YAA NƆ NƐ O HWƆƆ!
A Ngɛ Zugba a Puɛe—Mɛni Nɛ Baiblo ɔ De?
“E be kɛe nɛ adesahi a ní peepee maa ngɔ oslaahi kɛ ba zugba a nɔ. Ma nguahi fuu ma hyi kɛ nyu. Je ɔ mi maa dɔ la wawɛɛ pe be ko nɛ be ɔ. Ahumi nɛ ngɛ gbeye maa fia. Nyu he maa hia wawɛɛ ngɛ hehi fuu. Tsohi kɛ lohwehi ayɔhi abɔ hɛ mi ma kpata. Munyu nɛ ɔ pi nyazia loo nɔ́ he zã womi, se mohu, e ji nɔ́ nɛ je mi si kpami de kaa e maa ba ke nɔ yemi ɔmɛ tsakee we mlaahi nɛ a pee nɛ kudɔɔ bɔ nɛ a kɛ oslaba he wami kɛ he wami kpahi tsuɔ ní ha a he.”—António Guterres, nɛ e ji United Nations (Je Ma Amɛ A Kake Peemi Kuu ɔ) womi ngmalɔ nɔkɔtɔma a kɛ amaniɛ bɔmi nɛ ɔ ha kɛ kɔ Intergovernmental Panel on Climate Change ɔ he ngɛ April 4, 2022.
“Je mi si kpali ngɛ nihi kɔkɔ bɔe kaa e be kɛe nɛ kɔɔhiɔ mi tsakemi ma puɛ paaki nguahi nɛ maa su 423 [ngɛ United States], ejakaa kɔɔhiɔ mi ngɛ la dɔe wawɛɛ ngɛ lejɛ ɔ. Haomihi nɛ ma nyɛ maa ba a ngɛ kaa oslaahi nɛ wa ma nyɛ maa kane a he ní ngɛ Baiblo ɔ mi ɔ: ní nɛ ɔmɛ ji, la kɛ nyu nɛ puɛɔ ní, ice nɛ ngɛ silee, wo ɔ nɛ ngɛ hyie kɛ kɔɔhiɔ mi nɛ ngɛ la dɔe.”—“Flooding Chaos in Yellowstone, a Sign of Crises to Come,” The New York Times, June 15, 2022.
Anɛ a ma nyɛ ma tsu nyagbahi nɛ kɔɔ bɔ nɛ níhi ngɛ puɛe ngɛ zugba a nɔ ha a he ní lo? Ke jã a, mɛnɔ ma tsu a he ní? Moo hyɛ nɔ́ tutuutu nɛ Baiblo ɔ tsɔɔ.
A gba kɛ fɔ si kaa adesahi ma ha nɛ níhi ma puɛ ngɛ zugba a nɔ
Baiblo ɔ de ke Mawu ma “kpata ni nɛmɛ nɛ a ngɛ zugba a hɛ mi kpatae ɔmɛ a hɛ mi.” (Kpo Jemi 11:18) Baiblo ngmami nɛ ɔ tsɔɔ wɔ níhi etɛ komɛ:
1. Adesahi a ní peepeehi ma puɛ zugba a.
2. Zugba a nɛ a ngɛ lɛ puɛe ɔ se maa po.
3. Pi adesahi nɛ a ma nyɛ ma dla níhi nɛ ngɛ puɛe ngɛ zugba a nɔ ɔ, se mohu, Mawu ji nɔ nɛ ma nyɛ ma dla.
A ma dla níhi ngɛ zugba a nɔ hwɔɔ se
Baiblo ɔ de ke ‘zugba a maa hi si kɛ ya neneene.’ (Fiɛlɔ 1:4) Adesahi maa hi nɔ kɛ ya daa.
“Nihi nɛ peeɔ nɔ́ nɛ da a, zugba a maa pee a nɔ́ nɛ a maa hi nɔ daa.”—La 37:29.
A ma dla nɔ́ fɛɛ nɔ́ nɛ puɛ ngɛ zugba a nɔ ɔ.
“Nga zugba kpataa nɛ gbli ɔ ma na bua jɔmi; zia zugba a ma nya, nɛ mɔmɔhi maa puɛ ngɛ nɔ.”—Yesaya 35:1.