Mɛnɔ Aloo Mɛni Ji “Alfa a Kɛ Omega a”?

Nɔ́ nɛ Baiblo ɔ de

Yehowa Mawu Ope ɔ ji nɔ nɛ a tsɛɛ ke “Alfa a kɛ Omega a” nɛ. Munyu nɛ ɔ je kpo si etɛ ngɛ Baiblo ɔ mi.​—Kpo Jemi 1:8; 21:6; 22:13.a

Mɛni he je nɛ Mawu tsɛ e he ke “Alfa a kɛ Omega a”?

Alfa ji kekleekle okadi nɛ je Hela ningma okadi ɔmɛ a sisi, nɛ omega ji nɔ́ nɛ gbe ningma okadi ɔmɛ a nya. Lɔ ɔ ji gbi nɛ a kɛ ngma Baiblo ɔ fã nɛ a tsɛɛ ke Somi Ehe ɔ, nɛ́ Kpo Jemi womi ɔ hu piɛɛ he ɔ. A kɛ blɔ he nɛ́ ningma okadi nɛ ɔmɛ ngɛ ngɛ Hela ningma okadi ɔmɛ a kpɛti ɔ pee nɔ́ hyɛmi nɔ́ kɛ tsɔɔ kaa Yehowa pɛ ji sisije kɛ nyagbe. (Kpo Jemi 21:6) Lɛ ji Mawu Ope kɛ je blema lokoo, nɛ e maa hi si kaa Mawu Ope kɛ maa ya neneene. Lɛ pɛ ji “Mawu nɛ ngɛ kɛ je neneene kɛ yaa si neneene.”​—La 90:2.

Mɛnɔ ji “kekleekle ɔ kɛ sekpɛ ɔ”?

Baiblo ɔ kɛ biɛ nɛ ɔ tsɛɛɔ Yehowa Mawu kɛ e bi Yesu tsuo, se a hɛɛ sisi numi slɔɔtohi. Ha nɛ waa hyɛ nɔ́ hyɛmi nɔ́ enyɔ komɛ.

• Yehowa de ngɛ Yesaya 44:6 ke: “Imi ji kekleekle nɔ, kɛ sekpɛ nɔ. Ye se ɔ, Mawu kpa ko be hu.” Ngɛ kuku nɛ ɔ mi ɔ, Yehowa ngɛ tsɔɔe kaa lɛ pɛ ji anɔkuale Mawu nɛ e ngɛ kɛ yaa neneene; e se ɔ, Mawu kpa ko be hu. (5 Mose 4:​35, 39) Ngɛ enɛ ɔ blɔ fami ɔ, munyu nɛ ji “kekleekle ɔ kɛ sekpɛ ɔ” kɛ “Alfa a kɛ Omega a” hɛɛ sisi numi kake.

• Kɛ piɛɛ he ɔ, munyu nɛ ji “kekleekle ɔ [pro’tos, pi alfa] kɛ sekpɛ ɔ [e’skha·tos, pi omega]” a je kpo ngɛ Kpo Jemi 1:​17, 18 kɛ 2:8. Ngɛ ngmami nɛ ɔ mi ɔ, wa naa kaa nɔ nɛ a ngɛ e he munyu tue ngɛ hiɛ ɔ gbo nɛ e kpale ba wami mi ekohu. Enɛ ɔ he ɔ, ngmami nɛ ɔ be nyɛe maa da si kɛ ha Mawu, ejakaa e gbo we gblee. (Habakuk 1:​12) Se kɛ̃ ɔ, Yesu lɛɛ e gbo nɛ a tle lɛ si. (Ní Tsumi 3:​13-​15) Lɛ ji kekleekle nɔmlɔ nɛ a tle lɛ si nɛ e ná wami nɛ gbenɔ be mi ngɛ hiɔwe, lejɛ ɔ nɛ e ngɛ amlɔ nɛ ɔ kɛ “yaa neneene kɛ neneene.” (Kpo Jemi 1:18; Kolose Bi 1:18) Kɛ je jamɛ a be ɔ mi kɛ yaa a, Yesu lɛ ma tle nihi nɛ a gbo ɔ si kɛ ba wami mi ekohu. (Yohane 6:​40, 44) Enɛ ɔ he ɔ, Yesu ji sekpɛ nɔ nɛ Yehowa nitsɛ tle lɛ si kɛ je gbeje. (Ní Tsumi 10:40) Ngɛ enɛ ɔ hu mi ɔ, wa ma nyɛ ma tsɛ Yesu ke, “kekleekle ɔ kɛ sekpɛ ɔ.”

Anɛ Kpo Jemi 22:13 ɔ tsɔɔ kaa Yesu ji “Alfa a kɛ Omega a” lo?

Dɛbi. Nihi slɔɔtoslɔɔtohi lɛ a tu munyu ngɛ Kpo Jemi yi 22 ɔ mi ɔ nɛ, se a tsɔɔ we nɔ tutuutu nɛ tu munyu nɛ ngɛ kuku 13 ɔ mi ɔ. Nilelɔ kpanaa nɛ a tsɛɛ ke William Barclay ngma kɛ kɔ munyu nɛ ngɛ Kpo Jemi yi 22 ɔ he ke: “A ngmɛ́ munyuhi nɛ ngɛ mi ɔ nya tsɔɔ; . . . enɛ ɔ he ɔ, e yee kaa o maa le nɔ tutuutu nɛ ngɛ munyu ɔ tue ɔ.” (The Revelation of John, Volume 2, Revised Edition, page 223) Enɛ ɔ he ɔ, wa ma nyɛ ma de ke nɔ nɛ a tsɛɛ ke “Alfa a kɛ Omega a” ngɛ Kpo Jemi 22:13 ɔ mi ɔ nɔuu ji nɔ nɛ a kɛ biɛ nɛ ɔ tsɛ lɛ ngɛ Kpo Jemi womi ɔ mi ɔ he kpa komɛ ɔ nɛ​—lɛ ji Yehowa Mawu.