NIHEWI KƐ YIHEWI BIƆ KE
Mɛni He Je Nɛ E Sa Nɛ Waa Ya Kpehi Nɛ A Peeɔ Ngɛ Matsɛ Yemi Asa a Nɔ ɔ?
Daa otsi ɔ, Yehowa Odasefohi kpeɔ si enyɔ ngɛ Matsɛ Yemi Asahi a nɔ nɛ a jaa Yehowa. Mɛni lɛ yaa nɔ ngɛ lejɛ ɔ, nɛ ke o ya lejɛ ɔ, kɛ o ma ná he se ha kɛɛ?
Mɛni lɛ yaa nɔ ngɛ Matsɛ Yemi Asa a nɔ?
Matsɛ Yemi Asa a nɔ ji he nɛ wa kaseɔ Baiblo ɔ ngɛ titli. Níhi nɛ wa kaseɔ ngɛ lejɛ ɔ maa ye bua mo konɛ:
o kase anɔkuale nɛ kɔɔ Mawu he ɔ.
o le nɔ́ he je nɛ níhi ngɛ nɔ yae kaa kikɛ ngɛ je ɔ mi ɔ.
o pee nɔmlɔ kpakpa.
o ná huɛmɛ kpakpahi.
Anɛ o le lo? A tsɛɛ hehi nɛ Yehowa Odasefohi buaa a he nya ngɛ ɔ ke Matsɛ Yemi Asa, ejakaa Mawu Matsɛ Yemi ɔ he ní ji nɔ́ titli nɛ wa kaseɔ ngɛ lejɛ ɔ.—Mateo 6:9, 10; 24:14; Luka 4:43.
Mɛni he je nɛ e sa nɛ o ya Matsɛ Yemi Asa a nɔ ɔ?
Níhi nɛ o ma ya nu ngɛ lejɛ ɔ maa ye bua mo. Baiblo mi sisi tomi mlaahi nɛ o maa kase ngɛ Yehowa Odasefohi a kpehi a sisi ɔ maa ye bua mo konɛ o “le ní.” (Abɛ 4:5) Enɛ ɔ tsɔɔ kaa Baiblo ɔ maa ye bua mo konɛ o mwɔ yi mi kpɔhi nɛ da ngɛ si himi mi. E maa ye bua mo nɛ o ma ná heto kɛ ha si himi ɔ mi sane bimi komɛ kaa:
Munyuyihi nɛ nyɛɛ se nɛ ɔmɛ ji munyuhi nɛ a tuɔ ngɛ kpehi nɛ wa peeɔ ɔmɛ a sisi ngɛ otsi ɔ nyagbe ɔ ekomɛ:
Mɛni He Je E Sa Kaa Baiblo ɔ Nɛ Tsɔɔ Mo Blɔ?
Jije O Ma Ná Yemi Kɛ Buami Kɛ Je Ngɛ Haomi Behi A Mi?
Nɔ́ Nɛ Mawu Matsɛ Yemi ɔ Ngɛ Pee Ha Wɔ Amlɔ Nɛ ɔ.
“Nɔ ko nɛ i kɛ lɛ yaa sukuu ba wa kpe ɔmɛ eko. E ba hi wa weku ɔ kasa nya, nɛ wa ha nɛ e hyɛ wa ní kasemi womi ɔmɛ mi. Pee se ɔ, e de mi kaa e bua jɔ bɔ nɛ a ngɛ sanehi bie nɛ nihi ngɛ hetohi hae ɔ he wawɛɛ. E de hu kaa a be womihi nɛ a kɛ kaseɔ ní ngɛ a sɔlemi ɔ mi kaa bɔ nɛ wa ngɛ ɔ.”—Brenda.
Anɛ o le lo? A he we sika ngɛ Matsɛ Yemi Asa a nɔ, nɛ a tsu we sika hulɔ ngɛ lejɛ ɔ.
Nihi nɛ o kɛ maa bɔ ngɛ lejɛ ɔ maa wo mo he wami. Baiblo ɔ tsɔɔ kaa yi mi tomi kake he je nɛ́ Kristofohi buaa a he nya ji kaa konɛ a ‘hi a sibi he wami woe.’ (Hebri Bi 10:24, 25) Ke o kɛ nihi nɛ a suɔ Mawu kɛ ni kpahi pe mɛ nitsɛmɛ a he ɔ bɔ ɔ, e ma ha nɛ o ná bua jɔmi wawɛɛ ngɛ je nɛ ɔ nɛ nihi foɔ mɛ pɛ a nɔ mi ngɛ mi ɔ mi.
“Behi fuu ɔ, i haoɔ nɛ pɔ tɔɔ ye he ngɛ ligbi ɔ mi, se ke i ya Matsɛ Yemi Asa a nɔ ɔ, nihi nɛ a ngɛ lejɛ ɔ haa nɛ ye nɔ gbagba teɔ. Ke wa kpa asafo mi kpe nɛ i yaa we mi ɔ, ye bua jɔɔ wawɛɛ, nɛ i náa he wami nɛ ma kɛ je ligbi kpa sisi.”—Elisa
Anɛ o le lo? Wa ngɛ Yehowa Odasefohi asafohi nɛ hiɛ pe 120,000 ngɛ je kɛ wɛ, nɛ a kpeɔ ngɛ hehi nɛ hiɛ pe 60,000. Daa jeha a, ke e hi kulaa a, wa maa Matsɛ Yemi Asa ehehi maa pee 1,500 akɛnɛ wa he ngɛ hiɛe ɔ he je.a
a Ke o suɔ nɛ o le he nɛ wa peeɔ wa kpe ɔmɛ eko ngɛ ɔ, yaa “Asafo Mi Kpehi Nɛ Yehowa Odasefohi Peeɔ” blɔ he ɔ, nɛ o nyɛ munyu nɛ ji, “Hla He Nɛ Kɛ O He Kɛ We” ɔ nɔ.