9. Mɛni hemi kɛ yemi nɛ dɛ nihi hɛɛ ngɛ abolo ɔ nɛ Yesu kɛ tsu ní ɔ he?

⁹ Sɔlemi yali komɛ tsɔɔ kaa akɛnɛ Yesu de ke: “Enɛ ɔ ji ye nɔmlɔtso” ɔ heje ɔ, a he ye kaa abolo ɔ tsake ngɛ nyakpɛ blɔ nɔ kɛ pee Yesu helo nitsɛnitsɛ. Se pi jã ji sane ɔ.a Yesu nɔmlɔtso ɔ kɛ abolo nɛ masa be mi ɔ tsuo ngɛ, nɛ e bɔfo anɔkualetsɛmɛ ɔmɛ na. Lɔɔ he ɔ, e ngɛ heii kaa Yesu ngɔ níhi kɛ ngɛ níhi a he toe kaa bɔnɛ e pɔɔ peemi ɔ.—Yoh. 2:19-21; 4:13, 14; 10:7; 15:1.

10. Abolo nɛ a kɛ yeɔ Nyɔmtsɛ ɔ Gbɔkuɛ Niye Ní ɔ daa si kɛ ha mɛni?

¹⁰ Abolo ɔ nɛ bɔfo ɔmɛ na kɛ a hɛngmɛ nɛ a ye ɔ daa si kɛ ha Yesu nɔmlɔtso ɔ. Be ko nɛ be ɔ, anɔkuale Kristofoli susu kaa abolo ɔ daa si kɛ ha Kristofoli nɛ a pɔ mɛ nu ɔ. Baiblo ɔ tsɛɛ mɛ ke “Kristo nɔmlɔtso.” A susu jã, ejakaa Yesu ku abolo ɔ mi fuu, se lɛɛ lɛɛ a ku we e wu ko mi. (Efe. 4:12; Rom. 12:4, 5; 1 Kor. 10:16, 17; 12:27) Se pee se ɔ, a ba nu sisi kaa abolo ɔ daa si kɛ ha Yesu nɔmlɔtso ɔ nitsɛnitsɛ. Behi fuu ɔ, Ngmami ɔ tsɔɔ bɔnɛ Yesu “na nɔ́ ngɛ helo mi” ha. A sɛu lɛ. Enɛ ɔ he ɔ, abolo nɛ a kɛ ye Nyɔmtsɛ ɔ Gbɔkuɛ Niye Ní ɔ daa si kɛ ha Yesu nɔmlɔtso nitsɛnitsɛ nɛ e kɛ “tloo wa he yayami ɔmɛ” ɔ. —1 Pet. 2:21-24; 4:1; Yoh. 19:33-36; Heb. 10:5-7.

15, 16. Ke a ngɛ Nyɔmtsɛ ɔ Gbɔkuɛ Niye Ní ɔ yee ɔ, mɛni a kɛ abolo ɔ peeɔ?

¹⁵ Ke munyu tulɔ ɔ kɛ e munyu ɔ ma nyagbe ɔ, e maa tsɔɔ kaa be su nɛ wa maa pee nɔ́ nɛ Yesu pee benɛ e kɛ e bɔfo ɔmɛ ye Nyɔmtsɛ ɔ Gbɔkuɛ Niye Ní ɔ. Kaa bɔnɛ wa de kɛ sɛ hlami ɔ, a kɛ abolo nɛ masa be mi kɛ wai ma tsu ní ngɛ Kaimi ɔ sisi. Eko ɔ, a kɛ ní enyɔ nɛ ɔmɛ maa ma okplɔɔ nɔ ngɛ munyu tulɔ ɔ kasa nya. E maa kane ngmami ko kɛ tsɔɔ nɔ́ nɛ Yesu de ngɛ abolo ɔ he, kɛ nɔ́ nɛ e kɛ abolo ɔ pee. Kaa nɔ hyɛmi nɔ́ ɔ, eko ɔ, e maa kane nɔ́ nɛ Mateo ngma a. E ngma ke: “Yesu kɛ̃ abolo nɛ e gbaa nɔ nɛ e ku mi, nɛ e ngɔ ha e kaseli ɔmɛ nɛ e ke, ‘Nyɛ he nɛ nyɛɛ ye! Enɛ ɔ ji ye nɔmlɔ tso ɔ!’” (Mat. 26:26) Yesu ku abolo nɛ masa be mi ɔ mi nɛ e ngɔ ha e bɔfo ɔmɛ. Ngɛ Kaimi ɔ nɛ a maa ye ngɛ April 14 ɔ nɔ ɔ, o maa na abolo nɛ masa be mi nɛ a ku mi ngɔ wo plɛɛtehi a mi.