Mɛni He Je Nɛ Yehowa Odasefohi Kɛ A He Wui Ma Kudɔmi Sanehi A Mi?
Yehowa Odasefohi kɛ a he wui ma kudɔmi sanehi a mi akɛnɛ Baiblo ɔ tsɔɔ jã a he je. Wa be he wami ko ngɛ ma hɛ mi nyɛɛli a nɔ, wa fɔɛ sɔ kɛ ha ma kudɔmi kuuhi loo nɔ ko nɛ ngɛ ma kudɔmi mi blɔ nya ko hlae, wa plee we ma kudɔmi blɔ nya he, nɛ waa kɛ wa he wui níhi nɛ nihi peeɔ konɛ a kɛ tsake nɔ yemi ko ɔ mi. Wa he ye kaa Baiblo ɔ tsɔɔ yi mi tomihi a he je nɛ jã peemi sa.
Wa nyɛɛ Yesu nɛ e kua ma kudɔmi blɔ nya a nɔ hyɛmi nɔ́ ɔ se. (Yohane 6:15) E ha nɛ e kaseli ɔmɛ le kaa “pi je ɔ mi bi ji mɛ,” nɛ e tsɔɔ mi heii kaa e sɛ nɛ a kɛ a he nɛ wo ma kudɔmi sanehi a mi.—Yohane 17:14, 16; 18:36; Marko 12:13-17.
Wa fĩɔ Mawu Matsɛ Yemi ɔ nɛ Yesu tu he munyu ɔ se. Yesu de ke: ‘Sane kpakpa nɛ ɔ nɛ kɔɔ matsɛ yemi ɔ he ɔ, a maa fiɛɛ kɛ kpa je ɔ mi tsuo.’ (Mateo 24:14) Akɛnɛ wa daa Mawu Matsɛ Yemi ɔ nane mi nɛ a fa wɔ kaa waa fiɛɛ e bami ɔ kɛ tsɔɔ nihi he je ɔ, waa kɛ wa he wui ma kudɔmi sanehi a mi ngɛ ma tsuaa ma nɛ wa ngɛ mi ɔ mi.—2 Korinto Bi 5:20; Efeso Bi 6:20.
Wa he nɛ waa kɛ wui ma kudɔmi sanehi a mi ɔ ha nɛ waa kɛ nihi tsuo nɛ e slo ma kudɔmi kuu mi nɛ a ngɛ ɔ nyɛɔ tuɔ sane kpakpa nɛ kɔɔ Mawu Matsɛ Yemi ɔ he ɔ he munyu. Wa bɔɔ mɔde nɛ waa kɛ wa munyu tutui kɛ wa ní peepee tsɔɔ kaa waa kɛ wa hɛ fɔɔ Mawu Matsɛ Yemi ɔ nɔ kaa lɔ ɔ pɛ nɛ e ma tsu adesahi a nyagbahi a he ní.—La 56:11.
Akɛnɛ wa ha we nɛ ma kudɔmi sanehi nɛ gba wa kpɛti he je ɔ, wa pee kake kaa nyɛmimɛ ngɛ je kɛ wɛ. (Kolose Bi 3:14; 1 Petro 2:17) Se jamihi nɛ a kɛ a he woɔ ma kudɔmi sanehi a mi ɔ ngɔɔ mi gbami kɛ baa a sɔlemi ɔ mi bi ɔmɛ a kpɛti.—1 Korinto Bi 1:10.
Bu kɛ ha ma nɔ yeli. E ngɛ mi kaa waa kɛ wa he wui ma kudɔmi sanehi a mi mohu lɛɛ, se wa buɔ ma nɔ yeli ngɛ ma nɛ wa ngɛ mi ɔ mi. Enɛ ɔ kɛ Baiblo fami nɛ ɔ kɔ: “Nɔ tsuaa nɔ nɛ ba e he si ha ma nɔ yeli.” (Roma Bi 13:1) Wa yeɔ mlaa nɔ, wa woɔ tohi, nɛ ke amlaalo ɔ ngɛ nɔ́ ko pee konɛ nihi nɛ a ná he se ɔ, wa ti si kɛ wui. Waa kɛ wa he wui níhi nɛ nihi peeɔ konɛ a kɛ tsake nɔ yemi ko ɔ mi, mohu ɔ, waa kɛ Baiblo ga womi nɛ tsɔɔ kaa waa “sɔle ha matsɛmɛ, kɛ nihi tsuo nɛ hɛɛ blɔ nya” a tsuɔ ní, titli ɔ, ke a ngɛ yi mi kpɔ ko mwɔe nɛ ma nyɛ maa sa he blɔ nɛ nihi ngɛ kaa a ma ja Mawu ɔ he ɔ.—1 Timoteo 2:1, 2.
Ke nihi mwɔ a yi mi kpɔ ngɛ ma kudɔmi sanehi a he ɔ, wa ti si kɛ wui. Kaa nɔ hyɛmi nɔ́ ɔ, wa tsi we sɔ fɔmi loo nihi nɛ a suɔ kaa a maa fɔ sɔ ɔ nya.
Anɛ lingmi nɛ ɔ pɛ nɛ wa je wa he kɛ je ma kudɔmi sanehi a mi lo? Dɛbi. Yesu kaseli ɔmɛ kɛ kekle Kristofo ɔmɛ hu ngɔɛ a he kɛ wui ma kudɔmi sanehi a mi. Womi nɛ ji, Beyond Good Intentions ɔ de ke: “E ngɛ mi kaa kekle Kristofo ɔmɛ he ye kaa e sa nɛ a ba a he si ha ma nɔ yeli ɔmɛ, se a kɛ a he wui ma kudɔmi sanehi a mi.” Womi nɛ ji, On the Road to Civilization ɔ hu tu kekle Kristofo ɔmɛ a he munyu ke, “a ngɔɛ blɔ nya ngɛ ma kudɔmi blɔ nya tomi ko mi.”
Anɛ ma kudɔmi sanehi nɛ waa kɛ wa he wui mi ɔ ha nɛ wa he ngɛ gbeye lo? Dɛbi. Wa ji ma bi nɛ wa suɔ tue mi jɔmi, enɛ ɔ he ɔ, e sɛ nɛ ma nɔ yeli nɛ a ye wɔ gbeye. Mo susu amaniɛ ko nɛ National Academy of Sciences ngɛ Ukraine ɔ bɔ ngɛ jeha 2001 ɔ mi ɔ he nɛ o hyɛ. Amaniɛ bɔmi ɔ tu wa he nɛ waa kɛ wui ma kudɔmi sanehi a mi ɔ he munyu ke: “Eko ɔ, ni komɛ a bua be yi mi kpɔ nɛ Yehowa Odasefohi mwɔ nɛ ɔ he jɔe; yi mi tomi nɛ ɔ nɔuu he nɛ Nazi kɛ Kɔmiunisi nɔ yemi ɔmɛ wa mɛ yi mi be ko nɛ be ɔ nɛ.” Be nɛ a ngɛ Odasefo ɔmɛ yi mi wae ngɛ Soviet nɔ yemi ɔ sisi po ɔ, “a ya nɔ nɛ a ye mlaa nɔ. A kɛ anɔkuale yemi tsu ní wawɛɛ ngɛ ngmɔhi kɛ ní tsumi he kpahi a mi, nɛ a ti si kɛ wui Kɔmiunisi nɔ yemi ɔ.” A mwɔ amaniɛ bɔmi ɔ nya ke, mwɔnɛ ɔ hu, Yehowa Odasefohi a hemi kɛ yemi ɔ kɛ a ní peepee “puɛ we tue mi jɔmi nɛ ma ko ngɛ ɔ.”