9. Mɛni blɔ tsɔɔmi Yehowa kɛ ha Mose, se mɛni mohu e pee? (Moo hyɛ foni nɛ ngɛ ní kasemi ɔ sisije ɔ.)

⁹ Kɛ Mose pee e ní ngɛ atuã tsɔmi nɛ ɔ he ha kɛɛ? E hyɛ Yehowa ekohu konɛ e tsɔɔ lɛ nɔ́ nɛ e pee. Se ngɛ si fɔfɔɛ nɛ ɔ mi ɔ, Yehowa de we Mose ke e ngɔ tso ɔ kɛ fia tɛ sa a. Yehowa de Mose ke e wo e tso ɔ nɛ e bua ni ɔmɛ a nya ngɛ tɛ sa a he, konɛ lɔ ɔ se ɔ, e tu munyu kɛ tsɔɔ tɛ sa a. (4 Mose 20:6-8) Se Mose tui munyu kɛ tsɔɔ tɛ sa a. Mohu ɔ, e kɛ abofu tu munyu kɛ tsɔɔ nihi nɛ a bua a he nya ngɛ lejɛ ɔ ke: “Nyɛ atuã tsɔli, nyɛɛ bu mi tue! Anɛ e he hia kaa wa je nyu ngɛ tɛ sa nɛ ɔ mi kɛ ha nyɛ lo?” Kɛkɛ nɛ e ngɔ e tso ɔ kɛ fia tɛ sa a, pi si kake, se si enyɔ.​—4 Mose 20:10, 11.

NƆ́ NƐ TSƆƆ KAA MOSE TSƆ ATUÃ

12. Mɛni ji nɔ́ kpa ko hu he je nɛ eko ɔ, Yehowa mi mi fu Mose kɛ Aaron?

¹² Eko ɔ, nɔ́ kpa ko hu he je nɛ Yehowa mi mi fu Mose kɛ Aaron ɔ nɛ. Mo kadi nɔ́ nɛ Mose de Israel bi ɔmɛ. E de mɛ ke: “Anɛ e he hia kaa wa je nyu ngɛ tɛ sa nɛ ɔ mi kɛ ha nyɛ lo?” Munyungu nɛ ji, “wa” nɛ Mose kɛ tsu ní ɔ ma nyɛ maa tsɔɔ e kɛ Aaron. Munyu nɛ ɔ nɛ Mose tu ɔ tsɔɔ kaa e bui Yehowa, nɔ nɛ e pee jamɛ a nyakpɛ ní ɔ. E ngɛ kaa nɔ́ nɛ munyu nɛ ngɛ La 106:32, 33 ɔ maa oti nɛ ɔ nɔ mi. E deɔ ke: ‘Ma a wo Yehowa mi mi la ngɛ Meriba nyu ɔ he. A kɛ Mose wo haomi mi ngɛ nɔ́ nɛ a pee ɔ he. Mose mi mi fu ma a wawɛɛ nitsɛ, nɛ e tu munyu basabasa.’c (4 Mose 27:14) Nɔ́ nɛ Mose pee ɔ wui Yehowa hɛ mi nyami. Yehowa de Mose kɛ Aaron ke: “Nyɛ ni enyɔ ɔmɛ nyɛ tsɔ atuã ngɔ wo mi.” (4 Mose 20:24) Hɛdɔ ngɛ yayami nɛ a pee ɔ he wawɛɛ!

13. Mɛni he je nɛ bɔ nɛ Yehowa gbla Mose tue ha a da a?

¹³ Akɛnɛ Mose kɛ Aaron ji hɛ mi nyɛɛli ngɛ Israel bi ɔmɛ a kpɛti he je ɔ, Yehowa hyɛ blɔ kaa a maa bu lɛ tue pe ni kpa amɛ. (Luka 12:48) Be ko ɔ, Israel bi ɔmɛ a kpɛti ni komɛ tsɔ atuã, nɛ Yehowa gbla a tue. E ha we nɛ a ya Kanaan zugba a nɔ. (4 Mose 14:26-30, 34) Enɛ ɔ he ɔ, e da blɔ kaa Yehowa gbla Mose tue kaa bɔ nɛ e gbla atuã tsɔli ɔmɛ a tue ɔ. Yehowa ngmɛ́ Mose hu blɔ nɛ e ya Si Womi Zugba a nɔ.