ a ngɛ nɔ mi mami kaa jã nɛ a pee ɔ da. Nyɛmimɛ nyumuhi kɛ yihi nɛ a sɛ we gba si himi mi ɔ fia a pɛɛ si kaa a kɛ nɔ ko nɛ sɔmɔɔ Yehowa pɛ maa sɛ gba si himi mi, konɛ Yehowa bua nɛ jɔ. Nyɛmiyo Michiko nɛ ngɛ Japan ɔ weku li bɔ mɔde kaa a ma ha nɛ e kɛ nɔ ko nɛ tsa pi Yehowa sɔmɔlɔ ji lɛ ɔ nɛ sɛ gba si himi mi, se ngɛ enɛ ɔ tsuo se ɔ, e fia e pɛɛ si kaa e maa bu Mawu tue. Ke e na nɛ e huɛmɛ kɛ anɔkuale Kristofohi ngɛ gba si himi sɛe nɛ lɛɛ e ná we nɔ ko ɔ, kɛkɛ e hao. E de ke: “I deɔ ye he ke Yehowa ji ‘Mawu nɛ ngɛ bua jɔmi,’ enɛ ɔ he ɔ, tsa pi gba si himi mi nɛ nɔ ko maa sɛ ɔ nɛ ma ha lɛ bua jɔmi. I he ye hu kaa Yehowa haa wɔ níhi nɛ wa ngɛ hlae ɔ. Enɛ ɔ he ɔ, ke wa suɔ kaa waa sɛ gba si himi mi se wa nɛ nɔ ko ɔ, e maa hi kaa wa maa mlɛ kɛ ya si be nɛ wa ma na nɔ ko.” (1 Timoteo 1:11, NW) Pee se ɔ, Michiko kɛ nyɛminyumu ko nɛ peeɔ nɔ hyɛmi nɔ́ kpakpa sɛ gba si himi mi nɛ e ná bua jɔmi kaa e kɛ Yehowa ga womi ɔ tsu ní.

Nyɛmimɛ nyumu komɛ hu ngɛ mlɛe nɛ a ná nyɛmimɛ yihi nɛ a peeɔ nɔ hyɛmi nɔ́ kpakpa konɛ a kɛ mɛ nɛ sɛ gba si himi mi. Kaa nɔ hyɛmi nɔ́ ɔ, Bill nɛ je Australia a tsɔɔ kaa be komɛ ɔ, e náa yihi nɛ a pi Odasefohi ɔ a he bua jɔmi. Se e kɛ a ti nɔ ko bɔɛ gbagbanii, ejakaa e sume kaa e kɛ nɔ ko nɛ e he we yi maa “bɔ.” Jeha komɛ nɛ be ɔ, e ná nyɛmimɛ yihi komɛ a he bua jɔmi, se nyɛmimɛ yi ɔmɛ lɛɛ a be e he bua jɔmi. Bill mlɛ jeha 30 sɔuu loko e na nyɛmiyo Kristofo no ko nɛ e kɛ lɛ ma nyɛ maa hi si. Bill de ke: “I pia we ye he kɔkɔɔkɔ. I ngɛ bua jɔmi, ejakaa wa blaa kɛ yaa fiɛɛmi, wa peeɔ kake kɛ kaseɔ ní, nɛ wa blaa kɛ jaa Mawu hulɔ. I kɛ ye yo ɔ kɛ e huɛmɛ fiɛɔ nɛ wa muɔɔ kɛ bua jɔmi, ejakaa mɛ tsuo a ji Yehowa sɔmɔli. Waa kɛ Baiblo sisi tomi mlaahi tsuɔ ní ngɛ wa gba si himi ɔ mi.”

NÍHI NƐ O MA NYƐ MAA PEE BE MI NƐ O NGƐ YEHOWA BLƆ HYƐE Ɔ

Ke o kɛ o hɛ fɔ Yehowa nɔ nɛ o ngɛ mlɛe konɛ o ná nɔ ko nɛ o kɛ lɛ nɛ sɛ gba si himi mi ɔ, mɛni o kɛ jamɛ a be ɔ maa pee? O ma nyɛ ma susu nɔ́ he je nɛ o sɛ we gba si himi ɔ he. Ke o na kaa Yehowa mlaa a nɔ nɛ o suɔ kaa o maa ye ɔ he je nɛ o sɛ we gba si himi mi lolo ɔ, lɛɛ mo ná nɛ o le kaa Yehowa bua jɔ o he. (1 Samuel 15:22; Abɛ 27:11) Jehanɛ se hu ɔ, yaa nɔ nɛ o sɔle ha Yehowa daa, nɛ́ o de lɛ bɔ nɛ e peeɔ mo ha. (La 62:8) Ke o bɔɔ mɔde wawɛɛ nɛ o hwuɔ kɛ siɔ akɔnɔ yayahi ɔ, huɛ bɔmi nɛ ngɛ o kɛ Yehowa nyɛ kpɛti ɔ mi maa wa daa ligbi. O ma nyɛ ma ná nɔ mi mami kaa Yehowa susuɔ o he, ejakaa o he jua wa ha lɛ. E wui wa ti nɔ ko si kaa e ma ha lɛ huno loo yo nɛ e kɛ lɛ nɛ hi si. Se ke gba si himi mi nɛ o maa sɛ ɔ ji nɔ́ nɛ he hia mo tutuutu ɔ, Yehowa le blɔ nɛ hi pe kulaa nɛ e maa gu nɔ kɛ ha mo nɔ ko nɛ o kɛ lɛ nɛ hi si.​​—La 145:16; Mateo 6:32.

Be komɛ ɔ, eko ɔ, o maa pee o ní kaa bɔ nɛ David pee e ní ɔ. David de ke: ‘Yehowa, he mi nɔ esɔ koo! Ye hɛ kɛ nɔ fɔmi tsuo miɔ nɛ e ta. Koo ngɔ o he kɛ laa mi.’ (La 143:5-7, 10) O kɔni mi nɛ ko jɔ̃. Moo hyɛ Yehowa blɔ konɛ e tsɔɔ mo nɔ́ nɛ e suɔ kaa o pee. Moo bu Yehowa tue konɛ o kane Baiblo ɔ, nɛ o pue o yi mi tɛ ngɛ níhi nɛ o kaneɔ ɔ a he. Enɛ ɔ maa ye bua mo nɛ o maa le níhi nɛ Yehowa ngɛ hlae kaa o pee, kɛ bɔ nɛ e ye bua e sɔmɔli nɛ a hi si blema a ha. Ke o buɔ Yehowa tue ɔ, lɔ ɔ ma ha nɛ o ma ná kã kɛ ye e mlaa amɛ a nɔ.

Mɛni hu nɛ ke o peeɔ ɔ, e maa ye bua mo nɛ o ya nɔ nɛ o ná bua jɔmi be mi nɛ o sɛ we gba si himi mi lolo nɛ ɔ? Moo bɔ mɔde nɛ o ha huɛ bɔmi nɛ ngɛ o kɛ Yehowa nyɛ kpɛti ɔ mi nɛ wa, nɛ o ná biɛ kpakpa ngɛ e hɛ mi. E sa nɛ o ke nihi ní faa, o hɛ mi nɛ wa kɛ ní tsumi, o le bɔ nɛ a kɛ nihi hii si ngɛ tue mi jɔmi mi ha, nɛ o ye Yehowa anɔkuale hulɔ. Ja nihi kɛ a yihi jeɔ su nɛ ɔmɛ kpo loko a ma ná bua jɔmi ngɛ a gba si himi mi. (1 Mose 24:16-21; Rut 1:16, 17; 2:6, 7, 11; Abɛ 31:10-27) Mo hla Matsɛ Yemi ɔ se blɔ kekle, o kɛ kã nɛ tsu fiɛɛmi ní tsumi ɔ, nɛ o he hu nɛ wa ngɛ asafo ɔ mi. Enɛ ɔ maa ye bua mo nɛ o maa pee juɛmi nɛ da. Bill kai benɛ e ngɛ mlɛe nɛ e maa sɛ gba si himi mi ɔ. E de ke: “Benɛ ma hɛli si ɔ, jehahi babauu be! I kɛ jamɛ a be ɔ sɔmɔ Yehowa kaa blɔ gbalɔ.”

Mlaa nɛ Yehowa wo wɔ kaa waa kɛ nihi nɛ a “le Nyɔmtsɛ ɔ” pɛ nɛ sɛ gba si himi mi ɔ be bi. Ke waa kɛ anɔkuale Kristofo no ko sɛ gba si himi mi ɔ, lɔ ɔ woɔ Yehowa hɛ mi nyami nɛ wa náa bua jɔmi. Baiblo ɔ de ke: ‘A gbaa nɔ nɛ yeɔ Yehowa gbeye, nɛ e náa e mlaa amɛ a he bua jɔmi saminya a. E we ɔ maa pee niatsɛ we, he nɛ kplɔkɔtɔ ngɛ, nɛ e maa bɔ kɛ maa ya neneene.’ (La 112:1, 3) Enɛ ɔ he ɔ, moo fia o pɛɛ si kaa o maa bu mlaa nɛ Mawu wo wɔ kaa waa kɛ nihi nɛ a “le Nyɔmtsɛ ɔ” pɛ nɛ sɛ gba si himi mi ɔ tue.