• Bɔ Nɛ O Ma Ná Baiblo ɔ He Se Kɛ Pi Si Ha
    O Ma Nyɛ Ma Ná Bua Jɔmi Kɛ Ya Neneene!—Moo Kase Baiblo ɔ Nɛ O Ná He Se
    • Ní Kasemi 11. Yo ko nɛ e ngɛ Baiblo ɔ kanee benɛ e tsu we mi ní bɔɔ nɛ́ e ngɛ e he mi jɔɔe ɔ.

      NÍ KASEMI 11

      Bɔ Nɛ O Ma Ná Baiblo ɔ He Se Kɛ Pi Si Ha

      Anɛ e ba hyɛ ngɛ o blɔ fa mi kaa o suɔ nɛ o je nɔ́ ngua ko peemi sisi, se o nu he kaa e peemi maa ye lo? Eko ɔ, bɔ nɛ pee nɛ e peemi nɛ ko ye ha mo ɔ, o pee lɛ bɔɔbɔɔbɔɔ. Jã pɛpɛɛpɛ nɛ e ji ngɛ Baiblo ɔ kanemi blɔ fa mi. Eko ɔ, o ma bi o he ke, ‘Jije ma je sisi kɛ je?’ Ngɛ ní kasemi nɛ ɔ mi ɔ, wa ma susu ní komɛ nɛ o ma nyɛ maa pee konɛ Baiblo ɔ kanemi kɛ e kasemi nɛ ko ye ha mo ɔ he.

      1. Mɛni he je nɛ e sa nɛ waa kane Baiblo ɔ daa ligbi ɔ?

      Ke nɔ ko kaneɔ Baiblo ɔ, aloo ‘Yehowa mlaa a’ daa ligbi ɔ, e bua maa jɔ, nɛ e maa ye manye hulɔ. (Kane La 1:1-3.) Sisije ɔ, o ma nyɛ maa ngɔ hɛngmɛfia bɔɔ pɛ kɛ kane Baiblo ɔ daa ligbi. Ke o bɔni ní komɛ lemi ngɛ Mawu Munyu ɔ mi ɔ, lɔ ɔ ma ha nɛ o bua ma ba jɔ Baiblo ɔ kanemi he wawɛɛ.

      2. Mɛni maa ye bua mo konɛ o ná Baiblo ɔ kanemi he se?

      Bɔ nɛ pee nɛ o ná Baiblo ɔ kanemi he se ɔ, e sa nɛ o ná tsui, nɛ o “susu” nɔ́ nɛ o ngɛ kanee ɔ he. (Yoshua 1:8) Ke o ngɛ Baiblo ɔ kanee ɔ, mo bi o he ke: ‘Mɛni enɛ ɔ tsɔɔ mi ngɛ Yehowa he? Kɛ i kɛ enɛ ɔ ma tsu ní ngɛ ye si himi mi ha kɛɛ? Kɛ i kɛ ngmami nɛ ɔ maa ye bua ni kpahi ha kɛɛ?’

      3. Mɛni o ma nyɛ maa pee konɛ o ná be kɛ kane Baiblo ɔ?

      Anɛ e he waa kɛ haa mo kaa o ma ná be kɛ kane Baiblo ɔ lo? E be gbɔjɔɔ kɛ ha wa kpɛti ni komɛ hulɔ. Se moo bɔ mɔde nɛ o kɛ o “be nɛ tsu ní ngɛ blɔ nɛ hi pe kulaa nɔ.” (Efeso Bi 5:16) O ma nyɛ maa pee jã ke o to be pɔtɛɛ ko nɛ o kɛ maa kane Baiblo ɔ daa ligbi. Ni komɛ kaneɔ Baiblo ɔ mɔtu mla. Ni komɛ hu peeɔ jã piani, eko ɔ, ke a ngɛ a he jɔɔe. Jehanɛ se hu ɔ, ni komɛ peeɔ jã gbɔkuɛ ke a yaa hwɔ si. Mɛni be lɛ maa hi ha mo?

      MOO KASE BABAUU

      Moo kase blɔ nɔ nɛ o maa gu konɛ o bua nɛ jɔ Baiblo ɔ kanemi he, nɛ o hyɛ bɔ nɛ o ma plɛ kɛ dla o he saminya ha konɛ o ná Baiblo ɔ nɛ o ngɛ kasee ɔ he se.

      Foni Ɔmɛ: Jokuɛ nyumuyo ko nɛ e ngɛ niye ní ko nɛ e yi hyɛ ɔ yee ngɛ be slɔɔtohi a mi. 1. E kɛ niye ní ɔ ngɛ fiɛe. 2. Benɛ e wa bɔɔ ɔ, e bɔni niye ní ɔ yemi. 3. Benɛ e wa saii ɔ, e bua ba jɔ niye ní ɔ he.

      Wa bua ma nyɛ maa jɔ Baiblo ɔ kanemi he, kaa bɔ nɛ wa bua ma nyɛ maa jɔ niye ní komɛ nɛ wa yi gblee he ɔ

      4. Moo hyɛ nɔ́ nɛ o ma nyɛ maa pee konɛ o bua nɛ jɔ Baiblo ɔ kanemi he

      Eko ɔ, e he maa wa ha mo kaa o maa je Baiblo ɔ kanemi sisi. Se kɛ̃ ɔ, o bua ma nyɛ ma ba jɔ Baiblo ɔ kanemi he kaa bɔ nɛ o bua ma nyɛ maa jɔ niye ní ko nɛ o yi hyɛ he ɔ. Nyɛɛ kane 1 Petro 2:2, nɛ nyɛ susu sane bimi nɛ ɔ he:

      • Anɛ o susu kaa ke o kaneɔ Baiblo ɔ daa ligbi ɔ, lɔ ɔ be hae nɛ o bua nɛ jɔ e kanemi he, nɛ́ o kane be fɛɛ be lo?

      Mo je Video ɔ, nɛ nyɛɛ hyɛ bɔ nɛ ni komɛ a bua ba jɔ Baiblo ɔ kanemi he ha. Lɔ ɔ se ɔ, nyɛ susu sane bimihi nɛ nyɛɛ se nɛ ɔmɛ a he.

      VIDEO: Nihewi kɛ Yihewi Ngɛ Mɔde Bɔe Kaa A Maa Kase Baiblo ɔ (5:33)

      • Mɛni nyagbahi nɛ nihewi kɛ yihewi nɛ a ngɛ video ɔ mi ɔ ye a nɔ?

      • Mɛni yeɔ bua mɛ nɛ a nyɛɔ nɛ a kaneɔ Baiblo ɔ daa ligbi?

      • Mɛni ji ní komɛ nɛ a pee konɛ a bua nɛ jɔ Baiblo ɔ kanemi he?

      Ga womihi nɛ maa ye bua mo konɛ o nyɛ nɛ o je Baiblo ɔ kanemi sisi:

      • Moo hla Baiblo sisi tsɔɔmi nɛ e da, nɛ e sisi numi yi. O ma nyɛ maa kane New World Translation ɔ, aloo e fã nɛ a pee ngɛ Dangme mi ɔ.

      • Moo je e kanemi sisi kɛ je hehi nɛ o bua jɔ a he wawɛɛ ɔ. Moo hyɛ ní komɛ nɛ maa ye bua mo ngɛ daka nɛ ji “Moo Je Baiblo ɔ Kanemi Sisi” ɔ mi.

      • Mo kadi he nɛ o kane kɛ su ɔ kɛ fɔ si. Daka nɛ ji “Kadi He Nɛ O Kane Baiblo ɔ Kɛ Su” nɛ ngɛ womi nɛ ɔ mi ɔ maa ye bua mo.

      • Moo ngɔ JW Library® app ɔ kɛ tsu ní. O ma nyɛ maa kane Baiblo ɔ, aloo o bu tue ngɛ JW Library app ɔ nɔ ngɛ o fon loo kɔmpiuta nɔ ngɛ he fɛɛ he.

      • Mawu Munyu ɔ Kasemi Womi ɔ maa ye bua mo. O maa na zugba he fonihi, kɛ dakahi nɛ maa ye bua mo konɛ o bua nɛ jɔ Baiblo ɔ kanemi he.

      5. Moo sɛ hlami nɛ o dla o he kɛ ha Baiblo ɔ kasemi

      Nyɛɛ kane La 119:34, nɛ nyɛ susu sane bimi nɛ ɔ he:

      • Mɛni he je nɛ ke o maa kane Baiblo ɔ, aloo o ma dla o he kɛ ha Baiblo ɔ kasemi ɔ, e sa nɛ o sɔle kekle ɔ?

      Mɛni o maa pee konɛ o ná ní kasemi ɔ eko fɛɛ eko he se kɛ pi si? Be fɛɛ be nɛ o ma dla o he kɛ ha ní kasemi ɔ, moo ngɔ ga womihi nɛ nyɛɛ se nɛ ɔmɛ kɛ tsu ní:

      1. A. Moo kane ní kasemi ɔ kekleekle fã a.

      2. B. Moo kane ngmamihi nɛ a kadi mɛ kaa nyɛɛ kane ɔmɛ, nɛ o hyɛ bɔ nɛ a kɔɔ ní kasemi ɔ he ha.

      3. D. Moo po munyuhi nɛ a ha sane bimi ɔmɛ a heto ɔ sisi. Jã nɛ o maa pee ɔ maa ye bua mo konɛ o kɛ nɔ nɛ e kɛ mo kaseɔ ní ɔ nɛ susu ní kasemi ɔ he saminya.

      Foni Ɔmɛ: Yo ko nɛ e ngɛ e he dlae loko a kɛ lɛ nɛ ba kase Baiblo ɔ. A. E kane ní kasemi ɔ kekleekle fã a. B. E ngɛ ngmamihi nɛ a kadi mɛ kaa a kane ɔ kanee ngɛ Baiblo ɔ mi. D. E poo munyu titlihi nɛ ngɛ ní kasemi ɔ mi ɔ a sisi.

      Anɛ o le lo?

      Yehowa Odasefohi kɛ Baiblo sisi tsɔɔmi slɔɔtohi tsu ní. Se wa bua jɔ New World Translation of the Holy Scriptures ɔ he wawɛɛ, ejakaa e da, e sisi numi yi, nɛ Mawu biɛ ɔ hu je kpo ngɛ mi.​—Hyɛ munyu nɛ ji “Anɛ Yehowa Odasefohi Ngɛ Mɛ Nitsɛmɛ A Baiblo Lo?” nɛ ngɛ Intanɛti ɔ nɔ ɔ.

      NI KOMƐ DEƆ KE: “Baiblo ɔ kasemi yee. I be deka nɛ ma kɛ kase, aloo pɔ tɔ ye he.”

      • Kɛ o susu kɛɛ?

      NYA MWƆMI

      Ke o suɔ nɛ o ná Baiblo ɔ he se wawɛɛ ɔ, moo to be kɛ kane, moo sɔle konɛ o nu nɔ́ nɛ o ngɛ kanee ɔ sisi, nɛ o sɛ hlami nɛ o dla o he loko e su be nɛ a kɛ mo ma ba kase ní ɔ.

      Mi Nylɔmi

      • Mɛni lɛ maa ye bua mo konɛ o ná Baiblo ɔ kasemi he se?

      • Mɛni be pɔtɛɛ lɛ o ma nyɛ maa to kɛ ha o he konɛ o kɛ hi Baiblo ɔ kanee aloo o kɛ hi kasee?

      • Mɛni he je nɛ se nami ngɛ he kaa o maa sɛ hlami nɛ o dla o he loko ní kasemi be ɔ nɛ su ɔ?

      Nɔ́ Nɛ O Ma Tsu He Ní

      NÍ KPAHI NƐ MAA YE BUA MO

      Moo hyɛ ga womi komɛ nɛ maa ye bua mo konɛ o ná Baiblo ɔ kanemi he se.

      “Bɔ Nɛ O Ma Plɛ Kɛ Ná Baiblo ɔ Kanemi He Se Ha” (Hwɔɔmi Mɔ No. 1 2017)

      Moo kase blɔ etɛ nɛ o ma nyɛ maa gu nɔ kɛ kane Baiblo ɔ.

      “Bɔ Nɛ Baiblo ɔ Ma Nyɛ Maa Ye Bua Mo Ha​—Fã 1: Moo Kane Baiblo ɔ” (Munyu nɛ ɔ ngɛ Intanɛti ɔ nɔ)

      Moo hyɛ bɔ nɛ o bua ma nyɛ maa jɔ Baiblo ɔ kanemi he ha.

      “Bɔ Nɛ Baiblo ɔ Ma Nyɛ Maa Ye Bua Mo Ha​—Fã 2: Mɛni Ma Pee Konɛ Ye Bua Nɛ Jɔ Baiblo ɔ Kanemi He?” (Munyu nɛ ɔ ngɛ Intanɛti ɔ nɔ)

      Ga womihi nɛ je nihi nɛ a kane Baiblo ɔ jehahi babauu ɔ a ngɔ nɛ maa ye bua mo.

      Dɛ He Ní Kasemi Nɛ Nuu Tso (2:06)

  • Yaa Nɔ Nɛ O Hɛ Kɛ Su Yehowa He
    O Ma Nyɛ Ma Ná Bua Jɔmi Kɛ Ya Neneene!—Moo Kase Baiblo ɔ Nɛ O Ná He Se

    • 4. Yaa nɔ nɛ o kɛ o Huɛ Yehowa nɛ sɛɛ ní

      Sɔlemi nɛ o sɔleɔ kɛ Baiblo ɔ nɛ o kaseɔ ɔ ye bua mo nɛ o ba pee Yehowa huɛ. Kɛ ní enyɔ nɛ ɔmɛ nɛ o maa ya nɔ maa pee ɔ maa ye bua mo konɛ o hɛ kɛ su Yehowa he wawɛɛ ha kɛɛ?

      Nyɛɛ kane Kɔmɔ Yemi 2:​19, nɛ́ nyɛ susu sane bimi nɛ ɔ he:

      • Bɔ nɛ pee nɛ huɛ bɔmi nɛ ngɛ o kɛ Yehowa nyɛ kpɛti ɔ mi nɛ wa a, kɛ e sa nɛ sɔlemi nɛ o sɔleɔ ɔ nɛ hi ha kɛɛ?

      Nyɛɛ kane La 1:​2, nɛ́ nyɛ susu sane bimi nɛ ɔ he:

      • Mɛni o maa pee konɛ o ná o Baiblo kanemi ɔ he se wawɛɛ konɛ huɛ bɔmi nɛ ngɛ o kɛ Yehowa nyɛ kpɛti ɔ mi nɛ wa?

      Mɛni o ma nyɛ maa pee konɛ o dɛ he ní kasemi nɛ nu tso saminya? Mo je VIDEO ɔ, nɛ́ o hyɛ ní komɛ nɛ maa ye bua mo. Lɔ ɔ se ɔ, nyɛ susu sane bimihi nɛ nyɛɛ se nɛ ɔmɛ a he.

      VIDEO: Ha O Dɛ He Ní Kasemi Nɛ Nu Tso (5:22)

      • Ga womihi nɛ a kɛ ha ngɛ video ɔ mi ɔ te nɛɛ nɛ o suɔ kaa o kɛ ma tsu ní?

      • Mɛni munyuyihi lɛ o suɔ kaa o maa kase a he ní?