E be kɛe nɛ Yehowa maa gu e Matsɛ Yemi ɔ nɔ kɛ je wa nyagba amɛ tsuo kɛ je. Enɛ ɔ ji sane kpakpa nɛ́ e sa kaa nɔ fɛɛ nɔ nɛ e nu. Yesu suɔ kaa e se nyɛɛli ɔmɛ nɛ a de nɔ fɛɛ nɔ sɛ gbi nɛ ɔ! (Mateo 28:19, 20) Mɛni blɔ nɔ Yehowa Odasefohi guɔ kɛ tsuɔ Yesu fami nɛ ɔ he ní?

1. Kɛ Mateo 24:14 ɔ ngɛ mi bae ha kɛɛ mwɔnɛ ɔ?

Yesu gba kɛ fɔ si kaa, “Sane kpakpa nɛ ɔ nɛ kɔɔ Matsɛ Yemi ɔ he ɔ, a maa fiɛɛ ngɛ zugba a nɔ hehi tsuo nɛ nimli ngɛ ɔ.” (Mateo 24:14) Yehowa Odasefohi kɛ bua jɔmi ngɛ ní tsumi nɛ he hia wawɛɛ nɛ ɔ tsue. Wa ngɛ sane kpakpa nɛ ɔ fiɛɛe ngɛ je ɔ mi tsuo ngɛ gbihi nɛ hiɛ pe 1,000 mi! Ní tsumi ngua nɛ e se be nɛ ɔ biɔ mɔde bɔmi kɛ blɔ nya tomi kpakpa. Yehowa lɛ ngɛ wɔ ye buae nɛ wa nyɛ ngɛ ní tsumi nɛ ɔ tsue ɔ nɛ.

2. Mɛni mɔde nɛ wa ngɛ bɔe konɛ wa nyɛ nɛ waa fiɛɛ kɛ ha nihi?

Wa fiɛɛɔ ngɛ he fɛɛ he nɛ wa maa na nihi ngɛ. Wa fiɛɛɔ ngɛ “wehi a mi” kaa bɔ nɛ Kristofohi nɛ a hi si ngɛ Yesu kaseli ɔmɛ a be ɔ mi ɔ pee ɔ. (Ní Tsumi 5:42) Enɛ ɔ ji blɔ titli nɛ wa guɔ nɔ kɛ fiɛɛɔ ha nimli ayɔhi abɔ daa jeha. Akɛnɛ pi be fɛɛ be nɛ nihi hiɔ we mi he je ɔ, wa fiɛɛɔ ngɛ ma nɔ hulɔ. Be fɛɛ be ɔ, wa hlaa blɔhi a nɔ nɛ wa maa gu kɛ tu Yehowa kɛ e yi mi tomi ɔmɛ a he munyu kɛ tsɔɔ ni kpahi.

3. Mɛnɔmɛ a blɔ nya ní tsumi ji kaa a fiɛɛ sane kpakpa a?

E ji anɔkuale Kristofohi tsuo a blɔ nya ní tsumi kaa a maa fiɛɛ sane kpakpa a kɛ ha ni kpahi. Waa kɛ wa blɔ nya ní tsumi nɛ ɔ fiɛ we kulaa. Wa bɔɔ mɔde wawɛɛ kaa wa maa fiɛɛ ejakaa wa le kaa e ma he ni kpahi a yi wami. (Kane 1 Timoteo 4:16.) A wui wɔ hiɔ ngɛ ní tsumi nɛ ɔ he, ejakaa Baiblo ɔ de ke: “Nyɛ ná lɛ yaka gu, nyɛɛ ngɔ kɛ ha yaka gu.” (Mateo 10:7, 8) Pi nɔ fɛɛ nɔ nɛ e buɔ wa sɛ gbi ɔ tue. Se wa yaa nɔ nɛ wa fiɛɛɔ ejakaa fiɛɛmi ní tsumi ɔ piɛɛ wa Mawu jami he, nɛ e haa nɛ Yehowa bua jɔɔ.

MOO KASE BABAUU

4. Wa bɔɔ mɔde wawɛɛ konɛ wa nyɛ nɛ waa fiɛɛ kɛ ha nihi tsuo

VIDEO: Wa Fiɛɛɔ Kɛ Ya Suu “Zugba a Nɔ Hehi Nɛ A Kɛ Wawɛɛ ɔ” (7:33)

• Mɛni lɛ o bua jɔ he ngɛ mɔde nɛ Yehowa Odasefohi ngɛ bɔe kɛ ngɛ fiɛɛe ɔ he?

Nyɛɛ kane Mateo 22:39 kɛ Roma Bi 10:13-15, nɛ nyɛ susu sane bimihi nɛ nyɛɛ se nɛ ɔmɛ a he:

• Ngɛ mɛni blɔ nɔ nɛ wa fiɛɛmi ní tsumi ɔ tsɔɔ kaa wa suɔ ni kpahi?

• Kɛ Yehowa naa nihi nɛ a fiɛɛɔ sane kpakpa a ha kɛɛ?​—Hyɛ kuku 15.

5. Wa piɛɛ Mawu he kɛ ngɛ ní tsue

Níhi a si kpamihi fuu tsɔɔ kaa Yehowa ngɛ wa fiɛɛmi ní tsumi ɔ kudɔe. Kaa nɔ hyɛmi nɔ́ ɔ, benɛ nyɛminyumu ko nɛ a tsɛɛ lɛ ke Paul nɛ e ngɛ New Zealand ɔ ngɛ fiɛɛe ngɛ wehi a mi piani ko ɔ, e ya na yo ko ngɛ e we mi. Jamɛ a ligbi ɔ mɔtu ɔ, yo ɔ sɔle kɛ ha Mawu, nɛ e wo Mawu biɛ nɛ ji Yehowa a ta ngɛ e sɔlemi ɔ mi nɛ e de lɛ ke e ha nɛ nɔ ko nɛ ba slaa lɛ. Paul de ke, “Ngmlɛfia etɛ se ɔ, i ya su e sinya a nya.”

Nyɛɛ kane 1 Korinto Bi 3:9 ɔ, nɛ nyɛ susu sane bimi nɛ ɔ he:

• Ngɛ mɛni blɔ nɔ nɛ níhi a si kpami kaa nɔ́ nɛ ya nɔ ngɛ New Zealand ɔ tsɔɔ kaa Yehowa ngɛ fiɛɛmi ní tsumi ɔ kudɔe?

Nyɛɛ kane Ní Tsumi 1:8 ɔ, nɛ nyɛ susu sane bimi nɛ ɔ he:

• Mɛni he je nɛ wa hia Yehowa yemi kɛ buami konɛ wa nyɛ nɛ wa tsu fiɛɛmi ní tsumi ɔ?

Anɛ o le lo?

A tsɔseɔ wɔ daa otsi ngɛ wa kpe ɔmɛ a sisi konɛ e ye bua wɔ nɛ wa nyɛ nɛ waa fiɛɛ. Ke o ya kpe nɛ ɔ eko hyɛ ɔ, kɛ o na tsɔsemi nɛ ɔ ha kɛɛ?

6. Wa buɔ fami nɛ Mawu kɛ ha kaa waa fiɛɛ sane kpakpa a tue

Ngɛ kaseli ɔmɛ a be ɔ mi ɔ, si temi kɛ woli bɔ mɔde kaa a ma ha nɛ Yesu se nyɛɛli ɔmɛ nɛ a kpa fiɛɛmi. Se Kristofohi nɛ a hi si ngɛ kaseli ɔmɛ a be ɔ mi ɔ fã he blɔ nɛ a ngɛ nɛ a kɛ maa fiɛɛ ɔ he kɛ gu ‘sane kpakpa a nɛ a ngɔ kɛ ma si ngɛ mlaa nya a’ nɔ. (Filipi Bi 1:7) Yehowa Odasefohi hu peeɔ jã mwɔnɛ ɔ.a

VIDEO: A Fã Sane Kpakpa a He Ngɛ Mlaa Nya (2:28)

Nyɛɛ kane Ní Tsumi 5:27-42 ɔ, nɛ nyɛ susu sane bimi nɛ ɔ he:

• Mɛni he je nɛ wa be fiɛɛmi ní tsumi ɔ kpae ɔ?​—Hyɛ kuku 29, 38, kɛ 39.

NYA MWƆMI

Yesu fã e se nyɛɛli ɔmɛ kaa a fiɛɛ sane kpakpa a kɛ ha nihi ngɛ je ɔ mi tsuo. Yehowa ngɛ e sɔmɔli ye buae konɛ a nyɛ nɛ a tsu ní tsumi nɛ ɔ.

Mi Nylɔmi

• Mɛnɔmɛ lɛ a ngɛ sane kpakpa a fiɛɛe ngɛ je kɛ wɛ?

• Mɛni blɔ nɔ nɛ fiɛɛmi nɛ wa fiɛɛɔ ɔ tsɔɔ kaa wa suɔ nimli?

• Anɛ o susu kaa fiɛɛmi ní tsumi ɔ ma nyɛ ma ha nɛ wa bua nɛ jɔ lo? Mɛni he je?

NÍ KPAHI NƐ MAA YE BUA MO

Moo hyɛ blɔ nɔ nɛ Yehowa Odasefohi guɔ kɛ fiɛɛɔ kɛ haa nihi ngɛ ma nguahi a mi.

Ma Nɔ Odase Yemi Klɛdɛɛ Ngɛ Ma Nguahi A Mi Nɛ Ya Nɔ Ngɛ Paris (5:11)

Mɛni nɛ Yehowa Odasefohi pee kɛ ye bua nihi nɛ a ba sa we ɔ?

A Ha Nɛ Wesa He Bi Komɛ Ná Mumi Mi Nyu Nɛ A Nu (5:59)

Moo hyɛ bɔ nɛ nɔ ko tsɔɔ kaa fiɛɛmi ní tsumi ɔ nɛ e kɛ e be tsuo ngɛ tsue ɔ haa nɛ e bua jɔɔ ha.

Ye Bua Jɔ Kaa I Hla Ní Tsumi Nɛ ɔ (6:29)

Moo kase sane komɛ nɛ a ma nya si ngɛ kojomi hehi nɛ lɔ ɔ ha nɛ wa nyɛ ngɛ fiɛɛe ɔ he ní.

“Matsɛ Yemi Fiɛɛli Ngɔ A Sane Kɛ Ya Kojomi He” (Mawu Matsɛ Yemi ɔ Ngɛ Nɔ Yee!, yi 13)

Yesu de ke, loko nɔ ko maa pee Kristofo no ɔ, e sa nɛ a baptisi lɛ. (Kane Mateo 28:19, 20.) Se kɛ a baptisiɔ nɔ ha kɛɛ? Nɛ mɛni e sa nɛ nɔ ko nɛ pee konɛ e he nɛ su kɛ ha baptisimi?

1. Kɛ a baptisiɔ nɔ kɛɛ?

Hela munyu nɛ a tsɔɔ sisi ke “baptisimi” ɔ tsɔɔ kaa a maa ngɔ nɔ ko kɛ “wo” nyu mi nɛ e yi maa laa. Benɛ a baptisi Yesu ngɛ Yordan Pa a mi ɔ, a ngɔ lɛ kɛ wo nyu ɔ mi nɛ e yi laa, nɛ lɔ ɔ se ɔ, “e je kpo ngɛ nyu ɔ mi.” (Maako 1:9, 10) Kaa bɔ nɛ a baptisi Yesu ɔ, jã nɔuu kɛ̃ nɛ a baptisiɔ anɔkuale Kristofohi. A kɛ mɛ woɔ nyu mi, nɛ a yi laa.

2. Ke nɔ ko ha nɛ a baptisi lɛ ɔ, mɛni lɔ ɔ tsɔɔ?

Ke nɔ ko ha nɛ a baptisi lɛ ɔ, lɔ ɔ tsɔɔ kaa e jɔɔ e he nɔ kɛ ha Yehowa Mawu. Kɛ nɔ ko ma plɛ kɛ jɔɔ e he nɔ ha Yehowa kɛɛ? Loko a maa baptisi nɔ ko ɔ, e maa sɔle kɛ ha Yehowa, nɛ e ma de lɛ kaa e suɔ nɛ́ e sɔmɔ lɛ kɛ ya neneene. Ngɛ e sɔlemi ɔ mi ɔ, e maa wo Yehowa si kaa e ma sɔmɔ lɛ pɛ, nɛ e kɛ Mawu suɔmi nya ní peemi maa pee nɔ́ titli ngɛ e si himi mi. E maa mwɔ e yi mi kpɔ kaa ‘e ma kua e he . . . nɛ e maa ya nɔ maa nyɛɛ’ Yesu tsɔɔmi ɔmɛ kɛ e nɔ hyɛmi ní ɔmɛ a se. (Mateo 16:24) E he nɔ jɔɔmi ɔ kɛ e baptisimi ɔ haa nɛ huɛ bɔmi gbagbanii ba hiɔ e kɛ Yehowa, kɛ nihi nɛ a sɔmɔɔ lɛ ɔ a kpɛti.

3. Mɛni nɛ e sa nɛ nɔ ko nɛ pee loko a maa baptisi lɛ?

Loko a ma nyɛ maa baptisi mo ɔ, ja o kase Yehowa he ní, nɛ o ná hemi kɛ yemi nɛ mi wa ngɛ e mi. (Kane Hebri Bi 11:6.) Ke o ngɛ Yehowa he ní kasee nɛ o hemi kɛ yemi ɔ mi ngɛ wae ɔ, suɔmi nɛ o ngɛ kɛ ha lɛ ɔ hu mi maa hi wae. Enɛ ɔ ma ha nɛ o maa suɔ kaa o maa tsɔɔ ni kpahi Yehowa he ní, nɛ o maa suɔ kaa o kɛ e sisi tomi mlaahi hu ma tsu ní. (2 Timoteo 4:2; 1 Yohane 5:3) Ke nɔ ko ngɛ mɔde bɔe ‘nɛ́ e ba e je mi kaa nɔ nɛ e sɔmɔɔ Yehowa, konɛ e sa e hɛ mi kɛ pi si’ ɔ, e maa suɔ kaa e maa jɔɔ e wami nɔ kɛ ha Mawu nɛ a baptisi lɛ.​—Kolose Bi 1:9, 10.a

MOO KASE BABAUU

4. Wa ma nyɛ maa kase ní ngɛ bɔ nɛ a baptisi Yesu ha a mi

Nyɛɛ kane Mateo 3:13-17 ɔ, konɛ o le babauu kɛ kɔ Yesu baptisimi ɔ he. Lɔ ɔ se ɔ, nyɛ susu sane bimihi nɛ nyɛɛ se nɛ ɔmɛ a he:

• Anɛ bimwɔyo ji Yesu benɛ a baptisi lɛ ɔ lo?

• Kɛ a baptisi lɛ kɛɛ? Anɛ a ngmɛ nyu kɛ pue e yi mi lo?

Benɛ a baptisi Yesu ɔ, e je ní tsumi klɛdɛɛ nɛ Mawu kɛ wo e dɛ kaa e ba tsu ngɛ zugba a nɔ ɔ sisi. Nyɛɛ kane Luka 3:21-23 kɛ Yohane 6:38 ɔ, nɛ nyɛ susu sane bimi nɛ ɔ he:

• Benɛ a baptisi Yesu se ɔ, mɛni ní tsumi nɛ e kɛ pee oti ngɛ e si himi mi?

5. Baptisimi ji oti ko nɛ o ma nyɛ maa su he

Eko ɔ, sisije ɔ, he nɔ jɔɔmi kɛ baptisimi maa wo o he gbeye bɔɔ. Se kɛ̃ ɔ, ke o ngɛ o hɛ mi yae ɔ, o ma ba ná nɔ mi mami kaa o ma nyɛ maa mwɔ yi mi kpɔ nɛ he hia wawɛɛ nɛ ɔ. Mo je VIDEO ɔ, konɛ o na bɔ nɛ ni komɛ pee lɛ ha.

VIDEO: Nɔ́ Nɛ Wa Maa Pee Konɛ Waa Kɛ Yehowa Nɛ Nu Huɛ (1:11)

Nyɛɛ kane Yohane 17:3 kɛ Yakobo 1:5 ɔ, nɛ nyɛ susu sane bimi nɛ ɔ he:

• Mɛni nɔ ko maa pee konɛ e he nɛ su kɛ ha baptisimi?

1. Ke wa sɔle ha Yehowa nɛ wa de lɛ kaa wa suɔ nɛ wa ma sɔmɔ lɛ kɛ ya neneene ɔ, lɔ ɔ tsɔɔ kaa wa jɔɔ wa he nɔ kɛ ha lɛ

2. Ngɛ baptisimi ligbi ɔ nɔ ɔ, wa haa nɛ e peeɔ heii kɛ haa nihi kaa wa jɔɔ wa he nɔ kɛ ha Mawu

6. Ke a baptisi wɔ ɔ, wa ba piɛɛɔ Yehowa weku ɔ he

Ke a ná nɛ a baptisi nɔ ko ɔ, e ba piɛɛɔ weku nɛ ngɛ je kɛ wɛ nɛ kake peemi ngɛ a kpɛti ɔ he. E ngɛ mi kaa wa je ma slɔɔtoslɔɔtohi kɛ wɛtso slɔɔtoslɔɔtohi a mi mohu lɛɛ, se wɔ tsuo wa hɛɛ hemi kɛ yemi kake, nɛ waa kɛ je mi bami he mlaahi nɛ ngɛ Baiblo ɔ mi ɔ tsuɔ ní. Nyɛɛ kane La 25:14 kɛ 1 Petro 2:17 ɔ, nɛ nyɛ susu sane bimi nɛ ɔ he:

• Ngɛ ngmami nɛ ɔ nya a, mɛni se nɔ ko ma ná ke e ha nɛ a baptisi lɛ?

NYA MWƆMI

Yesu tsɔɔ kaa e sa nɛ a baptisi Kristofohi. Loko nɔ ko ma nyɛ maa su oti nɛ ɔ he ɔ, e sa nɛ e ná hemi kɛ yemi nɛ mi wa ngɛ Yehowa mi, nɛ e kɛ Yehowa sisi tomi mlaahi nɛ tsu ní, nɛ e jɔɔ e he nɔ kɛ ha lɛ.

Mi Nylɔmi

• Kɛ e sa nɛ a baptisi nɔ ha kɛɛ, nɛ mɛni he je nɛ baptisimi he hia a?

• Ke a baptisi nɔ ko ɔ, mɛni e tsɔɔ?

• Mɛni e sa nɛ nɔ ko nɛ pee loko e ma nyɛ maa jɔɔ e wami nɔ nɛ́ a baptisi lɛ?

NÍ KPAHI NƐ MAA YE BUA MO

Moo kase nɔ́ nɛ baptisimi tsɔɔ kɛ nɔ́ nɛ e tsɔɔ we.

“Mɛni Ji Baptisimi?” (Munyu nɛ ɔ ngɛ Intanɛti ɔ nɔ)

Moo hyɛ níhi nɛ nɔ ko ma nyɛ maa pee konɛ e he nɛ su kɛ ha baptisimi.

“Mo Ha Nɛ Suɔmi Nɛ O Ngɛ Kɛ Ha Yehowa a Nɛ Ha Nɛ A Baptisi Mo” (Hwɔɔmi Mɔ, March 2020)

Moo kane munyu nɛ ɔ nɛ o na nɔ́ he je nɛ nyumu ko mwɔ e yi mi kpɔ kaa e ma ha nɛ a baptisi lɛ ɔ.

“A Suɔ Nɛ Imi Nitsɛ Ma Le Nɔ́ Tutuutu Nɛ Baiblo ɔ Tsɔɔ” (Hwɔɔmi Mɔ, February 1, 2013)

Moo hyɛ nɔ́ he je nɛ se nami ngɛ he kaa o ma ha nɛ a baptisi mo, kɛ nɔ́ nɛ o maa pee kɛ dla o he kɛ ha baptisimi.

“Anɛ E Sa Nɛ Ma Ha Nɛ A Baptisi Mi Lo?” (Sanehi Nɛ Nihewi Kɛ Yihewi Biɔ—Hetohi Nɛ Yeɔ Bua, Kpo 2, yi 37)