Yaa Nɔ Nɛ O ‘Je Bumi Kpo Ha Nihi Kaa Kikɛ Nɛ ɔ’

BLƆ TSƆƆMI AJLA TOLI ɔmɛ to ajla toli a kuu komɛ a sisi. Kɛ je jeha 1992 ɔ mi ɔ, a hla asafo mi nikɔtɔmahi nɛ a ngɛ níhi a si kpami, nɛ a nane pi si konɛ a ye bua ajla toli a kuu nɛ ɔmɛ kɛ tsu ní.a (Hyɛ sisi ningma.) Yemi kɛ buali nɛ ɔmɛ piɛɛ “to kpa” amɛ a he, nɛ a yeɔ bua Blɔ Tsɔɔmi Ajla Toli ɔmɛ saminya. (Yohane 10:16) Daa otsi ɔ, yemi kɛ buali nɛ ɔmɛ yaa kpehi nɛ ajla toli a kuuhi nɛ a ngɛ mi ɔ peeɔ ɔ. A kɛ amaniɛ bɔmi nɛ he hia haa ajla toli a kuu ɔ, nɛ a tsɔɔ a juɛmi ngɛ níhi a he hulɔ. Blɔ Tsɔɔmi Ajla Toli ɔmɛ ji nihi nɛ a maa juɛmi nya si ngɛ níhi a he, nɛ yemi kɛ buali ɔmɛ waa mɛ kɛ tsuɔ a juɛmi nya si mami ɔ he ní. Yemi kɛ buali ɔmɛ jeɔ a tsui mi kɛ tsuɔ ní tsumi saisaa nɛ a kɛ woɔ a dɛ ɔ. A piɛɔ Blɔ Tsɔɔmi Ajla Toli ɔmɛ a he kɛ hiaa blɔ kɛ ya peeɔ kpe klɛdɛɛhi kɛ mahi a kpɛti kpehi. A nyɛɔ tsɔɔ mɛ kɛ yaa asafo ɔ ní tsumi kɔnihi kaa asafo ɔ ní tsumi yi ɔ nane mi dali.

Nyɛminyumu ko nɛ e sɔmɔ kaa yemi kɛ bualɔ kɛ je jeha 1992 ɔ mi ɔ de ke, “Ke i tsu ye blɔ nya ní tsumi ɔ, e yeɔ bua Blɔ Tsɔɔmi Ajla Toli ɔmɛ nɛ a kɛ a juɛmi maa mumi mi níhi a nɔ wawɛɛ.” Nyɛminyumu kpa ko nɛ e kɛ jeha 20 sɔmɔ kaa yemi kɛ bualɔ ɔ hu de ke, “Enɛ ɔ ji he blɔ ngua ko nɛ i hyɛ we blɔ gblee kaa ma ná.”

Blɔ Tsɔɔmi Ajla Toli ɔmɛ kɛ ní tsumi fuu wo yemi kɛ buali nɛ ɔmɛ a dɛ, nɛ a bua jɔɔ mɔde nɛ nyɛmimɛ nyumu anɔkualetsɛmɛ nɛ ɔmɛ ngɛ bɔe ɔ he wawɛɛ nitsɛ. Nyɛ ha nɛ wɔ tsuo waa ya nɔ nɛ wa ‘je bumi kpo ha nihi kaa kikɛ nɛ ɔ.’​—Filipi Bi 2:29.