Baiblo ɔ ha nɛ wa na kaa adesa wami ngɛ ‘kpiti nɛ e mi haomi hiɛ babauu.’ (Hiob 14:1) Anɛ jã ji bɔ nɛ Mawu to e yi mi ngɛ adesahi a he lo? Ke pi jã ji Mawu yi mi tomi ɔ, lɛɛ mɛni ji e yi mi tomi ngɛ wa he mɔ? Anɛ e yi mi tomi ɔ maa ba mi lo? Moo hyɛ hetohi nɛ woɔ nɔ bua nɛ Baiblo ɔ kɛ ha a.

1. Mɛni si himi nɛ Yehowa suɔ kaa wa ná?

Yehowa suɔ kaa wa ná si himi kpakpa. Benɛ e bɔ Adam kɛ Hawa a, e kɛ mɛ wo paradeiso nɛ ngɛ fɛu nɛ́ a tsɛɛ ke Eden abɔɔ ɔ mi. Lɔ ɔ se ɔ, “Mawu gbaa mɛ nɛ e de mɛ ke, ‘Nyɛ fɔ babauu nɛ nyɛɛ hiɛ; nyɛ hyi zugba a nɔ tsuo, nɛ nyɛɛ ye zugba a tsuo nɔ.’” (1 Mose 1:28) Yehowa suɔ kaa a fɔ bimɛ nɛ a pee zugba a tsuo paradeiso, nɛ́ a hyɛ lohwe ɔmɛ a nɔ. E yi mi tomi ji kaa adesahi tsuo nɛ a ye mluku, nɛ́ a hi si kɛ ya neneene.

E ngɛ mi kaa níhi yɛ nɔ kaa bɔ nɛ Mawu to ɔ mohu lɛɛ,a se e yi mi tomi ɔ tsakee we. (Yesaya 46:10, 11) Loloolo ɔ, e suɔ kaa adesahi nɛ a buɔ lɛ tue ɔ nɛ a ná si himi kpakpa kɛ ya neneene.​—Kane Kpo Jemi 21:3, 4.

2. Mɛni blɔ nɔ wa maa gu kɛ ná bua jɔmi ngɛ si himi mi amlɔ nɛ ɔ?

Yehowa bɔ wɔ konɛ waa ngɔ wa hɛ kɛ fɔ e nɔ nɛ́ e tsɔɔ wɔ blɔ. Enɛ ɔ he je nɛ wa suɔ kaa wa maa le lɛ konɛ wa ja lɛ ɔ nɛ. (Kane Mateo 5:3-6.) E suɔ nɛ huɛ bɔmi gbagbanii nɛ hi waa kɛ lɛ wa kpɛti, ‘nɛ́ waa ye e mlaa amɛ tsuo a nɔ, nɛ waa suɔ lɛ,’ nɛ wa sɔmɔ lɛ “kɛ [wa] tsui tsuo.” (5 Mose 10:12; La 25:14) Ke wa peeɔ jã a, wa ma ná bua jɔmi ke waa kɛ nyagbahi ngɛ kpee po. Ke wa sɔmɔ Yehowa a, wa si himi maa pee kpakpa, nɛ wa maa le yi mi tomi nɛ ngɛ si himi he.

3. Yehowa suɔ nɛ adesahi nɛ a ná si himi kpakpa

Mo je VIDEO ɔ, nɛ nyɛ susu sane bimi nɛ ɔ he.

VIDEO: Mɛni He Je Nɛ Mawu Bɔ Zugba a?—Fã Ko (1:41)

• Mɛni he je nɛ Mawu bɔ zugba nɛ ngɛ fɛu nɛ ɔ?

Nyɛɛ kane Fiɛlɔ 3:11 ɔ, nɛ nyɛ susu sane bimi nɛ ɔ he:

• Mɛni nɛ ngmami nɛ ɔ tsɔɔ mo ngɛ Yehowa he?

4. Yehowa yi mi tomi ɔ tsakee we

Nyɛɛ kane La 37:11, 29 kɛ Yesaya 55:11 ɔ, nɛ nyɛ susu sane bimi nɛ ɔ he:

• Kɛ wa plɛ kɛ le kaa yi mi nɛ Yehowa to ngɛ adesahi a he ɔ tsakee we kɛɛ?

5. Ke wa sɔmɔ Yehowa a, wa si himi maa pee kpakpa

VIDEO: I Ba Na Yi Mi Tomi Nɛ Ngɛ Si Himi He (5:03)

• Benɛ Terumi kase yi mi tomi nɛ ngɛ si himi he ɔ, kɛ e ná he se ha kɛɛ?

Nyɛɛ kane Fiɛlɔ 12:13 ɔ, nɛ nyɛ susu sane bimi nɛ ɔ he:

• Mɛni wa maa pee kɛ tsɔɔ kaa wa bua jɔ níhi babauu nɛ Yehowa pee kɛ ha wɔ ɔ he?

NYA MWƆMI

Yehowa suɔ kaa wa ná si himi kpakpa, nɛ́ wa ná bua jɔmi kɛ ya neneene ngɛ zugba a nɔ. Ke wa sɔmɔ lɛ kɛ wa tsui tsuo ɔ, wa si himi maa pee kpakpa amlɔ nɛ ɔ po.

Mi Nylɔmi

• Sisije ɔ, mɛni ji Yehowa yi mi tomi kɛ ha Adam kɛ Hawa?

• Kɛ wa plɛ kɛ le kaa Mawu yi mi tomi kɛ ha adesahi ɔ tsakee we ha kɛɛ?

• Mɛni o maa pee konɛ o ná si himi kpakpa?

NÍ KPAHI NƐ MAA YE BUA MO

Moo kase nɔ́ he je nɛ wa ma nyɛ ma ná nɔ mi mami kaa Eden abɔɔ hi si niinɛ ɔ he ní.

“Eden Abɔɔ ɔ—E Hi Si Niinɛ Aloo E Ji Nyazia?” (Hwɔɔmi Mɔ, January 1, 2011)

Moo kane nɔ́ he je nɛ wa ma nyɛ ma ná nɔ mi mami kaa zugba a maa hi si kɛ ya neneene ɔ he ní.

“Anɛ A Ma Kpata Zugba a Hɛ Mi Lo?” (Munyu nɛ ɔ ngɛ Intanɛti ɔ nɔ)

Moo kane nɔ́ nɛ Baiblo ɔ de ngɛ blɔ nɔ nɛ o maa gu kɛ ná si himi kpakpa he ɔ he ní.

“Mɛni Yi Mi Tomi Lɛ Ngɛ Wami He?” (Munyu nɛ ɔ ngɛ Intanɛti ɔ nɔ)

Moo hyɛ bɔ nɛ nyumu ko nɛ e susu kaa e ngɛ nɔ́ fɛɛ nɔ́ ngɛ e si himi mi ɔ ba yɔse kaa nɔ́ ko ngɛ lɛ bɔe ha.

Amlɔ Nɛ ɔ Ye Si Himi Pee Kpakpa (3:55)

2. Mɛnɔmɛ nɛ a maa piɛɛ Yesu he kɛ ye Matsɛ?

Pi Yesu pɛ nɛ e maa ye nɔ ngɛ Mawu Matsɛ Yemi ɔ mi. Nihi nɛ a je ‘wɛtso fɛɛ wɛtso kɛ lilɛ kɛ nimli kɛ je ma amɛ a mi ɔ . . . maa ye zugba a nɔ kaa matsɛmɛ.’ (Kpo Jemi 5:9, 10) Nihi enyɛmɛ nɛ a maa piɛɛ Kristo he kɛ ye nɔ? Kɛ je benɛ Yesu ba zugba a nɔ nɛ e kpale kɛ ho hiɔwe ya a, nimli ayɔhi abɔ ba pee e se nyɛɛli. Se anɛ, nimli nɛ ɔmɛ tsuo maa piɛɛ Yesu he kɛ ye nɔ lo? Dɛbi. A kpɛti nihi 144,000 pɛ nɛ a ma ya piɛɛ e he ngɛ hiɔwe kɛ ye nɔ. (Kane Kpo Jemi 14:1-4.) Kristofohi nɛ a piɛ ɔ lɛɛ a maa pee Matsɛ Yemi ɔ sisi bimɛ ngɛ zugba a nɔ.​—La 37:29.

Amlɔ nɛ ɔ, Mawu Matsɛ Yemi ɔ ngɛ nɔ yee ngɛ hiɔwe. E be kɛe nɛ́ e maa ye zugba a nɔ, nɛ e ma ha nɛ si himi ngɛ zugba a nɔ ɔ maa pee kpakpa. Ha nɛ waa hyɛ ní komɛ nɛ Matsɛ Yemi ɔ ma tsu.

1. Ngɛ mɛni blɔ nɔ nɛ Mawu Matsɛ Yemi ɔ ma ha nɛ tue mi jɔmi kɛ dami sane yemi maa ba zugba a nɔ?

Yesu nɛ e ji Mawu Matsɛ Yemi ɔ nya Matsɛ ɔ ma kpata yiwutsotsɛmɛ, kɛ adesa nɔ yemihi tsuo a hɛ mi ngɛ Harmagedon ta a mi. (Kpo Jemi 16:14, 16) Jamɛ a be ɔ mi ɔ, Baiblo ɔ mi si womi nɛ nyɛɛ se nɛ ɔ maa ba mi. Lɔ ɔ ji: “E piɛ bɔɔ nɛ o be yayami peeli nae hu.” (La 37:10) Yesu maa gu Matsɛ Yemi nɛ ɔ nɔ kɛ ha nɛ tue mi jɔmi kɛ dami sane yemi nɛ hi zugba a nɔ he fɛɛ he.​—Kane Yesaya 11:4.

2. Ke a ngɛ Mawu suɔmi nya ní pee ngɛ zugba a nɔ ɔ, kɛ si himi ɔ maa hi ha kɛɛ?

Ngɛ Mawu Matsɛ Yemi ɔ sisi ɔ, “nihi nɛ peeɔ nɔ́ nɛ da a, zugba a maa pee a nɔ́ nɛ a maa hi nɔ daa.” (La 37:29) Moo po he foni kaa o ngɛ je ko nɛ nihi tsuo peeɔ nɔ́ nɛ da, nɛ́ a suɔ Yehowa kɛ a sibi ɔ mi! Nɔ ko nɔ ko be hiɔ nue hu, nɛ nɔ fɛɛ nɔ maa hi si kɛ maa ya neneene.

3. Ke a kpata yayami peeli a hɛ mi se ɔ, mɛni Mawu Matsɛ Yemi ɔ ma tsu?

Ke a kpata yayami peeli a hɛ mi se ɔ, Yesu maa ye nɔ kaa Matsɛ jeha 1,000. Jamɛ a be ɔ mi ɔ, Yesu kɛ nihi 144,000 nɛ a maa piɛɛ e he kɛ ye nɔ ɔ maa ye bua nihi nɛ a ngɛ zugba a nɔ ɔ konɛ a pee nihi nɛ a ye mluku nɛ yayami ko be a he. Ngɛ jeha akpe ɔ nyagbe ɔ, zugba a maa pee paradeiso, nɛ nihi nɛ a ngɛ zugba a nɔ ɔ a bua maa jɔ ejakaa a ngɛ Yehowa mlaa amɛ a nɔ yee. Lɔ ɔ se ɔ, Yesu maa ngɔ Matsɛ Yemi ɔ kɛ ha Yehowa nɛ ji e Tsɛ ɔ ekohu. A ma “tsɔ” Yehowa “biɛ ɔ he” ngɛ blɔ nɛ pe kulaa nɔ. (Mateo 6:9, 10) Jamɛ a be ɔ mi ɔ, e maa pee heii kaa Yehowa ji Nɔ Yelɔ kpakpa nɛ́ e susuɔ e sisi bimɛ a he. Lɔ ɔ se ɔ, Yehowa ma kpata Satan, daimonio ɔmɛ, kɛ nihi tsuo nɛ a teɔ si kɛ woɔ Yehowa nɔ yemi ɔ a hɛ mi. (Kpo Jemi 20:7-10) Si himi kpakpa nɛ Mawu Matsɛ Yemi ɔ maa ngɔ kɛ ba a maa hi si kɛ maa ya neneene.

MOO KASE BABAUU

4. Mawu ma ha nɛ adesahi a nɔ yemihi tsuo se maa po

Baiblo ɔ tsɔɔ kaa: ‘Ni komɛ ngɔɔ blɔ nya nɛ a ná a kɛ yeɔ a nyɛmimɛ awi.’ (Fiɛlɔ 8:9) Yehowa maa gu e Matsɛ Yemi ɔ nɔ kɛ ma ha nɛ dami sane nɛ a yi nɛ ɔ se maa po.

Nyɛɛ kane Daniel 2:44 kɛ 2 Tɛsalonika Bi 1:6-8 ɔ, nɛ nyɛ susu sane bimihi nɛ nyɛɛ se nɛ ɔmɛ a he:

• Mɛni nɛ Yehowa kɛ e Bi Yesu maa pee adesa nɔ yeli kɛ nihi tsuo nɛ a fĩɔ a se ɔ?

• Kɛ nɔ́ nɛ o kase ngɛ Yehowa kɛ Yesu he ɔ ha nɛ o na kaa a maa ye dami sane ngɛ nɔ́ nɛ a maa pee ɔ mi ha kɛɛ?

5. Yesu ji Matsɛ nɛ se be

Yesu nɛ e ji Mawu Matsɛ Yemi ɔ nya Matsɛ ɔ maa pee níhi fuu kɛ ha nihi nɛ a maa hi zugba a nɔ ɔ. Mo je VIDEO ɔ, nɛ o hyɛ bɔ nɛ níhi nɛ Yesu pee ɔ tsɔɔ kaa e suɔ nɛ e ye bua nihi ha. Jehanɛ se hu ɔ, o maa na kaa Mawu ha lɛ he wami konɛ e kɛ pee jã.

VIDEO: Yesu Tsɔɔ Níhi Nɛ Mawu Matsɛ Yemi ɔ Maa Pee (1:13)

Níhi nɛ Yesu pee benɛ e ngɛ zugba a nɔ ɔ tsɔɔ níhi nɛ Matsɛ Yemi ɔ ma tsu hwɔɔ se. Jɔɔmihi nɛ nyɛɛ se nɛ ɔmɛ a kpɛti te nɛɛ lɛ o ngɛ blɔ hyɛe wawɛɛ? Nyɛɛ kane ngmamihi nɛ a tsɛ se nɛ́ a tu jɔɔmi nɛ ɔmɛ a he munyu ngɛ mi ɔ.

6. Mawu Matsɛ Yemi ɔ maa ngɔ si himi kpakpa kɛ ba hwɔɔ se

VIDEO: Níhi Nɛ Maa Ba Hwɔɔ Se ɔ A He Nɔ Hyɛmi Nɔ́ (4:38)

Nyɛɛ kane La 37:4 ɔ, nɛ nyɛ susu sane bimi nɛ ɔ he:

• Kɛ lemi nɛ o ba le kaa Yehowa “ma ha mo níhi nɛ o tsui suɔ” ɔ haa nɛ o nuɔ he ha kɛɛ?

NYA MWƆMI

Mawu Matsɛ Yemi ɔ ma ha nɛ Mawu yi mi tomi ɔmɛ maa ba mi. E ma ha nɛ zugba a maa pee paradeiso, nɛ nihi nɛ a ma sɔmɔ Yehowa a maa hi nɔ kɛ maa ya neneene.

Mi Nylɔmi

• Mɛni blɔ nɔ Mawu Matsɛ Yemi ɔ maa gu kɛ ha nɛ Yehowa biɛ ɔ he nɛ tsɔ?

• Mɛni he je nɛ wa ma nyɛ ma he ye kaa Mawu Matsɛ Yemi ɔ ma ha nɛ si womihi nɛ ngɛ Baiblo ɔ mi ɔ maa ba mi ɔ?

• Ní kpakpahi nɛ Mawu Matsɛ Yemi ɔ ma tsu ɔ, a kpɛti te nɛɛ nɛ o ngɛ blɔ hyɛe wawɛɛ?

NÍ KPAHI NƐ MAA YE BUA MO

Moo hyɛ nɔ́ nɛ Harmagedon tsɔɔ.

“Mɛni Ji Harmagedon Ta a?” (Munyu nɛ ɔ ngɛ Intanɛti ɔ nɔ)

Moo hyɛ níhi nɛ maa ya nɔ ngɛ “amanehlu ngua“ a nɛ Yesu tu he munyu ɔ mi.—Mateo 24:21.

“Mɛni Ji Amanehlu Ngua a?” (Munyu nɛ ɔ ngɛ Intanɛti ɔ nɔ)

Moo hyɛ bɔ nɛ wekuhi ma nyɛ ma bla kɛ susu jɔɔmihi nɛ Mawu Matsɛ Yemi ɔ kɛ maa ba hwɔɔ se ɔ he ha.

Moo Po He Foni Kaa O Ngɛ Paradeiso ɔ Mi (1:50)

Moo kane munyu nɛ e yi ji, “I Bi Ye He Sanehi Fuu” ɔ, nɛ o hyɛ bɔ nɛ nyumu ko nɛ e tsɔɔ atuã kɛ siɔ ma kudɔmi blɔ nya tomihi ɔ na nɔ́ nɛ e ngɛ hlae ɔ.

“Baiblo ɔ Tsakeɔ Nihi A Si Himi” (Hwɔɔmi Mɔ, January 1, 2012)