Mɛni He Je Nɛ Yehowa Odasefohi Yɛ Ta?

Yehowa Odasefohi yɛ ta ngɛ yi mi tomihi nɛ nyɛɛ se nɛ ɔmɛ a he je:

1. Wa buɔ Mawu tue. Baiblo ɔ de kaa Mawu sɔmɔli kɛ “a ta hwumi klaate ɔmɛ maa sɔ kpakplaahi,” nɛ “a be a he dlae kɛ ha ta gblegbleegble hu.”​—Yesaya 2:4.

2. Wa buɔ Yesu tue. Yesu de bɔfo Petro ke: “Ngɔɔ o klaate ɔ ngɔ to e to he; ejakaa nihi tsuo nɛ hiaa klaate ɔ, a kɛ klaate ma kpata a hɛ mi.” (Mateo 26:52) Yesu munyu ɔ tsɔɔ kaa e se nyɛɛli kɛ a he be ta hwumi mi woe.

   Yesu de e kaseli ɔmɛ ke, “pi je ɔ mi bi ji mɛ,” enɛ ɔ he ɔ, a kɛ a he wui ma kudɔmi sanehi a mi. (Yohane 17:16) A tui ní nɛ ta buli tsuɔ ɔ he munyu yaya ko, nɛ ke nɔ ko suɔ kaa e ma tsu ta buli a ní tsumi ɔ, a tsi we e nya.

3. Wa suɔ ni kpahi. Yesu fa e kaseli ɔmɛ ke ‘a suɔ a sibi.’ (Yohane 13:34, 35) Enɛ ɔ tsɔɔ kaa Yesu kaseli ngɛ je kɛ wɛ ɔ maa pee nyɛmimɛ, nɛ a kɛ a he be ta hwue.​—1 Yohane 3:10-12.

4. Kekle Kristofo ɔmɛ a nɔ hyɛmi nɔ́ ɔ. Womi nɛ ji, Encyclopedia of Religion and War ɔ de ke: “Yesu kaseli ɔmɛ kua ke a kɛ a he be ta hwumi kɛ ta buli a ní tsumihi a mi woe,” ejakaa jã nɛ a maa pee ɔ “kɛ mlaa nɛ Yesu wo mɛ kaa a suɔ a he nyɛli po ɔ kɔ we.” Jã kɛ̃ nɛ Mawu jami he ní lelɔ ko nɛ ngɛ Germany nɛ a tsɛɛ lɛ ke Peter Meinhold ɔ tu munyu kɛ kɔ Yesu kaseli ɔmɛ a he ke: “Kaseli ɔmɛ susu kaa nɔ ko be nyɛe maa pee Kristofo no, nɛ ngɛ jamɛ a be ɔ mi nɔuu ɔ, e pee ta bulɔ.”

Níhi Nɛ Wa Peeɔ Kɛ Yeɔ Bua

Yehowa Odasefohi ji ma bi kpakpahi, nɛ wa he be gbeye ngɛ ma nɛ wa ngɛ mi ɔ mi. Wa ngɛ bu kɛ ha ma nɔ yeli kaa bɔ nɛ Baiblo ɔ fa wɔ ke waa pee ɔ. Baiblo ɔ de ke:

• “Nɔ tsuaa nɔ nɛ ba e he si ha ma nɔ yeli.”​—Roma Bi 13:1.

• “Nyɛɛ ngɔ Kaisare ɔ níhi ngɔ ha Kaisare ɔ, nɛ nyɛɛ ngɔ Mawu níhi ngɔ ha Mawu.”​—Mateo 22:21.

Enɛ ɔ he ɔ, wa yeɔ mlaa nɔ, wa woɔ tohi, nɛ ke amlaalo ɔ ngɛ nɔ́ ko pee konɛ nihi nɛ a ná he se ɔ, wa ti si kɛ wui.