-
Mɛni Nɛ Baiblo ɔ De Ngɛ Bɔmi Nami He?O Ma Nyɛ Ma Ná Bua Jɔmi Kɛ Ya Neneene!—Moo Kase Baiblo ɔ Nɛ O Ná He Se
-
-
NÍ KASEMI 41
Mɛni Nɛ Baiblo ɔ De Ngɛ Bɔmi Nami He?
Nihi fuu a bua jɔɛ he kaa a maa sɛɛ bɔmi nami he ní. Se ke Baiblo ɔ ngɛ bɔmi nami he munyu tue ɔ, e tuɔ he munyu ngɛ blɔ nɛ ngɛ tɛ̃ɛ nɛ bu ngɛ he nɔ. Wa náa nɔ́ nɛ Baiblo ɔ de kɛ kɔ bɔmi nami he ɔ he se. Nile ngɛ nɔ́ nɛ Baiblo ɔ de kɛ kɔ bɔmi nami he ɔ mi, ejakaa Baiblo ɔ je Yehowa nɛ ji wa Bɔlɔ ɔ ngɔ. E le nɔ́ nɛ hi kɛ ha wɔ. E tsɔɔ wɔ nɔ́ nɛ e sa kaa waa pee konɛ waa sa e hɛ mi, kɛ nɔ́ nɛ ma ha nɛ wa ná bua jɔmi ngɛ si himi mi kɛ ya neneene.
1. Mɛni ji Yehowa susumi ngɛ bɔmi nami he?
Bɔmi nami ji nike ní nɛ Yehowa kɛ ha adesahi. E suɔ kaa bɔmi nami nɛ ha nyumu kɛ yo nɛ a sɛ gba si himi mi ɔ bua jɔmi. Kɛ gu nike ní nɛ ɔ nɔ ɔ, nyumu kɛ yo nɛ a sɛ gba si himi mi ɔ ma nyɛ ma fɔ bimɛ. Jehanɛ hu ɔ, e haa nɛ a jeɔ suɔmi kpo kɛ tsɔɔ a sibi, nɛ e haa nɛ a náa a sibi a he bua jɔmi. Enɛ ɔ he je nɛ Mawu Munyu ɔ de ke, o kɛ ‘o nihe mi yo kpeekpee ɔ nɛ ná bua jɔmi’ ɔ nɛ. (Abɛ 5:18, 19) Yehowa hyɛɛ blɔ kaa Kristofohi nɛ a sɛ gba si himi mi ɔ nɛ a ye a sibi anɔkuale, enɛ ɔ he ɔ, a be suɔe nɛ a puɛ gba kɔkɔɔkɔ.—Kane Hebri Bi 13:4.
2. Mɛni ji ajuama bɔmi?
Baiblo ɔ de ke: “Ajuama bɔli . . . a nine be Mawu Matsɛ Yemi ɔ nɔ sue.” (1 Korinto Bi 6:9, 10) Nihi nɛ a ngma Baiblo ɔ ngɛ Hela gbi mi ɔ ngɔ munyungu nɛ ji por·neiʹa kɛ kale ajuama bɔmi ní peepee slɔɔtohi. Ní peepee nɛ ɔmɛ ekomɛ ji, (1) nihi nɛ a sɛ we gba si himi mi nɛ a kɛ a sibi náa bɔmi,a (2) nyumu kɛ nyumu loo yo kɛ yo nɛ a náa bɔmi, kɛ (3) nɔmlɔ kɛ lohwe nɛ a náa bɔmi. Ke wa ‘yu wa he ngɛ ajuama bɔmi he’ ɔ, lɔ ɔ ma ha nɛ waa sa Yehowa hɛ mi, nɛ wɔ nitsɛmɛ hu wa ma ná he se.—1 Tɛsalonika Bi 4:3.
MOO KASE BABAUU
Moo hyɛ blɔ nɔ nɛ o ma nyɛ maa gu kɛ yu o he ngɛ ajuama bɔmi ní peepeehi a he, kɛ bɔ nɛ o ma ná he se ha ke o ha nɛ o je mi bami he tsɔ.
3. Tuu ajuama bɔmi nya fo
Benɛ yo ko ngɛ hlae nɛ e kɛ nyumu anɔkualetsɛ ko nɛ a tsɛɛ lɛ ke Yosef nɛ ná bɔmi ɔ, Yosef kua. Nyɛɛ kane 1 Mose 39:1-12, nɛ nyɛ susu sane bimihi nɛ nyɛɛ se nɛ ɔmɛ a he:
Mɛni wo Yosef he wami nɛ e tu fo ɔ?—Hyɛ kuku 9.
Anɛ o susu kaa yi mi kpɔ nɛ Yosef mwɔ ɔ da lo? Mɛni he je?
Mwɔnɛ ɔ, kɛ nihewi kɛ yihewi ma plɛ kɛ kase Yosef, nɛ́ a tu ajuama bɔmi nya fo ha kɛɛ? Mo je VIDEO ɔ.
Yehowa suɔ kaa wɔ tsuo wa kua ajuama bɔmi ní peepeehi. Nyɛɛ kane 1 Korinto Bi 6:18, nɛ nyɛ susu sane bimihi nɛ nyɛɛ se nɛ ɔmɛ a he:
Mɛni si fɔfɔɛhi lɛ ma nyɛ ma ha nɛ nɔ ko kɛ e he nɛ wo ajuama bɔmi mi?
Kɛ o ma plɛ kɛ tu ajuama bɔmi nya fo ha kɛɛ?
4. O ma nyɛ maa ye ajuama bɔmi he kahi a nɔ
Mɛni ma nyɛ ma ha nɛ e he nɛ wa ha nɔ ko kaa e maa ye ajuama bɔmi he kahi a nɔ? Mo je VIDEO ɔ, nɛ nyɛ susu sane bimi nɛ nyɛɛ se ɔ he.
Benɛ nyɛminyumu ɔ nɛ wa na ngɛ video ɔ mi ɔ ba yɔse kaa ní komɛ nɛ e ngɛ a he susue, kɛ e ní peepee ma nyɛ ma ha nɛ e je e yo ɔ se ɔ, mɛni e pee?
Be komɛ ɔ, e be gbɔjɔɔ ha Kristofohi nɛ a yeɔ anɔkuale ɔ po kaa a ma ha nɛ a susumihi a he nɛ tsɔ. Mɛni o ma nyɛ maa pee konɛ o kpa ní yayahi a he susumi? Nyɛɛ kane Filipi Bi 4:8, nɛ nyɛ susu sane bimihi nɛ nyɛɛ se nɛ ɔmɛ a he:
Mɛni níhi nɛ e sa kaa wa susu a he?
Kɛ Baiblo ɔ nɛ wa maa kane, kɛ wa he nɛ waa kɛ maa wo Yehowa sɔmɔmi mi vii ɔ, maa ye bua wɔ ha kɛɛ konɛ wa kua níhi nɛ ma ha nɛ waa pee yayami ɔ?
5. Wa náa Yehowa mlaa amɛ a he se
Yehowa le nɔ́ nɛ hi ha wɔ. E tsɔɔ wɔ níhi nɛ e sa nɛ waa pee konɛ wa je mi bami he nɛ tsɔ, kɛ se nɛ wa ma ná ke wa pee jã. Nyɛɛ kane Abɛ 7:7-27 aloo mo je VIDEO ɔ, nɛ nyɛ susu sane bimihi nɛ nyɛɛ se nɛ ɔmɛ a he.
Mɛni niheyo ɔ pee nɛ lɔ ɔ ha nɛ e sɛ ka mi?—Hyɛ Abɛ 7:8, 9.
Kaa bɔ nɛ a tsɔɔ ngɛ Abɛ 7:23, 26, ke nɔ ko kɛ e he wo ajuama bɔmi mi ɔ, lɔ ɔ ma nyɛ maa ngɔ haomihi fuu kɛ ba. Ke wa ha nɛ wa je mi bami he tsɔ ɔ, mɛni nyagbahi nɛ lɔ ɔ ma ha nɛ waa yu wa he ngɛ a he?
Ke wa je mi bami he tsɔ ɔ, kɛ lɔ ɔ maa ye bua wɔ ha kɛɛ konɛ wa ná bua jɔmi kɛ ya neneene?
Ni komɛ susu kaa nɔ́ nɛ Baiblo ɔ de ngɛ nyumu kɛ nyumu loo yo kɛ yo a bɔmi nami he ɔ tsɔɔ we suɔmi. Se Yehowa Mawu nɛ e ngɛ suɔmi ɔ suɔ kaa nɔ fɛɛ nɔ nɛ ná bua jɔmi kɛ ya neneene. Se loko wa ma nyɛ ma ná bua jɔmi kɛ ya neneene ɔ, ja wa ye e mlaa amɛ a nɔ. Nyɛɛ kane 1 Korinto Bi 6:9-11, nɛ nyɛ susu sane bimi nɛ ɔ he:
Anɛ nyumu kɛ nyumu loo yo kɛ yo a bɔmi nami pɛ ji ní peepeehi nɛ Mawu buɔ mɛ kaa a ji níhi nɛ sɛ lo?
E he hia nɛ wɔ tsuo waa pee tsakemi bɔ nɛ pee nɛ waa sa Mawu hɛ mi. Anɛ se nami ngɛ jã nɛ wa maa pee ɔ he lo? Nyɛɛ kane La 19:8, 11, nɛ nyɛ susu sane bimihi nɛ nyɛɛ se nɛ ɔmɛ a he:
Ke o hyɛ ɔ, anɛ nile ngɛ mi kaa Yehowa wo mlaahi kɛ kɔ je mi bami he lo? Mɛni he je nɛ o de jã a?
Yehowa ye bua nihi babauu nɛ a kɛ e je mi bami he mlaa amɛ ngɛ ní tsue. E ma nyɛ maa ye bua mo hulɔ
NI KOMƐ DEƆ KE: “Ke nihi enyɔ suɔ a sibi ɔ, tɔmi be he kaa a ma ná bɔmi.”
Mɛni ji o juɛmi ngɛ he?
NYA MWƆMI
Bɔmi nami ji nike ní nɛ Yehowa kɛ dloo nihi nɛ a sɛ gba si himi mi ɔ konɛ e ha mɛ bua jɔmi.
Mi Nylɔmi
Mɛni ji ajuama bɔmi ní peepee komɛ?
Mɛni maa ye bua wɔ konɛ waa yu wa he ngɛ ajuama bɔmi ní peepeehi a he?
Ke waa kɛ Yehowa je mi bami he mlaa amɛ tsuɔ ní ɔ, kɛ wa ma ná he se ha kɛɛ?
NÍ KPAHI NƐ MAA YE BUA MO
Moo kase nɔ́ he je nɛ Mawu suɔ kaa nyumu kɛ yo nɛ́ a suɔ kaa a maa hi si ɔ nɛ a sɛ gba si himi mi ɔ he ní.
Moo hyɛ nɔ́ he je nɛ mlaa nɛ Baiblo ɔ wo kɛ kɔ nyumu kɛ nyumu loo yo kɛ yo a bɔmi nami he ɔ tsɔɔ we kaa e sa nɛ waa nyɛ jamɛatsɛ ɔmɛ.
“Anɛ Nyumu Kɛ Nyumu Loo Yo Kɛ Yo A Bɔmi Nami Ji Ní Peepee Nɛ Dɛ Lo?” (Munyu nɛ ɔ ngɛ Intanɛti ɔ nɔ)
Moo hyɛ bɔ nɛ Mawu mlaa nɛ kɔɔ bɔmi nami he ɔ poɔ wa he piɛ ha.
Ngɛ níhi a si kpami nɛ ji “A Je Bumi Kpo Kɛ Tsɔɔ Mi” ɔ mi ɔ, moo hyɛ nɔ́ nɛ ye bua nyumu ko nɛ́ be ko nɛ be ɔ, e kɛ nyumuhi náa bɔmi ɔ nɛ́ e pee tsakemi ngɛ e si himi mi konɛ e sa Mawu hɛ mi.
a Ajuama bɔmi ní peepeehi nɛ nihi nɛ a sɛ we gba si himi mi kɛ a he woɔ mi ɔ ekomɛ ji, bɔmi nami nɛ a kɛ a he woɔ mi, nyumu tso nɛ́ a kɛ woɔ nya mi, aloo yo hé nɛ a lɔɔ, nyumu tso nɛ a kɛ woɔ nɔ abɔɔmi yami he, kɛ a sibi a fɔmi níhi a he nɛ́ a fiɛɔ.
-
-
Mɛni Baiblo ɔ De Ngɛ Gba Si Himi, Kɛ Gba Si Himi Mi Nɛ Nɔ Ko Sɛ We ɔ He?O Ma Nyɛ Ma Ná Bua Jɔmi Kɛ Ya Neneene!—Moo Kase Baiblo ɔ Nɛ O Ná He Se
-
-
NÍ KASEMI 42
Mɛni Baiblo ɔ De Ngɛ Gba Si Himi, Kɛ Gba Si Himi Mi Nɛ Nɔ Ko Sɛ We ɔ He?
Ngɛ he komɛ ɔ, nihi fuu he ye kaa ja nɔ ko sɛ gba si himi mi loko e ma ná bua jɔmi. Se pi nihi tsuo nɛ a sɛ gba si himi mi nɛ a ngɛ bua jɔmi, nɛ pi nihi tsuo nɛ a sɛ we gba si himi mi nɛ a be bua jɔmi. Ngɛ anɔkuale mi ɔ, Baiblo ɔ tsɔɔ kaa gba si himi ji nike ní, nɛ ke nɔ ko sɛ we mi hu, e ji nike ní.
1. Mɛni se nɛ nihi nɛ a sɛ we gba si himi mi ɔ náa?
Baiblo ɔ de ke: ‘Nɔ fɛɛ nɔ nɛ e maa sɛ gba si himi mi ɔ ma ná he se, se nɔ fɛɛ nɔ nɛ e be gba si himi mi sɛe ɔ, e ma ná he se saminya.’ (Kane 1 Korinto Bi 7:32, 33, 38.) Ngɛ mɛni blɔ nɔ nɛ ke nɔ ko sɛ we gba si himi mi ɔ, “e ma ná he se saminya?” Kristofohi nɛ a sɛ we gba si himi mi ɔ be he piɛɛli nɛ́ e ma bi nɛ a tsu a hiami níhi a he ní ha mɛ. Enɛ ɔ haa nɛ a náa be fuu kɛ peeɔ ní kpahi. A ti ni komɛ nyɛɔ nɛ a tsuɔ babauu ngɛ Yehowa sɔmɔmi mi ngɛ blɔhi fuu a nɔ. Kaa nɔ hyɛmi nɔ́ ɔ, a hiaa blɔ kɛ yaa he kpahi nɛ a ya fiɛɛɔ sane kpakpa a. Nɔ́ nɛ pe kulaa a, a ma nyɛ ma ná be fuu kɛ pee níhi nɛ ma ha nɛ a hɛ kɛ su Yehowa he.
2. Mɛni se nami komɛ lɛ ngɛ gba si himi mi nɛ nɔ ko maa sɛ ngɛ blɔ nɛ da nɔ ɔ he?
Kaa bɔ nɛ ke nɔ ko sɛ we gba si himi mi nɛ e náa he se ngɛ blɔ komɛ a nɔ ɔ, jã kɛ̃ nɛ nihi nɛ a sɛ gba si himi mi ɔ hu náa he se ngɛ blɔ komɛ a nɔ. Baiblo ɔ de ke, ‘ni enyɔ hi pe nɔ kake.’ (Fiɛlɔ 4:9) Kristofohi nɛ a sɛ gba si himi mi nɛ́ a kɛ Baiblo sisi tomi mlaahi tsuɔ ní ɔ naa kaa nɔ́ nɛ ngmami ɔ de nɛ ɔ ji anɔkuale. Nihi nɛ a sɛ gba si himi mi ɔ wo si kaa a maa suɔ a sibi, a maa bu a sibi, nɛ a ma ná a sibi a he bua jɔmi be fɛɛ be. Enɛ ɔ haa nɛ a nuɔ he kaa a ngɛ slɔkee pe nihi nɛ a ngɛ kaa nɔ kɛ e yo se a sɛ we gba si himi mi ɔ. Jehanɛ hu ɔ, a bimɛ ɔmɛ maa nu he kaa a ngɛ slɔkee.
3. Kɛ Yehowa naa gba si himi ha kɛɛ?
Benɛ Yehowa to gba si himi kekle nɔ́ ɔ he blɔ nya a, e de ke: ‘Nyumu ma si e tsɛ kɛ e nyɛ, nɛ e maa ngɔ e he ya mɛtɛ e yo he nɛ a maa pee nɔ kake.’ (1 Mose 2:24) Yehowa suɔ kaa huno kɛ e yo nɛ a suɔ a sibi, nɛ a mɛtɛ a sibi a he be abɔ nɛ a ngɛ wami mi ɔ. E ngmɛ blɔ kaa nɔ́ pɛ nɛ a ma nyɛ maa da nɔ kɛ po gba mi ji, ke nɔ kake puɛ gba. Ngɛ si fɔfɔɛ nɛ ɔ mi ɔ, Yehowa ha nɔ nɛ a je e se ɔ he blɔ kaa e ma nyɛ maa mwɔ e yi mi kpɔ kaa e maa po gba a mi.a (Mateo 19:9) Yehowa ha we Kristofohi he blɔ kaa a hi he piɛɛli enyɔ loo nɔ́ nɛ hiɛ pe jã.—1 Timoteo 3:2.
MOO KASE BABAUU
Moo hyɛ níhi nɛ o ma nyɛ maa pee konɛ o ná bua jɔmi, kɛ níhi nɛ o maa pee konɛ o ha nɛ Yehowa bua nɛ jɔ ke o sɛ gba si himi mi aloo o sɛ we gba si himi mi.
4. Ke o sɛ we gba si himi mi ɔ, ngɔɔ nike ní nɛ ɔ kɛ tsu ní saminya
Yesu na gba si himi mi nɛ ni komɛ sɛ we ɔ kaa nike ní. (Mateo 19:11, 12) Nyɛɛ kane Mateo 4:23, nɛ nyɛ susu sane bimi nɛ ɔ he:
Kɛ Yesu ngɔ nike ní nɛ ji gba si himi mi nɛ e sɛ we ɔ kɛ sɔmɔ e Tsɛ ɔ, nɛ e kɛ ye bua ni kpahi ha kɛɛ?
Kristofohi nɛ a sɛ we gba si himi mi ɔ ma nyɛ ma ná bua jɔmi ke a ngɔ a be kɛ sɔmɔ Yehowa kaa bɔ nɛ Yesu pee ɔ. Mo je VIDEO ɔ, nɛ nyɛ susu sane bimi nɛ nyɛɛ se ɔ he.
Mɛni blɔhi a nɔ nɛ Kristofo no ko ma nyɛ maa ngɔ gba si himi mi nɛ e sɛ we ɔ kɛ sɔmɔ Yehowa konɛ e ná bua jɔmi?
Anɛ o le lo?
Baiblo ɔ tsɔɔ we jeha nɛ e sa kaa nɔ ko nɛ ye loko e sɛ gba si himi mi. Se mohu ɔ, e wo nihewi kɛ yihewi he wami kaa a mlɛ kɛ yaa si a maa “be nihewi [kɛ yihewi] a we akɔnɔ be ɔ nya.” Be nɛ ɔ ji be nɛ bɔmi nami he numi mi waa wawɛɛ, nɛ e ma nyɛ ma ha nɛ e he nɛ wa ha nɔ ko kaa e maa mwɔ yi mi kpɔhi nɛ da.—1 Korinto Bi 7:36.
5. O kɛ nile nɛ hla nɔ nɛ o kɛ maa sɛ gba si himi mi
Yi mi kpɔ nɛ o maa mwɔ ngɛ nɔ nɛ o kɛ maa sɛ gba si himi mi he ɔ ji yi mi kpɔ ko nɛ he hia wawɛɛ. Nyɛɛ kane Mateo 19:4-6, 9, nɛ nyɛ susu sane bimi nɛ ɔ he:
Mɛni he je nɛ e sɛ nɛ Kristofo no ko kɛ oya yemi nɛ sɛ gba si himi mi ɔ?
Baiblo ɔ ma nyɛ maa ye bua mo konɛ o le níhi nɛ sa kaa o hla ngɛ nɔ ko nɛ o kɛ lɛ maa sɛ gba si himi mi ɔ he. Nɔ́ nɛ he hia pe kulaa a, mo hla nɔ ko nɛ e suɔ Yehowa.b Nyɛɛ kane 1 Korinto Bi 7:39 kɛ 2 Korinto Bi 6:14. Lɔ ɔ se ɔ, nyɛ susu sane bimihi nɛ nyɛɛ se nɛ ɔmɛ a he:
Mɛni he je nɛ e sa nɛ waa kɛ wa nyɛmimɛ Kristofohi pɛ nɛ sɛ gba si himi mi ɔ?
Kɛ o susu kaa Yehowa maa nu he ha kɛɛ, ke o kɛ nɔ ko nɛ sɔmɔ we Yehowa sɛ gba si himi mi?
Ke a bla lohwehi enyɔ nɛ a sɔɛ kɛ wo kuɛpã tso kake he ɔ, mɛ tsuo a maa na nɔ́. Jã nɔuu nɛ ke Kristofo no ko kɛ nɔ ko nɛ e sɔmɔ we Yehowa a sɛ gba si himi mi ɔ, a ma ná nyagbahi fuu
6. Moo na gba si himi kaa bɔ nɛ Yehowa naa lɛ ɔ
Ngɛ blema Israel ɔ, nyumu komɛ kɛ a yihi po gba mi ngɛ juɛmi nɛ dɛ nɛ nyumu ɔmɛ hɛɛ ɔ he je. Nyɛɛ kane Malaki 2:13, 14, 16, nɛ nyɛ susu sane bimi nɛ ɔ he:
Mɛni he je nɛ ke nɔ ko kɛ e he piɛɛlɔ po gba mi be mi nɛ pi nɛ nɔ kake puɛ gba a, Yehowa sume ɔ?
Gba puɛmi, kɛ gba mi pomi ngɔɔ haomihi kɛ baa he piɛɛlɔ nɛ a tɔ̃ e nɔ ɔ kɛ bimɛ ɔmɛ a nɔ
Mo je VIDEO ɔ, nɛ nyɛ susu sane bimi nɛ nyɛɛ se ɔ he.
Ke o he piɛɛlɔ ɔ sɔmɔ we Yehowa a, mɛni o ma nyɛ maa pee konɛ bua jɔmi nɛ hi nyɛ gba si himi ɔ mi?
7. Moo ngɔ gba si himi he mlaahi nɛ Yehowa wo ɔ kɛ tsu ní.
Yehowa mlaahi nɛ kɔɔ gba si himi he nɛ nɔ ko kɛ ma tsu ní ɔ biɔ mɔde bɔmi wawɛɛ.c Se Yehowa jɔɔ nihi nɛ a kɛ mlaa nɛ ɔmɛ tsuɔ ní ɔ. Mo je VIDEO ɔ.
Nyɛɛ kane Hebri Bi 13:4, nɛ nyɛ susu sane bimihi nɛ nyɛɛ se nɛ ɔmɛ a he:
Anɛ o susu kaa wa ma nyɛ maa ye Yehowa mlaahi nɛ kɔɔ gba si himi he ɔ nɔ lo? Mɛni he je nɛ o de jã a?
Yehowa hyɛɛ blɔ kaa Kristofohi nɛ a sɛ gba si himi mi ɔ nɛ́ a ngɔ a gba a kɛ wo mlaa sisi, nɛ ke a maa po gba a mi hu ɔ, a pee jã ngɛ mlaa nya kaa bɔ nɛ ngɛ mahi fuu a mi ɔ, amlaalo ɔmɛ hyɛɛ blɔ kaa nihi nɛ a pee ɔ. Nyɛɛ kane Tito 3:1, nɛ nyɛ susu sane bimi nɛ ɔ he:
Ke o sɛ gba si himi mi ɔ, anɛ nyɛɛ kɛ nyɛ gba a wo mlaa sisi lo?
NƆ KO MA BI KE: “Anɛ nyumu kɛ yo be nyɛe maa hi si be mi nɛ a sɛ we gba si himi mi lo?”
Kɛ o ma ha heto kɛɛ?
NYA MWƆMI
Gba si himi ji nike ní nɛ je Yehowa ngɔ. Ke nɔ ko sɛ we mi hu, e ji nike ní nɛ je Yehowa ngɔ. Nihi nɛ a sɛ gba si himi mi kɛ nihi nɛ a sɛ we gba si himi mi ɔ tsuo ma nya ma ná bua jɔmi ke a pee Yehowa suɔmi nya ní ngɛ a si himi mi.
Mi Nylɔmi
Ngɛ mɛni blɔ nɔ nɛ nɔ ko nɛ e sɛ we gba si himi mi ɔ kɛ e be ma nyɛ ma sɔmɔ Yehowa saminya?
Mɛni he je nɛ Baiblo ɔ de ke waa kɛ wa nyɛmimɛ Kristofohi pɛ nɛ sɛ gba si himi mi ɔ?
Mɛni nɔ pɛ nɛ Ngmami ɔ tsɔɔ kaa nɔ ko ma nyɛ maa da kɛ po gba mi?
NÍ KPAHI NƐ MAA YE BUA MO
Ke a ke waa sɛ gba si himi mi “ngɛ Nyɔmtsɛ ɔ mi pɛ” ɔ, mɛni e tsɔɔ?
“Sane Bimihi Nɛ Je Ní Kaneli A Ngɔ” (Hwɔɔmi Mɔ, July 1, 2004)
Moo hyɛ videohi enyɔ nɛ maa ye bua mo nɛ o mwɔ yi mi kpɔ nɛ da kɛ kɔ nyɛɛmi nɛ a kɛ sɛɛ gba si himi mi, kɛ gba si himi he.
Moo hyɛ nɔ́ he je nɛ nyɛminyumu ko nuɔ he kaa níhi nɛ Yehowa ha lɛ ɔ he jua wa kulaa pe níhi nɛ e ngmɛɛ a he ɔ.
Mɛni níhi nɛ e sa kaa nɔ ko nɛ susu a he loko e mwɔ e yi mi kpɔ kaa e maa po gba mi loo e maa je gba?
“Mo Ná Bumi Kɛ Ha ‘Nɔ́ Nɛ Mawu Ngɔ Kɛ Tsa’ a” (Hwɔɔmi Mɔ, December 2018)
a Hyɛ Nyagbe Ningma 4 nɛ kɔɔ gba jemi he be mi nɛ huno ɔ kɛ e yo ɔ a ti nɔ ko puɛ we gba.
b Ngɛ wɛtso komɛ a mi ɔ, fɔli nɛ a hlaa gba si himi he piɛɛli kɛ haa a bimɛ. Ke e ba jã a, nɔ́ nɛ fɔli nɛ a ngɛ suɔmi ɔ hyɛɛ kekleekle ji kaa nɔ ɔ suɔ Yehowa lo, se pi sika nɛ nɔ ɔ ngɛ loo blɔ nya nɛ e ngɛ.
c Ke o kɛ nɔ ko ngɛ kaa o yo be mi nɛ o tsu we e he ní, aloo o kɛ nɔ ko ngɛ kaa o huno be mi nɛ e tsu we o he ní ɔ, mo nitsɛ nɛ o maa mwɔ o yi mi kpɔ kaa o maa ngmɛɛ nɔ ɔ he aloo o maa je, loo kaa nyɛ maa sɛ gba si himi mi.
-