Mɛni Baiblo ɔ De Ngɛ Hwɔ Nɛ Ngɛ Bae Mwɔnɛ ɔ He?

“Hwɔ be nɔ ko yee hu.” Enɛ ɔ ji nɔ́ nɛ ma nɔ yeli ngɔ kɛ ma a hɛ mi kaa a maa su he konɛ a kɛ tsu adesahi a nyagba titli nɛ a kɛ ngɛ kpee ɔ a kpɛti kake he ní​—nɛ lɔ ɔ ji blɔ nɔ nɛ a maa gu kɛ ha nɛ nɔ fɛɛ nɔ nɛ ngɛ zugba a nɔ ɔ nɛ ná niye ní.a Se anɛ be ko maa su nɛ hwɔ be nɔ ko yee hu ngɛ zugba a nɔ lo? Mɛni Baiblo ɔ de?

Baiblo ɔ gba kɛ fɔ si kaa hwɔ maa ba ngɛ wa be nɛ ɔ mi

Baiblo ɔ gba kɛ fɔ si kaa hwɔ maa ba ngɛ wa be nɛ ɔ mi, nɛ́ ji be nɛ́ Baiblo ɔ tsɛɛ ke “nyagbe ligbi ɔmɛ” ɔ. (2 Timoteo 3:1) Pi Mawu nɛ ha nɛ hwɔ ngɛ bae, se e bɔ wɔ kɔkɔ kaa hwɔ maa ba. (Yakobo 1:13) Moo hyɛ Baiblo gbami enyɔ komɛ.

“Hwɔ maa ba . . . ngɛ he slɔɔtohi.” (Mateo 24:7) Baiblo gbami nɛ ɔ tsɔɔ kaa hwɔ maa ba ngɛ hehi fuu. Nihi nɛ a hyɛɛ niye ní he blɔ nya tomi nɔ ɔ bɔ amaniɛ ke: “Ngɛ níhi nɛ je ɔ ngɛ pee konɛ a kɛ tsi hwɔ, kɛ niye ní kpakpa nɛ be aloo niye ní nɛ sui nihi ɔ nya a tsuo se ɔ, kpaako níhi ngɛ puɛe kulaa mohu.”b Nihi ayɔ lafahi abɔ nɛ́ a ngɛ mahi fuu a nɔ ɔ nine sui niye ní nɛ a hia a nɔ. Nɛ mɔbɔ sane ji kaa, enɛ ɔ ha nɛ a kpɛti nihi fuu gbo.

“Hyɛ! okpɔngɔ yumu ko, nɛ nɔ nɛ e hii si ngɛ nɔ ɔ hɛɛ tsesi enyɔ sɛni ko ngɛ e dɛ mi.” (Kpo Jemi 6:5) Ngɛ gbami nɛ ɔ mi ɔ, okadi peemi okpɔngɔ ɔ kɛ nɔ nɛ hii si ngɛ nɔ ɔ daa si kɛ ha hwɔ nɛ maa ba ngɛ nyagbe ligbi ɔmɛ a mi.c Tsesi sɛni ɔ nɛ e ngɛ nɔ nɛ hii si ngɛ okpɔngɔ ɔ nɔ ɔ dɛ mi ɔ daa si ha niye ní bɔɔ nɛ a ma susu ha nɔ fɛɛ nɔ, konɛ a ná bɔɔbɔɔbɔɔ. Benɛ okpɔngɔ nɔ hilɔ ɔ ngɛ okpɔngɔ ɔ nɔ kɛ yaa a, gbi ko de kaa niye ní he jua maa wa wawɛɛ, nɛ e bɔ kɔkɔ kaa nihi nɛ a ko dã niye ní. (Kpo Jemi 6:6) Enɛ ɔ kale bɔ nɛ hwɔ ngɛ bae ngɛ je kɛ wɛ ha a pɛpɛɛpɛ. Nihi ayɔhi abɔ nyɛ we nɛ a he niye ní loo a ná niye ní kpakpa.

Blɔ nɔ nɛ a maa gu kɛ po hwɔ se

Womi mi leli tsɔɔ kaa zugba nyɛɔ nɛ e baa niye ní nɛ́ ma nyɛ maa su nɔ fɛɛ nɔ nɛ ngɛ nɔ ɔ, nɛ́ fuu po maa piɛ ngɛ se. Lɛɛ mɛni ha nɛ hwɔ ngɛ bae ɔ? Nɛ mɛni Baiblo ɔ de kaa Yehowad nɛ ji wa Bɔlɔ ɔ maa pee kɛ tsu nyagba nɛ ɔ he ní?

Nyagba: Adesa nɔ yeli be nyɛe maa po ohia kɛ dami sane nɛ a yi nɛ́ lɔ ɔ ha nɛ hwɔ ngɛ nihi yee ɔ se.

Nyagba nɛ ɔ nya tsaba: A maa ngɔ Mawu Matsɛ Yemi nɛ ye mluku ɔ kɛ da adesa nɔ yemi nɛ yí mluku ɔ nane mi. (Daniel 2:44; Mateo 6:10) Mwɔnɛ ɔ, e he waa kɛ haa ohiatsɛmɛ fuu kaa a ma he niye ní nɛ maa su mɛ, se ngɛ Mawu Matsɛ Yemi ɔ sisi lɛɛ, e be lɛ bae jã. Baiblo ɔ de kɛ kɔ Yesu Kristo nɛ ji Mawu Matsɛ Yemi ɔ nya Matsɛ ɔ he ke: ‘Ke ohiatsɛ, loo nɔ nɛ e fi lɛ, loo nɔ nɛ be nɔ ko tsɛ lɛ ɔ, e buɔ lɛ tue. . . . Zugba a maa ba ní saminya, nɛ a ma ná blɛfo babauu ngɛ yo ɔmɛ tsuo pɛpɛɛpɛ a nɔ.’​—La 72:12, 16.

Nyagba: Tahi puɛɔ níhi fuu, nɛ e haa nɛ sika he blɔ nya tomihi hu puɛɔ, enɛ ɔ haa nɛ e he waa ha nihi kaa a ma ná niye ní nɛ a hia a.

Nyagba nɛ ɔ nya tsaba: “[Yehowa] haa ta se poɔ ngɛ je ɔ mi tsuo; e kuɔ kɛ̃ɛ̃hi, kɛ akplɔhi a mi, nɛ e kɛ la sãã ta zugba lɛhi!” (La 46:9) Mawu ma kpata ta hwumi níhi kɛ nihi nɛ a haa nɛ ta baa a hɛ mi. Enɛ ɔ ma ha nɛ e he be wae ha nihi hu kaa a ma ná niye ní, nɛ a kɛ nyagbe ko be kpee. Baiblo ɔ wo si kaa: “Dalɔ maa bɔ, nɛ tue mi jɔmi maa pɔ he.”​—La 72:7, NW.

Nyagba: Hiɔmi nɛ nɛɛ wawɛɛ kɛ kɔɔhiɔ mi la dɔmi nɛ nya wa kɛ adebɔ mi oslaahi kpataa ngmɔ níhi kɛ lohwehi a hɛ mi.

Nyagba nɛ ɔ nya tsaba: Mawu ma kudɔ adebɔ mi he wamihi, nɛ lɔ ɔ ma ha nɛ bɔ nɛ kɔɔhiɔ mi si fɔfɔɛ maa hi ha a ma ha nɛ niye ní maa ba. Baiblo ɔ de ke: ‘[Yehowa] tsiɔ ahumi nya nɛ e kpaa fiami; oslɔke ɔmɛ a he jɔɔ, nɛ wo ɔ ngmɛɛ dii. . . . Yehowa ha nga kplanaa plɛ pee taku kɛ e mi nyu babaaba; nɛ zugba gbigbli plɛ pee he nɛ nyu hɛngmɛhi hia si ngɛ. Ni nɛmɛ nɛ hwɔ ye mɛ ɔ, e ha a to si ngɛ lejɛ ɔ . . . A hu zugba a, nɛ a du wai yiblii ngɛ nɔ; nɛ a kpa ní babauu.’​—La 107:29, 35-37.

Nyagba: Nihi nɛ a hɛ tsuɔ nɛ a sisiɔ nɔ ɔ peeɔ niye níhi nɛ a be kpakpa nɛ́ ke nɔ ko yeɔ e maa wo lɛ hiɔ, aloo a ha we nɛ nihi a nine nɛ su niye ní nɛ a hia a nɔ.

Nyagba nɛ ɔ nya tsaba: Mawu Matsɛ Yemi ɔ ma kpata nihi nɛ a yi anɔkuale nɛ a sisiɔ nɔ ɔ a hɛ mi. (La 37:10, 11; Yesaya 61:8) Baiblo ɔ de ngɛ Yehowa Mawu he ke “nihi nɛ a waa mɛ yi mi ɔ, e yeɔ a sane kɛ haa mɛ. Nihi nɛ hwɔ ngɛ mɛ yee ɔ, e haa mɛ niye ní.”​—La 146:7.

Nyagba: A puɛɔ niye ní nɛ je ɔ náa a mi dlami etɛ mi kake jeha fɛɛ jeha, aloo e laa daa jeha.

Nyagba nɛ ɔ nya tsaba: Ngɛ Mawu Matsɛ Yemi ɔ sisi ɔ, nihi nɛ a kɛ mɛ maa da niye ní he blɔ nya tomi nya a maa hyɛ nɔ saminya. Benɛ Yesu ngɛ zugba a nɔ ɔ e hyɛ saminya konɛ a ko dã niye ní. Kaa nɔ hyɛmi nɔ́ ɔ, ngɛ be ko mi ɔ, e ha nihi nɛ a he hiɛ pe 5,000 niye ní. Lɔ ɔ se ɔ, e de e kaseli ɔmɛ ke: “Nyɛ bua bibli nɛ piɛ ɔ nya konɛ ekoeko nɛ ko dã.”​—Yohane 6:5-13.

Akɛnɛ Mawu Matsɛ Yemi ɔ ma je nɔ́ tutuutu nɛ ha nɛ hwɔ ngɛ bae ɔ kɛ je he je ɔ, adesahi tsuo ma ná niye ní kpakpahi fuu. (Yesaya 25:6) Ke o suɔ nɛ o kase be nɛ́ Mawu Matsɛ Yemi ɔ ma tsu enɛ ɔ he ní ɔ, hyɛ munyu nɛ ji “Mɛni Be Nɛ Mawu Matsɛ Yemi ɔ Maa Ye Zugba a Nɔ?”