Moo Ye Bua Konɛ Mumi Mi Paradeiso ɔ Nɛ Pee Fɛu Pe Bɔ Nɛ E Ngɛ ɔ

1, 2. Ngɛ Hebri Ngmami ɔ mi ɔ, “nɔ́ nɛ Mawu kɛ e nane maa nɔ” ɔ ma nyɛ maa da si kɛ ha mɛni?

YEHOWA MAWU de ke: “Hiɔwe ji ye matsɛ sɛ, nɛ zugba ji nɔ́ nɛ i kɛ ye nane maa nɔ.” (Yesaya 66:1) Mawu tu ‘nɔ́ nɛ e kɛ e nane maa nɔ’ ɔ he munyu hu ke: “Ma wo ye nane mami he ɔ hɛ mi nyami.” (Yesaya 60:13, NW) Mɛni blɔ nɔ Mawu guu kɛ woɔ e nane mami he ɔ hɛ mi nyami aloo e haa nɛ e peeɔ fɛu? Nɛ wɔ nihi nɛ wa ngɛ Yehowa nane mami he nɛ ji zugba a nɔ ɔ hu nɛɛ, mɛni e biɔ nɛ waa pee?

² Ngɛ Hebri Ngmami ɔ mi ɔ, a nyɛɔ tuɔ sɔlemi we ɔ nɛ hi Israel ɔ hu he munyu kaa “nɔ́ nɛ Mawu kɛ e nane maa nɔ.” (1 Kronika 28:2, NW; La 132:7, NW) Sɔlemi we ɔ muɔ Yehowa hɛ, ejakaa lejɛ ɔ ji he nɛ anɔkuale jami yaa nɔ ngɛ. Sɔlemi we ɔ hu wo Yehowa hɛ mi nyami ngɛ zugba a nɔ.

3. Mɛni ji mumi mi sɔlemi we ɔ, nɛ mɛni be jamɛ a blɔ nya tomi ɔ je sisi?

³ Mwɔnɛ ɔ, jije a jaa Mawu ngɛ ngɛ anɔkuale mi? Tsa pi tsu ko kaa bɔ nɛ sɔlemi we ɔ ngɛ ɔ mi. Mohu ɔ, wa jaa Mawu ngɛ mumi mi sɔlemi we ɔ. Tsu ko be nɛ wo Yehowa hɛ mi nyami pe mumi mi sɔlemi we ɔ. Mɛni ji mumi mi sɔlemi we ɔ? E ji blɔ nya nɛ Mawu to konɛ adesahi nɛ a nyɛ nɛ a kɛ lɛ nɛ pee huɛ, nɛ a ja lɛ. Yesu kpɔmi nɔ́ ɔ nɔ lɛ Mawu da kɛ to blɔ nya nɛ ɔ nɛ. Blɔ nya tomi nɛ ɔ je sisi ngɛ jeha 29 benɛ a baptisi Yesu nɛ a pɔ lɛ nu kaa Osɔfo Nɔkɔtɔma ngɛ Yehowa mumi mi sɔlemi we ɔ.​—Hebri Bi 9:11, 12.

4, 5. (a) Mɛni nihi nɛ a jaa Yehowa ngɛ anɔkuale mi ɔ suɔ kaa a maa pee nɛ lɔ ɔ kɛ La 99 ɔ kɔ? (b) Mɛni sane e sa kaa wa ti nɔ tsuaa nɔ nɛ bi e he?

⁴ Wa bua jɔ wawɛɛ kaa Mawu to blɔ nya konɛ wa ja lɛ ngɛ anɔkuale mi. Wa tsɔɔ nihi Yehowa biɛ ɔ kɛ nike ní nɛ se be nɛ ji kpɔmi nɔ́ ɔ he ní kɛ tsɔɔ kaa wa bua jɔ blɔ nya tomi nɛ ɔ he. Wa bua jɔ kaa nihi nɛ a hiɛ pe ayɔ kpaanyɔ nɛ a ji anɔkuale Kristofohi jeɔ Yehowa yi daa ligbi! Jamihi fuu a mi bimɛ hɛɛ susumi nɛ dɛ. A susu kaa ke a gbo ɔ, a ma ya je Mawu yi ngɛ hiɔwe, se Yehowa we bi lɛɛ, a le kaa e he hia nɛ a je Mawu yi ngɛ zugba nɛ ɔ nɔ amlɔ nɛ ɔ.

⁵ Ke wa jeɔ Yehowa yi ɔ, lɔ ɔ tsɔɔ kaa wa ngɛ Mawu sɔmɔli anɔkualetsɛmɛ nɛ a tu a he munyu ngɛ La 99:1-3, 5-7 ɔ kasee. (Kane.) Blema a, anɔkualetsɛmɛ kaa Mose, Aaron, kɛ Samuel fĩ blɔ nya nɛ Yehowa to kɛ ha anɔkuale jami ɔ se. Mwɔnɛ ɔ, loko nihi nɛ a pɔ mɛ nu nɛ a ngɛ zugba a nɔ ɔ ma ya piɛɛ Yesu he kɛ sɔmɔ kaa osɔfohi ngɛ hiɔwe ɔ, a kɛ anɔkuale yemi sɔmɔɔ Yehowa ngɛ mumi mi sɔlemi we ɔ fã nɛ ngɛ zugba a nɔ ɔ mi. Nimli ayɔhi abɔ, nɛ ji “to kpa” amɛ kɛ anɔkuale yemi yeɔ bua mɛ. (Yohane 10:16) Kuu enyɔ nɛ ɔ tsuo peeɔ kake kɛ jaa Yehowa. Se e sa kaa wa ti nɔ tsuaa nɔ nɛ bi e he ke, ‘Anɛ i kɛ ye tsui tsuo fĩɔ blɔ nya nɛ Yehowa to kɛ ha anɔkuale jami ɔ se lo?’

WA BA LE NIHI NƐ A NGƐ SƆMƆE NGƐ MAWU MUMI MI SƆLEMI WE Ɔ

6, 7. Mɛni haomi ba Kristofohi asafo ɔ nɔ ngɛ kaseli ɔmɛ a be ɔ mi, nɛ benɛ e ke e suu jeha 1919 ɔ, mɛni ba?

⁶ Benɛ a to Kristofohi asafo ɔ sisi nɛ e sui jeha 100 lolo ɔ, hemi kɛ yemi kuami je sisi kaa bɔ nɛ a gba fɔ si ɔ. (Bɔfo Ɔmɛ A Ní Tsumi 20:28-30; 2 Tesalonika Bi 2:3, 4) Kɛ je lɔ ɔ se ɔ, e he ba wa wawɛɛ kaa nihi maa le nihi nɛ a jaa Mawu ngɛ anɔkuale mi ɔ a mi tso. Jeha lafahi ba be loko Yehowa gu Yesu nɔ kɛ ha nɛ nihi ba le ni nɛmɛ nɛ a ngɛ Mawu sɔmɔe ngɛ e mumi mi sɔlemi we ɔ a mi tso.

⁷ Benɛ e ke e suu jeha 1919 ɔ, nihi ba le nihi nɛ Mawu kplɛɛ a nɔ nɛ a ngɛ sɔmɔe ngɛ e mumi mi sɔlemi we ɔ a mi tso heii. Nimli nɛ ɔmɛ pee tsakemi ngɛ a si himi mi konɛ Yehowa nɛ kplɛɛ jami nɛ a jaa lɛ ɔ nɔ saminya. (Yesaya 4:2, 3; Malaki 3:1-4) Enɛ ɔ ha nɛ nina ko nɛ bɔfo Paulo na jeha lafahi abɔ nɛ be ɔ bɔni mi bami.

8, 9. Mɛni “paradeiso” Paulo na ngɛ nina mi?

⁸ A tu nina nɛ Paulo na a he munyu ngɛ 2 Korinto Bi 12:1-4. (Kane.) Ngɛ jamɛ a nina a mi ɔ, Yehowa tsɔɔ Paulo nɔ́ ko nɛ maa ya nɔ hwɔɔ se. Mɛni “paradeiso” Paulo na a? Kekleekle ɔ, e ma nyɛ maa da si kɛ ha Paradeiso nitsɛnitsɛ nɛ e be kɛe nɛ e maa ba zugba a nɔ ɔ. (Luka 23:43) Nɔ́ nɛ ji enyɔ ɔ, e ma nyɛ maa da si kɛ ha mumi mi paradeiso nɛ wa ma ná mi blɔ fa mi nɔ́ kɛ pi si ngɛ je ehe ɔ mi ɔ. Nɛ nɔ́ nɛ ji etɛ ɔ, e ma nyɛ maa da si kɛ ha si himi kpakpa nɛ ngɛ hiɔwe nɛ ji “Mawu paradeiso ɔ.”​—Kpojemi 2:7, NW.

⁹ Se mɛni he je nɛ Paulo tsɔɔ kaa e “nu munyuhi nɛ be hie tumi ngɛ adesa gbi mi, nɛ́ adesa be he blɔ nɛ e sɛɛɔ hulɔ” ɔ? Ejakaa e sui be nɛ e maa tsɔɔ nyakpɛ níhi nɛ e na ngɛ nina a mi ɔ a sisi fitsofitso lolo. Se mwɔnɛ ɔ, Yehowa ngmɛ wɔ blɔ konɛ waa tsɔɔ nihi jɔɔmihi nɛ e we bi ngɛ nae amlɔ nɛ ɔ!

10. Mɛni he je nɛ e slo mumi mi paradeiso ɔ ngɛ mumi mi sɔlemi we ɔ he ɔ?

¹⁰ Wa pɔɔ mumi mi paradeiso ɔ he munyu tumi, se mɛni a tsɛɛ jã a? Lɔ ɔ ji tue mi jɔmi si himi nɛ se be nɛ Mawu kɛ dloo e we bi. Enɛ ɔ he ɔ, e slo mumi mi paradeiso ɔ ngɛ mumi mi sɔlemi we ɔ he. Mumi mi sɔlemi we ɔ ji blɔ nya nɛ Mawu to kɛ ha anɔkuale jami. Mumi mi paradeiso ɔ haa nɛ nihi leɔ nihi nɛ Mawu kplɛɛ a nɔ, nɛ a jaa lɛ ngɛ e mumi mi sɔlemi we ɔ a mi tso heii.​—Malaki 3:18.

11. Mɛni he blɔ wa ná mwɔnɛ ɔ?

¹¹ Wa bua jɔ kaa wa ba le kaa kɛ je jeha 1919 kɛ ma nɛ ɔ, Yehowa ha nɛ adesahi nɛ a yi mluku ngɛ lɛ ye buae kɛ ngɛ mumi mi paradeiso ɔ he blɔ nya toe, a ha nɛ e mi ngɛ ngɔe, nɛ e mi hu ngɛ blie. Anɛ mo hu o ngɛ ní tsumi nɛ ngɛ nyakpɛ nɛ ɔ eko tsue lo? Anɛ o bua jɔ he blɔ nɛ o ná kaa o piɛɛ Yehowa he kɛ ngɛ ní tsue konɛ a kɛ wo e hɛ mi nyami ngɛ zugba a nɔ ɔ he lo?

YEHOWA NGƐ ASAFO Ɔ DLAE KONƐ E PEE FƐU WAWƐƐ NITSƐ

12. Kɛ wa plɛ kɛ le kaa Yesaya 60:17 ɔ ngɛ mi bae ha kɛɛ? (Moo hyɛ foni nɛ ngɛ ní kasemi ɔ sisije ɔ.)

¹² Gbalɔ Yesaya gba kɛ fɔ si kaa tsakemi nguanguahi fuu maa ba ngɛ Mawu asafo ɔ nɛ ngɛ zugba a nɔ ɔ mi. (Kane Yesaya 60:17.) Nihewi kɛ yihewi kɛ nihi nɛ a ba asafo ɔ mi kɛ we ɔ kaneɔ aloo a nuɔ nɛ nihi tuɔ tsakemi nɛ ɔmɛ a he munyu kɛkɛ. Se nyɛmimɛ nyumuhi kɛ yihi fuu ngɛ asafo ɔ mi benɛ tsakemi nguangua nɛ ɔmɛ ya nɔ ɔ! Anɔkualetsɛmɛ nɛ ɔmɛ ngɛ nɔ mi mami kaa Mawu gu wa Matsɛ Yesu nɔ kɛ ngɛ níhi kudɔe ngɛ e we asafo ɔ mi! Ke wa bu nyɛmimɛ nɛ ɔmɛ a níhi a si kpamihi tue ɔ, hemi kɛ yemi kɛ hɛ kɛ nɔ fɔmi nɛ wa ngɛ ngɛ Yehowa mi ɔ mi maa wa.

13. Ngɛ La 48:12-14 ɔ nya a, mɛni e sa kaa waa pee?

¹³ E sa nɛ anɔkuale Kristofohi tsuo nɛ a tsɔɔ nihi Yehowa asafo ɔ he ní. Wa ngɛ Satan je yaya nɛ ɔ mi mohu lɛɛ, se tue mi jɔmi kɛ kake peemi ngɛ waa kɛ wa nyɛmimɛ wa kpɛti. Enɛ ɔ ngɛ nyakpɛ wawɛɛ nitsɛ! E sa nɛ waa kɛ bua jɔmi nɛ tsɔɔ ‘yi nɔhi nɛ nyɛɛ se’ ɔ Yehowa asafo ɔ kɛ mumi mi paradeiso ɔ he ní!​—Kane La 48:12-14.

14, 15. Mɛni tsakemihi a pee ngɛ jeha 1970 ɔ se, nɛ kɛ asafo ɔ ná he se ha kɛɛ?

¹⁴ Nihi fuu nɛ a wa ngɛ jeha mi nɛ a ngɛ asafo ɔ mi ɔ na tsakemihi nɛ ya nɔ nɛ ha nɛ Yehowa asafo ɔ nɛ ngɛ zugba a nɔ ɔ pee fɛu pe bɔ nɛ e ngɛ ɔ. Nyɛmimɛ nɛ ɔmɛ kaiɔ benɛ asafo sɔmɔlɔ pɛ lɛ e hyɛɛ asafo ɔ nɔ se tsa pi nikɔtɔmahi a kuu ɔ, kɛ benɛ asafo ɔ ní tsumi kɔni ɔ sɔmɔlɔ lɛ hyɛɔ asafo ɔ ní tsumi kɔni ɔ nɔ se pi Asafo ɔ Ní Tsumi Kɔni Ajla Toli ɔmɛ ɔ. A kaiɔ benɛ Watch Tower Society ɔ nya dalɔ ɔ pɛ lɛ e kɛ blɔ tsɔɔmi haa Yehowa Odasefohi tsuo se pi Yehowa Odasefohi A Blɔ Tsɔɔmi Ajla Toli ɔmɛ ɔ. E ngɛ mi kaa nyɛmimɛ nyumu nɛ ɔmɛ tsuo ngɛ a se yeli mohu lɛɛ, se nɔ kake pɛ lɛ e mwɔɔ yi mi kpɔ ngɛ asafohi a mi, ngɛ asafo ɔ ní tsumi kɔnihi, kɛ asafo ɔ ní tsumi yi ɔ. Ngɛ jeha 1970 ɔ se ɔ, a pee tsakemihi konɛ nikɔtɔmahi a kuuhi nɛ a mwɔ yi mi kpɔ, se pi nɔ kake.

¹⁵ Mɛni he je nɛ tsakemi nɛ ɔmɛ nɛ a pee ɔ ye bua asafo ɔ? Ejakaa a da Ngmami ɔ sisi nɛ a ba nu saminya a nɔ kɛ pee jã. Tsa pi nɔ kake pɛ nɛ daa nɔ́ tsuaa nɔ́ nya ngɛ asafo ɔ mi, mohu ɔ, asafo mi nikɔtɔma amɛ tsuo, nɛ ji ‘nimli adesahi nɛ Yehowa kɛ ha kaa nike ní’ ɔ. Asafo ɔ náa su kpakpahi nɛ nikɔtɔma amɛ tsuo ngɛ ɔ he se.​—Efeso Bi 4:8; Abɛ 24:6.

16, 17. Mɛni tsakemihi a pee lingmi nɛ ɔ nɛ o bua jɔ he, nɛ mɛni he je?

¹⁶ Mo susu tsakemi komɛ nɛ a pee lingmi nɛ ɔ kɛ kɔ wa womi ɔmɛ ɔ he ɔ he nɛ o hyɛ. Waa kɛ bua jɔmi haa nihi womihi nɛ a ngɛ fɛu nɛ yeɔ bua mɛ ngɛ wa fiɛɛmi ní tsumi ɔ mi. Mo susu bɔ nɛ waa kɛ kɔmpiuta klama ehehi ngɛ sane kpakpa a fiɛɛe ɔ hu he nɛ o hyɛ. Kaa nɔ hyɛmi nɔ́ ɔ, nihi fuu nyɛɔ nɛ a yaa jw.org wɛbsaiti ɔ nɔ konɛ a nine nɛ nyɛ nɛ su yemi kɛ buami nɛ a hia a nɔ. Tsakemi nɛ ɔmɛ tsuo tsɔɔ kaa Yehowa susuɔ e we bi a he wawɛɛ, nɛ e suɔ mɛ.

¹⁷ Wa bua hu jɔ kaa a pee tsakemi ngɛ kpehi nɛ wa yaa a he bɔ nɛ pee nɛ wa ná be kɛ pee wa weku Mawu jami aloo wa dɛ he ní kasemi. Wa bua jɔ tsakemihi nɛ a pee ngɛ kpɔ mi kpehi kɛ kpokpa nɔ kpehi nɛ wa yaa a he ɔ he. Daa jeha nɛ wa maa ya kpe ɔ, wa naa kaa kpe ɔ ngɔɔ pe nɔ́ nɛ wa ya kɛ be ɔ! Wa bua jɔɔ tsɔsemi nɛ a kɛ haa wɔ ngɛ wa Baiblo sukuu babauu ɔmɛ a sisi ɔ he hulɔ. Tsakemi nɛ ɔmɛ tsuo tsɔɔ heii kaa Yehowa ngɛ e we asafo ɔ kudɔe, nɛ e yaa nɔ nɛ e haa nɛ mumi mi paradeiso ɔ peeɔ fɛu wawɛɛ nitsɛ!

NƆ́ NƐ WA PEEƆ NƐ HAA MUMI MI PARADEISO Ɔ PEE FƐU WAWƐƐ NITSƐ

18, 19. Mɛni wa ma nyɛ maa pee konɛ mumi mi paradeiso ɔ nɛ pee fɛu wawɛɛ nitsɛ?

¹⁸ Yehowa wo wa hɛ mi nyami kaa e ha nɛ wa piɛɛ e he kɛ ha nɛ mumi mi paradeiso ɔ ngɛ fɛu pee wawɛɛ nitsɛ. Se mɛni blɔ nɔ wa guu kɛ peeɔ jã? Waa kɛ kã fiɛɛɔ Matsɛ Yemi ɔ he sane kpakpa a kɛ tsɔɔ nihi nɛ wa peeɔ nihi fuu kaseli. Be tsuaa be nɛ wa maa ye bua nɔ ko nɛ e ma ba pee Mawu sɔmɔlɔ ɔ, wa yeɔ bua nɛ mumi mi paradeiso ɔ mi bliɔ.​—Yesaya 26:15; 54:2.

¹⁹ Ke wa bɔɔ mɔde wawɛɛ nɛ wa náa Kristofohi a su kpakpahi ɔ, lɔ ɔ hu tsɔɔ kaa wa ngɛ ye buae konɛ mumi mi paradeiso ɔ nɛ pee fɛu wawɛɛ. Enɛ ɔ yeɔ bua nɛ mumi mi paradeiso ɔ muɔɔ nihi a hɛ wawɛɛ. Behi fuu ɔ, je mi bami kpakpa kpo nɛ wa jeɔ, kɛ tue mi jɔmi nɛ ngɛ wa kpɛti ɔ ji nɔ́ titli nɛ gblaa nihi kɛ baa asafo ɔ mi kɛ Yehowa kɛ Yesu a ngɔ, se pi Baiblo ɔ mi nɛ wa le ɔ pɛ.

20. Ngɛ Abɛ 14:35 ɔ nya a, mɛni e sa kaa waa pee?

²⁰ Mwɔnɛ ɔ, ke Yehowa kɛ Yesu na wa mumi mi paradeiso nɛ ngɛ fɛu ɔ, a bua jɔɔ wawɛɛ nitsɛ. Bua jɔmi nɛ wa ma ná ngɛ paradeiso nitsɛnitsɛ nɛ maa ba zugba a nɔ hwɔɔ se ɔ mi nyafii ko kɛkɛ ji nɛ ɔ nɛ. E sa nɛ wa kai munyu nɛ ngɛ Abɛ 14:35 ɔ be tsuaa be. A de ngɛ lejɛ ɔ ke: “Tsɔlɔ nɛ le ní ɔ, matsɛ suɔ lɛ.” Be mi nɛ wa ngɛ mɔde bɔe wawɛɛ konɛ wa ha nɛ mumi mi paradeiso ɔ nɛ pee fɛu ɔ, nyɛ ha nɛ waa kɛ nile nɛ tsu ní!