Mɛni He Je Nɛ Nihi Gboɔ?

Nɔ́ Nɛ Baiblo ɔ De

Ke wa weku no ko loo wa suɔlɔ ko gbo ɔ, tɔmi be he kaa wa ma susu nɔ́ he je nɛ e gbo ɔ he. Baiblo ɔ de ke: “Gbenɔ kɛɛ ɔ ji yayami.”​—1 Korinto Bi 15:56.

Mɛni he je nɛ nimli tsuo peeɔ yayami nɛ a gboɔ ɔ?

Adam kɛ Hawa gbo, ejakaa a pee yayami kɛ si Mawu. (1 Mose 3:17-19) ‘Mawu mi lɛ wami jeɔ kɛ baa.’ Enɛ ɔ he ɔ, ngɛ yayami nɛ Adam kɛ Hawa pee kɛ si Mawu ɔ mi ɔ, nɔ́ nɛ a ma nyɛ maa hyɛ blɔ kaa a ma ná pɛ ji gbenɔ.​—La 36:9; 1 Mose 2:17.

Adam ngɔ yayami kɛ e mi nɔ́ nami kɛ sã e bimɛ tsuo. Baiblo ɔ de ke: “Nɔ kake lɛ pee yayami, nɛ yayami kɛ gbenɔ ba. Enɛ ɔ ha gbenɔ sã nimli tsuo, ejakaa nɔ tsuaa nɔ pee yayami.” (Roma Bi 5:12) Adesahi gboɔ, ejakaa mɛ tsuo a pee yayami.​—Roma Bi 3:23.

Anɛ gbenɔ se ma nyɛ maa po kulaa lo?

Mawu wo si kaa be ko maa ba nɛ “e maa ye gbenɔ nɔ kunimi.” (Yesaya 25:8) Bɔ nɛ pee nɛ gbenɔ se nɛ po kulaa a, e sa nɛ Mawu nɛ je nɔ́ nɛ kɛ gbenɔ ba, nɛ ji yayami kɛ je kulaa. Mawu maa gu Yesu Kristo nɛ “woɔ je ɔ he yayami ɔ kɛ yaa a” nɔ kɛ tsu enɛ ɔ he ní.​—Yohane 1:29; 1 Yohane 1:7.