• Kɛ O Ma Ná Yehowa Odasefohi A Kpehi Nɛ O Maa Ya a He Se Ha Kɛɛ?
    O Ma Nyɛ Ma Ná Bua Jɔmi Kɛ Ya Neneene!—Moo Kase Baiblo ɔ Nɛ O Ná He Se
    • Ní Kasemi 10. Odasefo no ko nɛ e ngɛ nyumu ko nɛ e ba asafo mi kpe ɔ ngmami ko tsɔɔe ngɛ Baiblo ɔ mi, nɛ nyumu ɔ ngɛ hyɛe.

      NÍ KASEMI 10

      Kɛ O Ma Ná Yehowa Odasefohi A Kpehi Nɛ O Maa Ya a He Se Ha Kɛɛ?

      Anɛ a fɔ mo nine kɛ ya Yehowa Odasefohi a kpehi a sisi hyɛ lo? Ke o yɛ eko hyɛ ɔ, lɛɛ eko ɔ, o maa ye gbeye kaa o maa ya lejɛ ɔ. Eko ɔ, o ma bi o he ke, ‘Mɛni lɛ yaa nɔ ngɛ kpe nɛ ɔmɛ a sisi? Mɛni he je nɛ kpe nɛ ɔmɛ a he hia a? Mɛni he je nɛ e sa kaa ma ya kpe nɛ ɔmɛ ɔ?’ Ngɛ ní kasemi nɛ ɔ mi ɔ, o maa na kaa asafo mi kpehi nɛ o maa ya a ma ha nɛ o maa hɛ mo kɛ su Mawu he, nɛ e maa ye bua mo hulɔ.

      1. Mɛni ji yi mi tomi titli he je nɛ Yehowa Odasefohi buaa a he nya?

      Moo hyɛ nɔ́ nɛ Baiblo ngmalɔ ko de ngɛ yi mi tomi titli he je nɛ wa buaa wa he nya a he. E de ke: ‘Ma je Yehowa yi ngɛ ma a loo asafo ngua a tsuo hɛ mi.’ (La 26:12) Jã kɛ̃ nɛ Yehowa Odasefohi hu a bua jɔɔ ke a bua a he nya. Ngɛ je ɔ mi tsuo ɔ, a kpeɔ daa otsi konɛ a ja Mawu. A laa kɛ jeɔ Mawu yi, nɛ a sɔleɔ hulɔ. Daa jeha a, a buaa a he nya be komɛ ngɛ kpe nguahi a sisi kɛ jaa Mawu.

      2. Ke o ya wa kpe ɔmɛ a sisi ɔ, mɛni o ma ya kase ngɛ lejɛ ɔ?

      Mawu Munyu ɔ ji nɔ́ titli nɛ wa kaseɔ ngɛ wa kpe ɔmɛ a sisi. A tsɔɔ Mawu Munyu ɔ “sisi fitsofitso.” (Kane Nehemia 8:8.) Ke o ya wa kpe ɔmɛ ɔ, o maa kase Yehowa, kɛ e su kpakpa amɛ a he ní. Ke o ya nɔ nɛ o kase Yehowa kɛ e su kpakpa amɛ a he ní ɔ, lɔ ɔ ma ha nɛ o maa hɛ kɛ su e he, nɛ o maa na bɔ nɛ e maa ye bua mo ha konɛ o bua nɛ jɔ ngɛ si himi mi.​—Yesaya 48:17, 18.

      3. Kɛ ni kpahi nɛ o kɛ maa bɔ ngɛ wa kpe ɔmɛ a sisi ɔ maa ye bua mo ha kɛɛ?

      Yehowa fã wɔ ke “wa susu wa sibi a he konɛ wa ha nɛ wa sibi a nɔ gbagba nɛ e te kɛ ha suɔmi kɛ ní tsumi kpakpahi, nɛ́ wa ko kua wa he nya nɛ wa hii buae ɔ.” (Hebri Bi 10:24, 25) Ke o ba wa kpe ɔmɛ a sisi ɔ, o maa na nihi nɛ a susuɔ a sibi a he, nɛ a bua jɔ he kaa a maa kase Mawu he ní kaa bɔ nɛ mo hu o bua jɔ he kaa o maa pee ɔ. Jehanɛ se hu ɔ, a daa Baiblo ɔ nɔ kɛ tuɔ munyuhi nɛ woɔ nɔ he wami. (Kane Roma Bi 1:11, 12.) O ma ná he blɔ nɛ o kɛ nihi slɔɔtohi maa sɛɛ nyagbahi nɛ a kɛ ngɛ kpee, kɛ bɔ nɛ a plɛ kɛ ngɛ nya dae ha a he ní. Enɛ ɔmɛ ji yi mi tomi komɛ a he je nɛ Yehowa suɔ kaa wa bua wa he nya be fɛɛ be ɔ nɛ!

      MOO KASE BABAUU

      Moo kase níhi nɛ yaa nɔ ngɛ Yehowa Odasefohi a kpehi a sisi ɔ he ní babauu, kɛ nɔ́ he je nɛ e he hia kaa waa ya kpe nɛ ɔmɛ.

      4. Yehowa Odasefohi a kpehi

      Kristofohi nɛ a hi si ngɛ kaseli ɔmɛ a be ɔ mi ɔ kpeɔ nɛ a sɔmɔɔ Yehowa. (Roma Bi 16:3-5) Nyɛɛ kane Kolose Bi 3:16, nɛ nyɛ susu sane bimi nɛ ɔ he:

      • Kɛ Kristofohi nɛ a hi si ngɛ kaseli ɔmɛ a be ɔ mi ɔ ja Yehowa ha kɛɛ?

      Mwɔnɛ ɔ hu ɔ, Yehowa Odasefohi kpeɔ be fɛɛ be ngɛ Matsɛ Yemi Asahi a nɔ. Ke o suɔ nɛ o le bɔ nɛ a peeɔ a kpe ɔmɛ ha a, mo je VIDEO ɔ. Lɔ ɔ se ɔ, nyɛɛ hyɛ asafo mi kpe he foni ɔ, nɛ nyɛ susu sane bimihi nɛ nyɛɛ se nɛ ɔmɛ a he.

      VIDEO: Mɛni A Peeɔ Ngɛ Matsɛ Yemi Asahi A Nɔ? (2:12)

      • Mɛni nɛ o na ngɛ video ɔ mi nɛ yaa nɔ ngɛ Matsɛ Yemi Asahi a nɔ nɛ e kɛ nɔ́ nɛ wa kane ngɛ Kolose Bi 3:16 kɔ?

      • Mɛni ji nɔ́ kpa ko nɛ o to he hɛ ngɛ video ɔ loo foni ɔ mi kɛ kɔ asafo mi kpe ɔ he nɛ o bua jɔ he?

      Nyɛɛ kane 2 Korinto Bi 9:7, nɛ nyɛ susu sane bimi nɛ ɔ he:

      • Mɛni he je nɛ a he we sika ngɛ Yehowa Odasefohi a kpehi a sisi ɔ?

      Nɔ nɛ e kɛ mo kaseɔ Baiblo ɔ kɛ mo ma susu níhi nɛ a maa kase ngɛ asafo mi kpe nɛ a maa pee ngɛ otsi nɛ ɔ mi ɔ eko he.

      • Kpe ɔ fã amɛ a kpɛti te nɛɛ lɛ o bua jɔ he wawɛɛ?

      Anɛ o le lo?

      O maa na be kɛ hehi nɛ a peeɔ wa kpe ɔmɛ ngɛ ɔ ngɛ jw.org ɔ nɔ.

      Foni ɔmɛ: Níhi nɛ ngɛ nɔ yae ngɛ Matsɛ Yemi Asa ko nɔ, loko a maa je kpe ɔ sisi, benɛ kpe ɔ ngɛ nɔ yae, kɛ benɛ a kpa kpe ɔ. A tsɔɔ níhi nɛ ngɛ nɔ yae ɔ ngɛ foni nɛ ji A kɛ ya si E ɔ mi. A. Odasefo no ko nɛ e ngɛ magbɛ nɔ munyu tue ngɛ munyu tumi kpoku ɔ nɔ. B. Odasefo no ko nɛ e ngɛ munyu heto hae benɛ a bi sane ko ngɛ ní kasemi ɔ mi ɔ. D. Odasefo no ko nɛ e kɛ weku ko ngɛ ní sɛɛe benɛ a kpa asafo mi kpe. E. Odasefo no ko nɛ e bli sinya kɛ ha nɔkɔtɔma ko nɛ e ma asafo mi kpe.

      1. A. A tuɔ munyuhi, a peeɔ peemi kɛ tsɔɔ, nɛ a jeɔ videohi ngɛ wa kpe ɔmɛ a sisi. A laa nɛ a sɔleɔ kɛ jeɔ kpe ɔmɛ a sisi, nɛ a laa nɛ a sɔleɔ kɛ kpaa

      2. B. Ngɛ ní kasemi ɔ fã komɛ a mi ɔ, a biɔ sanehi nɛ tue buli ɔmɛ haa heto

      3. D. Nɔ fɛɛ nɔ ma nyɛ maa ya eko​—wekuhi, ni kakaakahi, nikɔtɔmahi, kɛ jokuɛwi tsuo

      4. E. Yehowa Odasefohi he we sika ngɛ a kpe ɔmɛ a sisi, nɛ a kɛ sika tsumi nɔ́ bi ngɛ nɔ ko hɛ mi

      5. E biɔ mɔde bɔmi loko o ma nyɛ maa ya wa kpe ɔmɛ a sisi

      Mo susu nɔ hyɛmi nɔ́ nɛ Yesu weku ɔ pee ɔ he nɛ o hyɛ. E biɔ nɛ a nyɛɛ ligbi etɛ kɛ je Nazaret kɛ be ngɛ yokuhi a nɔ kɛ ya ye gbijlɔ nɛ a yeɔ daa jeha ngɛ Yerusalem ɔ. Nyɛɛ kane Luka 2:39-42, nɛ nyɛ susu sane bimihi nɛ nyɛɛ se nɛ ɔmɛ a he:

      • Anɛ o susuu we kaa e biɔ mɔde bɔmi loko a ma nyɛ maa hia blɔ nɛ ɔ lo?

      • Mɛni he je nɛ e he hia nɛ o bɔ mɔde wawɛɛ loko o ma nyɛ maa ya asafo mi kpehi nɛ wa peeɔ ɔ?

      • Anɛ se nami ngɛ he kaa o maa ya asafo mi kpehi ke jã peemi he wa ha mo po lo? Mɛni he je?

      Foni ɔmɛ: Yosef, Maria, Yesu, kɛ Yesu nyɛmimɛ ɔmɛ a kpɛti nɔ kake nɛ a ngɛ a he dlae konɛ a hia blɔ. 1. Yosef ngɔ tlomihi kɛ fɔ teji ɔ nɔ, nɛ Maria ngɛ niye ní nɛ a maa hia a dlae. 2. Zugba he foni nɛ tsɔɔ blɔ hiami kɛ je Nazaret kɛ ya su Yerusalem.

      Baiblo ɔ tsɔɔ kaa e he hia nɛ wa bua wa he nya kɛ ja Yehowa. Nyɛɛ kane Hebri Bi 10:24, 25, nɛ nyɛ susu sane bimi nɛ ɔ he:

      • Mɛni he je nɛ e he hia nɛ waa ya asafo mi kpehi be fɛɛ be ɔ?

      NI KOMƐ DEƆ KE: “E he hia we kaa o maa ya piɛɛ ni kpahi a he kɛ ja Mawu. Ke o kaseɔ Baiblo ɔ ngɛ o we mi ɔ, lɔ ɔ pɛ hiɛ.”

      • Mɛni ngmami loo Baiblo mi nɔ hyɛmi nɔ́ nɛ tsɔɔ wɔ nɔ́ nɛ Yehowa suɔ?

      NYA MWƆMI

      Asafo mi kpehi nɛ o maa ya a maa ye bua mo konɛ o kase Yehowa he ní babauu. E ma ha nɛ huɛ bɔmi nɛ ngɛ o kɛ lɛ nyɛ kpɛti ɔ mi maa wa, nɛ o ma ná he blɔ nɛ o kɛ ni kpahi ma bla kɛ sɔmɔ Yehowa.

      Mi Nylɔmi

      • Mɛni he je nɛ Yehowa woɔ wɔ he wami kaa wa bua wa he nya kɛ sɔmɔ lɛ ɔ?

      • Mɛni o ma nyɛ maa kase ngɛ Yehowa Odasefohi a kpehi a sisi?

      • Mɛni ji se nami kpa komɛ nɛ ngɛ kpe ɔmɛ nɛ o maa ya a he?

      Nɔ́ Nɛ O Ma Tsu He Ní

      NÍ KPAHI NƐ MAA YE BUA MO

      Anɛ o yeɔ gbeye loo e peeɔ mo zo kaa o maa ya asafo mi kpe ɔmɛ eko lo? Moo hyɛ bɔ nɛ nyumu ko nɛ e ba jã ngɛ e blɔ fa mi ɔ bua ba jɔ kpe ɔmɛ a he ha.

      Wa Hɛ Be Bɔ Nɛ A Nya Wa He Ha a Nɔ Jee Gblegbleegble (4:16)

      Moo hyɛ bɔ nɛ niheyo ko bua jɔ asafo mi kpe ɔmɛ a he ha, kɛ nɔ́ nɛ e pee konɛ e nyɛ nɛ e ya daa.

      Ye Bua Jɔ Asafo Mi Kpe Ɔmɛ A He Wawɛɛ Nitsɛ! (4:33)

      Moo hyɛ nɔ́ nɛ ni komɛ de ngɛ asafo mi kpe nɛ a ya a he.

      “Mɛni He Je Nɛ E Sa Nɛ Waa Ya Kpehi Nɛ A Peeɔ Ngɛ Matsɛ Yemi Asa a Nɔ ɔ?” (Munyu nɛ ɔ ngɛ Intanɛti ɔ nɔ)

      Moo hyɛ bɔ nɛ ojo fialɔ ko si himi tsake ha benɛ e ya Yehowa Odasefohi a kpe ɔmɛ eko sisi ɔ.

      “He Tsuaa He Nɛ Ma Ya a, Tu Ngɛ Ye He” (Hwɔɔmi Mɔ, October 1, 2014)

  • Mawu Matsɛ Yemi ɔ Ngɛ Nɔ Yee Amlɔ Nɛ ɔ!
    O Ma Nyɛ Ma Ná Bua Jɔmi Kɛ Ya Neneene!—Moo Kase Baiblo ɔ Nɛ O Ná He Se

    • 5. Níhi tsake kulaa ngɛ je ɔ mi kɛ je jeha 1914 ɔ

      Mo je VIDEO ɔ.

      VIDEO: Níhi Tsake Kulaa Ngɛ Je ɔ Mi Kɛ Je Jeha 1914 ɔ (1:10)

      Yesu tsɔɔ níhi nɛ maa ya nɔ ngɛ je ɔ mi ke e ba pee Matsɛ ɔ. Nyɛɛ kane Luka 21:9-11 ɔ, nɛ nyɛ susu sane bimi nɛ ɔ he:

      • Ní nɛ ɔmɛ a kpɛti te nɛɛ lɛ o nuɔ aloo o naa nɛ́ a ngɛ nɔ yae?

      Bɔfo Paulo tsɔɔ bɔ nɛ nihi maa pee a ní ha ngɛ adesahi a nɔ yemi nyagbe be ɔmɛ a mi. Nyɛɛ kane 2 Timoteo 3:1-5 ɔ, nɛ nyɛ susu sane bimi nɛ ɔ he:

      • Anɛ o na kaa nihi ngɛ su nɛ ɔmɛ kpo jee mwɔnɛ ɔ lo?

      Foni Ɔmɛ: Níhi nɛ a ngɛ nɔ yae ngɛ nyagbe ligbi ɔmɛ a mi. 1. Ta bulɔ nɔkɔtɔma ko nɛ e wo e nine nɔ nɛ e ngɛ ngmlaa kpae. 2. Tsuhi nɛ a hule pue si benɛ zugba ko mimiɛɛ ɔ. 3. Ta buli a kɔɔhiɔ mi lɛhi. 4. Nihi nɛ a bu mask nɛ a ngɛ nyɛɛe. 5. Mɔ nguahi enyɔ nɛ a ngɛ New York nɛ la ngɛ sãe ngɛ basabasa peemi ko nɛ ya nɔ ɔ mi. 6. Nyumu ko nɛ e kɛ tsopa ngɛ ní tsue. 7. Nyumu ko nɛ e ngɛ e yo kongoe nɛ e ngɛ ngmlaa kpae kɛ ngɛ yi woe . 8. Tsopahi kɛ dã slɔɔtohi. 9. Yihi enyɔ nɛ a wo tadehi nɛ a ba nɔ ɔ nɛ a ngɛ foto poe. 10. Nɔ ko nɛ e ngɛ doe ngɛ hɛja jemi he ko nɛ nihi babauu ngɛ lɛ hyɛe nɛ mɛ hu a ngɛ doe. 11. Nɔ ko nɛ e peeɔ basabasa nɛ e yaa fɔ̃ nɔ́ ko.

      6. E sa kaa Mawu Matsɛ Yemi ɔ nɛ ngɛ nɔ yee ɔ nɛ wo wɔ he wami nɛ waa pee ní komɛ

      Nyɛɛ kane Mateo 24:3, 14 ɔ, nɛ nyɛ susu sane bimihi nɛ nyɛɛ se nɛ ɔmɛ a he:

      • Mɛni ní tsumi nɛ́ he hia lɛ ngɛ nɔ yae nɛ́ tsɔɔ kaa Mawu Matsɛ Yemi ɔ ngɛ nɔ yee?

      • Mɛni o maa pee konɛ mo hu o tsu ní tsumi nɛ ɔ eko?

      Amlɔ nɛ ɔ, Mawu Matsɛ Yemi ɔ ngɛ nɔ yee, nɛ e be kɛe nɛ e ma bɔni zugba a tsuo nɔ yemi. Nyɛɛ kane Hebri Bi 10:24, 25 ɔ, nɛ nyɛ susu sane bimi nɛ ɔ he:

      • Mɛni nɛ e sa kaa wa kpɛti nɔ fɛɛ nɔ nɛ e pee be mi nɛ wa na kaa “ligbi ɔ ngɛ sue ɔ”?

      Foni Ɔmɛ: 1. Nɔ ko nɛ a kɛ lɛ kaseɔ Baiblo ɔ nɛ e yaa Yehowa Odasefohi a we asafo mi kpe. 2. Baiblo mi ní kaselɔ ɔ nɔuu nɛ e ngɛ fiɛɛe ha nɔ ko nɛ e le lɛ.

      Ke o kase nɔ́ ko nɛ o le kaa e ma nyɛ maa ye bua nihi, nɛ e ma he a yi wami ɔ, mɛni o maa pee?