² Baiblo ɔ tu anɔkuale munyu ko nɛ atsinyɛ jemi be he ke: “Nɔ nɛ kɛ ní leli nyɛɛɔ ɔ, e leɔ ní. Se nɔ nɛ kɛ kuasiahi bɔɔ ɔ, haomi lɛ baa e nɔ.” (Abɛ 13:20) Pi nɔ ko nɛ a leɔ kɛkɛ he munyu nɛ Abɛ womi ɔ ngɛ tue. Munyu nɛ ji “nyɛɛɔ” ɔ, tsɔɔ huɛ bɔmi.a Baiblo mi munyuhi a sisi tsɔɔmi womi ko tu kuku nɛ ɔ he munyu ke: “Ke o kɛ nɔ ko nyɛɛɔ ɔ, e tsɔɔ kaa o suɔ nɔ ɔ nɛ o mɛtɛ e he.” Anɛ o kplɛɛ we nɔ kaa wa kaseɔ nihi nɛ wa suɔ mɛ ɔ lo? Niinɛ, akɛnɛ waa kɛ wa he mɛtɛɛ nihi nɛ wa suɔ mɛ ɔ a he he je ɔ, a ma nyɛ ma tsake wa su konɛ waa pee nɔ́ kpakpa aloo nɔ́ yayami.