Russia Ya Tua Ukraine

Ngɛ February 24, 2022 mɔtu mla mi ɔ, Russia ta buli ya tua Ukraine, e ngɛ mi kaa ma hɛ mi nyɛɛli fuu bɔ mɔde kaa a maa tsi nɔ́ nɛ ɔ nya nɛ e ko ba. Kɛ ta buli a basabasa peemi nɛ ɔ ma nyɛ maa sa je ɔ he ha kɛɛ? Ligbi bɔɔ ko ji nɛ ɔ, António Guterres nɛ ji nɔkɔtɔma ngɛ kuu nɛ ji United Nations (Je Mahi A Kake Peemi Kuu) ɔ mi ɔ de ke: “Wa be nyɛe maa kale haomi kɛ níhi a hɛ mi kpatami nɛ́ basabasa peemi nɛ ɔ maa ngɔ kɛ ba, kɛ bɔ nɛ basabasa peemi nɛ ɔ ma puɛ slɔkee si himi nɛ ngɛ mahi nɛ a ngɛ Yuropa je ɔ kɛ jehanɛ hu ngɛ je kɛ wɛ ɔ ha.”

Mɛni ji nɔ́ nɛ sa kadimi nɛ Baiblo ɔ de kɛ kɔ níhi kaa kikɛ nɛ a ngɛ nɔ yae ɔ he?

• Yesu gba kɛ fɔ si kaa be maa ba nɛ “ma maa te si ngɔ wo ma nɛ matsɛ yemi maa te si ngɔ wo matsɛ yemi.” (Mateo 24:7) Moo kane munyu nɛ ji “What Is the Sign of ‘the Last Days,’ or ‘End Times’?” konɛ o na bɔ nɛ Baiblo ɔ tsɔɔ kaa tahi nɛ ngɛ nɔ yae mwɔnɛ ɔ maa Yesu gbami ɔ nɔ mi ha.

• Baiblo mi womi nɛ ji Kpo Jemi ɔ kale ta hwumi kaa okpɔngɔ nɔ hilɔ ko nɛ e hii si ngɛ “okpɔngɔ tsutsuutsu kaa la” ko nɔ, nɛ e ma je “tue mi jɔmi kɛ je zugba a nɔ.” (Kpo Jemi 6:4) Moo kane munyu nɛ ji “Okpɔngɔ Nɔ Hili Eywiɛ Ɔmɛ​—Mɛnɔmɛ Ji Mɛ?” konɛ o na bɔ nɛ gbami nɛ ɔ kɔɔ ta hwumi he mwɔnɛ ɔ ha.

• Baiblo mi womi nɛ ji Daniel ɔ gba kɛ fɔ si kaa “omleyi je matsɛ ɔ” kɛ “woyi je matsɛ ɔ” ma tua a sibi. (Daniel 11:25-45, NW) Moo hyɛ video nɛ ji Gbami Nɛ Bami​—Daniel Yi 11 ɔ konɛ o na nɔ́ he je nɛ Russia kɛ mahi nɛ e kɛ mɛ pee kake ɔ daa si ha omleyi je matsɛ ɔ.a

• Kpo Jemi womi ɔ hu tu “Mawu Ope ɔ ligbi ngua a nɔ ta a” he munyu. (Kpo Jemi 16:14, 16) Se enɛ ɔ pi ta nɛ́ maa ya nɔ ngɛ mahi a kpɛti kaa bɔ nɛ wa ngɛ nae amlɔ nɛ ɔ. Moo kane munyu nɛ ji “What Is the Battle of Armageddon?” konɛ o le níhi fuu kɛ kɔ nɔ́ nɛ ɔ nɛ maa ya nɔ hwɔɔ se ɔ he.

Mɛni he je nɛ o ma nyɛ ma ná hɛ kɛ nɔ fɔmi kaa níhi ma tsake hwɔɔ se?

• Baiblo ɔ de ke, Mawu ma ha nɛ ‘ta se maa po ngɛ je ɔ mi tsuo.’ (La 46:9) Moo kane munyu nɛ ji “A Real Hope for a Better Tomorrow” konɛ o kase hwɔɔ se si himi kpakpa nɛ Mawu wo he si ɔ he ní fuu.

• Yesu tsɔɔ e kaseli ɔmɛ kaa a sɔle nɛ Mawu Matsɛ Yemi ɔ nɛ ba. (Mateo 6:9, 10) Matsɛ Yemi nɛ ɔ ji nɔ yemi nɛ ngɛ hiɔwe, nɛ e ma tsu Mawu yi mi tomi kɛ ha zugba a he ní, nɛ eko ji tue mi jɔmi nɛ maa hi zugba a nɔ. Ke o suɔ nɛ o le se nami komɛ nɛ Matsɛ Yemi ɔ maa ngɔ kɛ ba a, moo hyɛ video nɛ ji Mɛni Ji Mawu Matsɛ Yemi ɔ?

Yehowa Odasefohi nɛ a he hiɛ pe 129,000 lɛ a ngɛ Ukraine. Kaa bɔ nɛ Odasefohi nɛ a ngɛ je kɛ wɛ ɔ kɛ a he wui ma kudɔmi sanehi a mi ɔ, jã nɔuu nɛ Odasefohi nɛ a ngɛ Ukraine hu kaseɔ Yesu kɛ gu a he nɛ a kɛ wui ma kudɔmi sanehi kɛ ta hwumi mi ɔ nɔ. (Yohane 18:36) Ngɛ je ɔ mi tsuo ɔ, Yehowa Odasefohi yaa nɔ nɛ a jajeɔ “sane kpakpa nɛ ɔ nɛ kɔɔ Matsɛ Yemi ɔ he ɔ” kɛ tsɔɔ nihi kaa lɔ ɔ pɛ ji nɔ́ nɛ ma tsu adesahi a nyagbahi tsuo nɛ́ ta hu piɛɛ he ɔ he ní. (Mateo 24:14) Wa ngɛ mo nine fɔe kaa o su wa he konɛ waa ye bua mo nɛ o le níhi babauu kɛ kɔ hwɔɔ se he hɛ nɔ kami nɛ Baiblo ɔ tu he munyu ɔ he.