Anɛ Mawu Ngɛ Biɛ Lo?

Nɔ́ nɛ Baiblo ɔ de

Nɔ ko nɔ ko be nɛ e be biɛ. Enɛ ɔ he ɔ, anɛ sisi numi be he kaa Mawu nɛ hi biɛ lo? Ngɛ nimli a blɔ fa mi ɔ, biɛ nɛ nɔ fɛɛ nɔ ngɛ ɔ he hia wawɛɛ, nɛ e yeɔ bua mɛ nɛ huɛ bɔmi kpakpa hii a kpɛti. Anɛ pi jã nɛ e sa kaa e hi ngɛ waa kɛ Mawu hu wa kpɛti lo?

Ngɛ Baiblo ɔ mi ɔ, Mawu de ke: ‘Ye biɛ ji Yehowa.’ (Yesaya 42:8) E ngɛ mi kaa e ngɛ sablaihi kaa “Mawu Ope,” kɛ “Bɔlɔ,” mohu lɛɛ, se e ha e sɔmɔli he blɔ kaa a ma nyɛ maa ngɔ e biɛ nitsɛ kɛ tsɛ lɛ.​—1 Mose 17:1; Bɔfo Ɔmɛ A Ní Tsumi 4:24; 1 Petro 4:19.

Ngɛ Baiblo sisi tsɔɔmihi fuu a mi ɔ, Mawu biɛ ɔ je kpo ngɛ 2 Mose 6:3. Jamɛ a ngmami ɔ de ke: ‘I je ye he kpo tsɔɔ Abraham, Isak, kɛ Yakob kaa Mawu Ope; se ye biɛ Yehowa a lɛɛ i ha we nɛ a le.’

Ngɛ Dangme mi ɔ, Mawu biɛ ji Yehowa. Se ni komɛ hu tsɛɛ lɛ ke “Yawɛ.” Yehowa ji nɔ́ nɛ nihi babauu le, nɛ lɔ ɔ ji nɔ́ nɛ a pɔɔ tsɛmi. Benɛ a ngma Baiblo ɔ kekleekle fa a, pi Dangme mi nɛ a ngma ngɛ, se mohu ɔ, a ngma ngɛ Hebri gbi mi. Ngɛ Hebri gbi ɔ mi ɔ, a ngmaa ní kɛ jeɔ hiɔ nɔ kɛ yaa muɔ nɔ. Kikɛ ji bɔ nɛ a ngma Mawu biɛ ɔ ha, יהוה. Hebri ningma okadi eywiɛ nɛ ɔmɛ ji​—YHWH.