Nɔ́ Nɛ O Maa Pee Kɛ Tsɔɔ Kaa O Susuɔ Nɔ He

Benɛ be ngɛ mi pue ɔ, hunomɛ kɛ a yihi a ní peepee ma nyɛ maa tsɔɔ kaa a susu we a sibi a he hu. Ke o ngɛ he nue jã ngɛ o gba si himi ɔ mi ɔ, lɛɛ mɛni e sa kaa o pee ngɛ he?

• Nɔ́ nɛ e sa nɛ o le

• Nɔ́ nɛ o ma nyɛ maa pee

Nɔ́ nɛ e sa nɛ o le

Nɔ he susumi haa nɛ kake peemi hiɔ gba si himi mi. Kaa bɔ nɛ e he hia nɛ waa ye ní nɛ waa nu nyu be fɛɛ be konɛ wa ná nɔmlɔ tso mi he wami kpakpa a, jã kɛ̃ nɛ ke nɔ kɛ e yo jeɔ suɔmi kpo kɛ tsɔɔ a sibi be fɛɛ be ɔ, e haa nɛ gba si himi ɔ ngɔɔ nɛ kake peemi nɛ ngɛ a kpɛti ɔ hu mi waa. Ke nyumu kɛ yo sɛ gba si himi mi jehahi babauu po ɔ, e sa nɛ be fɛɛ be ɔ, nyumu ɔ nɛ ha nɛ yo ɔ nɛ le kaa e suɔ lɛ, nɛ e susuɔ e he. E sa nɛ yo ɔ hu nɛ pee jã nɔuu.

Suɔmi nitsɛnitsɛ fo we lɛ pɛ e nɔ́ mi. E suɔ nɛ ni kpahi a bua nɛ jɔ. Kaa nɔ hyɛmi nɔ́ ɔ, e sa nɛ nyumu kɛ e yo nɛ a yɔse níhi nɛ a sibi bua jɔ he nɛ a pee ha a sibi be fɛɛ be. E sɛ nɛ a mlɛ kɛ ya si benɛ a maa nu he kaa e sa nɛ a pee nɔ́ ko nɛ tsɔɔ kaa a susuɔ a sibi a he loko a pee.

Behi fuu ɔ, yihi suɔ nɛ a hunomɛ nɛ a pee níhi nɛ tsɔɔ kaa a susuɔ a he. Eko ɔ, nyumu ko suɔ e yo wawɛɛ, se ke e jeɔ jamɛ a suɔmi ɔ kpo ngɛ be pɔtɛɛ komɛ a mi, kaa mɔtu aloo gbɔkuɛ aloo ngɛ be nɛ e kɛ e yo ɔ ma ná bɔmi mi pɛ ɔ, eko ɔ, e yo ɔ be hee ye kaa e huno ɔ susuɔ e he niinɛ. E maa hi wawɛɛ kaa ngɛ ligbi ɔ mi tsuo ɔ, e maa pee níhi nɛ tsɔɔ kaa e susuɔ e yo ɔ he.

Nɔ́ nɛ o ma nyɛ maa pee

O munyu tutui nɛ tsɔɔ kaa o susuɔ o yo ɔ aloo o huno ɔ he. Ke o pɔɔ o huno aloo o yo de mi ke “I suɔ mo” aloo “O he jua wa ha mi” ɔ, lɔ ɔ ma ha nɛ e maa nu he kaa e he hia.

Baiblo sisi tomi mlaa: “Nɔ́ nɛ hyi tsui ɔ tɔ ɔ, lɔ ɔ nɛ nya deɔ.”​—Mateo 12:34.

Ga womi: Moo pee babauu pe o munyu tutui pɛ nɛ o kɛ maa tsɔɔ kaa o susuɔ o he piɛɛlɔ ɔ he. O ma nyɛ maa ngma ngɛ womi nɔ, aloo o ma nyɛ maa ngma ngɛ e-mail aloo ngɛ fon nɔ kɛ mane lɛ.

O ní peepee nɛ tsɔɔ kaa o susuɔ o yo ɔ aloo o huno ɔ he. O yo ɔ aloo o huno ɔ nɛ o maa fua, e nya he nɛ o ma fĩɔ, aloo e nine he kɛkɛ nɛ o maa pɛtɛ ke nyɛ ngɛ nyɛɛe ɔ ma ha nɛ e na kaa o suɔ lɛ niinɛ. Ke o yeɔ bua o yo aloo o huno kɛ peeɔ nɔ́, o hyɛɛ lɛ kɛ suɔmi hɛngmɛ aloo o keɔ lɛ nɔ́ ɔ, e maa na kaa o susuɔ e he nitsɛnitsɛ. O ma nyɛ maa hɛɛ baagihi, o bli sinya, o sa tsesihi a mi, o fɔ níhi a he, aloo o hoo ní kɛ ye bua o yo ɔ hulɔ. Ngɛ nihi fuu a blɔ fa mi ɔ, ní nɛ ɔmɛ a peemi pi yemi kɛ buami kɛkɛ, e tsɔɔ suɔmi!

Baiblo sisi tomi mlaa: “Nyɛ ko ha nɛ waa suɔ nɔmlɔ ngɛ munyu tutui mi aloo ngɛ lilɛ nɔ, mohu ɔ, ngɛ ní peepee . . . mi.”​—1 Yohane 3:18.

Ga womi: Susu o yo ɔ aloo o huno ɔ he kaa bɔ nɛ o susuɔ e he benɛ nyɛ ngɛ nyɛɛe nɛ nyɛ maa sɛ gba si himi mi ɔ.

Nyɛ ná be kɛ ha nyɛ sibi. Ke nyɛ ná be kɛ ha nyɛ sibi ɔ, e ma ha nɛ kake peemi nɛ ngɛ nyɛ kpɛti ɔ mi maa wa, nɛ o yo ɔ aloo o huno ɔ maa na kaa ke e ngɛ o kasa nya a, o bua jɔɔ. Ngɛ anɔkuale mi ɔ, ke nyɛ ngɛ bimɛ aloo ní tsumihi fuu ngɛ nyɛ kuɛ nɔ ɔ, e be hae nɛ nyɛ ná be kɛ ha nyɛ sibi. Se nyɛ ma nyɛ maa pee ní tsɔwitsɔwi komɛ, eko ɔ, nyɛ ma nyɛ ma gbɔle nyɛ kpɔmi kɛ bla aloo nyɛɛ nyɛɛ kɛ ya slaa si.

Baiblo sisi tomi mlaa: “Nyɛɛ le níhi nɛ a he hia wawɛɛ ɔ.”​—Filipi Bi 1:10.

Ga womi: Nyumu komɛ kɛ a yihi nɛ a be deka tsɔ ɔ toɔ be nɛ a jeɔ kpo gbɔkuɛ aloo otsi ɔ nyagbe.

Moo le níhi nɛ o yo ɔ aloo o huno ɔ suɔ. E slo nɔ́ nɛ nɔ fɛɛ nɔ suɔ nɛ a pee ha lɛ kɛ tsɔɔ kaa a susuɔ e he. Nyɛɛ kɛ nyɛ sibi nɛ sɛɛ ní konɛ nyɛɛ le nɔ́ nɛ nyɛ ti nɔ fɛɛ nɔ suɔ. Kɛkɛ ɔ, moo bɔ mɔde nɛ o pee jã kɛ ha o yo loo o huno ɔ. Mo kai kaa, ke nɔ kɛ e yo susuɔ a sibi a he ɔ, e haa nɛ kake peemi nɛ mi wa hiɔ a gba si himi ɔ mi.

Baiblo sisi tomi mlaa: “Suɔmi fo we lɛ pɛ e nɔ́ mi.”​—1 Korinto Bi 13:4, 5.

Ga womi: Koo nyɛ o yo ɔ aloo o huno ɔ nɔ kaa e suɔ mo. Mohu ɔ, mo bi o he ke, ‘Mɛni nɛ e sa nɛ ma pee konɛ ye yo ɔ aloo ye huno ɔ nɛ suɔ mi wawɛɛ?’