“Waa Kɛ Mo Maa Ya”

1, 2. (a) Mɛni Yehowa tsɔɔ kaa e maa ba ngɛ wa be nɛ ɔ mi? (b) Mɛni sane bimihi lɛ wa ma ha heto ngɛ munyu nɛ ɔ mi? (Moo hyɛ foni nɛ ngɛ ní kasemi ɔ sisije ɔ.)

YEHOWA tsɔɔ kaa ngɛ wa be nɛ ɔ mi ɔ, “ni nyɔngma ma ba nu Yuda no kake nɛ a maa pɛtɛ e tade he, nɛ a ma de lɛ ke, ‘Waa kɛ mo maa ya, ejakaa wa nu kaa Mawu kɛ nyɛ ngɛ.’” (Zakaria 8:23) “Yuda no” ɔ daa si kɛ ha nihi nɛ Mawu kɛ e mumi klɔuklɔu ɔ pɔ mɛ nu ɔ. A tsɛɛ mɛ hu ke ‘Mawu Israel.’ (Galatia Bi 6:16) “Ni nyɔngma” amɛ daa si kɛ ha nihi nɛ a ngɛ hɛ nɔ kami kaa a maa hi si ngɛ zugba a nɔ kɛ ya neneene ɔ. A le kaa Yehowa jɔɔ nihi nɛ a pɔ mɛ nu ɔ, nɛ a na kaa e ji he blɔ nɛ a ná kaa a piɛɛ a he kɛ ngɛ lɛ sɔmɔe.

² Kaa bɔ nɛ gbalɔ Zakaria de ɔ, Yesu hu tsɔɔ kaa Mawu we bi maa pee kake. E tsɛ nihi nɛ a ngɛ hɛ nɔ kami kaa a maa ya hiɔwe ɔ ke “kuu nyafii,” kɛ nihi nɛ a ngɛ hɛ nɔ kami kaa a maa hi zugba a nɔ ɔ ke ‘to kpahi.’ Se Yesu tsɔɔ kaa mɛ tsuo a maa pee “to kuu kake” nɛ a maa nyɛɛ lɛ nɛ ji ‘to hyɛlɔ kake’ ɔ se. (Luka 12:32; Yohane 10:16) Akɛnɛ kuu enyɔ nɛ ngɛ he je ɔ, eko ɔ, ni komɛ ma bi a he ke: (1) Anɛ e he hia kaa to kpa amɛ nɛ le nihi nɛ a ngɛ mwɔnɛ ɔ nɛ a pɔ mɛ nu ɔ tsuo a biɛ lo? (2) Kɛ e sa kaa nihi nɛ a pɔ mɛ nu ɔ nɛ bu a he ha kɛɛ? (3) Ke i kɛ nɔ ko ngɛ asafo mi nɛ e bɔni abolo ɔ yemi, loo wai ɔ numi ngɛ Kaimi ɔ sisi ɔ, kɛ e sa kaa ma pee ye ní ngɛ jamɛatsɛ ɔ he ha kɛɛ? (4) Ke i na kaa nihi nɛ a yeɔ abolo ɔ nɛ a nuɔ wai ɔ ngɛ Kaimi ɔ sisi ɔ a yibɔ ngɛ hɛ mi yae ɔ, anɛ e sa kaa lɔ ɔ nɛ hao mi lo? Wa maa na sane bimi nɛ ɔmɛ a heto ngɛ munyu nɛ ɔ mi.

ANƐ E HE HIA KAA WAA LE NIHI NƐ A PƆ MƐ NU NƐ A NGƐ MWƆNƐ Ɔ TSUO A BIƐ LO?

3. Mɛni he je nɛ wa be nyɛe maa le nimli 144,000 ɔ a kpɛti nihi tutuutu nɛ a piɛ ngɛ zugba a nɔ ɔ?

³ Anɛ e he hia kaa to kpa amɛ nɛ a le nihi nɛ a pɔ mɛ nu nɛ a piɛ ngɛ zugba a nɔ mwɔnɛ ɔ tsuo a biɛ lo? Ohoo. Mɛni he je? Ejakaa nɔ ko be nyɛe maa le tutuutu kaa jamɛatsɛmɛ ɔmɛ a nine maa su a hiɔwo ɔ nɔ loo a nine be nɔ sue.^[1] (Hyɛ nyagbe ningma.) E ngɛ mi kaa Mawu tsɛ mɛ kɛ yaa hiɔwe mohu lɛɛ, se ja a ye anɔkuale kɛ ya si nyagbe loko a nine maa su a hiɔwo ɔ nɔ. Satan le enɛ ɔ, lɔ ɔ he ɔ, e kɛ “lakpa gbali” tsuɔ ní konɛ e “kɛ mlɔɔ” mɛ. (Mateo 24:24) Kristofohi nɛ a pɔ mɛ nu ɔ be nyɛe ma ná nɔ mi kaa a nine maa su a hiɔwo ɔ nɔ, ja Yehowa ha nɛ e pee heii ha mɛ kaa e bu mɛ anɔkualetsɛmɛ. Yehowa kplɛɛɔ a nɔ kulaa, aloo e haa nɛ a náa nyagbe nya sɔumi loko a gboɔ, aloo e maa pee enɛ ɔ ke e piɛ bɔɔ nɛ “haomi kpetekpleenyɛ ɔ” maa je sisi.​—Kpojemi 2:10; 7:3, 14.

4. Ke wa be nyɛe maa le nihi nɛ a pɔ mɛ nu nɛ a ngɛ zugba a nɔ mwɔnɛ ɔ tsuo a biɛ ɔ, mɛni blɔ nɔ wa maa gu nɛ waa kɛ mɛ “maa ya”?

⁴ Ke to kpa amɛ be nyɛe maa le nihi nɛ a pɔ mɛ nu nɛ a ngɛ zugba a nɔ mwɔnɛ ɔ tsuo a biɛ ɔ, mɛni blɔ nɔ a maa gu nɛ a kɛ mɛ “maa ya”? Baiblo ɔ tsɔɔ kaa “ni nyɔngma” ma ba ‘nu Yuda no kake nɛ a maa pɛtɛ e tade he, nɛ a ma de lɛ ke, “Waa kɛ mo maa ya, ejakaa wa nu kaa Mawu kɛ nyɛ ngɛ.”’ Ngmami ɔ wo Yuda no kake pɛ ta. Se “mo” kɛ “nyɛ” nɛ a kɛ tsu ní ɔ dɛ si ha nɔ kake. Enɛ ɔ tsɔɔ kaa Yuda no nɛ a kɛ tsu ní ɔ dɛ si ha nɔ kake, mohu ɔ, e daa si ha nihi nɛ a pɔ mɛ nu ɔ tsuo. To kpa amɛ le enɛ ɔ, nɛ a kɛ nihi nɛ a pɔ mɛ nu ɔ tsuo ngɛ Yehowa sɔmɔe. E he hia we kaa a le nihi nɛ a pɔ mɛ nu ɔ a ti nɔ tsuaa nɔ e biɛ, nɛ a nyɛɛ e se. Yesu ji wa Hɛ Mi Nyɛɛlɔ, nɛ Baiblo ɔ de wɔ kaa e sa nɛ waa nyɛɛ lɛ pɛ e se.​—Mateo 23:10.

KƐ E SA KAA NIHI NƐ A PƆ MƐ NU Ɔ NƐ BU A HE HA KƐƐ?

5. Mɛni kɔkɔ bɔmi nɛ e sa kaa nihi nɛ a pɔ mɛ nu ɔ nɛ a susu he kɛ hɛdɔ, nɛ mɛni he je?

⁵ E sa nɛ nihi nɛ a pɔ mɛ nu ɔ nɛ a susu kɔkɔ bɔmi nɛ ngɛ 1 Korinto Bi 11:27-29 ɔ he saminya. (Kane.) Mɛni ma ha nɔ ko nɛ a pɔ lɛ nu ɔ maa ye abolo ɔ nɛ e nu wai ɔ “bɔ nɛ sɛ” ngɛ Kaimi ɔ sisi? Ke e ha we nɛ huɛ bɔmi kpakpa nɛ hi e kɛ Yehowa a kpɛti nɛ e ye abolo ɔ nɛ e nu wai ɔ, lɔ ɔ tsɔɔ kaa e bui Yehowa. (Hebri Bi 6:4-6; 10:26-29) Hɛdɔ ngɛ kɔkɔ bɔmi nɛ ɔ he, nɛ e kaiɔ nihi nɛ a pɔ mɛ nu ɔ kaa ke a suɔ nɛ a nine nɛ su ‘jlasi, nɛ lɔ ɔ he nɛ Mawu tsɛ mɛ kɛ je hiɔwe tɔɔ kɛ gu Kristo Yesu nɔ ɔ’ nɔ ɔ, lɛɛ e sa kaa a ye anɔkuale daa.​—Filipi Bi 3:13-16.

6. Kɛ e sa kaa Kristofohi nɛ a pɔ mɛ nu ɔ nɛ bu a he ha kɛɛ?

⁶ Paulo de Kristofohi nɛ a pɔ mɛ nu ɔ ke: “Imi nɛ a wo mi tsu ngɛ Nyɔmtsɛ ɔ nɛ i ngɛ sɔmɔe ɔ he ɔ, i kpa nyɛ pɛɛ nɛ nyɛɛ ba nyɛ je mi saminya, bɔ nɛ maa sa ní tsumi nɛ Mawu tsɛ nyɛ ke nyɛ ba tsu ɔ.” Mɛni blɔ nɔ e sa kaa a gu kɛ pee jã? Paulo de ke: “Nyɛɛ ba nyɛ he si; nyɛɛ pee nyɛ he humi, nɛ nyɛɛ to nyɛ tsui si. Nyɛɛ na ha nyɛ sibi nɛ nyɛɛ tsɔɔ kaa nyɛ suɔ nyɛ he niinɛ. Nyɛɛ bɔ mɔde nɛ nyɛɛ pee kake kɛ hi si. He jɔmi ɔ nɛ haa nyɛ peeɔ kake ɔ, Mawu mumi ɔ lɛ haa.” (Efeso Bi 4:1-3) Yehowa mumi klɔuklɔu ɔ yeɔ bua e sɔmɔli nɛ a baa a he si, se pi nɛ a woɔ a he nɔ. (Kolose Bi 3:12) Enɛ ɔ he ɔ, nihi nɛ a pɔ mɛ nu ɔ susuu we kaa a hi pe ni kpahi. A le kaa Yehowa ha we nihi nɛ a pɔ mɛ nu ɔ mumi klɔuklɔu ɔ fuu pe bɔ nɛ e haa e sɔmɔli kpahi. Nɛ a susuu we kaa a ma nyɛ maa nu Baiblo mi anɔkualehi a sisi wawɛɛ pe ni kpahi. Jehanɛ hu ɔ, a be nɔ ko dee kɔkɔɔkɔ kaa nɔ ɔ hu a pɔ lɛ nu, lɔ ɔ he ɔ, e bɔni abolo ɔ yemi nɛ e bɔni wai ɔ hu numi ngɛ Kaimi ɔ sisi. Mohu ɔ, a baa a he si, nɛ a le kaa Yehowa pɛ lɛ e tsɛɛ nihi kɛ yaa hiɔwe.

7, 8. Mɛni Kristofohi nɛ a pɔ mɛ nu ɔ hyɛ we blɔ, nɛ mɛni he je?

⁷ E ngɛ mi kaa nihi nɛ a pɔ mɛ nu ɔ nuɔ he kaa e ji he blɔ nɛ a ná kaa a maa ya hiɔwe mohu, se a hyɛ we blɔ kaa nihi kɛ mɛ nɛ hi si ngɛ blɔ klɛdɛɛ ko nɔ. (Efeso Bi 1:18, 19; kane Filipi Bi 2:2, 3.) A le hu kaa benɛ Yehowa pɔ mɛ nu ɔ, e ha we nɛ nɔ fɛɛ nɔ nɛ le. Enɛ ɔ he ɔ, ke a pɔ nɔ ko nu nɛ ni komɛ he we yi amlɔ nɔuu kaa a pɔ jamɛatsɛ ɔ nu ɔ, e pee we nɔ nɛ a pɔ lɛ nu ɔ nyakpɛ. E le kaa Baiblo ɔ de wɔ kaa ke nɔ ko tsɔɔ kaa Mawu ha lɛ blɔ nya ní tsumi klɛdɛɛ ko ɔ, waa kɛ oya yemi nɛ ko he jamɛatsɛ ɔ waa ye. (Kpojemi 2:2) Akɛnɛ nɔ ko nɛ a pɔ lɛ nu ɔ hyɛ we blɔ kaa nihi nɛ a bu lɛ kaa e he hia wawɛɛ pe ni kpahi he je ɔ, ke e kɛ nihi kpe nɛ e ngɛ e he si jee kɛ tsɔɔ mɛ ɔ, e he hia we nɛ e de mɛ kaa a pɔ lɛ nu. Ngɛ anɔkuale mi ɔ, e ma nyɛ maa hi kaa e be nɔ ko nɔ ko dee. E be fĩae ngɛ ní nguanguahi nɛ e maa pee ngɛ hiɔwe ɔ he hulɔ.​—1 Korinto Bi 1:28, 29; kane 1 Korinto Bi 4:6-8.

⁸ Kristofohi nɛ a pɔ mɛ nu ɔ nui he kaa e sa nɛ a kɛ ni kpahi nɛ a pɔ mɛ nu ɔ pɛ nɛ bɔ, kaa nɔ́ nɛ a ngɛ kuu ko mi. A hla we ni kpahi nɛ a pɔ mɛ nu ɔ a se blɔ konɛ a sɛɛ nu nɛ a pɔ mɛ ɔ he ní, aloo a kpe ngɛ kuuhi a mi konɛ a kase Baiblo ɔ. (Galatia Bi 1:15-17) Kaa nihi nɛ a pɔ mɛ nu ɔ peeɔ a ní jã a, jinɛ kake peemi ko hí asafo ɔ mi. Jinɛ lɔ ɔ ko tsɔɔ kaa a te si kɛ wo mumi klɔuklɔu ɔ nɛ ha nɛ tue mi jɔmi kɛ kake peemi ngɛ Mawu we bi a kpɛti ɔ.​—Kane Roma Bi 16:17, 18.

KƐ E SA KAA WAA PEE WA NÍ NGƐ A HE HA KƐƐ?

9. Mɛni he je nɛ e he hia nɛ o hyɛ saminya ngɛ bɔ nɛ o kɛ nihi nɛ a yeɔ abolo ɔ nɛ a nuɔ wai ɔ ngɛ Kaimi sisi ɔ hiɔ si ha a he ɔ? (Hyɛ daka nɛ ji, “Suɔmi ‘Pee We Níhi Nɛ Sɛ́.’”)

⁹ Kɛ e sa kaa o kɛ nyɛmimɛ nyumuhi kɛ yihi nɛ a pɔ mɛ nu ɔ nɛ hi si ha kɛɛ? Yesu de e kaseli ɔmɛ ke: “Nyɛ tsuo pɛpɛɛpɛ nyɛmimɛ ji nyɛ.” E tsa nɔ ke: “Nɔ tsuaa nɔ nɛ woɔ e he nɔ ɔ, a maa ba lɛ si; se nɔ nɛ baa e he si ɔ, a ma wo e nɔ.” (Mateo 23:8-12) Enɛ ɔ he ɔ, e sɛ nɛ waa bu nɔ ko kaa e he hia pe nɔ tsuaa nɔ, ke jamɛatsɛ ɔ ji Kristo nyɛmimɛ ɔmɛ nɛ a pɔ mɛ nu ɔ a ti nɔ ko po. Baiblo ɔ woɔ wɔ he wami konɛ waa kase asafo mi nikɔtɔma amɛ a hemi kɛ yemi ɔ, se e de we wɔ kaa wa ma nyɛ maa hla adesa ko kaa wa hɛ mi nyɛɛlɔ. (Hebri Bi 13:7) E ji anɔkuale kaa Baiblo ɔ tsɔɔ kaa e sa nɛ waa wo ni komɛ a “hɛ mi nyami totoe enyɔ.” Se nɔ́ he je nɛ e de jã ji kaa “a tsuɔ ní wawɛɛ” nɛ a “tsɔɔ ní hulɔ,” se pi nu nɛ a pɔ mɛ ɔ he je. (1 Timoteo 5:17) Ke wa jeɔ nihi nɛ a pɔ mɛ nu ɔ a yi tsɔ, nɛ wa naa mɛ kaa a he hia pe ni kpahi ɔ, e ma nyɛ ma gba a nya wawɛɛ. Nɔ́ nɛ pa hí pe kulaa ji kaa lɔ ɔ ma ha nɛ a wo a he nɔ. (Roma Bi 12:3) Wa sume nɛ wa ti nɔ ko nɛ pee nɔ́ ko nɛ maa tɔtɔ Kristo nyɛmimɛ nɛ a pɔ mɛ nu ɔ a ti nɔ ko nane!​—Luka 17:2.

10. Mɛni o maa pee kɛ tsɔɔ kaa o buɔ Kristofohi nɛ a pɔ mɛ nu ɔ?

¹⁰ Mɛni wa maa pee kɛ tsɔɔ kaa wa buɔ nihi nɛ Yehowa pɔ mɛ nu ɔ? Wa be mɛ bie kaa a de wɔ blɔ nɔ nɛ a gu kɛ ba pee nihi nɛ a pɔ mɛ nu. Sane nɛ ɔ kɔ we wa he, enɛ ɔ he ɔ, wa be he blɔ kaa wa leɔ. (1 Tesalonika Bi 4:11; 2 Tesalonika Bi 3:11) Nɛ e sɛ nɛ wa susu kaa nihi nɛ a pɔ mɛ nuɔ a hunomɛ loo a yihi, loo a fɔli, loo a weku li kpahi hu piɛɛ nihi nɛ a pɔ mɛ nu ɔ a he. Pi weku nɛ nɔ ko je mi ɔ nɛ tsɔɔ hɛ kɛ nɔ fɔmi nɛ e ngɛ. (1 Tesalonika Bi 2:12) E sɛ kaa wa bi sanehi nɛ maa hao nihi. Kaa nɔ hyɛmi nɔ́ ɔ, ke nyɛmiyo ko huno piɛɛ nihi nɛ a pɔ mɛ nu ɔ a he ɔ, e sɛ nɛ wa bi nyɛmiyo ɔ kaa ke e susu hwɔɔ se nɛ lɛ pɛ e maa hi zugba a nɔ kɛ ya neneene ɔ he ɔ, kɛ e peeɔ lɛ ha kɛɛ. Wa ma nyɛ ma ná nɔ mi mami wawɛɛ kaa ngɛ je ehe ɔ mi ɔ, Yehowa ma ha ‘nɔ́ tsuaa nɔ́ nɛ ngɛ hɛ ngmengmle ɔ e hiami ní.’​—La 145:16.

11. Ke wa yuɔ wa he ngɛ nihi nɛ “gbee nihi a yi mi” ɔ a he ɔ, kɛ lɔ ɔ poɔ wa he piɛ ha kɛɛ?

¹¹ Ke wa bui nihi nɛ a pɔ mɛ nu ɔ kaa a he hia wawɛɛ pe ni kpahi ɔ, lɔ ɔ poɔ wa he piɛ hulɔ. Ngɛ mɛni blɔ nɔ? Baiblo ɔ tsɔɔ kaa “nyɛmimɛ ɔmɛ a ti lakpatsɛ komɛ” ma nyɛ maa hi asafo ɔ mi nɛ eko ɔ, a ma de ke a pɔ mɛ nu. (Galatia Bi 2:4, 5; 1 Yohane 2:19) Jehanɛ hu ɔ, e ma nyɛ maa ba kaa nihi nɛ a pɔ mɛ nu ɔ a ti ni komɛ be anɔkuale yee kɛ ya si nyagbe. (Mateo 25:10-12; 2 Petro 2:20, 21) Se ke wa yuɔ wa he ngɛ nihi nɛ “gbee nihi a yi mi” ɔ a he ɔ, wa be ni kpahi a se nyɛɛe. Wa be nihi nɛ a pɔ mɛ nu, loo nihi nɛ a le mɛ wawɛɛ, loo nihi nɛ a ngɛ Yehowa sɔmɔe be kɛkɛɛ ji nɛ ɔ po a se nyɛɛe. Ke wa peeɔ jã nɛ e ba kaa jamɛatsɛmɛ ɔmɛ yi Yehowa anɔkuale hu, aloo a je asafo ɔ mi ɔ, hemi kɛ yemi nɛ wa ngɛ ngɛ Yehowa mi ɔ mi be gbɔjɔe, nɛ wa maa ya nɔ ma sɔmɔ Yehowa.​—Yuda 16.

ANƐ E HE HIA NƐ WAA HAO KAA A YIBƆ NGƐ HƐ MI YAE LO?

12, 13. Mɛni he je nɛ e sɛ kaa nihi nɛ a yeɔ abolo ɔ nɛ a nuɔ wai ɔ ngɛ Kaimi ɔ sisi ɔ a yibɔ nɛ ngɛ hɛ mi yae ɔ nɛ gba wa nya a?

¹² Jinɛ jehahi babauu nɛ be ɔ, nihi nɛ a yeɔ abolo ɔ nɛ a nuɔ wai ɔ ngɛ Kaimi ɔ sisi ɔ a yibɔ ɔ nɔ gbɔɔ. Se lingmi nɛ ɔ lɛɛ daa jeha a, a yibɔ ɔ yaa hɛ mi. Anɛ e sa kaa enɛ ɔ nɛ hao wɔ lo? Dɛbi. Nyɛ ha waa hyɛ nɔ́ he je.

¹³ ‘Yehowa le lɛ nitsɛ e nihi.’ (2 Timoteo 2:19) Yehowa le nihi nɛ e pɔ mɛ nu ɔ, se nihi nɛ a kaneɔ ni nɛmɛ nɛ a yeɔ abolo ɔ nɛ a nuɔ wai ɔ ngɛ Kaimi ɔ sisi ɔ lɛɛ a li nihi tutuutu nɛ a pɔ mɛ nu ɔ. Enɛ ɔ he ɔ, a kaneɔ nihi nɛ mɛɛ a susu kaa a pɔ mɛ nu, kpahu a pɔɛ mɛ nu ɔ kɛ piɛɛɔ he. Kaa nɔ hyɛmi nɔ́ ɔ, ni komɛ nɛ be ko nɛ be ɔ a yeɔ abolo ɔ nɛ a nuɔ wai ɔ kpa jã peemi. Eko ɔ, ni komɛ ngɛ juɛmi mi nyagba, lɔ ɔ he ɔ, a susu kaa a kɛ Kristo maa ye matsɛ ngɛ hiɔwe. E ngɛ heii kaa wa li nihi nɛ a pɔ mɛ nu ɔ a yibɔ tutuutu nɛ piɛ ngɛ zugba a nɔ.

14. Mɛni Baiblo de ngɛ nihi nɛ a pɔ mɛ nu nɛ a maa hi zugba a nɔ benɛ haomi ngua a maa je sisi ɔ he?

¹⁴ Loko Yesu ma ba ngɔ nihi nɛ a pɔ mɛ nu ɔ kɛ ho hiɔwe ya a, nihi nɛ a pɔ mɛ nu maa hi zugba a nɔ hehi fuu. Baiblo ɔ tsɔɔ kaa Yesu “maa tsɔ e bɔfo ɔmɛ kɛ ya je kɔ nya eywiɛ ɔmɛ. A ma ya bua nihi nɛ e hla a a nya kɛ maa je he kake kɛ maa ya he kake.” (Mateo 24:31) Baiblo ɔ tsɔɔ hu kaa ngɛ nyagbe ligbi ɔmɛ a mi ɔ, nihi nɛ a pɔ mɛ nu ɔ bɔɔ pɛ nɛ maa piɛ ngɛ zugba a nɔ. (Kpojemi 12:17) Se Baiblo ɔ tsɔɔ we a yibɔ nɛ maa piɛ benɛ haomi ngua a maa je sisi.

15, 16. Mɛni lɛ e he hia nɛ waa le ngɛ nimli 144,000 nɛ Yehowa hla mɛ ɔ a he?

¹⁵ Yehowa lɛ le be nɛ e kɛ hlaa nihi nɛ a pɔ mɛ nu ɔ. (Roma Bi 8:28-30) Yehowa bɔni nihi nɛ a pɔ mɛ nu ɔ hlami benɛ e tle Yesu si ɔ se. E ngɛ kaa nɔ́ nɛ a pɔ anɔkuale Kristofohi tsuo nɛ a hi si ngɛ kaseli ɔmɛ a be ɔ mi ɔ nu. Jeha lafahi a se ɔ, nihi fuu nɛ a tsɛɔ a he ke Kristofohi ɔ nyɛɛ we Kristo se ngɛ anɔkuale mi. Ngɛ jamɛ a be ɔ mi po ɔ, Yehowa pɔ anɔkuale Kristofohi kakaaka komɛ nu. A ngɛ kaa ngma nɛ Yesu tsɔɔ kaa a maa wa ngɛ huhi a kpɛti. (Mateo 13:24-30) Ngɛ nyagbe ligbi ɔmɛ a mi ɔ, Yehowa ngɛ nɔ yae nɛ e ngɛ nihi nu pɔe konɛ e ná nimli 144,000 ɔ.^[2] (Hyɛ nyagbe ningma.) Enɛ ɔ he ɔ, ke Mawu ma e juɛmi nya si kaa ke e piɛ bɔɔ nɛ nyagbe ɔ maa ba a e maa hla ni komɛ ɔ, e sɛ nɛ wa susu kɔkɔɔkɔ kaa e yi dami sane. (Yesaya 45:9; Daniel 4:35; kane Roma Bi 9:11, 16.)^[3] (Hyɛ nyagbe ningma.) E sa nɛ waa hyɛ nɛ hi nɛ wa ko pee wa ní kaa ní tsuli ɔmɛ nɛ a tu munyu kɛ si a nyɔmtsɛ ɔ ngɛ bɔ nɛ e wo sekpɛtsɛmɛ ɔmɛ hiɔ ha a he ɔ.​—Kane Mateo 20:8-15.

¹⁶ Tsa pi nihi nɛ a ngɛ hɛ nɔ kami kaa a maa ya hiɔwe ɔ tsuo ji “tsɔlɔ anɔkualetsɛ kɛ ní lelɔ ɔ.” (Mateo 24:45-47) Kaa bɔ nɛ ngɛ kaseli ɔmɛ a be ɔ mi ɔ, Yehowa kɛ Yesu gu nihi bɔɔ ko pɛ a nɔ kɛ tsɔɔ nihi fuu ní, aloo kɛ lɛ mɛ ɔ, jã kɛ̃ nɛ a ngɛ pee mwɔnɛ ɔ hulɔ. Ngɛ kaseli ɔmɛ a be ɔ mi ɔ, Kristofohi nɛ a pɔ mɛ nu ɔ a ti nihi bɔɔ pɛ nɛ a ha nɛ a ngma Kristofohi a Hela Ngmami ɔ. Mwɔnɛ ɔ hu ɔ, Kristofohi nɛ a pɔ mɛ nu ɔ a kpɛti nihi bɔɔ pɛ nɛ a kɛ blɔ nya ní tsumi wo a dɛ kaa a ha Mawu we bi a “nya mi ngma ngɛ be nɛ sa mi.”

17. Mɛni o kase ngɛ munyu nɛ ɔ mi?

¹⁷ Mɛni wa kase ngɛ munyu nɛ ɔ mi? Yehowa ma e juɛmi nya si kaa e maa dloo e we bi fuu neneene wami ngɛ zugba a nɔ, nɛ e maa dloo ni komɛ hu neneene wami ngɛ hiɔwe konɛ a kɛ Yesu nɛ ye matsɛ. Yehowa jɔɔ e sɔmɔli tsuo, “Yuda no” ɔ kɛ “ni nyɔngma” amɛ. E ngɛ blɔ hyɛe kaa mɛ tsuo a maa ye mlaa kake nɔ, nɛ a maa ye lɛ anɔkuale kɛ ya si nyagbe. E sa nɛ mɛ tsuo a ya nɔ nɛ a ba a he si. E sa nɛ mɛ tsuo a pee kake kɛ ja lɛ. Nɛ e sa nɛ mɛ tsuo a bɔ mɔde nɛ a ha nɛ tue mi jɔmi nɛ hi asafo ɔ mi daa. Be mi nɛ wa ngɛ nyagbe ɔ he sue haa nɛ ɔ, nyɛ ha nɛ wɔ tsuo waa ya nɔ nɛ wa sɔmɔ Yehowa nɛ waa nyɛɛ Kristo se daa kaa to kuu kake.