Yesu gba e kaseli ɔmɛ enyɔɔnyɔ nɛ e tsɔɔ mɛ bɔ nɛ a ma tsu fiɛɛmi ní tsumi ɔ ha. Se pi lɔ ɔ pɛ nɛ e tsɔɔ mɛ. Akɛnɛ e le kaa a kɛ si temi kɛ womi maa kpe he je ɔ, e de mɛ ke: ‘Hyɛ i ngɛ nyɛ tsɔe kaa jijɔhi kɛ yaa ogbeteehi a kpɛti. Nyɛ hɛ nɛ hi nyɛ he nɔ; ejakaa nihi maa nuu nyɛ, nɛ a maa kojo nyɛ, nɛ a maa fiaa nyɛ kpa ngɛ kpe he ɔmɛ. Ye he ɔ, a maa ngɔ nyɛ kɛ ya ganɔhi, kɛ matsɛmɛ a hɛ mi.’​​—Mateo 10:16-18.

Blɔ tsɔɔmi, kɛ he wami womi, kɛ kɔkɔ bɔmi nɛ sa nɛ Yesu kɛ ha kaseli 12 ɔmɛ ɔ maa ye bua mɛ nitsɛ! Se nihi nɛ a maa pee Yesu kaseli ngɛ e gbenɔ kɛ e si temi se ɔ tsuo ma ná blɔ tsɔɔmi nɛ ɔmɛ a he se wawɛɛ. Wa naa enɛ ɔ ngɛ nɔ́ nɛ Yesu de kɛ tsa nɔ ɔ mi. E de ke: “Nihi tsuo maa nyɛ nyɛ.” Enɛ ɔ tsɔɔ kaa pi nihi nɛ a maa fiɛɛ kɛ ha a pɛ nɛ a maa nyɛ mɛ. Jehanɛ hu ɔ, wa nɛ́ ngɛ Baiblo ɔ mi he ko kaa benɛ kaseli ɔmɛ ngɛ fiɛɛe ngɛ Galilea a, a ngɔ mɛ kɛ ya da ganɔhi kɛ matsɛmɛ a hɛ mi, aloo kaa a ti ni komɛ a weku li je mɛ kɛ ha kaa a gbe mɛ.

Atsinyɛ jemi ko be he kaa benɛ Yesu kɛ e bɔfo 12 ɔmɛ ngɛ munyu nɛ ɔ tue ɔ, e susu nihi nɛ a ma tsu fiɛɛmi ní tsumi ɔ hwɔɔ se ɔ hu a he. Mo susu nɔ́ nɛ e de kaa e kaseli ɔmɛ be fiɛɛmi ní tsumi ɔ nya gbee loko “Nɔmlɔ Bi ɔ maa ba” a he nɛ o hyɛ. Yesu ngɛ tsɔɔe kaa e kaseli ɔmɛ be Matsɛ Yemi ɔ he sane kpakpa a fiɛɛmi nya gbee loko e maa ba kaa kojolɔ nɛ Mawu hla.