Eko ɔ, nibwɔ nɛ ɔmɛ ji ma se sane kpakpa fiɛɛli, aloo Yohane nane mi dali, aloo kpɔ mi nɔ hyɛli. A ji ma se kpakpa fiɛɛli jio, Yohane nane mi dali jio, kpɔ mi nɔ hyɛli jio, a hia blɔ ɔ ngɛ sane kpakpa a he je. Yohane de ke: “Blɔ nɛ a hia nɛ ɔ, Kristo ní tsumi a ngɛ tsue.” (3 Yoh. 7) Munyu nɛ ji “Kristo ní tsumi a ngɛ tsue” nɛ Yohane kɛ tsu ní ɔ tsɔɔ kaa nyɛmimɛ nɛ ɔmɛ piɛɛ Kristofohi asafo ɔ he, nɛ e sa nɛ a he mɛ atuu. Enɛ ɔ he ɔ Yohane ngma ke: “Wɔ nɛ wa le Kristo ɔ, e hia kaa waa ye kɛ bua nimli nɛ ɔmɛ, nɛ waa piɛ a he kɛ tsu anɔkuale ɔ he ní tsumi ɔ.”​—3 Yoh. 8.

Kekleekle ɔ, ngɛ blɔ ko nɔ ɔ, wa ma nyɛ ma de ke anɔkualetsɛmɛ nɛ a ngɔ a he kɛ sã afɔle nɛ a hia blɔ kɛ ba je wa ma a mi ɔ lɛ ha nɛ wa ba le anɔkuale ɔ nɛ. Ngɛ anɔkuale mi ɔ, tsa pi nihi tsuo nɛ a ngɛ Kristofohi asafo ɔ mi mwɔnɛ ɔ nɛ a hiaa blɔ gagaagahi ngɛ sane kpakpa a he je. Se kaa bɔ nɛ Gayo pee ɔ, wɔ hu wa ma nyɛ maa ye bua kpɔ mi nɔ hyɛli kɛ a yihi, kɛ ni kpahi nɛ a hia blɔ ɔ, nɛ waa wo mɛ he wami. Aloo wa ma nyɛ maa pee nɔ́ ko kɛ ye bua nyɛmimɛ nyumuhi kɛ yihi nɛ a hiaa blɔ kɛ yaa he kpahi ngɛ a ma a mi, aloo ma se po konɛ a ya ye bua ngɛ he nɛ Matsɛ Yemi fiɛɛli fuu a he hia ngɛ ɔ. Enɛ ɔ he ɔ, nyɛ ha nɛ waa “bɔ nibwɔ peemi he mɔde.”​—Rom. 12:13; 1 Tim. 5:9, 10.