ilbusca/E+ via Getty Images
YAA NƆ NƐ O HWƆƆ!
Mɛni He Je Nɛ Nihi Nyɛ We Nɛ A Kɛ A Sibi Nɛ Hi Si Ngɛ Tue Mi Jɔmi Mi ɔ?—Mɛni Baiblo ɔ De?
Ma nɔ yeli kɛ blɔ nya tomihi nɛ a he biɛ ngɛ je ɔ mi ɔ nyɛ we nɛ a kɛ tue mi jɔmi nɛ ba. Mwɔnɛ ɔ, ta pɔ he ngɛ je ɔ mi wawɛɛ kɛ je benɛ a hwu jemi ta enyɔne ɔ se ɔ. Nihi maa pee kaa ayɔ akpe enyɔ nɛ́ ji nihi nɛ a ngɛ je ɔ mi ɔ mi gbami eywiɛ mi kake ɔ ngɛ hehi nɛ ta nɛ ɔmɛ ya nɔ ngɛ.
Mɛni he je nɛ adesahi nyɛ we nɛ a ngɔ tue mi jɔmi kɛ ba a? Mɛni Baiblo ɔ de?
Yi mi tomi etɛ he je nɛ́ adesahi be nyɛe maa ngɔ tue mi jɔmi kɛ ba
1. Nihi jeɔ suhi nɛ́ be hae nɛ tue mi jɔmi nɛ ba a kpo. Baiblo ɔ gba kɛ fɔ si kaa ngɛ wa be nɛ ɔ mi ɔ, “adesahi [maa] pee nihi nɛ a suɔ mɛ nitsɛmɛ a he, sika suɔli, fĩali, he nɔ woli, . . . nihi nɛ a jeɔ nɔ se, . . . nihi nɛ a hí kɛ somi ko somi, . . . nihi nɛ a be he nɔ yemi, . . . nihi nɛ a peeɔ a tsui nya ní, pupuupu peeli.”—2 Timoteo 3:2-4.
2. Adesahi be nyɛmi ɔ nɛ a kɛ ma tsu nyagbahi nɛ ngɛ bae ɔ a he ní nɛ́ Yehowaa Mawu nɛ́ ji a Bɔlɔ ɔ yemi kɛ buami piɛɛ we he. Baiblo ɔ tsɔɔ kaa “pi nɔmlɔ adesa nitsɛ he wami nya ji kaa e maa pee kikɛ nɛ ɔ, loo kikɛ nɛ ɔ.”—Yeremia 10:23.
3. Satan Abosiami nɛ́ ji nɔ yelɔ yi wu tso tsɛ nɛ́ e ngɛ he wami, nɛ́ e ngɛ “nihi nɛ a ngɛ zugba a nɔ hehi tsuo nɛ nimli ngɛ ɔ sisie ɔ” ji nɔ nɛ e ngɛ je ɔ kudɔe. (Kpo Jemi 12:9) Be abɔ nɛ ‘nɔ yayami ɔ lɛ ngɛ je ɔ kudɔe’ ɔ, ta kɛ basabasa peemi maa ya nɔ.—1 Yohane 5:19.
Mɛnɔ lɛ e kɛ tue mi jɔmi ma nyɛ maa ba?
Baiblo ɔ ma nɔ mi ha wɔ kaa pi adesa mɔde bɔmi ko nɛ́ e kɛ tue mi jɔmi maa ba, mohu ɔ, Mawu lɛ e kɛ tue mi jɔmi maa ba.
Ní kpakpahi nɛ nyɛ ngɛ blɔ hyɛe ɔ, i to nɛ ma ha nyɛ.”—Yeremia 29:11.
Mɛni blɔ nɔ Mawu maa gu kɛ ye jamɛ a si womi ɔ nɔ? “Mawu, nɔ nɛ e haa tue mi jɔmi ɔ maa ywia Satan.” (Roma Bi 16:20) Mawu maa gu nɔ yemi ko nɛ e ngɛ hiɔwe, nɛ Baiblo ɔ tsɛɛ ke “Mawu Matsɛ Yemi” ɔ nɔ kɛ ngɔ tue mi jɔmi kɛ ba ngɛ je kɛ wɛ. (Luka 4:43) Ngɛ Yesu Kristo, nɛ́ ji Matsɛ Yemi nɛ ɔ nya Matsɛ ɔ nɔ yemi sisi ɔ, a maa tsɔɔ nihi blɔ nɔ nɛ a maa gu nɛ a kɛ a sibi maa hi si ngɛ tue mi jɔmi mi.—Yesaya 9:6, 7.
Ke o suɔ nɛ o le babauu ɔ, moo kane munyu nɛ ji “What Will God’s Kingdom Accomplish?”