2. Mɛni Baiblo ɔ de ngɛ Yehowa he?

Baiblo ɔ tsɔɔ kaa ngɛ mawu slɔɔtohi nɛ nihi jaa a tsuo a kpɛti ɔ, Yehowa pɛ ji anɔkuale Mawu. Mɛni he je? Ngɛ yi mi tomihi fuu a he je. Yehowa ji nɔ nɛ e nɔ kuɔ pe kulaa, nɛ lɛ pɛ ji nɔ nɛ e “ngɛ he wami pe nɔ tsuaa nɔ ngɛ je ɔ mi tsuo.” (Kane La 83:18.) Lɛ ji “Ope,” nɛ tsɔɔ kaa e ngɛ he wami nɛ́ e kɛ maa pee nɔ́ fɛɛ nɔ́ nɛ e suɔ kaa e maa pee. Lɛ nɛ “e bɔ níhi tsuo.” Lɛ nɛ e bɔ je ɔ kɛ nɔ́ fɛɛ nɔ́ nɛ wami ngɛ mi ngɛ zugba a nɔ. (Kpo Jemi 4:8, 11) Níhi tsuo nɛ ngɛ je ɔ mi ɔ, Yehowa lɛ bɔ, se Yehowa lɛɛ pi nɔ ko nɛ bɔ lɛ. Yehowa ngɛ kɛ je neneene, nɛ e maa hi si kɛ maa ya neneene.​—La 90:2.

Akɛnɛ Yehowa ji nɔ nɛ bɔ wɔ he je ɔ, e sa nɛ wa ja lɛ pɛ. (Kpo Jemi 4:11) Enɛ ɔ tsɔɔ kaa e sa nɛ waa suɔ lɛ, nɛ wa sɔmɔ lɛ pɛ. Jehanɛ se hu ɔ, e sɛ nɛ waa ngɔ amaga, aloo foni, aloo nɔ́ kpa ko kɛ tsu ní ngɛ Mawu jami mi.​—Kane Yesaya 42:8.

E sa nɛ wa jami ɔ nɛ pee nɔ́ nɛ e “ngɛ klɔuklɔu nɛ e saa” Yehowa hɛ mi. (Roma Bi 12:1) Enɛ ɔ tsɔɔ kaa e sa nɛ waa ngɔ je mi bami he mlaahi nɛ Mawu wo ɔmɛ kɛ tsu ní ngɛ wa si himi mi. Kaa nɔ hyɛmi nɔ́ ɔ, nihi nɛ a suɔ Yehowa a, a bua jɔɔ mlaahi kɛ blɔ tsɔɔmihi nɛ e kɛ ha ngɛ gba si himi he ɔ he, nɛ a kɛ tsuɔ ní. Jehanɛ se hu ɔ, a kuaa ní peepeehi nɛ maa ye mɛ awi, kaa taba numi, tsopa nɛ a kɛ tsuɔ ní ngɛ blɔ nɛ dɛ nɔ, kɛ dã demi loo dã fuu numi.a