Mɛni He Je Nɛ Yehowa Odasefohi Yi Bloonya a?
Juɛmi nɛ dɛ nɛ nihi hɛɛ
Nɔ́ Nɛ Nihi Deɔ: Akɛnɛ Yehowa Odasefohi he we Yesu yi ɔ he je nɛ a yi Bloonya a nɛ.
Anɔkuale ɔ: Kristofohi ji wɔ. Wa he ye kaa Yesu Kristo pɛ nɔ a maa gu kɛ he nihi a yi wami.—Bɔfo Ɔmɛ A Ní Tsumi 4:12.
Nɔ́ Nɛ Nihi Deɔ: Nyɛɛ kɛ mi gbami baa wekuhi a mi, ejakaa nyɛ deɔ nihi ke a ko ye Bloonya.
Anɔkuale ɔ: Wa susuɔ wekuhi a he wawɛɛ, nɛ waa kɛ Baiblo ɔ yeɔ buaa mɛ konɛ kake peemi nɛ hi weku ɔ mi.
Nɔ́ Nɛ Nihi Deɔ: Bloonya ji be nɛ a keɔ nɔ nɔ́, nɛ tue mi jɔmi hii zugba a nɔ, nɛ nihi peeɔ a sibi kpakpa, se enɛ ɔmɛ tsuo bɔ nyɛ.
Anɔkuale ɔ: Wa bɔɔ mɔde kaa wa maa pee nihi kpakpa nɛ waa kɛ mɛ nɛ hi si ngɛ tue mi jɔmi mi daa ligbi. (Abɛ 11:25; Roma Bi 12:18) Kaa nɔ hyɛmi nɔ́ ɔ, bɔ nɛ wa peeɔ wa asafo mi kpehi ha, kɛ bɔ nɛ wa tsuɔ fiɛɛmi ní tsumi ɔ ha a kɛ blɔ tsɔɔmi nɛ Yesu kɛ ha a kɔ. E de ke: ‘Nyɛ ná lɛ yaka gu nɛ nyɛ wui he hiɔ; nyɛ hu nyɛɛ ngɔ kɛ ha nɛ nyɛ ko he hiɔwo.’ (Mateo 10:8) Jehanɛ hu, wa haa nihi leɔ kaa Mawu Matsɛ Yemi ɔ pɛ nɛ ma nyɛ maa ngɔ tue mi jɔmi nitsɛnitsɛ kɛ ba zugba a nɔ.—Mateo 10:7.
Mɛni He Je Nɛ Yehowa Odasefohi Yi Bloonya a?
Yesu fa kaa wa kai e gbenɔ ɔ, se pi e fɔmi ɔ.—Luka 22:19, 20.
Yesu kaseli ɔmɛ kɛ kekle Kristofo ɔmɛ yi Bloonya. Womi nɛ ji, New Catholic Encyclopedia a de ke, “jeha 243 ngɛ Kristo fɔmi se loko a to Yesu fɔmi ligbi yemi he gbijlɔ ɔ sisi.” Enɛ ɔ tsɔɔ kaa nyagbe kaselɔ ɔ gbo maa pee jeha 100 se loko a bɔni Bloonya yemi.
Nɔ́ ko be nɛ tsɔɔ kaa a fɔ Yesu ngɛ December 25; Baiblo ɔ tsɔɔ we ligbi tutuutu nɛ a fɔ lɛ.
Wa he ye kaa Mawu kplɛɛ we Bloonya yemi nɔ, ejakaa e je wɔ jami kusumihi a mi.—2 Korinto Bi 6:17.
Ke nyɛ ye Bloonya a, kɛkɛ e pee mɛni?
E ngɛ mi kaa nihi babauu le kaa Bloonya yemi je wɔ jami mi, nɛ Baiblo ɔ kplɛɛ we nɔ mohu lɛɛ, se loloolo ɔ, a yeɔ. Nihi kaa jã a biɔ ke: Mɛni he je nɛ e sa kaa Kristofohi nɛ a pee kpɛii ngɛ Bloonya yemi he? Ke a ye ɔ, kɛkɛ e pee mɛni?
Baiblo ɔ woɔ wɔ he wami nɛ wa susu níhi a he, ‘konɛ wa yɔse níhi nɛ ji Mawu suɔmi nya ní kpakpahi nɛ sa e hɛ mi saminya’ a. (Roma Bi 12:1, 2) Baiblo ɔ tsɔɔ wɔ kaa e sa nɛ wa ha nɛ anɔkuale ɔ he nɛ hia wɔ. (Yohane 4:23, 24) Wa susuɔ bɔ nɛ nihi naa wɔ ha a he mohu, se wa suɔ kaa wa kɛ Baiblo mlaahi ma tsu ní, ke lɔ ɔ ma ha nɛ nihi be wa sane suɔe po.
E ngɛ mi kaa wa yi Bloonya mohu lɛɛ, se wa tsi we nihi a nya kaa a ko ye. Nɔ nitsɛ nɛ e maa mwɔ e yi mi kpɔ ngɛ sane nɛ ɔ he. Waa kɛ wa he wui nihi a Bloonya yemi he sanehi a mi.