Mɛni Lɛ Ngɔ Ní Yayamihi Kɛ Nɔ́ Nami Kɛ Ba Je ɔ Mi?

Ke nɔ́ yayami ko ba a, nihi pɔɔ bimi ke: “Mɛni he je nɛ nɔ́ nɛ ɔ ba a?” Wa bua jɔ wawɛɛ kaa Baiblo ɔ ha sane bimi nɛ ɔ heto!

1. Mɛni Satan pee nɛ́ lɔ ɔ ngɔ ní yayamihi kɛ ba je ɔ mi?

Satan Abosiami tsɔ Mawu hɛ mi atuã. Satan suɔ nɛ e ye adesahi a nɔ, enɛ ɔ he ɔ, e sisi Adam kɛ Hawa konɛ mɛ hu a gbo Mawu tue. E ye Hawa lakpa nɛ e kɛ sisi lɛ. (1 Mose 3:1-5) Satan ha nɛ Hawa susu kaa Yehowa ngɔ nɔ́ kpakpa ko kɛ ngɛ lɛ laae. E tsɔɔ kaa ke adesahi gbo Mawu tue ɔ, a ma ná bua jɔmi. Satan ye kekleekle lakpa benɛ e de Hawa ke e be gboe ɔ. Enɛ ɔ he ɔ, Baiblo ɔ tsɛɛ Satan ke ‘lakpatsɛ kɛ lakpa a e tsɛ.’​—Yohane 8:44.

2. Mɛni nɛ Adam kɛ Hawa hla kaa a maa pee?

Yehowa ha Adam kɛ Hawa nɔ́ fɛɛ nɔ́ nɛ a maa hia. E de mɛ ke a ma nyɛ maa ye tsohi nɛ ngɛ Eden abɔɔ mi ɔ eko fɛɛ eko nɔ yiblii, ja kake pɛ nɛ e sɛ nɛ a ye e nɔ yiblii. (1 Mose 2:15-17) Se a mwɔ a yi mi kpɔ kaa a maa ye tso yiblii ɔ nɛ Mawu de mɛ ke a ko ye ɔ. Enɛ ɔ he ɔ, Hawa ‘tsɔ tso yiblii ɔ nɛ e ye.’ Pee se ɔ, Adam ‘hu ye tso yiblii ɔ eko.’ (1 Mose 3:6) Mɛ tsuo a gbo Mawu tue. Akɛnɛ Adam kɛ Hawa ye mluku he je ɔ, jinɛ a ma nyɛ maa pee nɔ́ nɛ da. Se a mwɔ a yi mi kpɔ kaa a be Mawu tue bue. Enɛ ɔ ha nɛ a pee yayami, nɛ a kua he blɔ nɛ Mawu ngɛ kaa e yeɔ a nɔ ɔ. Yi mi kpɔ nɛ ɔ nɛ a mwɔ ɔ ha nɛ a na nɔ́ wawɛɛ.​—1 Mose 3:16-19.

3. Kɛ yi mi kpɔ nɛ Adam kɛ Hawa mwɔ ɔ sa wa he ha kɛɛ?

Yayami nɛ Adam kɛ Hawa pee ɔ ha nɛ a yi mluku hu, nɛ mluku nɛ a yi ɔ sã a sisi bimɛ tsuo. Baiblo ɔ de ngɛ Adam he ke: “Kɛ gu adesa kake nɔ ɔ, yayami ba je ɔ mi, nɛ gbenɔ gu yayami nɔ kɛ ba, nɛ lɔ ɔ he ɔ, gbenɔ sã adesahi tsuo.”​—Roma Bi 5:12.

Níhi fuu lɛ haa nɛ wa naa nɔ́. Be komɛ ɔ, wa naa nɔ́ akɛnɛ wa mwɔ yi mi kpɔhi nɛ dɛ ɔ he je. Be komɛ hu ɔ, wa naa nɔ́ ngɛ yi mi kpɔhi nɛ dɛ nɛ ni komɛ mwɔ ɔ he je. Nɛ be komɛ hu ɔ, wa naa nɔ́ akɛnɛ níhi nɛ wa hyɛ we blɔ ɔ baa wa nɔ tlukaa he je.​—Kane Fiɛlɔ 9:12.

MOO KASE BABAUU

4. Nɔ tutuutu nɛ ha nɛ wa ngɛ nɔ́ nae

Nihi fuu susu kaa Mawu lɛ ngɛ je ɔ tsuo nɔ yee. Anɛ e ji anɔkuale lo? Mo je VIDEO ɔ.

VIDEO: Mɛnɔ Lɛ Ngɛ Je ɔ Kudɔe? (1:24)

Nyɛɛ kane Yakobo 1:13 kɛ 1 Yohane 5:19 ɔ, nɛ nyɛ susu sane bimi nɛ ɔ he:

• Anɛ Mawu lɛ ha nɛ nɔ́ nami kɛ ní yayamihi ngɛ nɔ yae ɔ lo?

5. Níhi nɛ je Satan nɔ yemi ɔ mi kɛ ba

VIDEO: Mɛni He Je Nɛ Mawu Ngmɛ Nɔ́ Nami Blɔ ɔ?—Fã Ko (3:07)

Nyɛɛ kane 1 Mose 3:1-6, nɛ nyɛ susu sane bimihi nɛ nyɛɛ se nɛ ɔmɛ a he:

• Mɛni lakpa nɛ Satan ye?​—Hyɛ kuku 4 kɛ 5.

• Ngɛ mɛni blɔ nɔ nɛ Satan ngɛ tsɔɔe kaa Yehowa ngɔ nɔ́ kpakpa ko kɛ ngɛ adesahi laae?

• Anɛ Satan ngɛ tsɔɔe kaa adesahi hia Yehowa kaa a Nɔ Yelɔ loko a ma ná bua jɔmi lo?

Nyɛɛ kane Fiɛlɔ 8:9 ɔ, nɛ nyɛ susu sane bimi nɛ ɔ he:

• Akɛnɛ pi Yehowa nɛ e ngɛ je ɔ nɔ yee he je ɔ, mɛni lɛ ba?

1. A. Adam kɛ Hawa ye mluku, nɛ a hi Paradeiso mi. Se pee se ɔ, a bu Satan tue nɛ a tsɔ Yehowa hɛ mi atuã

2. B. Benɛ a tsɔ atuã a se ɔ, yayami, nɔ́ nami, kɛ gbenɔ ba je ɔ mi

3. D. Yehowa maa po yayami, nɔ́ nami, kɛ gbenɔ se. Hwɔɔ se ɔ, adesahi maa ye mluku nɛ a maa hi Paradeiso ɔ mi ekohu

6. Ke wa ngɛ nɔ́ nae ɔ, e haoɔ Yehowa

Ke wa ngɛ nɔ́ nae ɔ, anɛ e haoɔ Mawu lo? Mo susu nɔ́ nɛ Matsɛ David kɛ bɔfo Petro ngma a he nɛ o hyɛ. Nyɛɛ kane La 31:7 kɛ 1 Petro 5:7 ɔ, nɛ nyɛ susu sane bimi nɛ ɔ he:

• Kɛ lemi nɛ o ba le kaa Yehowa le wa nɔ́ nami ɔmɛ, nɛ e susuɔ wa he ɔ haa nɛ o nuɔ he ha kɛɛ?

NYA MWƆMI

Satan Abosiami kɛ Adam kɛ Hawa ji nihi titli nɛ a ha nɛ ní yayamihi ngɛ nɔ yae ngɛ je ɔ mi ɔ nɛ. Ke wa ngɛ haoe ɔ, e haoɔ Yehowa, nɛ e be kɛe nɛ́ e ma ha nɛ lɛ tsuo se maa po.

Mi Nylɔmi

• Mɛni lakpa nɛ Satan Abosiami ye Hawa?

• Kɛ Adam kɛ Hawa tue gbomi ɔ sa wɔ tsuo wa he ha kɛɛ?

• Kɛ wa plɛ kɛ le kaa ke wa ngɛ nɔ́ nae ɔ, e dɔɔ Yehowa ha kɛɛ?

NÍ KPAHI NƐ MAA YE BUA MO

Moo kase bɔ nɛ a tsɔɔ yayami sisi ha ngɛ Baiblo ɔ mi.

“Mɛni Ji Yayami?” (Munyu nɛ ɔ ngɛ Intanɛti ɔ nɔ)

Moo kase babauu kɛ kɔ nɔ́ nɛ Satan Abosiami de ngɛ Eden abɔɔ mi ɔ he.

“Mɛni He Je Nɛ Mawu Ngmɛ Nɔ́ Nami Blɔ ɔ?” (Hwɔɔmi Mɔ ɔ mi munyu)

Moo hyɛ hetohi nɛ woɔ nɔ bua kɛ ha sane bimi ko nɛ nihi fuu li heto ɔ.

“Mɛni He Je Nɛ Mawu Ngmɛ Blɔ Nɛ A Gbe Yuda Bi Ayɔhi Abɔ ɔ? Mɛni He Je Nɛ Mawu Tsi We Nya a?” (Munyu nɛ ɔ ngɛ Intanɛti ɔ nɔ)

Moo hyɛ nɔ́ nɛ nyumu ko kase ngɛ nɔ́ nami nɛ bɔle lɛ ɔ mi.

I Hí Si Kɛ Ha We Ye He Hu (5:09)

Akɛnɛ wa kekleekle fɔli, nɛ ji Adam kɛ Hawa bui Mawu tuea he je ɔ, wa peeɔ yayami, wa naa nɔ́, nɛ wa gboɔ. Se wa ngɛ hɛ kɛ nɔ fɔmi. Yehowa to blɔ nya kɛ gu e Bi Yesu Kristo nɔ, konɛ e kɛ kpɔ wɔ kɛ je yayami kɛ gbenɔ gbiɛmi sisi. Baiblo ɔ tsɔɔ kaa Yesu gu e gbenɔ ɔ nɔ kɛ ha kpɔmi nɔ́ ɔ. Kpɔmi nɔ́ ji hiɔ nɛ a woɔ konɛ a kɛ ha nɛ nɔ ko nɛ e ye e he. Hiɔ nɛ Yesu wo ɔ ji e wami nɛ ye mluku nɛ e kɛ sã afɔle ɔ nɛ. (Kane Mateo 20:28.) Akɛnɛ a fɔ Yesu kaa adesa nɛ ye mluku, nɛ́ e bu Mawu tue be fɛɛ be he je ɔ, jinɛ e ko nyɛ hi zugba a nɔ kɛ ya neneene. Se kɛ̃ ɔ, e je e suɔmi mi nɛ e gbo kɛ ha wɔ konɛ wa nine nɛ su níhi tsuo nɛ bɔ Adam kɛ Hawa a nɔ ekohu. Enɛ ɔ nɛ́ Yesu pee ɔ hu tsɔɔ bɔ nɛ e kɛ Yehowa a suɔ wɔ wawɛɛ ha. Ní kasemi nɛ ɔ maa ye bua mo konɛ hɛsa nɛ o ngɛ ngɛ́ Yesu gbenɔ ɔ he ɔ mi nɛ wa wawɛɛ.

1. Kɛ wa ma plɛ kɛ ná Yesu gbenɔ ɔ he se ha kɛɛ mwɔnɛ ɔ?

Akɛnɛ wa ji yayami peeli he je ɔ, wa peeɔ níhi babauu nɛ sɛ Yehowa hɛ mi. Se kɛ̃ ɔ, ke wa pia wa he ngɛ yayamihi nɛ wa pee ɔ he, nɛ wa sɔle kɛ kpa Yehowa pɛɛ ngɛ Yesu Kristo biɛ mi kaa e ngɔ kɛ ke wɔ, nɛ wa bɔ mɔde kaa wa be jamɛ a yayami ɔmɛ pee hu ɔ, huɛ bɔmi kpakpa maa hi waa kɛ Mawu wa kpɛti. (1 Yohane 2:1) Baiblo ɔ de ke: “Kristo gbo si kake nyɔngloo ngɛ yayamihi a he je, dalɔ ɔ ngɛ nihi nɛ a dɛ ɔmɛ a nane mi, konɛ e nyɛɛ nyɛ hɛ mi kɛ ya Mawu ngɔ.”​—1 Petro 3:18.

2. Kɛ wa ma ná Yesu gbenɔ ɔ he se ha kɛɛ hwɔɔ se?

Yehowa tsɔ Yesu konɛ e ngɔ e wami nɛ ye mluku ɔ kɛ ha “konɛ nɔ fɛɛ nɔ nɛ e heɔ lɛ yeɔ ɔ, a ko kpata e hɛ mi, mohu ɔ, e ná neneene wami.” (Yohane 3:16) E be kɛe nɛ Yehowa maa gu nɔ́ nɛ Yesu pee nɛ ɔ nɔ kɛ dla ní yayamihi tsuo nɛ Adam tue gbomi ɔ ngɔ kɛ ba a. Enɛ ɔ tsɔɔ kaa ke wa ná hemi kɛ yemi ngɛ Yesu afɔle sami ɔ mi ɔ, wa ma ná he blɔ kɛ hi si ngɛ bua jɔmi mi kɛ ya neneene ngɛ paradeiso zugba a nɔ!​—Yesaya 65:21-23.

MOO KASE BABAUU

3. Yesu gbenɔ ɔ kpɔ̃ wɔ kɛ je yayami kɛ gbenɔ mi

VIDEO: Mɛni He Je Nɛ Yesu Gbo?—Fã 1 (2:01)

• Mɛni lɛ bɔ Adam benɛ e gbo Mawu tue ɔ?

Nyɛɛ kane Roma Bi 5:12 ɔ, nɛ nyɛ susu sane bimi nɛ ɔ he:

• Kɛ yayami nɛ Adam pee ɔ sa o he ha kɛɛ?

Nyɛɛ kane Yohane 3:16, nɛ nyɛ susu sane bimi nɛ ɔ he:

• Mɛni he je nɛ Yehowa tsɔ e Bi ɔ kɛ ba zugba a nɔ ɔ?

1. Adam ye mluku, se e bui Mawu tue, nɛ lɔ ɔ ha nɛ adesahi tsuo pee yayami nɛ a gboɔ

2. Yesu ye mluku, nɛ e bu Mawu tue, nɛ lɔ ɔ ma ha nɛ adesahi maa ye mluku nɛ a ma ná neneene wami

4. Nihi tsuo ma nyɛ ma ná Yesu gbenɔ ɔ he se

VIDEO: Mɛni He Je Nɛ Yesu Gbo?—Fã 2 (2:00)

• Ngɛ mɛni blɔ nɔ nɛ nihi tsuo ma nyɛ ma ná nɔ kake gbenɔ he se?

Nyɛɛ kane 1 Timoteo 2:5, 6, nɛ nyɛ susu sane bimi nɛ ɔ he:

• Adam ye mluku, se yayami nɛ e pee ɔ ha nɛ adesahi tsuo peeɔ yayami, nɛ a gboɔ. Yesu hu ye mluku. Ngɛ mɛni blɔ nɔ nɛ Yesu ha “kpɔmi nɔ́ nɛ sa pɛpɛɛpɛ”?

5. Kpɔmi nɔ́ ɔ ji nike ní nɛ Yehowa kɛ ha mo

Yehowa huɛmɛ ɔmɛ naa kpɔmi nɔ́ ɔ kaa nike ní nɛ e kɛ ha ngɛ a ti nɔ fɛɛ nɔ he. Kaa nɔ hyɛmi nɔ́ ɔ, nyɛɛ kane Galatia Bi 2:20 ɔ, nɛ nyɛ susu sane bimi nɛ ɔ he:

• Mɛni bɔfo Paulo de kɛ tsɔɔ kaa e naa kpɔmi nɔ́ ɔ kaa e ji nike ní nɛ Yehowa kɛ ha lɛ?

Benɛ Adam pee yayami ɔ, a bu e kɛ e sisi bimɛ tsuo gbenɔ fɔ. Se Yehowa tsɔ e Bi ɔ kaa e ba gbo konɛ o nyɛ nɛ o hi si kɛ ya neneene.

Ke o ngɛ ngmamihi nɛ nyɛɛ se ɔ kanee ɔ, mo susu bɔ nɛ Yehowa maa nu he ha benɛ e Bi ɔ ngɛ nɔ́ nae ɔ he nɛ o hyɛ. Nyɛɛ kane Yohane 19:1-7, 16-18, nɛ nyɛ susu sane bimi nɛ ɔ he:

• Kɛ nɔ́ nɛ Yehowa kɛ Yesu pee kɛ ha mo ɔ haa nɛ o nuɔ he ha kɛɛ?

NYA MWƆMI

Yesu gbenɔ ɔ he je ɔ, Yehowa ma nyɛ maa ngɔ wa he yayami ɔmɛ kɛ ke wɔ, nɛ wa ma nyɛ maa hi si kɛ ya neneene.

Mi Nylɔmi

• Mɛni he je nɛ Yesu gbo ɔ?

• Ngɛ mɛni blɔ nɔ nɛ Yesu wami nɛ ye mluku ɔ ji kpɔmi nɔ́ nɛ sa pɛpɛɛpɛ?

• Kɛ o ma ná Yesu gbenɔ ɔ he se ha kɛɛ?

NÍ KPAHI NƐ MAA YE BUA MO

Moo kase nɔ́ he je nɛ a tsɛɛ Yesu wami kaa adesa nɛ ye mluku ɔ ke kpɔmi nɔ́ ɔ.

“Mɛni Blɔ Nɔ Yesu Afɔle Sami ɔ Ji ‘Kpɔmi Nɔ́ Kɛ Ha Nihi Babauu’?” (Munyu nɛ ɔ ngɛ Intanɛti ɔ nɔ)

Moo hyɛ nɔ́ nɛ e sa kaa waa pee konɛ a he wa yi wami kɛ je yayami kɛ gbenɔ mi.

“Yesu Heɔ Nihi A Yi Wami—Ngɛ Mɛni Blɔ Nɔ?” (Munyu nɛ ɔ ngɛ Intanɛti ɔ nɔ)

Anɛ Yehowa kɛ yayamihi nɛ a ngɛ hɛdɔ ɔ po ma nyɛ maa ke lo?

“Baiblo Mi Sane Bimihi Nɛ A Ha Heto” (Hwɔɔmi Mɔ, May 1, 2013)

Moo hyɛ bɔ nɛ Kristo afɔle sami ɔ he ní nɛ nyumu ko kase ɔ ye bua lɛ ha nɛ́ e tsake e je mi bami.

“I Kɛ Ye He Wui Yi Wu Tso Ní Peepeehi A Mi Hu” (Munyu nɛ ɔ ngɛ Intanɛti ɔ nɔ)